FCB - FC Schüpfen 1:5 (0:3)

Samstag, 3. Mai 2025, 16.00 Uhr, Fussballplatz Lachen Büren an der Aare

Meisterschaft 3. Liga, Gruppe 4

Text: Hans Peter "Budi" Gribi

Fotos: Stephan Kubacki (kommen etwas später)

Der FCB vermochte seine frühen Chancen zur Führung (Kubacki, Lauper, Schuler) nicht zu verwerten, baute unerklärlicherweise ab und lud den Gegner zum Toreschiessen ein.

Aufstellung

Tim Blatter, Numa Marmier (25' David Vuilleumier), Manuel Bigler (77' Joel Tüscher), Denis Schneider, Remo von Wartburg (46' Fabian Hänzi), Ruben Dos Santos (64' Mario Bärtschi), Nick Eggenberger, Men Meier, Fabian Schuler, Yannic Kubacki (46' Dario Leisi), Luca Lauper (67' Manuel Scheidegger)

Ersatz

Marco Günther

Abwesend

Alex Jorge Files, Joel Knörr, Jascha Kubacki, Stefan Pranjic

Staff

Patrick Meier (Trainer), Thomas Lerch (Assistenztrainer), Reto Steiner (Masseur)

Tore

14' 0:1 Pascal Spring

20' 0:2 Jannis Schüpbach

30. 0:3 Luca Steffen

61' 1:3 Dario Leisi

70' 1:4 Luca Steffen

77' 1:5 Fabian Hänzi (Eigentor, Rückpass auf Torhüter), der SR gibt das Eigentor Tim Blatter

Karten

22' Nick Eggenberger (Grobes Foul)

45' Ruben Dos Santos (Grobes Foul)

72. Men Meier (Halten)

75' Fabian Schuler (Reklamieren)

89' David Vuilleumier (Grobes Foul)

Bemerkungen

Erstes Spiel dieser Saison mit dem vollzähligen Kader (noch ohne die rekonvaleszenten Alex Jorge Files, Joel Knörr, Stefan Pranjic) an Bord.

Trainer Patrick Meier hat das Team, gegenüber der gewonnen Begegnung in Aegerten, auf drei Positionen verändert. Für Günther spielte von Wartburg, Eggenberger ersetzte Tüscher und Bärtschi sah sich durch Kubacki ersetzt. Die Bauernweisheit aus dem Sport "Never change a winning team" fand keine Berücksichtigung.

Sagenhafte 5 gelbe Karten hat sich der FCB geleistet, damit holt Prishtina den FCB in dieser Rubrik kaum noch ein. Unrühmlich und kaum Besserung in Sicht.

Buvette

Der Club99 hat zum traditionellen Raclette-Essen eingeladen und den Buvettendienst souverän gemeistert. Danke schön!

Platzspeaker

Louis Polverini

Spielbericht

Erschti Haubzyt

Nach churzem Abtaschte chunnt dr FC Schüpfen zur erschte Chance. E Flangge vo dr Nr. 16 Shaiylan Gnanambalavanan, verpasse Fründ und Feind, die einte es Gou z'mache, die andere suber abzwehre. E erschti Drohgebärde vo Schüpfe mit em ne Hallo-Wach-Effekt für üsi Jungs. Und scho wird’s gfährlech im Sächzähner vom Gascht. Dr Fabian Schuler, hoffentlech het är die gueti Form vo Aegerten chönne konserviere, setzt dr Yannic Kubacki optimau y (8. Minute). Die Superchance zur Füehrig setzt dr Yannic näbe ds Gou. Es vergeit ke Minute toucht dr Luca Lauper alleini vor em gägnerische Gooli uf, dr zweni platziert Schuss wehrt dr Gooli y Gorner. Dr aaschliessend Eggstoss landet im Chrut usse. Chance Nummer zwöi isch ou vergää, aber aller guten Dinge sind drei. 12. Minute, dr FCB isch immer no am Drücker und chunnt ernöit zur e guete Chance. Lauper und Schuler chöme mit em ne Doppu-doppupass vors Gou, dr Fäbu verpasst us ca. 6 Meter ds Gou nume knapp, aber nid dinne isch ou dernäbe.

