Harziger Saisonstart

Text: Hans Peter "Budi" Gribi Fotos: Stephan Kubacki

Bekanntlich startete unser Team wegen des Ländtifestes erst verspätet am Mittwoch, 20. August 2025, um 20:00 Uhr in Ins zum Saisonstart. Eine unglückliche Lösung, da Wochenspiele meist mit Unpässlichkeiten der Spieler verbunden sind und zudem eine Anreise bei etlichen Spielern einer "Juflete" von der Arbeit auf den Fussballplatz gleichkommt. Kramen wir in der Vergangenheit, sind Spiele unter der Woche für den FCB meist nicht rosig ausgegangen.

FC Ins Müntschemier – FC Büren an der Aare 2:0 (0:0)

20. August 2025, 20:00 Uhr, Rötschmatte Ins, Meisterschaft 4. Liga

Für üs Zueschouer isch dä Matchbsuech y aune Belange nüd Gfröits gsy, bschtändig bisch am Schärme noche gsecklet, so schtarch hat das gschiffet. Schlussändlech het me sech y dr Büvette es Plätzli gsuecht, aber de vom Schpiu nid viu gha. Us däm Grund wär e Matchbricht vermässe gsy.

Es isch zytewies dr Ydruck entstande, dass me dä Match hät müesse abbreche. Hey d'Giele uf e Bau ghoue, isch dr Bau blybe schtoh und e riese Wasserfontäne isch ds Resultat gsy. Ig bi immer dr Meinig gsy, dass e Bau muess chönne ufgumpe, de sy d'Verhäutnis regulär und es Schpiu cha stattfinde. Sygs wys wöu, abhöögle und uf em Teppich blybe. Ds Einte (d'Verschiebig) pass zum Andere (ds Wätter).

Eis chame aber no säge. Hät dr FCB ganz am Aafang vom Schpiu d'Chance packt und die cheibe Chischte gmacht, wär Ins Müntschemier z'packe gsy. Schlussändlech hey d'Inser mit längerer Schpiuduur besser is Schpiu gfunge und die wenige Chance gnutzt. Üsi Jungs sy mit der Verschiebig, dr Aareis und de Wättergabriole in Ins bedient und z'beduure gsy.

Ufschtellig FCB

Noe Fankhauser – Fabian Hänzi – David Vuilleumier – Ruben Dos Santos – Joel Zambrano – Numa Marmier - Fabian Schuler – Denis Schneider – Joel Tüscher – Yannic Kubacki – Dario Leisi

Ersatz

Fabian Jenni - Daniel Marti – Adirut Saengsai (d'Wächsle sy mir nid bekannt)

Abwäsend – es kompletts Team mit Gooli und auem drum und dra!!!

Silas Adam – Mario Bärtschi - Manuel Bigler - Tim Blatter – Nick Eggenberger - Alex Jorge Files – Marco Günther – Joel Knörr – Luca Lauper - Men Meier – Remo von Wartburg - Noah Zambrano

FC Büren an der Aare – FC Aarberg a 3:3 (0:1)

Samstag, 23. August 2025, 16:00 Uhr, Fussballplatz Lachen Büren an der Aare, Meisterschaft 4. Liga

Ufschtellig FCB

Noe Fankhauser - Fabian Hänzi - David Schläfli - David Vuilleumier (82' Joel Tüscher) - Numa Marmier (21' Ruben Dos Santos) - Joel Zambrano - Nick Eggenberger - Mario Bärtschi (52. Yannic Kubacki) - Fabian Schuler - Denis Schneider - Dario Leisi

Ersatz

Tim Blatter – Daniel Marti

Abwäsend

Mit es paar Korrekture, wie gäge Ins und wieder isch es e ganzi Teamsterchi

Staff

Patrick Meier (Trainer), Thomas Lerch (Assistenztrainer), Reto Steiner (Masseur)

Gou

16' 0:1

47' 0:2

49' 0:3

53' 1:3 Ruben dos Santos (Penalty)

59. 2:3 Fabian Schuler

63' 3:3 Fabian Schuler

Charte

46' Ruben dos Santos

49' David Schläfli

Informazione zum Schpiu

Ou im zwöite Schpiu vor nöie Saison muess dr Trainer ufschteue was do isch, und das isch üsserscht mager. Ke Bigler, ke Meier, zwe vo de nöie Schpieler (Noah Zambrano und Silas Adam) sy y de Ferie, dr Luca Lauper faut längeri Zyt verletzt us, äbefaus dr Alex Jorge Files, übere Marco Günther weiss ig nüt, ds glyche Wüsse ha ig bim Joel Knörr und bim Remo von Wartburg, etc., etc.

D'Frog schteut sich, was e Trainer cha bewege, wenn zum Trainingsuftakt es Rumpfteam zur Verfüegig hesch und di Wuchenänd für Wuchenänd muesch zfryde gä, dass überhoupt mit 13 Maa chasch a d'Schpiu reise. Do müesse mir üsi Ambizione uf de biuige Plätz y Griff übercho und chlyneri Brötli bache. Wie mir z'Ohre cho isch, söu de dr Fabian Schuler ou no sächs Wuche, wäg em ne USA-Ufenthaut, fähle. Guet Nacht am Sächsi, sy das geili Ussichte. Mi sött de y dr Teppichetasche scho luege, dass me uf d'Rückrunde es 40-Maa Kader cha zämebrösmele, damit me e Saison einigermasse sorgefrei cha düreschtoo. So stogle mir haut vo Schpiu zu Schpiu und hoffe, dass dr Tag nümme so wyt isch, wo dr Trainer mit em ne zfrydne Lächle ch a dr Linie schtoo.

Das isch jitz scho grad e chley überspitzt formuliert gsy, aber trotzdäm, wyt dernäbe bi ig nid.

