Zwöi Schpiu, sächs Punkt
Mi cha sauft bhoupte, dr FCB het dä Töifschlag "Abschtieg" beschtens verchraftet und sich ufgrafft, um y dr vierte Liga e gueti Faue z'mache. Mitsdrinn dr Slobodan Pranjic. E ruhige und besonnene Maa, mit em ne ganz guete Droht zu syne Jungs. Engagiert, energisch, ziuorientiert! Mit syre positive Dänkwiis überchunnt me ds Gfüu, dä Maa cha Bärge versetze.
Im erschte Schpiu gäge FC Nidau uf em Lache het me vo Aafang a nüt lo aabrönne. Bereits ir 16. Minute het dr Dario Leisi, übrigens für mi dr Maa vom Schpiu, überleit und üsserscht cool zur Füehrig igschobe. E aagschossni Hand im Sächzähner vo Büre, das cha immer passiere, het zum ne Penauti gfüehrt und Nidau wieder lo hoffe. Dr Ruben het aber dere Hoffnig mit em ne Kunschtschuss schnäu es Ändi bereitet. I dr Nachschpiuzyt het dr Denis Schneider, äbefaus mit em ne sehenwärte Gou, dr Dechu zuegmacht.
Guet gschpiut, no besser kämpft und beschtens igschteut uf das Schpiu aaträte. So muess es sy. Einzige Wermuetstropfe, my lot viu z'viu Chance ungnutzt usse. Dä Wermuetstropfe isch aber eher es Tröpfli, we me de Schpiu glych no gwinnt. Das isch de y dr Vergangeheit nid gäng so gsy.
Im zwöite Schpiu het bereits e erklärte Ufschtiegskanditat uf d'Bürer gwartet. Radelfingen, do isch doch öppis, ah klar, dr Lars Stuber (vorhär johrzähntelang by Safnern Schpieler und Trainer und ds Büre beschtens bekannt) het ds Eis überno, um dä lang ersehnt Ufschtieg z'schaffe. Auso e erschte Härtetest für üsi Manne. Es isch nid aues Guud, was glänzt! Oder besser usdrückt: Zersch lifere statt lafere. E sone unwiderstehliche Ydruck het das Team nid hingerlo, auso Radufinge. Uf däm schwär beschpiubare Bitz, me hocket extrem äng ufenang obe, het dr FCB die glychi Körperschprach wie gäge Nidau uspackt und zeigt, wo Bartli dr Moscht hout. Es isch nie ds Gfüu ufcho, die Radufinge chönnte öppis rysse, z'rar sy die guete Aktione gsy. Üser Manne hingäge sy forsch a d'Sach und hei dominant ufgschpiut. Die 20. Minute het du ändlech d'Erlösig y Form vom Nick Eggenberger brocht. Es höch verdients Verdikt.
Nach däm Gou isch Büre aagrennt und aagrennt, aber das zwöite Gou het eifach nid wöue faue. Drfür het sich dr Schiri y Szene gsetzt. Ei gäubi Charte do, ei gäubi Charte dört und wüu dä no reklamiert het, däm ou no grad eini. Vier Charte für Büre, wo me ohni Wyteres hät chönne druf verzichte. Und Gou? Fehlanzeige! Chance um Chance het me verblöterlet.
Heit d'Hüet Manne und Froue, jitz bringt dr Slobodan dr Murad Gande, oder wie d'Schpieler ihm säge dr Cem. Är isch e syrische Asylant, wo scho sit längerem bim Charlie Maffeo trainiert und bis jitz nume im Zwöi zum Ysatz cho isch. Schpiufröidig und schprützig. E umkehrte Händsche gägenüber syne Ysätz im Zwöi. Ds zwöite Gou macht är säuber und 3:0 leit är am Fabian Schuler muschtergüutig uf's Scheichli. E Yschtand nach Mass. Zwüschedüre het dr Schiri nomou y z'Poschettli glängt, und Büre no die füfti Charte zeigt, die Bire!
Gande Murad
E völlig verdiente Sieg für e FCB u dr Ufschtiegsaschpirant Nummer eis muess vorlöufig chlyneri Brötli bache.
Übrigens het Büre y däm Schpiu, gägenüber em Match gäge Nidau, uf e Manuel Bigler, Diego Imperiali, Dario Leisi, und Men Meier müesse verzichte. Ygschprunge isch dr Patrick von Felten, üses Multitalänt Mario Bärtschi (Junior B), dr Fabian Hänzi (e überzügendi Leischtig) und dr Murad Gande.
Im Momänt nid im Ysatz wäge Chrankheit oder Verletzig: Roméo Bezzola, Mikael Stauffer, Marco Günther, Marco Kocher, Luca Lauper, Luc Gutbub, Yannic Kubacki.
Dr Uftakt isch glückt, auso ran an den Speck. Am Samschtig geit d'Reis nach Täuffelen, Aapfiff isch am viurtuvorvieri. Mir drücke d'Düme oder göh besser grad uf Töiffele go mitfiebere und hopp Büre bääge.
Hopp FCB