top of page

FCB - FC Evilard 4:2 (3:1)

Meisterschaft - 3. Liga / Gruppe 6 -9.11.2019 14:30 – Lachen Büren an der Aare


Ufschtellig FCB: Simon Käser, Marco Günther (62. Marco Kocher), Ruben Dos Santos, David Schläfli, Manuel Scheidegger (49. Lars Freiburghaus), Fabian Schuler, Men Meier, Thomas Lerch (C), Raphael Schuler (67. Yannic Kubacki), Joel Tüscher, Reto Rüttimann


Ersatz: Mikael Stauffer, Yannik Tüscher (ou agschlage)


Nid derby: Nick Eggenberger (Bruef), Reto Grogg (Gsundheitlechi Problem, aber unger de Zueschouer), Luc Gutbub (Krank), Diego Imperiali (Nid im Ufgebot), Mischa Hofer (Privat), Luca Lauper (Rekonvaleszent), Dario Leisi (Liischteproblem), Denis Schneider (Privat), Eric Stauffer (Krank aber aus Zueschouer awäsend)


Bemerkig: Letschts Meischterschaftsschpiu vor dr Winterpouse Manuel Scheidegger trotz ärztlichem Verbot i dr Schtartformation (verruckte Cheib), dr Fabian Schuler us em grüene Gwändli (Areis vo Oberriet), nach zwei Schtung Schlof i dr Schtartformation. Marco Kocher aus Schef "Lacheputzete" diräkt vom orange Marti-Chleidli is Dress vom Eis. Z'erschte Mou beidi Schuler ir Schtartformation.


Staff: Patrick Tüscher und Patrick "Vofi" Von Felten (Trainer, Vofi verhindert), Reto Steiner (Massör)


Gou: 2. 1:0 Fabian Schuler (Schuss Reto Rüttimann), 18. 2:0 Reto Rüttimann (pär Chopfbau uf Pass vom Joel Tüscher), 23. 3:0 Reto Rüttimann, 37. 3:1 Marc Bächler, 49. 4:1 Fabian Schuler (uf Pass vom Thomas Lerch), 62. 4:2 Francesco Vergani

Lueget de Matchdetail nid uf dr Houmpäitsch vom Fuessbauverband a, dr Schiri het mit de Zyte es huere Puff abgloh!


Gäubi Charte: 44. Min. Ruben Dos Santos (Reklamiere) und drmit isch dr Ruben für e Rückrundeuftakt gäge Aegerten gschperrt, 52. Min. Men Meier (Foul)


Notize für d'Redaktion: Louis Polverini


Platzverhäutnis und Wätter: Dr Jarno Beyeler het i zwe Tag das Terrain (gäge die 16 Schtund Arbeit) so beschpiubar gmacht, dass nach em Matsch praktisch keni "Schäde" si feschtschteubar gsi. E Rieseisatz und die drü Punkt zieh mir am "Eis" ab u gäh se am Jarno.


Dr Rase nach 90 Minute Match - formidable!


Schtabili Wätterlag, chlei chaut und ab und zue het hurti d'Sunne useglüüslet.


Negativs Vorgeplänku

Hüt isch dr Träner Patrick Tüscher nid z'beniede gsy. Im Verlouf vom Tag het ei Hiobsbotschaft die angeri gjagt. Dr Versuech Lüt telefonisch chönne z'konaktiere isch ou jedesmou im Nirvana glandet. Es paar Schtung vor Apfiff isch d'Ufschtellig no i dr Schwebi ghanget, definitivi Absage hei sech ghüft. So isch dr Manuel Scheidegger anschtatt i dr Büvette gschtange ufglüffe u dr Marco Kocher het chum rächt sys orangsche Marti-Chleidli chönne abzieh, het är scho d'Nummere zwöi am Rügge gha (aber nid i däm Sinn wo du jitz dänksch).


Ig cha mir vorschteue, dass dr Pädu die definitivi Schpielercharte und d'Ufschtellig für e Schiri churz vor Torschluss het chönne übergäh und no denn nid het chönne sicher sy, öb jitz aues im Lot sig.


So gseh absolut keni ideale Vorussetzige für das verschobne Schpiu vom 19. Oktober.


Ds Erfröilechschte vorab

Wie sech Bäre für e Winterschlof vorbereite, dass wüsse mir. Si schlö sech dr Ranze vou das es chlepft u gö go pfuuse. Dä Schlof näh sie zwüsche Oktober und Dezämber i Agriff und dä duuret bis i Früehlig ine.


Öbe sinnbiudlech glich hets dr FCB gmacht, sie füue nid d'Ränze (wär kontraproduktiv) sondern ihres Punktekonto u gö i d'Winterpouse. Aber die duuret nid so lang. Bereits im Januar geits i d'Haue und wenn d'Witterig einigermasse passabel isch, geits de relativ rassig scho wieder use.


We me d'Ranglischte schtudiert, tüe paar wyssi Ziele no chlei weh, wüu nid grad jedi Niederlag hät müesse sy. Aber das höögle mir jitz ab. Und wär weiss, we me e gueti Vorbereitig macht, isch i dr Rückrunde viu bis aues müglech.


Gäge die dunku hingerleite Teams het me jewils gwunne u die si flott ir Überzau!


Zwe gägesätzlichi Haubzyte

Gägesätzlecher hätte die zwe Haubzyte nid chönne sy. Het me ir erschte Haubzyt die Sach no konzentriert apackt, si di zwöite füfevierzg Minute wieder vo Angscht prägt gsi, dr Gägner chöm no einisch dra. Z'konzentrierte Schpiu und z'konsequänte Vortschegge isch chlei flöte gange, wie d'Organisation und Verschtändigung ungerenang uf em Bitz ou. Schliesslech het me aber für jedes Ufböume vom Gägner die passendi Antwort parat gha.


Aber – und das isch ou e Tatsach – hät Evilard d'Chance packt, wär weiss wie das usecho wär?


Erschti Haubzyt

Wie gäge Diessbach isch Büre häuwach zur Kabine use cho. Eigentlech erschtunlech, wie d'Mannschaft die Absänze und die ernöiti Umkrämpelig vo dr Ufschtellig wäggschteckt het. Büre isch im Vorwärtsgang und dr Reto Rüttimann, einisch meh y glänzender Schpiuluune, louft uf dr lingge Syte gäge Füferegge zu und drückt ab, dr Goli cha dä Bau häbchläb pariere, gäge satt Nachschuss vom Fabian Schuler het är ke Chance meh. 2. Minute 1:0 für Büre, Diessbach lässt grüssen, e Schtart nach Mass und früeh uf Kurs. Mir aus Zueschouer gseh e konzentrierte und agriffige Afang vo Büre. Bereits ir 6. Minute touche dr Fabian Schuler und dr Reto Rüttimann mit em ne sehenswärte Doppupass vor em gägnerische Gou uf. Dr Schuss vom Fäbu cha dr Goli aber blockiere. Vo hinge bis vore isch dr FCB bemüeht, em Schpiugschehe entschprächend z'verschiebe u zwüsche de Reihe dr Handorgeleeffekt z'vermiede. Das glingt ganz guet und machts Evilard schwär i d'Gäng z'cho. D'Matschuhr schteit bi dr 14. Minute, wo Evilard z'erschte Mou ärnschthaft und gfährlech wird. E Eggbau wird churz gschpiut und die aschliessendi Flangge chunnt ziugenau uf e Gring vo dr Nummere zäh (Bächler). Dr Simon Käser wird nid gforderet, dr Bau flügt klar über d'Latte. Jitz het uf z'mou Büre schwachi Momänte. Hinge isch me nümme so sortiert wie afangs und Evilard witteret Morgeluft. Zersch flügt e Freischtoss weiss dr Tüfu wo häre, dr Simu het nid mou mit dr Wimpere zuckt. Die Rueh isch du aber schnäu verfloge gsi. Plötzlech toucht dr Delaquis alleini vor em Simu uf und macht eigentlech aues rächt, aber üse Goli pariert suverän. Vom Schpiufäudrand chöme jitz luti Wort, zu rächt! Jitz eifach Evilard nid lo is Schpiu cho, was me afangs sensationell gmacht het, isch im Momänt Makulatur.


Mir hei jo no dr Reto Rüttimann zum Erschte Nid id d'Hose mache! Mir hei jo no dr Reto Rüttimann, mit momentan 9 Gou a dr Schpitze vom Torschützeklassemänt. Rächts usse cha sich dr Joel Tüscher gäge sy Gägner suverän düresetzte, sy Flangge gfingt dr Reto Rüttimann, u däm (ig wiederhole mi) muesch nid e Bau uf e Chopf zirkle. Wusch – 2:0, dr Goli isch chancelos. Jitz bsinne sech üsi Giele wieder uf ihri Schterchi. Ds Schpiu isch plötzlech wieder fescht i Büre Hand, dr nöchscht Schpieler wird gsuecht, ds Abiete und ds Loufe für e Bau z'wöue schtimmt wieder. Wenn Büre dä Druck ufsetzt, zeige sich d'Schwäche vo Evilard, öppis Glichwärtigs hei sie nid entgägezsetze. U trotzdäm chunnt Evilard zu re Topchance. Dr Vergani, dr Toptorschütz bi Evilard, schliesst es viuverschprächends Solo kataschtrophal ab. Mir näh das gärn so entgäge.