Drei Grosschance und Usbüti gleich Null. Het jitz dr FCB ds Puuver scho verschosse? Chunnt dä blöd Schpruch "wär se vore nid macht überchunnt se hinge" einisch mee sy Berächtigung. Jo und no einisch jo. Ab däm Zytpunkt isch vo Büre nümme viu Produktivs z'gsee. Ds Schpiu würkt verfahre, het ke Struktur und dr Wiue macht schlapp. Angers Schüpfen, die wüsse um was das es geit, nää ds Schpiu y d'Hang und löö dr Bau lo loufe. Däm het Büre nümme viu entgägezsetze. Es isch nid erschtunlich und nume e Frog vor Zyt, wenn das der Gascht y Füehrig geit. Schüpfen überchunnt e Freischtoss us 25 Meter zuegschproche, dr Tim Blatter pariert, cha aber dr Bau nid blockiere und dr Pascal Spring erbt zum 0:1. Schüpfen isch am Drücker und macht Dampf. Paar Minute schpöter schtreift e Schuss d'Latte. Dr Minutezeiger het zwe Umdräiige abgschpuelet, hets bi Büre scho wieder ygschlage. Mi em ne Doppupass tanke sich zwe Schüpfer dür d'Verteidigungsreihe vo Büre und dr Jannis Schüpbach, alleini vor em Tim, het ke Problem d'Füehrig uszboue, 0:2. Gäng wenn der FCB mit em Chärtle aafot, isch das es Zeiche, das sich liechti Fruschterschynige breit mache. Für es grobs Foul und es Wägmüpfe gits für e Nick Eggenberger dr berächtigt gäub Ggartong. Schüpfe isch wieder im Aamarsch. E schtramme Schuss us zwöuf Meter cha dr Tim Blatter uf Choschte vom ne Gorner entschärfe. Dr Gorner isch nüt Schpektakulärs, Büre versuecht ufzboue, schytteret aber mit de Bemüehige scho paar Meter nach em Sächzähner. Obwous jo nid so heiss isch, winkt dr Schiri zur Tränki, ds Gurgeli aanetze und hopp de Bäse, wyter im Texscht. Bi der Glägeheit wächslet dr Patrick Meier dr David Vuilleumier für e unglücklech kämpfend Numa Marmier y (Dr Gring nid lo hange Numa, du bisch e Bericherig für das Team und es Verschpräche für Zuekunft).

Der FCB troucht wieder mou vor em gägnerische Gou uf. Dr Aagriff cha nume dür es Fou gschtoppet wärde. Dr Fabian Schuler, normau e träffsichere Maa, brätscht dä Bau y d'Botanik. Im Gägezug machts Schüpfen besser. Dr Luca Steffen facklet us 12 Meter nid lang und versorget dä Bau zum 0:3 y länger Egge. Uf de Räng macht sich Frustration breit und dr Erger wird mit ere höchere Kadänz a Biertabloo abegschwänkt. Büre chunnt ernöit zum ne Freischtoss. Dasmou schteit dr Ruben Dos Santos häre, aber ou dä Versuech cha d'Zueschouer nid verzücke. Zäh Minute vor dr Pouse schteit dr Tim Blatter im Fokus. Dr Sächzähner vo Schüpfe drückt us 16 Meter ab und dr Tim wehrt y Gorner. Bis zum Haubzytpfiff passiert nüt me, wo üs cha us de Socke houe. Usser, dass dr Ruben Dos Santos ou is Druckli "Fruschtfoul" längt und sy mittlerwyle 9 gäubi Charte vo dr Saison präsentiert überchunnt.

Nach dere unzuelängleche Leischtig, nach em Startoptimismus, isch d'Frog berächtigt, cha dr FCB reagiere und no öppis Zäubars usehole?

