FCB – FC Ins Müntschemier 4:0 (2:0)

Hans Peter Gribi
vor 4 Stunden
6 Min. Lesezeit

Zweites Spiel in der Rückrunde und zweiter Sieg. Der FCB bestätigt sich in der Spitzengruppe.

Samstag, 4. April 2029, 16:00 Uhr, Fussballplatz Lachen Büren an der Aare

Meisterschaft 4. Liga

Text: Hans Peter "Budi" Gribi

Foto: Stephan Kubacki

Daten zum Spiel: Louis Polverini

Aufstellung FCB (4-1-4-1)

Noe Fankhauser, Silas Adam (76' Ruben Dos Santos), Nick Eggenberger, Denis Schneider, Marco Günther (70' David Vuilleumier), Men Meier (80' Daniel Marti), Noah Raul Zambrano, Joel Miguel Zambrano, Fabian Schuler, Simao Lopes (65' Nevio Eggli), Yannic Kubacki (60' Fabian Hänzi)

Ersatz

Tim Blatter, Rafael José Azevedo Alves

Abwesend

Mario Bärtschi, Manuel Bigler (gesperrt), Fabian Jenni, Numa Marmier

Verletzt

Alex Jorge Files, Joel Knörr, Luca Lauper, Dario Leisi, Joel Tüscher

Staff

Patrick Meier (Trainer), Gianluigi Maffeo (Assistenztrainer)

Tore

16' 1:0 Fabian Schuler (Freistoss aus 13 Metern)

45' 2:0 Fabian Schuler auf Pass von Silas Adam

50' 3:0 Simao Lopes auf Pass von Ruben Dos Santos

82' 4:0 Fabian Hänzi mit Fallrückzieher nach punktgenauer Flanke von Nevio Eggli

Keine Karten für den FCB, wie schon in Ipsach. Geht ja!

Bemerkungen

Silas Adam nach 45 Minuten ausgewechselt, "was gisch was hesch" ins Auto der Eltern und im Eiltempo nach Zürich Flughafen, mit dem Ziel Mallorca. Schöne Ferien Silas.

Nachträglich ist mir das Fehlen von Dario Leisi zu Ohren gekommen. Eine Listenoperation zwingt ihn zu einer Pause. Gute Besserung!

Erster Startelfeinsatz von Simao Lopes Magalhaes (25.05.2010) und gleich die Krönung mit dem schlitzohrigen Treffer zum 3:0.

Im Vorspiel siegte die zweite Mannschaft gegen den FC Grünstern mit Toren von David Probst, Nils Blatter und Adam Khadizov mit 3:0.

Erschty Haubzyt

Büre gfingt nach em Aapfyff perfekt is Schpiu, schpiut und louft wieder y Schtellig, so wie erfougsverschprächende Fuessbau muess sy. Dr Fabian Schuler schliesst e flüssig vortreite Aagriff mit em ne Schuss us 20 Meter ab, schytteret aber no a dr Präzision. Die gueti Phase duuret a, dr Noah Zambrano bedient a dr Mittulinie dr Marco Günther, dr Marco drückt vo 16 Meter ab und ghörts nume ordentlech a dr Latte tschädere. Bereits y dr 8. Minute gits e längeri Pouse und ds Aafangsfurioso vom FCB isch jää unterbroche. E Zwöikampf zwüschem robuschte Yannic Kubacki und em no robuschtere Sandro Moser islch dr Uslöser gsy. D'Nummere 5 vo Ins Müntschemier muess ds Schpiufäude verletzt verloo. Mir wünsche vo dere Schteu gueti Besserig. Ds Schpiu geit wyter, aber wie obe scho gseit isch das Aafangsfurioso abgwürgt worde, Büre isch zwar gäng no dominant, aber nümme so souverän, wie aafangs vom Schpiu. Sie schpiele die flüssige Aagriffe nümme konsequent fertig und Ins Müntschemier het mittlerwyle ou is Schpiu gfunge.

Dr Fäbu, Man of the Match, git ou näbem Platz dr Ton a!

Fabian Schulers erschte Schtreich

Mir wüsse aui, wie wärtvou dr Fäbu für üses Team isch. Är isch immer e Unruheherd und e unbequeme Gägner. Schnäu, trickrych und mit em ne rächte Pfung vom ne Schuss usgschtattet. Syt dr Saison 2018/2019 isch dr Fäbu z'Büre und us der erschte Mannschaft nümme wägzdänke.

