FCB – FC Grünstern 6:4 (2:2)

Samstag, 25. Oktober 2025, 16:00 Uhr, Fussballplatz Lachen Büren an der Aare

Meisterschaft 4. Liga

Text: Hans Peter "Budi" Gribi

Foto: Stephan Kubacki (folgen später)

Tabelle wird noch aktualisiert

Aufstellung FCB

Tim Blatter, David Vuilleumier, Nick Eggenberger, Fabian Hänzi, Marco Günther, Denis Schneider, Joel Zambrano (40' Mario Bärtschi, 46' Joel Zambrano), Silas Adam, Dario Leisi (88. Numa Marmier), Yannic Kubacki, Noah Zambrano (88' Mario Bärtschi)

Ersatz

Noe Fankhauser

Abwesend

Manuel Bigler (gesperrt), Daniel Marti, Men Meier (gesperrt), Ruben Dos Santos (gesperrt), Fabian Jenni, Joel Tüscher (Militär), Fabian Schuler (Ferien)

Verletzt

Alex Jorge Files, Joel Knörr, Luca Lauper

Staff

Patrick Meier (Trainer), Thomas Lerch (Assistenztrainer)

Tore

05' 1:0 Dario Leisi

28' 2:0 Dario Leisi

30' 2:1 Yannis Keller

34' 2:2 Julien Barthe

65' 3:2 Yannic Kubacki

67' 3:3 Mathieu Vonäsch

71' 4:3 Dario Leisi

86' 5:3 Yannic Kubacki

87' 5:4 Gilles Tanner

89' 6:4 Joel Zambrano

Bemerkige

Dr Thomas Lerch ds letschte Mou aus Assischtänzträner uf em Bänkli. Härzleche Dank für dis Engagement und dis Härzbluet. Du wirsch am Team fähle.

Manuel Bigler dür d'Disziplinarkommission vom SFV provisorisch bis am 16.12.2025 gschperrt.

Marco Günther's provisorischi Schperri isch ufghobe, derfür isch dr Men Meier provisorisch us em Verchehr zoge bis am 16.12.2025. Was für es Gabaree!

Dür die chaotischi Rapportierig vom Schiedsrichter und Abarbeitig vo dr Disziplinarkommission us em Schpiu gäge Längnou, muess dr Trainer Patrick Meier ernöit Rötusche im Mittufäud vornä.

Dr Gägner, wo mir nach em ne Gschpräch vor em Matsch e sympathische Ydruck gmacht het, isch nach em Matsch was gisch was hesch vom Lachen gflüchtet. Y dr Rückrunde nimmt de üses Team ds Bier mit, höcklet is Wäudli und tuet sich de dört vertöörle. Mi sött chley zunenand luege.

Vorbereitig zum Schpiu

Dr Marco "Butti" Sutter het d'Yfahrt, dr Parkplatz und sämtlechi Wäge vo Bärge vo Loub befreit. Marco, mir chöi üs scho glücklech schetze, gsehsch du d'Büez und machsche ou. Guud wärt dä Giu! Merci viu mou!

Erschty Haubzyt

Uf em schwär beschpiubare Lachen, es het praktisch dr ganz Morge gschiffet, hat me sech nid lang mit Abtaschte beschäftiget. Bereits y dr 4' touchet dr quirlig und schtetig Unrueheherd Dario Leisi vor em gägnerische Gou uf. Dr Nick Eggenberger het ihn muschtergüutig y Szene gsetzt. Dr schtramm aber wenig platziert Schuss cha dr gägnerisch Gooli Pascal Wolf sorgefrei blockiere. Ke Minute schpöter schiesst dr Noah Zambrano e scharfe Eggbau, dä Bau chunnt vom ne Gägner ernöit zum Noah, sy Massflangge chöpflet, jo du hesch rächt gläse, chöpflet dr Dario zum 1:0 y. Was für ne Schtart und was für ne Schpiufröid. Hoffentlech het die chley lenger häre aus ou scho. Mir erinnere üs, mehrmous het dr FCB e gueti Schtartviertuschtund liechtfertig zu de Finger usgää. Aber ke Angscht, es wird no besser und das über d'Schtartviertuschtund us. Dr Dario Leisi, är schteit und louft gäng richtig und lot derby die gägnerischi Abwehr schlächt usgseh, isch ou y dr 14. Minute wieder zur Schteu. Sy Abschluss chlatscht a d'Latte. Bir nöchschte Aktion isch ou wieder dr Dario dr Houptdarschteuer. Dr Yannic Kubacki bedient sy Kolleg wies im Büechli schteit, dr Schuss schtrycht knapp am Pfoschte verby.