Uninschpirierends Schpiu

Konzentriere mir üs uf d'Schpiu vo de beide Abschtieger vo dr letschte Saison. Aarberg chunnt nach anfänglichem Geplänkel besser is Schpiu und bout Druck uf. Vorerscht cha dr FCB däm Druck standhaute und säuber probiere offensivi Aktione z'sueche. Das misslingt aber, Ungenauigkeite und Verständnisschwierigkeite sy dr Hemmschue. Die 24. Minute louft, wo d'Bemüehige vom FCB jäh unterbroche wärde. Penauty für Aarberg! Im ne Zwöikampf geit dr David Vuilleumier villech chley ungschickt äs Wärch. Dr Schütz vo Aarberg lot am Noe ke Chance und versänkt zum 0:1. Büre het zum däm Zytpunkt d'Vorgabe vom Trainer uf ke Art und Wys chönne umsetze. Ds Gfüu vom ne homogene Team het nid chönne ufcho. Y dr 24. Minute chunnt dr Ruben dos Santos, är het lenger müesse schaffe, für e Numa Marmier y Ysatz. Üsi formidabli Matchuhr vom Baronello Malerei Gipserei zeigt die 33. Minute, wo Aarberg zur e passable Chance chunnt, dr Noe Fankhauser isch uf em Poschte und entschärft. Bis zur Pouse bringt dr FCB nüt wäutbewegends z'schtand, aber ou Aarberg kämpft mee gäge die eigete Unzuelänglechkeite. Mit däm 0:1 Rückschtand für e FCB geits y d'Pouse. Isch es lut worde y dr Kabine vom FCB? Isch es Schpezialsäftli zum Ysatz cho? Oder hey d'Schpieler säuber gmerkt, dass me so ke Bluemetopf cha gwinne? So oder so, es muess mee cho, wott me dr Saisonschtart nid grad völlig verchachele.

Doppuschlag y zwe Minute

Nach dr Pouse söu d'Schpiu vo Büre besser wärde. Schpiele – loufe – schpiele wär e Aasatz. Aber zersch hout sich dr Ruben dos Santos sy (fasch obligati) gäubi Charte (47. Minute). Es chunnt zum aakündete Doppuschlag für Aarberg, 47. Minute 0:2, 49. Minute 0:3 und aus chlyses Drüberii no grad die gäubi Charte für e David Schläfli. Befürchtige sy ufchoo, dä Match chönnt im ne Fiasko ände. Einersyts isch es am Noloo vo de Arbärger gläge und anderersyts a üsem FCB, dass ds Schpiu nid komplett kippet isch. Y dr 53. Minute cha dr Ruben e Penauty suverän verwandle und nöii Hoffnige lo ufcho. Dr Fabian Schuler, e begnadete Fuessbauer und Hoffnigsträger, vergit ir 57. Minute e Grosschance, machts aber de zwe Minute schpöter richtig guet und schiesst zum 2:3 y. Jitz isch dr FCB im Schpiu, angaschiert, kämpferisch, ufs Mou geits. Muess me de zersch ds Mässer am Haus ha, bevor me cha Gas gä? 62. Minute, dr Denis Schneider schiesst e Freischtoss und verfäut nume knapp. E Minute schpöter isch dr Fabian Schuler wieder zur rächte Zyt am rächte Ort und erziut ds 3:3. Innerhaub schtarche zäh Minute schrysst dr FCB das Schpiu us dr Hofnigslosigkeit. Druffe blybe und versueche drüü Punkt z'hole! Es hät nid söue sy. Büre git unerklärlecherwys ds Schpiu wieder zur Hang us und Aarberg verfäut die ernöite Füehrig nume um Hooresbreiti. Ds Schpiu neigt sich am Ändi zue, ohni das es Team zu guete Chance chunnt. Aber ei Chance hets no gä. Dr FCB erziut ir Nachschpiuzyt no es Gou, aber äbe nume es Offsidgou. So geit dä Match, leider für üs, unentschiede us.

Dr FCB het über nünzg Minute gseh, z'weni fürs Schpiu to. Schtarchi 20 Minute länge eifach nid um es Schpiu z'rysse. Zuegää, ds Team isch ufgrund vo viu Absänze nid ygschpiut und schtarch dezimiert. Aber we me scho uf em Bitz schteit, söt me über 90 Minute a d'Gränze go und dr Muet ha, öppis z'probiere.

Sy mir gschpannt, wies de usgseht, wenn das Team komplett isch. Wenns um d'Plätz Konkurränzkämpf git und d'Vorschtellige vom Trainer vom Papier uf e Platz projeziert wärde.

Het dr FCB mit em Joel Zambrano ändlech dr langersehnt Regisseur im Mittufäud gfunge? Umsichtig, kämpferisch und mit viu Idee isch dr Joel e Schpieler, wo aus Schautschteu uffaut und wo cha Zeiche setze. Am Delaay Cup in Diessbach het zäme mit em Brueder Noah und em Silas Adam gseh, dass Outomatisme funktioniere und Bäu y d'Schnittschteue immer für Gfahr sorge. Die drei Schpieler hey sich erschtunlich schnäu ygfüegt und hey am Schpiu vom FCB nöii Impulse chönne gä. Und ds Erfröuleche isch, dass vo Aafang a üsi Schpieler mitgmacht hey. Schad eifach, dass dr Joel es paar Wuche ohne Mithiuf vo syne Kollege muess usharre.

Wenn de dr Joel merkt, dass är aus Regisseur cho waute und akzeptiert isch, wärs de nid schlächt, dass er uf em Platz y Situatione derno dr bös Maa schpiut und zwüschedüre seit, wo's düre geit. Kommunikation uf em Platz isch aues.

Hopp FCB