Mir notiere die 17. Minute, us 13 Meter fasch zentrau vor em Gou, wird em FCB e Freischtoss zuegschproche. E Dischtanz für e Fäbu - natürlech. Und wie dr Fäbu dä verrumt, perfekt über d'Muur zirklet schlot dr Bau im rächte obere Egge y. D'Füehrig isch höchschti Zyt und verdient.

Es fougt e Viertuschtund, wo sich dr FCB nid vom Vorschprung lot lo inschpiriere. Dr Bau louft, aber die nun ufsässigi Art vom Gägner chunnt bi üsne Manne nid guet a. Viu Baubsitz, teils schön vortreiti Aagriffe, aber dr finau Pass wott nid so rächt funktioniere. Und üsi Verteidigung? Wüu sich ds Schpiu mehrheitlech y dr Zone vom Gägner abschpiut, chöi sich d'Usseverteidiger Silas Adam und Marco Günther hüüfig y Aagriff yschaute, und was über d'Mittulinie chunnt, wird erfougrych attackiert, teils bim bissige Men Meier, aber de sicher y dr d'Viererchötti mit Silas Adam, Nick Eggenberger, Denis Schneider und Marco Günther. Üse Gooli, dr Noe Fankhauser, verbringt e einigermasse ruhige und ungschtresste Oschtersamschtig. Es duuret bis zur 36. Minute, bis die Chäs-und-Brot-Phase am ne Ufreger wycht. Dr Yannic Kubacki, gäge FC Ipsach no verletzt, drückt us schpitzem Winku ab, um es Muggeseckeli schtrycht dä Knauer über d'Latte. Zwe Minute schpöter chunnt dr Gägner zur erschte Chance. Dr Julian Studer (Nr. 10) schtartet uf der Mittulinie e Sololouf, cha üsi Verteidigung knacke, sie überhaschtet Flachschuss geit knapp am Ghüüs vom Noe Fankhauser vorby. Das wär d'Chance gsy für e Gägner, dr FCB für d'Passivität (es chunnt mir grad kes bessers Wort y Sinn) z'beschtrofe. Paar Minute schpöter verpassts dr Marco Günther, sy gueti Leischtig mit em ne Gou z'kröne. Sy Schuss us 11 Meter isch zweni präzis.

Fabian Schulers zwöite Schtreich

Är schteit wieder richtig, dr Fabian Schuler. Muschtergüutig vom Silas Adam y syne letschte Minute im Schpiu vor em Abflug bedient, volländet dr Fäbu us 5 Meter zur Resultatkosmetik, mir schriebe die 45. Minute.

Fazit erschti Haubzyt

Es wär mee, viu mee drinnegläge. D'Überlägeheit vom FCB und d'Harmlosigkeit vom Gägner hät ohni Problem es 4:0 verdient gha. Aber für das Wunschresultat het Büre, zwar sehr bemüet chame gloub so säge, zweni gmacht um erfougrych z'sy.

Und dr Simao, wie het är sich gschlage?

Viu glüffe, viu am Bau und gäge e gäderige Gägeschpieler mit Vorteile. Isch är wägem Starteufdebut närvös gsy und het är e Portion zviu Reschpäkt vor dene Chäschte us em Grosse Moos gha? Mir wüsses nid, haute aber fescht, dass sys Talänt und sy Filigrantechnik alleweil sichtbar gsy isch. Zu was das är fähig isch, erfahre mir de y dr zwöite Haubzyt. Gratuliere Simao zu dim ryfe Yschtand y im Eis.