Mir hei jo no dr Reto Rüttimann zum Zwöite Evilard het nid reüssiert und so dr Aschlussträffer verpasst. Verpasst het du dr Reto Rüttimann 3:0 nid. Uf ne Abprauer vom ne Schuss vom Fabian Schuler isch är zur Schteu, us 15 Meter schiesst är platziert zum 3:0 y. Jitz füehrt dr Reto Torschützelischte i der Gruppe mit 11 Träffer alleini a. Mir gratuliere u si hoch erfröit.


D'Vorentscheidig? Ohni sich uf d'Escht usezloh d'Vorentscheidig? Jo chame so säge, aber ou unger dr güetige Mithiuf vom Gascht. Schtehendi Bäu, für einisch nid nume de Bürer ihres Manggo. Evilard verschiesst e Freischtoss us beschter Position. Zwe Minute schpöter flangget dr Marco Günther i Sächzähner ine, am Reto Rüttimann sy Schuss isch für einisch z'unpräzis. Evilard isch wieder a dr Reihe. E schtraffe Schuss cha dr Marco Günther i letschter Not abwehre und so d'Weschte grad no suber bhaute. Paar Minute schpöter isch es passiert. Dr Vergani lot e Schuss a d'Latte, üser Manne si im Momänt grad nid im Biud, am schnäuschte schautet dr Bächler u schiesst zum 3:1 y. Da Träffer isch nid unverdient, het doch Evilard paar gueti Chance kläglech vergäh. Aber scho bau ergäh sech Chance für üser Giele. Nach em ne Eggbau (39. Minute) schiesst dr Fabian Schuler i idealer Höchi uf's Gou, i letschter Sekunde länkt e Schpieler mit em Chopf dä Schuss no über d'Latte. Genau ei Minute schpöter Duplizität der Ereignisse, uf ne Eggbau vom Fäbu chöpflet dr Thomas Lerch über's Gou. Es schteit gäng no 3:1 und plötzlech chunnt Evilard im Minutetakt zu zwe 100 Prozäntige. Dr Vergani schtürmt allei uf's Bürer Gou, dr Schuss länkt dr ufmerksam Simon Käser i Gorner. Churz vor dr Pouse, es isch die 43. Minute, muess dr Simu ernöit e Schuss us beschter Position abwehre. Zwe ganz grossi Chance für Evilard zum zrugg z'gfinge is Schpiu si vertoh. Dr Pousepfiff erlöst dr FCB vor e Druckphase vom Gascht.


Zwöiti Haubzyt

Nach em Pousepfiff isch dr Ruben Dos Santos mit em Reto Steiner i Container zur Pflege. Dr Apfiff verzögeret sech, wüu dr Ruben niene z'gseh isch. Isch dä uf em Schrage igschlofe? Schliesslech toucht är uf. Bim Manuel Scheidegger isch me sech ou nid so sicher gsi, öb är no cha wytertue. Ou är louft y, muess aber nach vier Minute ds Schpiufäud verloh. Für ihn chunnt dr Lars Freiburghaus zum Isatz. Evilard macht bereits wieder uf sech ufmerksam. E Schuss cha dr Simon Käser, hüt rächt schträng in Äktschen, pariere.


E schpezielli Leischtig Dä Fabian Schuler het mi schwär erschtunt. Im Militär i auer Hergottsfrüechi zum warme Näscht us, nächhär vo Oberriet gfüeuti 150 Minute Fahrt hei, zu de Hudle us und dusche, schnäu chlei ligge und am Eis uf em Schuttplatz sy. U weisch was? Z'vorderscht und z'hingerscht isch är azträffe gsi, zwöi Gou het är gmacht und nünzg Minute het är müesse düreschutte und derby no Kilometer abgschpuelet wie Anton. Sini Bedürfnis het är für d'Egippe hinge lo aschtoh. Das isch e Rieseleischtig und verdient üse Reschpäkt. Sackschtarch Fäbu!


Näbem Reto hei mir jo no dr Fabian Schuler Es louft die 49. Minute, dr Thomas Lerch bedient dr Fäbu, dä zieht los und verwütscht dr Goli mit em ne scharfe Flachschuss i nöcher Egge zum 4:1. Herrlech gmacht!


