Jitz geits um d'Wurscht!

FC United Hermrigen-Jens - FC Büren an der Aare

Samstag, 6. Juni 2026, 18:00 Uhr, Gemeindesportplatz Jens

Meisterschaft 4. Liga

Am Samschtig isch Jens e wichtige Punkt uf dr Landcharte vo dr Schwiiz.

Dört schtygt nämlech e erschti Vorentscheidig um e Ufschtieg y die 3. Liga vo dr Gruppe 7. Es git genau eis Szenario - dr FCB muess gwinne, wott är sy Chance uf e Ufschtieg nid im vorletschte Schpiu y Sand setze.

Dr Tüüfu wotts, dass die diräkte Kontrahänte FC Aarberg, FC Bözingen und FC Lengnau nümme ungerenang um d'Chrone kämpfe. Einzig dr FCB het no dä unbequem Gägner Hermrigen-Jens, wo beidi Plätz, öb Hermrigen oder Jens, vo dr Grössi vom Platz keni Fisimatänte möge verlyde. Schpiele, loufe, schpiele und mou ungschminkt eine lo krache, dr schnäu Abschluss sueche, chönnt e guet Wahl sy.

D'Ranglische vor däm Wuchenänd: 

 D'Begägnige vom nöchschte Samschtig, 6. Juni 2026, lute wie fougt:

De gseht de d'Ranglischte wie fougt us: 

Sött sich dr FCB in Jens e Usrütsch leischte, öb verlüüre oder unentschiede, isch aues verby. Wüu denn chöme Strafpunkt y d'Wärtig und dört gsehts bim FCB zappenduster us.

No hurti e Blick uf d'Personausituation. Ohni öpperem wöue uf d'Füess tschaupe, isch es gäge Hermrigen-Jens nid grad ufs Beschte bschteut. Ruben Dos Santos und dr Nick Eggenberger sy wäge de Vorkommnis gäge Lengnau gschperrt und dr Fabian Schuler isch us mir unerfindleche Gründ nid aawäsend. Potzheilanddonner isch das e Schyssdräck, angers chame die Situation nid usdrücke. Grad drüü Schtammchräft wo nid do sy, do schtöö mir d'Hoor z'Bärg. Was ig mitübercho ha isch, dass dr Dario Leisi wieder im Land isch, und mir wüsse, dass dr Dario weiss, wo d'Chischte schteit. Y 13 Schpiu vo 21 het är immerhin 15 Töpf gschosse und isch vom Koeffiziänt dr Toptorschütz vom Team. Jitz hoffe mir eifach mou, dass sich dr Dario y de Ferie guet erhout het und uf dä Bäu so scharf isch, dass es nume so dätscht und chlepft. Bim Marco Günther weiss me no nid, öb är cha y d'Hose schtyge. Öb dä Gingg as Bei Schade hingerlo het, weiss ig nid. Y dr Defensive wird nach mim Gfüeu dr Fabian "Bicicletta" Hänzi zum Ysatz cho und dr Daniel Marti isch äbefaus scharf uf ne Ysatz. Alternative gits jo ou no, wenn mir is Druckli vo de Juniore B gryffe. Defensiv e Macht und e Turm im Team, dass het är im Schpiu gäge FC Orpund ydrücklech bewiese, isch dr Nils Blatter. Nid z'vergässe dr Baukünschtler Simao Lopes, oder dr Dopputorschütz Rafael José Azevedo Alves, wo nid lang facklet und eifach d'Gou macht. Vergässe wey mir nid dr Nevio Eggli, wiuig und schnäu und fürs Eis ou scho topfet und dr David Vuilleumier, wo überau chasch ysetze. Aui angere Müglechkeite faue wäge Verletzig us (Joel Knörr, Joel Tüscher, Alex Jorge Files, Mario Bärtschi, Numa Marmier und dr Luca Lauper).

Im Startteam wird sicher der Fabian Hänzi y dr Verteidigung gsetzt sy und im offensive Mittufäud dr Noah Zambrano. Und wär isch ächt dr dritt Maa? Ig ha e Ahnig, oder besser e Wunschvorschtellig, hocke aber ufs Muu. Sodeli - jitz hey mir fang ds nöchschte Wuchenänd abghandlet. Wenn mir dr Fade no chley wey wyter schpinne, gsehts de am letschte Schpiutag fougendermasse us:

Und so würde de Ranglischte usgseh: 

A däm Tag sy de dr Ruben Dos Santos und dr Nick Eggenberger wieder schpiuberächtigt. Eventuell isch de dr Fäbu Schuler ou wieder unger syne Teamkollege.

Ou a däm Schpiutag darf sich dr FCB ke Blössi gä. Scho bim ne Unentschiede chunnt üses Schparkonto vo de Schtrofpunkt zum Zug, schwupp und die ganzi Herrlechkeit ändet im ne böse Erwache. So wyt wey mir gar nid dänke. Mir hey ds Vertroue y üses Team, mit dr Leischtig gäge Lengnau hey sie bewiese, dass sie aune Herusforderige gwachse sy.

Es heisst eifach, y no zwöi Schpiu bis zum Abpfiff aues gää, ufs Muu hocke und keni Charte me riskiere. E wytere Usfau möge mir de nümme verchrafte. Und villech no e Tipp vom Schpiufäudrand. Uf däm chlyne Platz in Jens isch de wichtig, we me mitenand lut und dütlich kommuniziert, es chönnt cheibe hiufrych sy.

Uf au Fäu drücke mir dr Dume und wünsche viu Glück!

Und faus..., de heit de Hüet Froue und Manne, de geit de Poscht ab. Mann wär das schön!

Budi