FC Grünstern - FCB 0:5 (0:2)

Samstag, 10. Oktober 2026, 14:30 Uhr, Gemeindesportplatz Ipsach

Meisterschaft 4. Liga

Text: Hans Peter "Budi" Gribi

Aufstellung FCB (4-2-3-1)

Noe Fankhauser, Noah Zambrano (59' Nils Blatter), Fabian Hänzi (59' Marco Günther), Denis Schneider (C), Nikola Jankovic (59' Ledion Ramadani), Men Meier, Joel Zambrano, Silas Adam (71' Rafael Azevedo Alves), Fabian Schuler, Manuel Bigler, Luca Lauper (65' Simao Lopes Magalhaes)

Ersatz

Tim Blatter

Rekonvaleszent

Alex Files, Joel Knörr, Dario Leisi, Daniel Marti

Abwesend

Mario Bärtschi, Ruben Dos Santos, Nick Eggenberger, Patrick Frieden, Yannic Kubacki, Numa Marmier, David Vuilleumier

Spiel mit anderem Team

Fabian Suarez

Junioren B im erweiterten Kader

Jonas Beyeler, Alan Duflon, Neal Homberger, Robin Steiner

Staff

Manuel Scheidegger (Trainer), Carlos Manuel De Sousa Files (Assistenztrainer), Jarno Beyeler (Torhütertrainer), Reto Steiner (Masseur)

Tore

05' 0:1 Luca Lauper auf Pass von Fabian Schuler

07' 0:2 Eigentor auf Pass von Fabian Schuler

78' 0:3 Simao Lopes Magalhaes

80' 0:4 Marco Günther (Prellball nach feiner Einzelleistung)

89' 0:5 Simao Lopes Magalhaes

Karten

Erfreulicherweise keine!

Bemerkungen

Wetter kühl und immer wieder einsetzender Regen

Das Hauptterrain des FC Grünstern mit etlichen Kahlstellen, verursacht durch Krähen (kennen wir ja auch)

FC United Hermrigen-Jens verliert 1:0 in Täuffelen und verabschiedet sich aus der Spitzengruppe

90' Simao Lopes Magalhaes sieht seinen Penalty blockiert

90'+1' Gelbrote Karte Loan Robert (Grünstern)

Men of the Match

Noe Fankhauser hielt mit unglaublichen Paraden den FCB auf der Erfolgsspur

Joel Miguel Zambrano, Denker und Lenker im Spiel des FCB

Simao Lopes mit zwei entscheidenden Toren trotz Kurzeinsatz

So souverän, wie es das Resultat ausdrückt, sah es bis zur 78. Minute nicht aus. Nachdem der FCB den Gastgeber Grünstern 78 Minuten lang weichgeklopft hatte, brachte eine Wechselorgie die Siegsicherung.

Dr Manuel Scheidegger verzichtet y dr Schtartformation uf die vier mitgreiste Schpieler vo de Junioren B, wüu am Sunntig die wichtigi Begägnig gäge Schüpfe uf em Lache aaschteit. Dört geits um e Klasseerhaut. Jitz kenne mir ds Resultat, mit 8:0 isch die Ufgab mir Bravour erledigt worde (Gouschütze: 4x Simao Lopes, Ledion Ramadani, Shayne Grossen, Yves Schlup und Nils Blatter).

Dr FCB isch furios y das Schpiu gschtartet. Scho y dr 5. Minute het dr Luca Lauper zum 0:1 troffe, und nume zwöi Minute schpöter isch ds 0:2  gfaue - dür es Eigegou uf e scharfi Flangge vom Fabian Schuler. Wenn das y däm Tämpo wytergeit, müesse mir dr Zeuraame fürenäh, damit mir nid no dr Überblick verlüüre. So wyt isch es de aber nid cho. Obwou dr FCB dr Gägner klar dominiert und gnue Chance gha het, um grad zwöi oder drüü Schpiu z'gwinne, isch d'Partie unabsichtlich spannend blybe. Entwäder hets a dr nötige Präzision gfäut, dr letscht Pass het z'ungenau gschpiut dr Mitschpieler nid erreicht, ds Glück het gfäut, oder dr Gooli vo Grünstern, dr Dominic Mülchi, het mit viu Gschick und em ne guet Schtelligsschpiu Schlimmers verhinderet.

Me chönnt fasch dänke, dass dr Gaschtgäber völlig chancelos em Aarenne vo Büre usglieferet isch gsy. Nid ganz. Bereits y dr 11. Minute het dr Noe Fankhauser mit em ne guete Reflex e Schuss a Pfoschte glänkt. Das isch auerdings die einzig würklech klari Chance vo Grünstern y dr erschte Haubzyt blybe.

Dr Ufwand, wo dr FCB betrybe hat, isch enorm gsy. Löuferisch schtarch, mit schöne Bauschtaffette, Doppupäss und hie und do sogar es technisches Kabinettstückli - längwylig isch üs Zueschouer wäägerli nid worde.