Nid Resultat verwaute, wyter schutte isch me versuecht z'säge. Vorerscht isch me guet ungerwägs. Nach em ne grobe Foul am ne Büreschpieler gits e Freischtoss us 25 Meter. Leider e harmlosi Sach, wo me durchus chlei meh chönnt drus mache. Es isch wieder am glänzend ufgleite Fabian Schuler, sy Schuss cha dr Goli vo Evilard entschärfe. Ir 57. Minute fahrt dr Ruben Dos Santos im letschte Ougeblick dr Fuess us u länkt so e guete Schuss i Gorner. Dä schtehend Bau isch a Harmlosigkeit aber nid z'überbiete. E schöni Koproduktion Raphael Schuler zu Fabian Schuler eröffnet e gueti Chance. Dr Schuss vom Fabian cha dr Goli zum Eggbau kläre. E Minute schpöter überchunnt dr Joel Tüscher ändlech si Chance, dr Schuss wird aber pariert. Nach sim Supermatsch und zwöi Gou gäge Diessbach het är ou hüt kämpferisch überzügt. Us unerklärliche Gründ git jitz Büre Zügu us dr Hand u lot's chlei lo schliefe. Evilard überchunnt dür das Nohloh Schpiuateile und cha ds Gschehe usgliche. Uf ne Eggbau vo Evilard isch dr Simu Käser parat und pariert. Mittlerwyle isch die 62. Minute abroche. Dr Marco Günther, syt längerer Zyt im Militär und fouglich keini Tränings i de Chnoche, macht nach ere guete Leischtig em Marco Kocher Platz (61. Minute). Ei Minute schpöter chunnt Evilard zum ne Eggbau. Für einisch cha dr Vergani sy Torgfährlechkeit unger Bewies schteu und zum 4:2 ischiesse. Fröid und Leid si mängisch cheibe noch binang. Het dr Vergani vori sys Gou suverän gmacht, vergit är zwe Minute schpöter us 10 Meter kläglech. E wytere Wächsu bi Büre wird vouzoge. Für e Raphael Schuler chunnt dr Yannic Kubacki is Schpiu (67. Minute). Dr Larifari im Defensivverhaute vo Büre nimmt jitz chlei monschtrösi Forme a. Mit em Fuess rettet dr Simon Käser e Schuss us 10 Meter ernöit glänzend gäge Bächler. Und es geit wieder i die angeri Richtig. Dr Fabian Schuler kurvt im Sächzähner um Freund und Feind ume und schiesst knapp über ds Gou. E schöni Bauschtaffete übere Men Meier, Reto Rüttimann zum Yannic Kubacki hät bim ne Hoor d'Vorentscheidig brocht. Dr Schuss us 20 Meter brätscht a ds Lattechrütz. Jitz geits ufs Mou wieder, chum het me e Zagge höcher gschaute, chame ds Schpiu wieder a sich riesse. Jede leischtet Defensivarbeit u hout dr Bau haut ou Mou is Gjät, anschtatt es Risiko izgoh. So chame dä Vorschprung suverän verwaute und e erfougrichi Saison mit em ne schlussändlech verdiente Sieg beände.


Uf üsi junge Schpieler Lars Freiburghaus (2002), Marco Günther (1998), Yannic Kubacki (2000), Men Meier (2001), Fabian Schuler (1998), Raphael Schuler (2000), Joel Tüscher (1999) chame schtouz si. Si hei am Chare gschriesse und us em ne afänglech verchachelete Tag mit ere professionelle Ischtellig ds Optimum useghout.


Dr Notnagu Marco Kocher het für ne Chautschtart e Superleischtig uf ds Fäud zouberet. Merci Marco!


Fazit

I der Vorrunde het me nie, oder ömu de fasch nie i dr gliche Mannschaft chönne ufloufe. Wuchenänd für Wuchenänd isch me zwunge gsi, nöi Linie zämezschteue u Schpieler vo ihrer Wunschposition z'verschiebe. Us der Sichtwys gseh, isch d'Usbütti sensationell. I euf Schpiu het me 21 Punkt ghout und es Gouverhäutnis vo 31:22 erziut. Das macht im Schnitt 1,9 Punkt, 2,8 Gou gschosse aber de ou 2 übercho. Und nachdäm me nach em Schpiu gäge Aurore d'Schpitze im Bösewichtränking ignoh het, isch me ou do wieder bi de Lüt. Mit em Reto Rüttimann schteut me zudäm dr Torschützeleader i dere Gruppe.


Hopp FCB



Aktuelle Beiträge

Alle ansehen

Comments