top of page

Wileroltigen - FCB 1:1 (1:1)

Meisterschaft 4. Liga, 6. April 2022, Sportplatz Saane


Was isch chly, houperig wie ne Moore u liegt für üs (fasch) am Arsch vor Wäut? Genau, dr Schuttplatz vo Wileroutige! U genau dört het geschter üses Eis probiert, sech so guet wie müglech us dr Affäre z'zieh. Mit Betonig uf versuecht. Dr Pädu Tüscher, dr Träner, het im Vorfäud vo däm Matsch gwarnet und druf ufmerksam gmacht, dass es ghörig viu Isatz und e Hampfele Säubschtvertroue brucht, um gäge Wileroutige chönne z'beschtoh. U nume beschtoh het me jo nid wöue, sondern reüssiere u mit drüü Punkt im Sack das beschwärleche Sunntigsreisli mit ere Triumphfahrt is Schtedtli fiire. Nid nüt isch gsi, gar nüt isch gsi. Mi isch du mit ere Zwänzabachtischnure abzöttelet. Aber – u das si gueti Nachrichte - so schlimm isch es de emänd ou nid usecho. Aber do derzue schpöter meh. Das isch fang mou d'Ileitig gsi.


Isch guet het är dr Taktikspicker nid gschlückt, schüsch hätte si de no verlore!


Ufschtellig FCB:

Schtouffer Michael, Günther Marco (75. Hofer Mischa), Lerch Thömu (C), Lopes dos Santos Ruben, Tüscher Schöggu, Eggenberger Nick (het für einisch nid müesse schaffe, 70. Grogg Reto), Tüscher Yannik (Note 7, die beschti Note isch es Sächsi), Schueler Fäbu, Scheidegger Mänu, Rüttimann Reto (85. Eggenberger Nick), Louper Luca (7. Schläfli Dävu)


Ersatz: Grogg Reto, Schläfli Dävu, Hofer Mischa


Träner: Tüscher Pädu, Vo Fäute (VoFi) Patrick


Schiedsrichter: E Pfiife (seit me zwar nid, ig beharre aber druf)


Fazit:

D'A- und Rückreis über Lyss – Aarbärg – Kaunach – Golate nach Wileroutige isch mindeschtens so interessant gsi wie der Matsch säuber, aber ömu de sicher schöner.


Guet zuelose!


Taktik het so usgseh, dass me hinge rübis u stübis aues furtzputzt was chunnt, u vore ohni längs Fäderläsis uf d'Chischte z'brätscht. Voilà, e guiti Taktik, wenn aui mitmache. U do chame sauft säge, es hei nid ganz aui mitgschpiut. U so isch es schlussändlech cho, wie's het müesse cho.


Der Gaschtgäber hat vor erschte Minute a e forschi Gangart a Tag gleit, isch bi de Zwöikämpf nid zimperlig dri, isch nume uf Zerschtöre us gsi. Hauruckfuessbau par excellence äbe. Üser hei eigentlech e ganz guete Schtart gha u si hüüfig vor em Gou uftoucht. Us hochkarätige Chance het me ds Gou teils knapp, teils kläglech verpasst. Mi hät mit mindeschtens zwöi zu nuu söue, jo müesse füere. Anschtatt i Füehrig zligge, het dr Luca Louper ir sibete Minute verletzt vom Fäud müesse. Dänkbar schlächte Vorussetzige für e wyter Verlouf vom Matsch. Ir zähte Minute het dr Fäbu Schueler e Louf uf dr lingge Site mit em ne satte Schuss abgschlosse, dr Abprauer vom Gooli chlepft dr Dävu Schläfli zum verdiente 1:0 i Chaschte. Büre het wyter dominiert u entschprächend ou Chance kreiert. Zäubares het eifach ums Verrecke nid wöue useluege. Gangart vom Gägner het a Intensität zuegno, isch z'einte oder angere Mou meh aus gränzwärtig gsi. Mit dere Taktik, mi cha däm ou "Zermürbe" säge, het Wileroutige d'Schpiuateile chlei chönne usgliiche. Achtung liebi Läser, was dr FCB gäge Müntschemier a Glück het chönne isacke, isch am hütige Tag kompensiert worde. E Dischtanzschuus ufs Gou vom Miggu, är schteit e chlei wyt vor em Chaschte, chlepft a d'Latte u gheit vor dr Linie wider is Fäud. Uf dr Gouhöchi poschtierti Lüt (zum Bischpiu Schiri Lui) hei gseh, dass dr Bau nie, ig widerhole NIE über dr Linie gsi isch, fouglich ou ke Gou chasch u darfsch pfyffe. Hinger dr Mittulinie poschtiert, z'Schperberöugli uf scherfschti Scherfi igschteut, git im Stile eines Maestros dr Schiri das Gou. Skandau i dr Gmüespampa, Härzbaraggegfahr. Büre het dä Nackeschlag eigentlech erstunlech ruhig wäggsteckt und het wyter versuecht, die dominanti Chraft uf em Fäud z'si. Aber e pflegti Schpiuwies het nid wöue glinge. Z'houperige Terrain, dr ufsässig Gägner u das verzwieflete Arenne het langsam aber sicher Schpure hingerloh. Pouse!


Z'Teeli isch verdouet (mir arme Sieche si uf em Trochne ghocket), was het müesse gseit si isch gseit worde. Gnützt hets aber wägerli nid viu. Es isch e zwöiti Haubzyt worde zum Vergässe. Mi het zwüschedüre mit de Kollege gschnurret, die schöni Gägend i Ougeschyn gnoh, oder uf dr Sanne gluegt, öb öppe e Foräue e Gump nimmt – Aktschen! Dr Pädu het versuecht, mit Awiesige chlei Ornig i dä schtrukturlos Kick z'bringe, aber ou das isch a de Aktöre abtröpfelet. Mi het wou gäng wider dr Wäg zum Gou gfunge, öb über e Flügu oder dür die gschtungeti Mitti, d'Bäu suber verarbeite und e satte Schuss ufs Gou bringe hingäge het nümme klappet. Mir am Schpiufäudrand hei scho dänkt, jitz glingt de de Wiloutiger no Glücksgriff und üser schtoh de do, mit de Hose im Chnöuäcke. Es isch du gottlob nid so wyt cho, wüu ou dr Gägner uf ihrem Bonsaischuttplatz nüme isch z'Gang cho. So isch es 1:1 bliibe. De Wileroutiger muess me es Komplimänt mache. Nie hei si ufgäh, si ruschtikau as Wärch u hei z'fuessbauerische Defizit mit viu Kampf u Isatz wettgmacht. Dört wird no mänge z'biesse ha u Punkt lo ligge.


Man of the Match (dä rächts)


Ig mache das nid so gärn, e einzelne Schpieler uf e Thron z'lüpfe. Aber dr Yannik Tüscher het das, ohni d'Leischtig vo de angere z'schmählere, unerchannt verdient. Grackeret, greiflet, dürebisse, gsecklet, gfeitet, Päss gschlage u nie ufgäh. Es grosses Kämpferhärz hesch zeigt Yannik, bim Usfau vom Luca verdammt, jo doppelt so wichtig.


Für einisch si mir nid so verwöhnt worde. Aber eis müesse mir üs bewusst si. Wie lang isch es här, dass der FCB 9 Schpiu lang ungschlage blibe isch? Äbe gsesch! I dene 9 Begägnige het me genau zwöi Mou unentschiede gschpiut. Sensationell. Nid wäge dene zwöi Pünktli vo Wileroutige mit em Schicksau hadere. Sich bewusst si, was me gleischtet het u zämeschtoh und so wyterfahre, de chöme mir no uf Honolulu cho dr FCB luege! Geili Equipe!!



Das Unentschiede schysst a, dass isch ke Diskussion. Es relativiert sech aber, weme dr Schpiutag aluegt. Fasch aues het für e FCB gschuttet. Müntschemier verlüürt (hei mir jo gäng gseit, die nimmts de ou na am Fäcke) u Grüenstärn schpiut uentschiede. Nume Längnou het sich nid a z'Motto "aues für Büre" ghaute u het gwunne. So chunnts zum ne Zämmeschluss ar Schpitze mit Müntschemier (30), Grüenstärn (29), FCB (29), Längnou (28).


De Verletzte Luca Louper, Reto Rüttimann, Damian Chocher (uf em Bou isch es passiert) und em Diego Imperiali gueti und schnäui Besserig.


Unger angerem sie no die fougende Schpiu, wo entscheidende Charakter hei:


Mi 22.04.2019: Grünstern - FC Lengnau

Sa 04.05.2019: FC Müntschemier - FC Grünstern

So 19.05.2019: FC Lengnau - FCB

Sa 01.06.2019: FC Lengnau - FC Müntschemier

Mi 05.06.2019: FCB - FC Grünstern


Nöchscht Wuche isch de am Samschtig wider uf em Lache gäge SC Aegerte-Brügg Matsch. Z'Motto "Drüü für üs"!




Aktuelle Beiträge

Alle ansehen