FCB - FC Ins Münschemier 2:0 (0:0)

Hans Peter Gribi

vor 14 Stunden

4 Min. Lesezeit

Samstag, 17. Oktober 2026, 16:00 Uhr, Fussballplatz Lachen Büren an der Aare

Meisterschaft 4. Liga

Text: Hans Peter "Budi" Gribi

Foto: Stephan Kubacki

Aufstellung FCB (4-2-3-1)

Tim Blatter, Marco Günther (79' Fabian Hänzi), Nick Eggenberger, Denis Schneider (C) (16' Ruben Dos Santos), Noah Zambrano (65' Nikola Jankovic), Men Meier, Joel Zambrano, Silas Adam, Simao Lopes Magalhaes (64' Ledion Ramadani), Manuel Bigler, Luca Lauper (73' David Vuilleumier),

Ersatz

Kein Ersatztorhüter

Abwesend

Mario Bärtschi, Yannic Kubacki, Numa Marmier, Fabian Schuler

Rekonvaleszent

Alex Files, Joel Knörr. Daniel Marti, Dario Leisi

Spiel mit anderem Team

Rafael Azevedo Alves, Nils Blatter, Noe Fankhauser, Patrick Frieden, Fabian Suarez

Junioren B im erweiterten Kader

Jonas Beyeler, Alan Duflon, Neal Homberger, Robin Steiner

Staff

Manuel Scheidegger (Trainer), Carlos Manuel De Sousa Files (Assistenztrainer), Jarno Beyeler (Torhütertrainer), Reto Steiner (Masseur)

Tore

50' 1:0 Manuel Bigler auf Pass von Luca Lauper

58' 2:0 Luca Lauper auf Pass von Simao Lopes Magalhaes

Karten

Keine

Bemerkungen

16' Captain Denis Schneider verlässt verletzt das Spielfeld, es ist wieder das Knie

90'+1' Ruben Dos Santos sieht seinen Penalty vom gegnerischen Torhüter gehalten

Gegen Ende des Spiels verletzte sich der Schiedsrichter, er kämpfte sich hinkend tapfer über die Runden

Regnerisch und schwer zu bespielbares Terrain, glitschige Unterlage. "Es richtigs Huduwätter"!

Es wurde der erwartete Abnützungskampf, geprägt von Zweikämpfen und unzähligen unsauberen Tacklings der Gäste. Ab Minute 60 Einbahnfussball, die Kräfte beim Gegner liessen eklatant nach.

Erschti Haubzyt

Scho glii nach em Aapfiff isch jedem klar worde, dass das Schpiu kes Zuckerschläcke wird, und vo Syte vom FCB Geduud e Teil vo dr Lösig wird sy. Ins Müntschemier, beschtückt mit grosse und/oder robuschte Schpieler, het d'Zwöikämpf im rustikale Schtiu über nünzg Minute dürezoge und teils mit unsubere Tacklings a dr Gränze vom Erloubte operiert. Der FCB het sich dür die Gangart nid gross lo beydrucke und uf em schwäre Bode versuecht, dr Bau y de eigete Reihe z'bhaute. Es gepflegts Ufbouschpiu mit mänge Schtatione, aber ohni zwingendi Abschlüss isch ds Resultat gsy. Bereits y dr 16. Minute hets im ne Zwöikampf, ig gloube am Gägner cha me nüt aahänke, dr Denis Schneider verwütscht. Wieder das verflixte Chnöi, es isch nümme wytergange, dr Ruben Dos Santos het sy Poschte ygno. A dere Schteue ganz gueti Besserig Denis.

D'Schpiu het mehrheitlech zwüsche de beide Sächzähner stattgfunde, Torchance sy Manguwar gsy, Flangge y Sächzhner vo Ins Müngtschemier sy vo de stämmige Verteidiger allesamt abgläse worde. Es het bis y die 33. Minute duuret, bis e gueti Chance dür das überlägene Schpiu vo Büre z'schtangcho isch, aber dr Luca Lauper verzieht. 37. Minute, e Corner vo Ins Müntschemier bringt so öppis wie Gfahr vor e Chaschte vom Tim Blatter. Aber z'ungeschtüm faue d'Bemühige zum Torschuss us. Dr Tim Blatter, bis zum Zytpunkt uf ke Art und Wys gforderet, entscherft d'Situation. Y dr Verlängerig, verursacht dür d'Verletzig vom Denis Schneider, verpasst dr FCB die längscht fäuigi Füehrig grad zwöimou, zerscht zischt e Abschluss vom Men Meier (bi mir aber nid ganz sicher, im Gwüu isch es schwär uszmache gsy) knapp über ds gägnerisch Gou und uf Pass vom louf- und schpiufröidige Silas Adam pfäfferet dr Manuel Bigler dr Bau statt is Netz y Pampa use. Churz drufabe pfyfft dr Schiri, är het sy Sach nid so schlächt gmacht, zur Pouse.

