top of page

FCB – SV Port 6:2 (1:0)

Aktualisiert: 23. Dez. 2022

Sonntag 26. Mai 2019, 14:00 Uhr, Sportplatz Lachen


E brisanti Usgangslag E gwüssi Brisanz het me däm Wuchenänd scho chönne abgwinne. Längnou bim ne unberächebare Radufinge (die muesch de zersch mou schlo) u dr FCB gäge dr Letscht, SV Port, wo dr Chopf no cha us dr Schlinge zieh, wenn sie in Büre chöi reüssiere. Grüenstärn het bereits am Samschtig mit em ne Sieg in Töiffele (5:1) vorgleit und dr Druck uf üsi Schütteler lo aaschweue. Schpannig pur a däm Sunntig und für Zartbesiteti e Hochrisikomatsch.


Hiuft Längnou? D’Redaktion het nach em Längouschpiu zum Beschte gäh, dass es nid unmüglech schynt, dass Längnou nach dr Vorschtellig gäge FCB no über die eigete Bei störchlet und so die grandiosi Usgangslag verchachlet.


Längnou hiuft u Büre packts! Churz vor em Apfiff wird klar, dass Längnou in Radufinge, vermuetlech nach em ne rächt dramatische Schpiu, mit 4:3 abgschiffet isch. Dr FCB het sech nid lo lumpe u nach verchnorztem Schtart die Chance packt. Sie chlättere uf e zwöit Tabäuerang und heis jitz ir Hang, us eigeter Chraft dr Ufschtieg z’schaffe. Nöchschts Wuchenänd heisst de dr Gägner Radufinge (Sunntig, 10:00), u de am Mittwuch druf uf em Lache (19:30), sofern me in Radufinge gwunne het, die absoluti Schtärnschtund vo dr Saison, z’auerentscheidende Schpiu gäge Grüenstärn.


Ufschtellig FCB: Beyeler Jarno (dr Panther vo Oberwiu), Schtouffer Eric, Lopes dos Santos Ruben, Scheidegger Mänu (C), Günther Marco (20. Schneider Denis), Rüttimaa Reto, Eggebärger Nick (33. Schläfli Dävu), Tüscher Yannik, Tüscher Schöggu (75. Hofer Mischa), Schueler Fäbu, Kubacki Yannic (77. Eggebärger Nick)


Träner: Tüscher Pädu, Vo Fäute (VoFi) Patrick


Dr Massör: Schteiner Reto


Nid derby: Grogg Reto (Rüggeproblem), Lerch Thömu (aagschlage), Louper Luca (gschperrt)


Verletzt si: Imperiali Diego, Kocher Damian, Schtouffer Miggu


Gou: Exgüsee, dass ig mit de Minute hüt nid cha glänze, aber mis Talänt im Multitasking isch nach em ne Churze i de Hirnwindige chlei verkümmeret. Aber das chunnt de scho wider. Assischtänte (oder -inne cool) wäre härlzech willkomme! Dr Fuessbauverband het ou grad verseit!

1:0 Schneider Denis, 2:0 Rüttimaa Reto, 2:1, 3:1 Schueler Fäbu, 4:1 Schueler Fäbu, 4:2, 5:2 Rüttimaa Reto, 6:2 Scheidegger Mänu

Erschti Haubzyt

Es isch eim fasch chlei gschmuech worde, wo me het müesse feschtschteue, dass wichtigi Schtütze vom Eis hei müesse uf ne Isatz verzichte. So isch dr Louper Luca gschperrt gsi (eigentlech e klevere Schachzug, gäge vermeintlech schwechscht Gägner z’pousiere und sech chlei erhole) u dr Lerch Thomi het gsundheitlech müesse forfait gäh. Im Mittufäud massivi Nachteile, sowou im defensive Berich und i dr Agriffsuslösig. Aber – und das isch wichtig – es hat Angeri wo hungrig si u ds Vertroue äbefaus verdiene.



