FC Büren an der Aare
1938
Luka Skvorc
Üse Luka "Knorz" Skvorc isch am Samschtig, 14. Mai 2005, y dr Klinik Linde in Biel uf d'Wäut cho. Dr Luka oder "Knorz", isch e Schtier und positive Eigeschaft sy bodeschtändig, scharmant und sensibu. Gelassen isch ou derby, söu auso heisse, dr Knorz isch e Gmüetsmoore (isch de positiv gmeint). Verlässlech und familieorientiert, sinnlech und gmüetlech. Die negative Eigeschafte chöi sy gheimnisvou, mängisch fasch chley schtur und eigesinnig. Dr typisch Schtier-Maa wird schnäu hässig, wenn ihm öppis nid passt u de zeigt är d'Hörner. Do chöme mir schpontan Zwöikämpf y Sinn, wo dr Luka hartnäckig, unger Ysatz vo aune Mittu, um e Bau kämpft.
190 cm gross, 80 kg schwär, blaui Ouge
Im Momänt schpiut dr Luka no y dr zwöite Mannschaft uf em ne Verteidigerposchte. Bi de Juniore F isch är bereits mit em Fuessbau y Kontakt cho. Sie damalig Trainer Manuel Scheidegger isch sys Vorbiud und wenns irgendwie gange isch, isch är uf em Lachen ds Eis go luege und het sich gschwore, mit dene wott ig ou einisch mitschpiele. Bereits mit 15 Johr het är die erschte Ysätz y dr 5. Liga gha. Die härzlechi Ufnahm im Team und ds Familiäre het ihm gfaue und ou ghuufe schnäu dr Aaschluss z'gfinge. Mit guete Leischtige möcht är sich für die erschti Mannschaft empfähle, aber vorerscht isch ihm wichtig, dass ändlech die erschte Punkt ufs Konto vom Zwöi chöme. Sys grosse Vorbiud isch dr Supertechniker Luka Modric vo real Madrid und sy Lieblingsclub isch Barcelona. Hoppla Knorz, das biest sech de, was machsch, wenn Real und Barcelona zäme schutte?
Schpricht me dr Luka uf syni Schwäche und Sterchi a, schtudierte är nid lang: "Hiufsbereit und ehrlech und mängisch äbe de ungeduudig. D'Hobbys sy Fuessbau und Fitness. Schnäderfrässig? Nei das isch dr Luka nid. Kunschtschtück bi dere Muetter, sie chochet troumhaft. Cola isch sys Lieblingsgetränk und wie gseit, ässe tuet är aues. Apropos ässe – sys Rituau vor em Match isch – ässe! Ig hoffe de nid grad Schnitzu und Pommes.
Hüt wohnt d'Familie Skvorc a dr Ziegelmattstrasse und vorhär sy sie am Hägniweg deheime gsy. Är füeut sich in Büren an der Aare sehr wou und schetzt, dass aues noch binang isch.
Bi dr Frog, wo är y Usgang geit, lot sich dr Luka nid lo y d'Charte luege. Churz und bündig seit är "überau dört, wo öppis los isch!" Mit däm gäh mir üs z'friede.
Was nimsch du für füf Sache mit uf die einsami Insu? "E Chaschte Bier, TV, PS4, e Fuessbau und ds Handy."
Am FC Büre schetzt dr Luka ds Familiäre, die gueti Kollegschaft und nach em Training und nach em Match ds Zämehocke und gmeinsam öppis trinke.
Weisch was mir a dir schetze Luka? Di luschtigi Art und di mängisch trochnig Humor und das me uf die cha zeue, wenns Lüt brucht wo aapacke.
Blieb wie de bisch, e feine, härzleche und hiufsbereite Typ.
Und wägem Eis, ig tue de bim Vofi es guets Wort ylege.