Eis het mi ir erschte Haubzyt imponiert. Die forschi Gangart vom Gägner geit doch eim irgendeinisch ufs Gäder, und du losch di zur e verbale Reaktion, oder angerem, lo verleite. Nüt, gar nüt! Schtoisch ruhig het dr FCB sys Schpiu dürezoge und het sich nid lo provoziere. Und wenn e Schpieler scho nume ds Muu büschelet het, für usezloo, isch vom Manuel Scheidegger lut und dütlich d'Reaktion cho.

Zwöiti Hauzyt

Nach em Aapfyff, d'Red vo de Trainer ir Pouse het d'Würkig nid verfäut, het Büre dr Ehrgyz packt und ändlech däm Schpiu die richtige Richtig gä. Und mygotstüüri - es het Frücht treit. Zerscht het im ne Gedränge im Sächzähner dr Luca Lauper d'Übersicht bhaute und dr Manuel Bigler präzis bedient, und dasmou hets nid y dr Pampa e Yschlag gä, nei dr Mänu püuveret dä Bau wuchtig is Netz zur längscht ersehnte Füehrig. Acht Minute schpöter, Ins Müntschemier schteit wie e Wang im Sächzähner, während dr Silas Adam, zum x-ten Mou, uf dr rächte Syte mit de Gägeschpieler Chatz und Muus schpiut. Sy Flangge landet im Chrüsimüsi vor em Gou, wo dr Simao Lopes dr Luca Lauper cha aaschpiele, und das isch e Läbesversicherig - päng 2:0. So, dr Chnopf isch platzt.

64. Minute und dr Manuel Scheidegger bringt nöii Chräft. Dr Nikola Jankovic, gäge Grünstern mit ere guete Leischtig ufgfaue, ersetzt dr flyssig Noah Zambrano und dr Ledion Ramadani chunnt für e Simao Lopes is Schpiu. 73. Minute, dr David Vuilleumier ersetzt dr Luca Lauper im Schturmzäntrum.

Ds Schpiu vo Büre "Bau und Gägner lo loufe" und die zermürbende Zwöikämpf hey d'Chräft bi Ins Müntschemier lo schwinde, sie loufe uf em Zahnfleisch. Büre rennt a, versuechts mit höche Flangge y Sächzähner, wo aber die schtämmige Verteidiger klar im Vorteil sy, oder über die rächti Syte, wo dr Silas Adam mou für mou dürelouft und mou für mou umgfreeset wird. Aber es wott eifach ums verrecke nümme klappe. Dr David Vuilleumier vergit zwöimou hingerenang nach schöner Vorarbeit vom Manuel Bigler, dr Joel Zambrano verzieht us 14 Meter und so wyter und so fort. Eine hey mir no. Ds letschte Chatz und Muus Schpiu vom Silas Adam im Schpiu isch doch no mit em ne Penauti belohnt worde. Dr Ruben dos Santos, normalerwys e sichere Schütz, gseht sy nid ganz präzis Schuss vom Gooli blockiert.

Fazit

Dr FCB zementiert mit däm Sieg d'Tabäuespitze und wüu United Hermrigen-Jens deheime gäge Grünstern unentschiede gschpiut het, het dr FCB Ins Müntschemier mit 7 Punkt und United Hermrigen-Jens mit 8 Punkt dischtanziert. Etoile Biel schlot Schüpfe 4:2 und isch mit eim Punkt Rückstand alleinige Verfouger.

Nächste Woche

Sonntag, 25.10.2026, 12:30h, FC Schüpfen b - FC Büren an der Aare

Rohrmatte Schüpfen

Hopp FCB!