Ds Schpiu gäge Letscht i dr aktuelle Ranglischte isch de nid öppe zum villech hie und do erwartete Säubschtlöufer worde, ds Gonträäri isch dr Fau gsi. Die hei sich nid grad mit byse u chratze, schtüpfe u schtruble gwehrt, aber mit aune verfüegbare Mittu versuecht, uf em Lache nid z’touche. Es isch ke gschläcketi Haubzyt gsi, schpielerisch e bägguhäärigi Aglägeheit, einzig vo dr Schpannig het dä Matsch gläbt. Aus sachkundige Zueschouer, u das si mir jo sowieso aui, het me nid ganz chönne schnaue, dass me wider zum Mittu griffe het, wo’s bis jitz no nie brocht het. Joo, dr läng u höch Bau i d’Schpitze. So isch mit der Strategie zwangslöufig fasch es Pingpongschpiu drus worde. Chunnt no derzue, dass d’Porter ou nid i dr Lag si gsi, öppis gschiets zur Erheiterig vo de zauhriche Zueschouer byztrage. So isch das Schpiu hin- und härplätscheret, ohni e Hochkaräter vor e Chance chönne z’beschtune. So hei die Lüt, wo nid unbedingt wägem Fuessbau uf e Lache piugeret si, sich i auer Rueh mit de knuschprige u fein gwürzte Fisch chönne vertörle. Gfahr, dass me bim ne Fröidegump sech d’Sunntigfrisur mit em ne Schlarg Mayo versiechet isch verschwinded chli gsi und es Juhuu-Gebrüll mit vouem Muu vou feine Fisch hät de dr Tischnachbar oder Tischnachbarin lo usgseh, wie dä oder die mit em ne schwäre Pigmäntfähler wär uf d’Wäut cho. Aber wie gseit, das aues isch nid passiert, truurig. Es het de vor em Pousetee glich no für nes Gou glängt. D’Porter Hintermannschaft het sich so unbehoufe (dähmlech wär chlei z’hert würd’s aber besser breiche) benoh, dass dr Denis Schneider aus Einzige d’Übersicht usgnützt und 1:0 margiert het. Das wär nid dr FCB, wenns nid no chlei Ufregig gäh hät. Üser Giele hei derfür gsorget u de no, wie sech das ghört, uf dr fautsche Syte. Hei die Glögglifrösche im Füfer inne umegfigureetlet, bis d’Porter gfüeuti drü Mou s’nid hei fertig brocht, uf Resultatkosmetik z’mache. Öppis isch i der ganze Chnuppesaagerei fasch ungergange. Dr. Günter Marco het i dr 20. Minute ds Fäud verletzt müesse verloh. Dr Schneider Denis het si Platz ignoh. Gueti Besserig Marco! Es louft scho die 48. Minute, die 49. chunnt ou no, jo de nähmer die 50. und 51. Minute ou no grad. Dr Pousetee isch scho düregheit gsi, wo sich dr Herr Schiedsrichter mit em ne chräftige Pfiff bemerkbar macht, „ig läbe de ou no“!


E chlini Randnotiz, schnäu igflächtet

Vor em Schpiu, während em Schpiu u nach em Schpiu chasch so einiges beobachte, wo dr cha e Muulegge hingereschriesse. Ig bi öppe am viurtuvor Eis uf em Schuttplatz gsi. E erschti Blottere Porter isch itrudlet. Öppis nach de Eis si die ine i d’Garderobe u si vorläufig nümme usecho. Am viurtuab Eis chunnt wider e Blottere derhär, das Mou chlei die chlineri, gö ine u chömme ou nümme use. Was fuuschte die cheibs dört inne, u de iloufe? Nid nötig, he? Churz nach haubi Zwöi, e schportleche Sound und e Schtoubwueche, neneii es isch kei BMW gsi, es chömme no einisch vier Porter gmüetlech und ir e Bombeschtimmig. Bis du eine vo de nid aktive Porter dene het Bei gmacht: „Dinne schtöh de öii Kollege füdleblutt i dr Kabine u warte uf e räschte vom Dress“. E Bombevorbereitig, Abschtiegskampf pur.