Es isch Zyt, dass ou Grünstern mou zur Schproch chunnt. Ufsässig und ggäderig im Abwehrverhaute und loufröidig und ziuorientiert, wenns uf e Chaschte vom Tim Blatter losgeit. Aber dä Schneid het dr FCB Grüenschtärn vorerscht mou abkouft. Dr diräkter Zug ufs Gou und die bessere Chance kreiere üsi Jungs. Y dr 18. Minute aber muess Büren d'Glücksgöttin aafordere, dass dr Usglych nid faut. E Schuss cha dr Tim nid oder nume ungnüegend abwehre (mini Ouge sy ou nümme die beschte), us churzer Dischtanz hout e Gägner dä Bau is Chrut use. Do wär äuä ou meh drinnegläge.

Es fougt e Phase wo prägt isch vo Zwöikämpf im Mittufäud. Ungenaui Aagriffsversüech, teils ou beyflusst dür ds Terrain, beherrsche ds Schpiu. Überragend nächhär e Schpiuzug übere Joel "Migu" Zambrano, wo dr Silas Adam perfekt aaschpiut, sy Schuss pariert dr wyt vor em Gou poschtiert Pascal Wolf mit em ne Riesereflex.

Es isch wieder Dario-Time

E Minute schpöter isch wieder "Dario-Time". Öppe 30 Meter vor em gägnerische Gou läschelet dr Dario Leisi am ne Gägner, wo ir Vorwärtsbewegig dr Aagriff wot aakurble, dr Bau vom Fuess, louft ufs Gou und schiesst überleit und unhautbar y. 29. Minute, dr FCB füehrt 2:0. Mir konschatiere, d'Konzentrationsphase vo Büre het 30 Minute häreghaa. Und nächhär?

Uf und näbem Platz Dynamit im A….

… hets zwöimou kachelet

Het sich dr FCB im Vorschprung gsünnelet, oder het dr Gägner e Zagge zuegleit? Es isch es Quentchen beides der Fau gsy. Grüenschtärn het ufdräit und isch no forscher a d'Seck. Innerhaub vo 4 Minute isch dä schön Vorschprung d'Schyssgass ab, buechstäblech. 30' dr Yannis Keller schiesst wuchtig zum Aaschlussträffer y und 4 Minute schpöter isch es eine vo de Barthe's, dr Junlien Barthe, woch dr Usglych cha härschteue. Es wär bimene Hoor no zur Füehrig vu Grüenschtärn cho, wär dr Tim Blatter nid uf em Poschte gsy (40'). Y dr glyche Minute muess dr Joel Zambrano mit em ne hochrote Chopf dr Platz verlo, dr Mario Bärtschi chunnt ufs Fäud. Dr Grund für dä Wächsu isch souglatt. D'Schtüupe hey am Migu d'Luft abgschteut, nei natürlech ds Bluet. Tipp a üse Hoflieferant Deely.G Sport, die chrotte Schtüupe hei d'Usmass für Schpargubei und nid für Muskumonschter. E Lösig wird gsuecht!

Ds Sockemonschter vom Lachen. Het dä die Socke am ne Clochard gmugget?

Mit däm für Büre unbefriedigende 2:2, chame gloub so säge, geits y d'Pouse.

Zwöiti Haubzyt – Närveflattere und Unterhautig pur

Dr Joel Zambrano louft wieder y, sichtlich erlöst und mit normaler Huttönig. Und es geit grad los wie d'Füürwehr. Dr Yannic Kubacki, im Verlouf vo dr Saison gäng schtercher worde, setzt sy Verdrängig y und tankt sich dür drei Gägner düre, sys Zämeschpiu mit em Noah Zambrano gfingt dr Dario Leisi, wo nid y gwohnter Manier die Rieseschance cha usnütze. 8 Minute schpöter schlots bi Grüenschtärn wieder y, aber us em erwartete Goupfiff wird’s leider e Foulpfiff.