Zwöiti Haubzyt

Für e Remo von Wartburg chunnt dr Fabian Hänzi is Schpiu und dr Dario Leisi ersetzt dr Yannic Kubacki. Früschi Chräft und d'Chance zur Wändi? Es sy drei Minute gschpiut, dr FCB chunnt zur e Freischtosschance. Dr Ruben Dos Santos nimmt Aalouf und zirklet dä Bau y d'Gfahrezone, wo sich niemer für dä Pass zueschtändig findet. Das cha me fang scho mou nüchtern säge, die schtehende Bäu vom FCB sy hüt nid ds Gäube vom Ei gsy. Ke überraschendi Variante, ke zündende Idee, ke schtramme Schuss ufs Gou. Es isch wieder a Schüpfen, nahtlos chnüpfe sy a d'Leischtig vor erschte Haubzyt a. Dr Jannis Schüpbach zieht us 15 Meter ab, aber dr Tim Blatter cha dä Schuss blockiere. Im Gägezug versuechts dr Fabian Hänzi, sy Schuss landet im Ussenetz. Drufabe schtriecht e Freischtoss vo Schüpfen knapp am Pfoschte verby. 61.Minute, dr Dario Leisi kämpft sich souverän dür d'Abwehrreihe vo Schüpfe, blybt im ne Zwöikampf chley glücklech am Bau und düpiert dr ungeschtüm useloufend Gooli, 1:3. Y dr 64. Minute ersetzt dr Mario Bärtschi dr blass und Rot gfährdet Ruben Dos Santos und ir 67. Minute geit dr glücklos kämpfend und äbe ou blass bIybni Luca Lauper für e Manuel Scheidegger ab em Fäud. Isch das dr Weckruef, isch das d'Initialzündig vor e Ufhoujagd?Mir chöi leider nüt Positivs brichte. Anschtatt, dass üse Luca breicht, breicht dr Luca (Steffen) vor Gägepartei und schteut dr aut Abschtand wieder här. Dr Schuessversuech vom Fabian Schuler us 16 Meter cha dr Gooli vo Schüpfe pariere. Fruschtfoul Nummer drüü. Dr Men Meier kassiert zurächt e gäubi Charte für e unsanfti Begägnig mit em ne Gägner. E Gorner, usgfüehrt vom Nick Eggenberger, fischet dr Gooli vo Schüpfe problemlos us dr Luft. Es wird wieder einisch Zyt für ne Charte, dasmou überchunnt dr Fabian Schuler ds gäube Ggartong für unqualifizierts Lafere (Fachschproch: Reklamieren). Wie unsicher sich der FCB hüt präsentiert het, unterstrycht dr Rückpass vom Fabian Hänz zum Tim Blatter. Ohni Kommunikation in angenehmer und verständlicher Tonlage, so zum Bischpiu: "Tim, ig schpiele zrugg", oder eifach nume es luts "Tim", kulleret der Bau zum 1:5 is Gou (77. Minute). By dere Glägeheit chunnt dr Joel Tüscher für e Manuel Bigler is Schpiu. Schüpfen blybt gfährlech und setzt e Freischtoss knapp näbe ds Ghüüs. Minute schpäter gseht dr Manuel Scheidegger sy Schuss vom Gooli pariert. Dr Pfupf isch duss, no chley es Hin und Här und dr erlösend Schlusspfiff nach unnötige Nachschpiuminute.

Fazit

Dr Uftritt vo üser Mannschaft, isch dere Affiche "Chance wahre", nume ganz am Aafang grächt worde. E ambitionslose und enttüschende Uftritt uf em Lachen. Hei die Wächsle gägenüber em Schpiu in Aegerten für Verwirrig gsorget? Villech cha das sy. Aber es erklärt nid dä farblos Uftritt mit em Wüsse, dass das ds Schpiu vo de Schpiu y der Rückrunde isch. Villech wär e Schtart us dr gsicherete Verteidigung ds bessere Mittu gsy? Däm widerschpräche aber d'Schtartminute, wo mes verpasst het, d'Chance z'wahre und vorzlege. Sygs wys wöu. Bi räschtleche füüf Schpiu no Täuffelen yzhole (7 Punkt Differänz) wär vermässe z'gloube. Ou y dere Hinsicht, dass Täuffelen no gäge Grünstern, üse FCB, Aarberg, Grafenried und Rüti b. Büren es vermeintlech liechts Programm het. Ei Aschpekt isch ou nid ohni. D'Schtrafpunkt schpräche ganz klar gäge FCB, sötte die zum Zug cho. Aber - nichts ist unmöglich! D'Hoffnig nid ufgää.

Tim Blatter und Numa Marmier

Beide noch spielberechtigt bei den Junioren B und Stammspieler der 1. Mannschaft, flotte und gradlinige Jungs, hatten heute, aus den verschiedensten Gründen, einen schweren Stand. Solche Spiele gibt es immer wieder, ob jung oder alt, ob routiniert oder nicht. Und eines ist auch klar. Einen höheren Anteil an der Niederlage haben weder du Tim, noch du Numa. Das Team als Ganzes trägt die Verantwortung. Also lasst euch nicht verrückt machen, bleibt wie ihr seid, nämlich sympathische Jungs und vielversprechende Fussballer des FCB. Kopf hoch!

Merci Louis für dini perfekte Notize zum Schpiu.

Nöchschts Wuchenänd: Samschtig, 10.05.2025, 18:00, FC Ins Müntschemier – FCB in Ins

Hopp FCB