Mit em gfährlechschte Resultat im Fuessbau het dr unufgregt Schiedsrichter zur Pouse pfiffe. Warum gfährlech? Dr Gägner het nüt me z'verlüüre, schteut sys Schpiu um und versuecht d'Unsicherheit vo dr füehrende Mannschaft usznütze. Faut dr Aaschlussträffer, chönnt ds Schpiu kippe. Das isch ufgrund vo de Schpiuaateile und em schpielerische Plus zwar fasch nid müglech, aber dr Fuessbau het syni eigete Gsetz.

Bis zur 78. Minute chönnt me dr Texscht vo dr erschte Haubzyt do häre kopiere. Büre schpiut überläge, rennt a und vergit ei Chance um die angeri. Y dr 59. Minute gryffe dr Ledion Ramadani für e Nikola Jankovic, dr Nils Blatter für e Noah Zambrano und dr Marco "Günä" Günther für e Fabian Hänzi y ds Schpiu y. Ab dr 65. Minute schteit dr Simao Lopes für e Luca Lauper uf em Platz und sächs Minute schpöter macht dr unermüedlech Silas Adam am Rafael Azevedo Alves Platz. Ds Schpiu nimmt nöi Fahrt uf und die nöie Chräft chöi sich vorteilhaft y Szene setze. Aber z'erscht sorge d'Platzherre für Närvechitzu. Das dä Fau wie obe erwähnt, "gfährlechs Resultat", nid ytroffe isch, isch em guet ufgleite Noe Fankhauser z'verdanke. E Drüüfachchance vo Grünstern innert es paar Sekunde, macht är im Schtiu vom ne Schpitzegooli spektakulär zunichte. Drufabe, es vergö es paar Minute, rettet är bim Useloufe vor em ne mügleche Yschlag.

D'Batterie vo de Grüenstärne sy langsam a d'Leischtigsgränze cho. Nid z'letscht ou, wüu sich dr FCB mit däm Resultat nid z'fryde gä het und d'Entscheidig vehemänt gsuecht het.

Y euf Minute vom Zittere zum klare Resultat

Sima Lopes - Marco Günther - Sima Lopes - 0:5. Es isch e Gnuss, dr Fraktion vo de 16-jährige zuezluege. Unbekümmert und ohni Angscht nä sy jede Zwöikampf a, loufe de Gägner um d'Ohre und glänze mit schpiuöffnende Päss. Bsunders erfröilech isch, dass ds Team das Potenzial vo de Junge erkennt und sie problemlos is Schpiu integriert und ungerstützt, wo sie nume chöi.

E tragischi Figur

Dr Gooli vo Grünstern isch dr meischtbeschäftigt Maa gsy uf em Fäud. Mit guete Reflexe und em ne guete Schtelligsschpiu het är mängi Chance vo de Bürer entscherft. Mit sym Angaschemaa het är derfür gsorget, dass dr FCB nid ernöit mit em ne Kanterresultat het chönne glänze. Schlussändlech het ou är müesse kapituliere.

E tragendi und trybendi Figur

Wär während 90 Minute eis Oug am Joel "Migu" Zambrano gwidmet het, het gseh, was dä Giu im Stand isch z'leischte. Löuferisch sackstarch, im Zwöikampf bissig und erfougrych, es fyns Gschpüri für d'Mitschpieler und e phänomenali Passsicherheit. Är isch uf sym Poschte schlicht unersetzlich. Ig chume eifach nid drum, dr Migu gäng und gäng wieder z'erwähne, nid z'letscht ou, wüu sie Konschtanz für ds Team enorm wichtig isch.

E tadellosi Figur

Im entscheidende Momänt het ds Team uf üse Gooli Noe Fankhauser chönne zeue. Mit sym ungloubleche Reflex uf drüü Schüss innert Sekunde het är d'Mannschaft vor grösserem Schade bewahrt und entscheidend mitghuefe, das Schpiu doch no souverän heyzbringe.

Fazit

Bis am Zischtig, denn findet d'Begägnig FC Ins-Müntschemier - FC Etoile statt, blybt der FCB mit 4 Punkt Vorsprung uf Platz 1. Es het viu brucht, bis die drüü Punkt verdientermasse sy am Trochne gsy. 90 Minute kämpfe und nie ufgä, die Devise het sich schliesslech, wenn ou spät, entsprächend uszaut. Wenn dr FCB die schpielerischi Überlägeheit und d'Effiziänz y de Chance cha steigere, isch Zueversicht gross, dass dr erscht Platz bis Saisonändi e Aaglägeheit vo Büre blybt.

Nächste Woche

Samstag, 17:10.2026, 16:00 FCB - FC Ins-Müntschemier auf dem Fussballplatz Lachen mit hoffentlich einem ambitionierten Buvettenteam und entsprechend kulinarischen Verwöhneinheiten.

Im Spitzenkampf gegen Hermrigen-Jens war es dem kurzfristigen Einsatz von Stefan Rothacher und Luka Skvorc zu verdanken, dass die Buvette die Tore öffnete. Mehr Herzblut für den Verein und mehr Einsatz meine Damen und Herren! Wenn alle am gleichen Strick ziehen, hält sich der Aufwand für jeden Einzelnen in Grenzen.

Hopp FCB!