Was hei mir in Büre für Luftschprüng gno, wo's gheisse het, vom FC Biel chöm dr Michael Blaser und dr Patrick Von Felten uf Büre cho schutte. Erschtligaschpieler uf Büre? Sötsch y Kontroue, mit dir schtimmt öppis nid! Es isch haut doch so use cho.

 

Nach erfouglosem Versuech ändlech us der 3. Liga 2. Schtärcheklass usezcho, het me in Büre am Ändi vo dr Saison 2005/06 d'Handbräms zoge und sech gseit, jitz muess me rundumernöiere, ghoue oder gschtoche. Sportchef, Trainer und namhafti Schpieler müesse d'Wändi bringe. So sy unger angerem dr Michael Blaser und dr Patrick Von Felten dür Eigeinitiative vom FC Biel und dr Patrick Meier vom FC Wacker Grenchen zu Büre gschtosse.

 

Zum vervouschtändige ds Kader vo dr Saison 2006/07 ungerem Trainer Marlon Hodgson:

Baumann Rodney, Beyeler Jarno, Blaser Michael, Gobat Simon, Habegger André, Hert Kevin, Imperiali Sandro, Käser Marco, Käser Simon, Käser Stefan, Katergi Nasser, Lerch Thomas, Maibach Markus, Meier Patrick (Torschützenkönig mit 17 Treffern), Meile Lorenz, Okoye "Chiboy" Chinedu", Rüttimann Mark, Schär Stephan, Schläfli David, Steinbacher Adrian, Sutter Thomas, Von Aesch Dominik, Von Felten Patrick, Stauffer Mikael.

Die Spielerlischte muess me sech mou uf dr Zunge lo vergo!

 

Und zmittsdrinn dr Michael Blaser. Üse Michael Blaser, wo nach em letschte Schpiu bi de Ü40 es MRI het lo mache und jitz d'Schuttschueh ändgüutig a Nagu hänkt, natürlech dr Gsundheit z'lieb, isch jo ou vernünftig. Är seit siny Chnöi sige scho lang es Problem und erschwärend würki sich us, dass är zwöimou ds Chrüzband und zwöimou dr Meniskus het müesse operiere. Das Stäche, wo är jitz gschpürt chöm vo zviu Belaschtig und Fäuschtellige, aber kaputt sig definitiv nüt. Häb sorg Mike und gueti Besserig.

 

Üse Mike, wo fuessbauerisch, mönschlech und mit sym Würke im Verein uf em Lache Schpure, nei sogar Fuhre hingerlo het, wo sich nachhautig uf e FCB usgwürkt hei. 7 Johr y dr erschte Mannschaft mit Lieb und Seeu und em ne grosse Kämpferhärz derby. Dr Mike het sys Debüt bim FCB y dr 3: Liga 2. Schtärcheklass gäh (Saison 2006/2007). Büre isch de grad dank Erschtligapower y die 1. Schtärcheklass ufgschtiege und ds Johr druf y die 2. Liga regional. Dört het me sich 4 Johr chönne haute und uf em Lache Klassemätsch chönne gniesse. Mit em Rücktritt vom Mike und syne Kollege het me sech de schnäu wieder im aute Fahrwasser gfunge, isch y d'Drittliga abegheit (2014/15) und innert 2 Saison y die 4. Liga abgschtiege (Saison 2015/16).

 

Nach em Rücktritt us dr erschte Mannschaft 2012/13 het dr Mike no bi de Seniore gschuttet und sech im Verein aus Vorschtandsmitglied fürs Marketing/Sponsoring ygsetzt. Die Schparte het dür sys Würke enorm a Gwicht gwunne und d'Ynahmesyte vom FCB y nöii Sphäre ghievt. Nach siebe intensive Johr im Vorschtand het sich dr Mike us der Füehrigsetage zruggzoge und sich näbscht em Autherrefuessbau syr Familie, em gmeinsame Huus und syne Hobbies gwidmet.

 

Dr Mike het in Lyss by de Juniore F sy viuverschprächendi Fuessbaukarriere aagfange, nächhär isch d'Familie uf Arch züglet wo är in Grenchen d'Schtatione Junioren E – B absolviert het. Sys Talänt isch schnäu ufgfaue und so verwunderets nid, dass dr Mike vo 1997-2002 in Grenchen und vo 2003-2006 in Biel sehr erfougrych Erschtliga gschuttet het. Dass är sy Karriere in Büre beändet het isch eifach nume e Glücksfau gsy.

 

Mir hoffe jo aui, dass mir nach däm definitive Rücktritt nid ganz uf e Mike müesse verzichte. Sy üsserscht korräkti, sympäthischi und fröhlichi Art wei mir uf em Lache nid misse.

 

Dir und dir Familie wünsche mir aues Guete und säge merci viu mou Mike. Schön, dass es di git und du zu üs gfunge hesch.

 

E Schtuehu wird uf em Lache für di gäng frei sy!

​

Erschienen im Matchprogramm vom 10. September 2022