Zwöiti Haubzyt

Mir si üs einig, es cha nume no besser wärde. Chlineri Retuschene im taktische Korsett het die schportlechi Leitig lo hoffe, es chöm de villech chlei besser. Und es isch besser worde, ömu de sicher ds Gouschiesse. Ou schüsch isch Schpiu gfäuiger derhär cho, Schtrukture si ersichtlicher u Körperschproch kantiger worde. Jitz het me hutäng mitübercho, dass dr Wüue die Partie heizbringe, bi jedem Bürer im Oberstübli achoh isch. So het me vermehrt Baustaffette z’gseh übercho, öppe Mou het es Doppupässli für fröidigi Bewegige am Schpiufäudfrand gsorget, mit de Schüss uf ds Gou isch me ou nümme so chnubbesaagerisch umgange. So isch es nid verwunderlich, dass Büre düre Rüttimann Reto d’Füehrig het chönne usboue (Pass vom Schueler Fäbu, dä Name chunnt de no es paar Mou vor). Das Gou het d’Porter uf ds Systema nervosum (Närvesyschtem) drückt und heftigschti Reaktione usglöst. Ungeschtüm, aber kämpferisch vorbiudlech hei sie versuecht, sich gäge die drohendi Niederlag z’schtemme. Plötzlech si ou ihne Schpiuzüg glunge u ab und zue si sie vor em Jarno uftouchet. Ungenaui Schüss oder harmlosi Abschlussversüech hei ds Ziu no nid gfunge. Büre het versuecht, dr Dechu zue z’tue, aber es het eifach umsverrecke nid wöue glinge, ou wüu dr Gooli vo Port so langsam aber sicher isch i Hochform ufgloffe. D’Bemüehige vo Port si de doch no vo Erfoug krönt worde, unhautbar hei sie mit em Aschlussträffer zum 2:1 igschosse. Jitz isch Systema nervosum (mi cha ou Närveflattere säge) wider uf die angeri Site gheit, aber üsi Jungs hei sich robuscht präsentiert und die nötigi Antwort parat gha. Innerhaub vo 2 Minute het dr Schueler Fäbu de Porter z’verschtoh gäh, dass sie de äuä mit em ne lääre Sack d’Heireis müesse unger d’Füess näh. Fouglich schteits auso 3:1 und 4:1. Port het sich tapfer gschlage. Die Eggippe wo afangs Saison mit es paar Lütli isch do gschtange, d’Juniore A ufglöst u i die erschti Mannschaft integriert hei, si wider häre cho. Es unhautbars Gou zum 4:2. Churz druf abe het dr Jarno Beyeler zeigt, dass är no nid zum aute Ise ghört, chatzehaft het dr Panther vo Oberwiu e haubhöche Schuss ume Pfoschte glieret. Z’Vouk het gmööget vor Begeischterig. Jitz isch aber höchschti Zyt worde, däm Schpass es Änd z’mache. Dr Rüttimaa Reto zum 5:2 und dr Mänu (löiferisch ou Duracell) zum 6:2, hei dr Sack zuegmacht. So, jitz geit wieder der Vorhang uf für dä Maa mit der Pfiffe. Mir schriebe scho wider die 48. Minute, de tüe mer haut noch chlei, 49. Minute, wüus so schön isch no die 50. und die 51. Minute. Abpfiff! Sodeli, jitz hei wider aui gwüsst, äär isch no do! Die cheibe biuige Internetuhre, es isch nüm wie früecher.




Die nöchschte Mätsch

Jitz geits Schlag uf Schlag. Es brucht üs aui. Nöchscht Sunntig am Zähni in Radufinge und am Mittwuch druf uf em Lache. Es chönnt si, dass es e ächte Showdown git. Gäng vorusgsetzt, Radufinge wird bezwunge, de isch dr Wäg offe. Wenns de am Mittwuch zum Ufschtieg längt, darf me de ruhig es Fläschli wo päng macht us dr Chuttebuese zoubere!


MIR SI AUI DERBY! Hopp FCB



Aktuelle Beiträge

Alle ansehen

Comments