top of page

FCB - FC Evilard 1:2 (1:1)

Aktualisiert: 24. Dez. 2022

Meisterschaft 3. Liga, Gruppe 6

Sportplatz Lachen Büren a/A, Samstag, 10. Oktober 2020, 16:00 Uhr


Ufstellig:

Stauffer Mikael, Dos Santos Ruben (29. Kubacki Yannic), Schneider Denis, Schläfli David (85. Tüscher Joel), Scheidegger Manuel, Lerch Thomas (C), Meier Men, Gutbub Luc, Schuler Fabian, Rüttimann Reto, Lauper Luca (65'Leisi Dario)


Ersatz: Bigler Manuel, Günther Marco, Steinbacher Adrian (Ersatztorhüter)


Trainer: Rüttimann Reto, Von Felten Patrick


Abwäsend:

Eggenberger Nick (Bruef), Grogg Reto (abwäsend), Hofer Mischa (nid ufbote), Imperiali Diego (nid ufbote), Käser Simon (verletzt), Stauffer Eric (verletzt), Sutter Michael (abwäsend)


Gou: 10' Francesco Vergani, 20' Denis Schneider, 82' Bujar Nushi


Gäubi Charte: 33' David Schläfli, 80' Meier Men, 85' Denis Schneider


Bemerkige:

Nach em verschobene Matsch gäge Madretsch vo letscht Sunntig dr FCB ändlech wieder mit em ne Ärnschtkampf. Ds Wätter und dr FCB mit zwe totau unterschiedleche Haubzyte. Ds Wätter i dr erschte Häufti sunnig und agnähm u dr FCB farb- und orientierigslos. Ir zwöite Haubzy verschwindet d'Sunne, es chunnt cho chutte und es wird unagnähm chaut und dr FCB besinnt sich und zeigt, was eigentlech i dere Mannschaft steckt.



Haubzyt eis – nid grad es Highlight

Büre cha, wie gäge Pieterlen, i Beschtbsetzig aaträte. Äbefaus wieder derby üse momentan Standardgoalie Mikael Stauffer. Eis schicke mir vorus, är het si Sach guet gmacht. Lut hingeruse dirigiert u d'Mannschaft gäng wieder ermunteret, dranne z'blybe u a sich z'gloube.


Evilard, die Überraschigsmannschaft vo dere Vorrunde, zeigt sich ab dr erschte Minute a konzentriert und fokussiert. Sie gäh z'gschpüre, dass sie mit em ne optimale Punktgwinn us Büre wei abreise. Sie si ir Startphase klar z'bessere Team, erzüge Druck und ihri Loufbereitschaft vom hingerschte bis zum vorderschte Maa isch vorbiudlech. Es chunnt nid vo ungefähr, dass sie meh vom Spiu hei und öfters vor em Gou vom Miggu Stauffer uftouche. Vor 5. bis zur 8. Minute kreiere sie drü Chance, einisch dervo rettet dr Miggu gekonnt und verhinderet die früechi Füehrig. Verhinderet die früechi Füehrig? Nei nüt isch gsi, kachelet het's! Mann u Muus störchle im Sächzähner vo Büre ume, Evilard cha dr Befreiigsschlag vo Büre mou für mou verhindere, wüu sie ou jede Körperteil zur Verteidigung vom Bau isetze. Dr Vergani, dä wo äbe i der Saison no nid so viu troffe het, mir heis im Matchprogramm gschriebe, fasst sech es Härz u knaut us churzer Distanz unhautbar zum 0:1 y. Unhautbar isch richtig, aber z'verteidige wär dä Bau alleweil gsi. So, jitz isch das itroffe, was me tunlichst het wöue vermiede. E früeche Gägeträffer isch immer e Partykiller, cha aber ou zum Weckruef wärde. Es blybt dr Partykiller, Büre findet dr Tritt eifach nid. Mir hei mehrmous Szene beobachtet, wo eine vo üsne Spieler dr Bau verlürt, anstatt uf und dervo u hingenoche, blibt me stoh und beobachtet, was do no aues passiert. Das het Evilard definitiv besser gmacht. Ir 11. und 14. Minute probiere dr Manuel Scheidegger und dr Luc Gutbub mit em ne Wytschuss zum Erfoug z'cho. Beides het nüt gfruchtet. Innerhaub vo 2 Minute isch dr Miggu wieder im Brönnpunkt. Einisch rettet är us em ne Gnusch use im Sächzähner grandios und z'angere mou cha är e Flachschuss blockiere.



Unverzeihlichi Fähler

Was die Unkonzentriertheit ir erschte Häufti ou dokumentiert sy zwe Situatione, wo so nid dörfe passiere. Us em ne Iiwurf i dr eigete Häufti diräkt uf e Körper vom Gägner löst e Gägeagriff us und es wird brandgfährlech. E Zwöite Fau wo sehr guet verdütlecht, dass me nid mitenang kommuniziert oder äbe unkonzentriert as Wärch geit. E Freistoss us dr eigete Häufti wird schnäu usgfüehrt. Die wo eigentlech hätte söue d'Adressate sy vo däm Freistoss, sy ir Vorwärtsbewegig und hei ke Ahnig, was y ihrem Rügge abgeit. Aber wenigstens hei sys du z'gschpüre übercho, oder ömu de eine dervo.



E Freistoss bringt dr Usgliich

Büre überchunnt e Freistoss zuegsproche. Uf dr Füferhöchi us ungefähr 25 Meter bringt dr Fabian Schuler dä Bau is Zäntrum, wo zwe Spieler vo Büre ufestiege, dr besser platziert Denis Schneider trifft pär Chopf zum Usglich. Im wytere Verlouf vom Spiu blybt aber dr Idruck hafte, dass das Büre weni bis nüt kümmeret. Anstatt "die Gunst der Stunde" usznütze, gheit me is aute Fahrwasser zrugg und lot Evilard wieder lo ufcho, git ds Spiu fahrlässig zur Hand us. