Saisonauftakt

Text: Hans Peter "Budi" Gribi

Das Wuchenänd sy d'Juniore C2, d'Juniore B1 und üses Eis y die nöii Saison gschtartet.

FC Täuffelen	-	Team Häftli Jun. C2	2	:	1
FC Besa Biel/Bienne	-	Team Häftli Jun. B1	3	:	6
FCB 4. Liga	-	SV Lyss	13	:	0

Junioren B 1. Stärkeklasse

D'Juniore B sy jo bekanntlech y dr Früehligsrunde y die 1. Stärkeklass ufgschtiege und hey fouglech zum Uftakt herters Brot zuum bysse vorgsetzt übercho. Wie die Giele das packt hey isch phänomenau. Bis zum Usglych y dr 77. Minute hey sie gäng gfüehrt und dank em ne super Mannschaftsgeischt und de schtränge aber ziufüehrende Trainings vom Trainergschpann, hey sie no d'Chaft gha, y füüf Minute ds Schpiu z'entscheide.

D'Gou für ds Team Häftli hey gschosse dr Robin Steiner (2), dr Rafael José Azevedo Alves (3) und dr Ledion Ramadani (1).

Härzlechi Gratulation am Team und am Trainergschpann, so chas wytergo.

4. Liga

Unger em Motto aues nöi ir Saison 2026/27 - haut stimmt so nid ganz, ds nöie Dress hey sie us disziplinarische Gründ (betrifft die letschti Saison) nid übercho - isch es gäge ds Team us Lyss losgange, und wie. 13:0 het dr FCB d'Lysser vom Lache wäggfägt. E Saisonschtart wies im Büechli schteit.

Startformation

Tim Blatter, Nick Eggenberger, Nils Blatter, Denis Schneider (C), Marco Günther (55' David Vuilleumier), Joel Zambrano (65. Noah Zambrano), Fabian Schuler, Manuel Bigler (65' Ruben Dos Santos), Dario Leisi (55' Ledion Ramadani), Silas Adam (60' Simao Lopes), Yannic Kubacki (60' Luca Lauper)

Ersatz

Patrick Frieden

Nicht im Aufgebot

Mario Bärtschi, Noe Fankhauser, Fabian Hänzi, Nikola Jankovic, Alex Jorge, Numa Marmier, Daniel Marti, Men Meier, Fabian Suarez

Tore

14' 1:0 Manuel Bigler (Dario Leisi)

29' 2:0 Dario Leisi (Yannic Kubacki)

39' 3:0 Manuel Bigler (Nick Eggenberger)

52' 4:0 Joel Zambrano (Denis Schneider)

64' 5:0 Manuel Bigler (aus dem Gewühl nach Eckball)

66' 6:0 Luca Lauper (David Vuilleumier)

70' 7:0 Luca Lauper (David Vuilleumier

74' 8:0 Luca Lauper (David Vuilleumier)

76' 9:0 Ledion Ramadani (Simao Lopes)

77' 10:0 Noah Zambrano (aus dem Gewühl nach Eckball)

82' 11:0 Luca Lauper (David Vuilleumier)

87' 12:0 Simao Lopes (Abpraller nach Pfostenschuss Ledion Ramadani)

90'+1' 13:0 Luca Lauper (Fabian Schuler)

Wahrlech es Schützefescht, mit Beteiligung vo 7 Torschütze und em ne Rückkehrer, dr Luca Lauper, wo nach de Verletzige vo sym Ysatz am ne Pouterobe, es Johr uf der lokale Fuessbaubühni gfäut het. Es macht dr Ydruck, dass der Luca schtercher zruggcho isch, het är doch 5 Gou bygschtüüret und derby e klassische Hattrick y 8 Minute erziut - Schapoo Luca!

Y dr Ufschtellig vom FCB het dr Trainer Manuel Scheidegger mit em Nils Blatter (2009), em Simao Lopes (2010) und em Ledion Ramadani (2010) d'Verjüngigskur vom Eis konsequänt y d'Wäg gleitet. D'Zämearbeit mit de Trainer vo de Juniore B Patrick Grossen und Alex Jorge Files klappet hervorragend und die süüferli Integration vo wytere junge Spieler wie Rafael Azevedo Alves, Jonas Beyeler (2009), Alan Duflon (2008), Neal Homberger (2008) und Robin Steiner (2010) isch aakurblet, sie sy bereits im Training vom Eis integriert. D'Juniore B gniesse im FCB e höche Status und darum isch das Wort "süüferli" so z'verschto, dass d'Priorität vo de Juniore B mit em Eis glychzschteue sy. Ig bi überzügt, dass üs die junge Wiude vom FCB no viu Fröid wärde mache.

D'Schtarteuf wyst es Durchschnittsauter vo 24 Johr uf, nimmt me no d'Ersatzschpieler derzue, blybt dä Wärt so schto.

Es nöis Gsicht het uf em Bänkli bim FCB sy Ufwartig gmacht. Guet, grad so nöi isch das Gsicht de ou nid. Är isch e Bürer und het fouglech bim FCB lehre schutte. Sys Talänt het me damaus bim FCB nid gebührend chönne abschetze, zudäm isch d'Konkurränz uf em Gooliposchte gross gsy. Drum isch dr Patrick Frieden mit nüünzähni nach Diessbach wyterzoge. Bis letscht Saison het är ds Gou vor erschte Mannschaft in Diessbach 15 Johr lang ghüetet. Nach em Rücktritt us dr erschte Mannschaft, isch dr Pädi wieder zrugg bi de Wurzle. Är wird aus Backup im Eis zur Verfüegig schto, aber houptsächlech ds Gou bim Zwöi suuber bhaute. Schön bisch wieder bi üs Pädi, härzlech wiukomme.

Am nöchschte Samschtig reist dr FCB uf Nidau (Aaschpiuzyt 18:00h). Nidau het gäge Abschtieger Etoile Biel im Startschpiu 6:2 verlore und wird gäge Büre versueche, dr schlächt Schtart z'korrigiere.

Mir drücke Düme und päägge Hopp FCB!