Ds Schpiu bietet jitz e Unterhautigswärt, wie das nume erfougrychi Netflixserie härebringe. Hin und här, mou die mou die angere, und aues mit viu Anggaschemaa und teils knuschprige Zwöikämpf, fair und im Rahme vom Erloubte. E Ougeschmaus für e Fuessbaukenner und es Närveflattere für üs Bürer.

Das müesse mir schnäu yflächte

Und eis muess me ou no a Maa bringe. Gleitet isch das Schpiu worde dür ne junge und souveräne Schiedsrichter, wo ohni Showylage und Diskussione d'Schpiu über d'Runde brocht het. Und no e zwöiti gueti Nachricht. Disziplinarkommission in Bärn ufpasse! Büre het kei einzigi Charte kassiert. Mir wüsses, dass mir es absolut normaus und sympathischs Team hey, wo kes Höörli cha chrümme. Bärn bitte notiere. Danke!

Wyter mit Schutte

Bim Närveflattere sy mir gsy, wo mir us x Begägnige kenne und fürchte. Und das isch hüt überstrapaziert worde. Grüenschtärn fahrt e Aagriff , wo viuverschprächend usgseht. D'Flangge y hinger Sächzähneregge wird haubhöch uf e Penautypunkt wytergleitet, dr ufmerksam Denis Schneider cha kläre. Ir 65. Minute die erschti, vermeintlichi Erlösig. Uf ne Eggbau cha dr Dario Leisi abschliesse, dr Abpraller chunnt zum beschtens poschtierte Yannic Kubacki, mit viu Power macht dr Kubi fasch ds Netz kaputt, Büre füehrt wieder (3:2 y Minute 65).

Was Erlösig? Nüt isch gsy, wyter flattere mit de Närve. Y dr 67. Minute cha dr Vonäsch ds Schpiu wieder usglyche. Büre rackeret, wott unbedingt dä Sieg. Aber Grüenschtärn isch e unbequeme Gägner. E Wytschuss vom Gägner schtrychlet fasch d'Latte und im Gägezug het dr FCB e Latteknauer z'beduure (weiss grad nümme, wär gschosse het). D'Uhr zeigt die 72'. Es isch wieder einisch am Dario Leisi. E Abpraller verwärtet är us füüf Meter zur ernöite Füehrig. Churz drufabe hout dr Damien Barthe, normalerwys zum Gou mache aagschteut, e Bürer vo de Socke, dass es eim gruuset. Dr guet poschtiert Schiedsrichter zückt die gäubi Charte. Vier Minute schpöter gseht dr Damien Barthe für es Dutzendfoul ernöit die gäubi Charte und flügt gäubrot vom Platz. E Vorentscheidig? Für die scho wieder vermeintlechi Vorentscheidig sorget y dr 86. Minute dr guet ufgleit Yannic Kubacki. Uslöser isch e Doppupass uf dr rächte Syte mit em Joel Zambrano uf dr Mittulinie, dr Kubi git Vougas, zieht bis 20 Meter vors Gou und drückt us vouem Louf ab, dr Bau schlot via lingge Pfoschte zum 5:3 y. Verflixt und zugenäht, die cheibe Grüenschtärn lö nid lugg. E Minute schpöter sorget dr Gilles Tanner für e Aaschlussträffer. Jitz eifach ke Chabis me baschtle Jungs, heybringe das Züüg. Churz vor Schluss vo dr reguläre Schpiuzyt, mir schriebe die 89. Minute, bricht dr Nick Eggenberger rächts düre, zieht abe bis zwüsche 16er und 5er, leit dr Bau zrugg und dr Joel Zambrano verrumt souverän zum 6:4.

