FCB - FC Lengnau 1:1 (1:)

Hans Peter Gribi
vor 11 Stunden
4 Min. Lesezeit

Sonntag, 30. August 2026, 14:30 Uhr, Fussballplatz Lachen Büren an der Aare

Meisterschaft 4. Liga

Text: Hans Peter "Budi" Gribi

Foto: Stephan Kubacki

Aufstellung FCB (4-2-3-1)

Tim Blatter, Marco Günther (56. Noah Zambrano), Denis Schneider (C), Nils Blatter (49' Ruben Dos Santos), Nick Eggenberger, Joel Zambrano (80. Fabian Hänz), Men Meier (67. David Vuilleumier), Simao Lopes Magalhaes (56. Yannic Kubacki), Ledion Ramadani (67. Luca Lauper), Manuel Bigler (54' Dario Leisi), Fabian Schuler

Verletzt

Silas Adam, Alex Files, Noe Fankhauser, Joel Knörr, Daniel Marti

Aufgebot anderes Team

Mario Bärtschi, Patrick Frieden, Nikola Jankovic, Numa Marmier, Fabian Suarez

Match mit Junioren B (erweiterter Kader)

Rafael Azevedo Alves, Jonas Beyeler, Alan Duflon, Neal Homberger, Robin Steiner

Staff

Manuel Scheidegger (Trainer), Carlos Manuel De Sousa Files (Assistenztrainer), Jarno Beyeler (Torhütertrainer), Reto Steiner (Masseur)

Tore

19' 0:1 Emir Mustafa

44' 1:1 Manuel Bigler auf Pass von Joel Zambrano

Karten

57' Denis Schneider gelbe Karte

67' Nick Eggenberger gelbe Karte (2)

Bemerkungen

Kein Ersatztorhüter im Aufgebot

Match

Das Schpiu het am super Wätter nid chönne ds Wasser reiche. Enttüschig pur und es Schpiu arm a Höhepünkt und rych a Fähler. Ha gmeint, judihui schöns Wätter, e geili Ufschtellig und aus Tüpli uf em i no drüü Punkt yfreese und dr Sunntig isch grettet. Do isch mir dr Schuss aber gwautig hingeruse. Dä Fahrplan ha äuä nume ig oder öppe no dr Staff uf em Radar gha. Item, Büre het nid dr bescht Tag usegläse. Mir isch ufgfaue, dass es a dr Disziplin im Pass-Schpiu gmanglet het, ds Löuferische het mi ou nid chönne überzüge, vorauem y dr Ändphase, wo me Druck erzügt het, sy etlechi uf em Zahnfleisch gloffe, oder hey dr Wiue nümme ufbrocht, dr inner Schweinehund z'überwinde und nochezsetze. So het Lengnau gäng wieder chönne gfährlechi Konter fahre und bim ne Hoor wär sie no zum 1:2 cho. D'Reaktion bi de Bauverlüscht sy gäng es Muggeseckali z'schpät cho. Es isch aber sicher ou do dra gläge, dass Lengnau e unbequeme Gägner isch gsy. Gäng noch am baufüehrend Maa und guslet und guslet, und das viu mou mit Erfoug. Die Cheibe hey eifach nid lugg glo u das Rezäpt isch scho chley ds Züngli a dr Waag gsy. Was nid neu isch, aber am Sunntig hüüfiger ufgfaue isch, isch ds Verpasse vom Pass a besser poschtiert Mitschpieler. Etlechi guet ygfädleti Aagriffe sy schliesslech am ne Gägeschpieler gschitteret. Dr Doppupass, eis vo de bewährte Mittu, für dür ufmüpfige Gägner z'cho, isch leider Manguwar gsy.

So jitz isch gnue gläschteret. Jitz versueche ig, y mim Fruscht inne, no öppis haubwägs Vernünftigs y Taschte z'brätsche.

Erscht Haubzyt

Büre hat gar nid so schlächt aagfange. Sy hey probiert, ds Zepter y d'Hang z'nä, ds Schpiu uf die eigeti Syte z'rysse, was gar nid so schlächt glunge isch. E schöns Zämeschpiu vom Simao Lopes uf e Ledion Ramadani het Gfahr brocht, doch dr Ledi het dr Bau nid suuber verwütscht. Es paar Minute schpöter versuechts dr Fabian Schuler us 18 Meter, dr Gooli isch parat und fischet dä Bau. Der FCB het y de erschte 15 Minute dr Gloube erweckt, dass me das Schpiu hüt wott und cha für sich entscheide. Es brucht mängisch nid viu, und me schteit mit lääre Häng do. Lengnau bis do häre harmlos, trifft völlig überraschend zur Füehrig. Jitz isch Charakter gfrogt, jitz muess me haut no chley meh tue und die Scharte uswetzte. Ds Schpiu git y dr Foug ab und wird zum Knorz. Es erschtuunt nid, dass Torchance dünn gsääit sy. Eini vo de wenige Chance, wo üs bote wird, isch fasch es Eigegou vo Lengnau. Doch dr Gooli isch häuwach und entschärft die heikli Situation. Uf dr angere Syte isch es dr Marco Günther, wo mit em ne Schuss us schpitzem Winku fasch dr Gooli düpiert. Aber ou do, isch är uf em Poschte.

Es isch dr schönscht Aagriff gsy vom ganze Schpiu. Dr Denis Schneider louft a dr Sytelinie y d'Schpiufäudhäufti vo Lengnau, us ca. 25 Meter gfingt sy Flangge der Manuel Bigler punktgenau, chräftig nickt dr Mänu zum Usglych y.

Zwöiti Haubzyt

Es isch wägerli nümme viu passiert. Im Verlouf vo dr zwöite Haubzyt wärde y dr 46., 49., 54., 56. und 67. Minute Wächsle vorgno. Es isch e Versuech wärt, meh us däm Schpiu z'mache. Nämers grad vorewäg, viu hets nid brocht. Y dr 52. Minute erziut Lengnau es Offsidegou. Y dr 62. Minute lanciert dr Noah Zambrano dr Fabian Schuler muschtergüutig, dr Schuss us paar Meter cha dr guet Gooli pariere und dr Nachschuss vom Joel Zambrano landet äbefaus y de Häng vom Gooli. Y dr 70. Minute louft dr Luca Lauper y Sächzähner und wird vom ne Längnouer aagryffe, dr Luca chunnt zu Fau, und - d'Pfyffe blybt schtumm. Es schynt gloub dr rächt Entscheid z'gsy sy, leider ke Penauti. Büre drückt und suecht d'Entscheidig. Mir heys ygangs erwähnt, warum die Bemühige nid vo Erfoug krönt sy gsy. Z'ungeschtüm, z'unpräzis und ds Oug für e besser poschtiert Mitschpieler, wo gfäut het. Me muess am Schluss mit em ne Punkt z'fryde sy, wüu Lengnau d'Chance zum Siegtor gha het, aber dank Unvermöge ou nid het chönne reüssiere.

Nächste Woche

Nöchscht Samschtig, Aaschpiuzyt 19:00 Uhr, isch dr FCB uf em Längfeld 2 in Biel gäge FC Besa z'Gascht.

Hopp FCB!