Zwöiti Haubzyt

Nach längerer Gäubschperri us em so fatale Schpiu in Lengnau ersetzt dr Ruben Dos Santos dr Silas Adam. Hesch hoffentlich dr Flüger nid verpasst und gniessisch d'Ferie in Mallorca. Büre isch physisch uf em Fäud, psychisch aber no nid ganz aawäsend. Es isch nid angers z'erkläre, dass ds Zämeschpiu vo mehrere Fähler zur Grosschance für Ins füehrt. Us 5 Meter verchachelet dr Tim Tanner kläglech und erschpart am verdutzte Noe Fankhauser d'Müglechkeit, sich z'bewähre. So jitz aber Giele d'Finger zum - isch jo egau, sie heis säuber gmerkt. Uf dr rächte Syte isch dr Ruben Dos Santos am Bau und gseht, dass dr Simao y Schtellig louft. Us däm Pass vom Ruben macht dr Simao es Kunschtstückli und lobt us 16 Meter unhautbar zum 3:0 y (50. Minute). Die Schpiuszene zeigt, was dä Gieu uf em Chaschte het, unfassbar und das mit Johrgang 2010. Dr Fabian Hänzi ersetzt y dr 60. Minute dr ufopfernd kämpfend Yannic Kubacki und dr Simao Lopes macht y dr 65. Minute für e Nevio Eggli Platz. Büre demonschtriert nun unufgregt es ryfs Schpiu und dominiert die Begägnig nach Beliebe. Es ergäbe sich Chance für e FCB, antwäder het eine vo de Gescht e Scheiche dran, oder es fäut a dr Präzision. Es louft die 70. Minute dr David Vuilleumier wird für e Marco Günther ygwächslet und zää Minute schpöter chunnt dr Daniel Marti für e Men Meier. So, nöi sortiere und hopp de Bäse. Das het sich ou dr Fabian Hänzi gseit.

Brasilianischer Schpektakel uf em Lachen

Mir isch nid bekannt gsy, dass dr Fäbu brasilianisches Bluet intus het. Uf au Fäu het dä Maa dr Lachen komplett verblüfft und so mänge Zueschouer het sech d'Ouge griebe ab däm Kunschtstück. Uf ne Pass vom Nevio Eggli leit sich dr Fäbu y d'Luft und hout dr Bau mit em ne Faurückzieher, oder us em italiänische Sprächgebruch Bicicletta, y d'Masche (82. Minute). Däm Gieu muess me das eifach möge gönne. Viumous chunnt är vom Bänkli y Ysatz. Aus Mitglied und Trainer vo de Juniore C Youth League mit sym Brüetsch Simon zäme über ds Normale für e FCB angaschiert, isch uf ihn immer Verlass, es Mitglied wie är im Büechli schteit. Üse Fotograf Stephan Kubacki het dä geil Momänt im Aasatz verwütscht und d'Fröid vom Fäbu ab sym Kabinettschtückli (besonders wertvolles Künststück oder eine meisterhafte, technische brillante Leistung) isch du flächedeckend uf em ne Biud z'gseh.

Normau gschuttet isch de nächhär glych no. Vom Gägner het me ussert em uffauend, gäub lüchtende Dress nümme viu gseh. Chräftemässig und fuessbauerisch sy sie uf em Zahnfleisch gloffe, reschpektive hey am guet funktionierende Kollektiv FCB nüt me z'entgägezsetze gha. Paar Minute vor Schluss het dr David Vuilleumier us churzer Dischtanz no ds 5:0 uf em Fuess, verzieht aber. Churz drufabe pfyfft dr guet und unuffäuig Schiedsrichter, chley mee Bewegig wär gloub drinnegläge, das Schpiu ab.

Fazit

Y de erschte zwöi Schpiu vo dere Rückrunde isch dä Gägner, wo Büre cha fordere, no nid y Erschynig träte. Me muess aber ou säge, dass gägenüber em Schpiu in Ipsach d'Mannschaft e gschlossnere Ydruck hingerloo het und über 90 Minute dominanter gschpiut het. We me jitz no über die voui Dischtanz uf däm zytewys höchere Level cha dürezieh, de het dr FCB y der Gruppe niemer z'fürchte.

Für mi het d'Homogenität y däm Schpiu viu mit der Yschtellig vo jedem Einzelne und dr taktische Ufschtellig z'tüe gha. Kei Schpieler isch abgfaue, d'Zwöikämpf het me aagno und versuecht dr Bau lo z'loufe. Und wenn de no so Geniestreiche à la Fabian Schuler, Simao Lopes und Fabian (Fábio) Hänzi sy mir aus Zueschouer häu begeischteret und chöme y Schtröme uf e Lachen. Merci Jungs!

Ds Kulinarische dörfe mir nid vergässe

Am Buvetteteam mit Marco "Butti" Sutter (Chef de cuisine und Tätschmeischter), Daniel Blaser, Fred Burkhalter, Markus "Willy" Fahrni und Michael Sutter gä mir 5 Schtärne (Cinque stelle, auso schüschtemang cinque stelle mee, aus d'Squadra Azzurra uf em Wäg y d'Versänkig). Chüschtigi und saftigi Hamburger und chnuschprigi Pommes sy uf em Lachen nid autäglich, umso mee schetze mir öies Angaschemaa und säge härzleche Dank Jungs, grossartig gmacht!