Fazit

Grüenschtärn isch wider Erwarte e zähje Gägner gsy. Do het me ds Gfüu Tabäualag isch so ussagechräftig, und erchlüpft nächhär, wenn me uf Granit bysst. Trotz de 4 Gägegou, het der FCB mehrheitlech e homogeni Leischtig zeigt. D'Löcher im Mittufäud sy besser gschlosse worde, aus im Schpiu gäge Nidau. Aber vo perfekt, chame no nid rede.

Ds Schpiu vom FCB isch syt dr Umschtellig uf ds Syschtem 4-3-3 sicherer worde und me schteut fescht, dass ds Organisiere vo dr Defensive liechter faut und überschaubarer isch. E wytere Pluspunkt isch ds Uslöse vo de Aagriffe, wo meh Variante im Aaschpiu zuelot. Tönt villech chley gschwuue, aber me überchunnt dr Ydruck, dass es de Schpieler ringer louft.

Ou wenn ig nid aui namentlech erwähnt ha, isch das e Sieg vom Kollektiv. Es git Schpieler, die mache e super Job und sy sehr wärtvou, und kene merkts. Zum Bischpiu dr Joel Zambrano, wo immer solid und mit viu Übersicht uf em Bitz schteit, wenn är nid grad aus Sockemonschter Gägend unsicher macht. Oder dr Denis Schneider, ou eher e schtiue Schpieler aber zueverlässig und solide. D'Vierchötti mit em David Vuilleumier (mit er e super Leischtig in Nidau, ha ig vergässe z'erwähne), Nick Eggenberger, Fabian Hänzi und em Marco Günther (immer ungerwägs mit sym kaputte Chrützband, unmügleche Cheib) wo neu formiert isch und e gueti Figur macht. Nid vergässe dr Silas Adam, e schnäue Maa, wo wäge dr Personalsituation nid uf sym gwohnte Poschte (mit Dampf ussedüre, öb aus Usseverteidiger oder aus Schtürmer) schuttet. Und schliesslech dr Noah Zambrano, mannschafsdienlech, ds Oug für e finau Pass und läuferisch schtarch und e ggäderige Cheib im Zwöikampf.

Beduure, isch villech nid grad ds richtige Wort, aber es faut mir grad nüt angers y, ha ig mit em Numa Marmier und em Mario Bärtschi. Sie sy a jedem Training derby, uf die Zwe isch 100% Verlass und sie finde sich besser aus Profis mit dr Reservischteroue ab. Öii Zyt chunnt, ghoue oder gschtoche, dürezieh und genauso wytermache. Es isch dr richtig Wäg und dir heit scho mängisch bewiese, dass dir y däm Team chöit beschtoo. Ig zieh dr Huet vor öich. Grandiosi Giele.

Jitz isch me nach Verluschtpunkt uf em 6. Platz, vier Punkt hinger em FC Bözingen 34 (das erschtuunt) und 4 Punkt hinger em FC Aarberg, wo no zwöi Schpiu muess nochehole, eis Punkt hinger FC United Hermrigen-Jens und punkteglych mit dem FC Lengnau.

Merci Noe Fankhauser für Korrekturmäudig, säubschtverständlech syt dir uf em 5. Platz nach Verluschtpünkt und nid 6. Sorry, rächne isch Glückssach.

Man of the Match

Es faut mir schwär, Schpieler usezhebe. Aber die füüf Gou wo dr Dario und dr Yannic gschosse hey, schpräche haut scho e eigeti Schproch. Chunnt derzue, dass die Beide kämpferisch überzügt hey und im Verlouf vor Saison gäng besser worde sy. Was so e flyssige Trainingsbsuech aues cha us eim usechuzele, erschtuunlich. Darum my Nomination für Men (nid dr Meier) of the Match es Doppupack, dr Dario Leisi und dr Yannic Kubacki! Heisst auso grosso modo zwe Chischte sy fäuig. Nid vergässe, mir alüte, wenns so wyt isch.

Uf däm Wäg wünsche mir aune tröie Zueschouer und Sponsore, üsne Funktionäre, Mitglieder und de Schpieler e gueti Winterpouse. Nid vergässe, ab und zue e Blick uf d'Houmpäitsch – und du bisch im Biud!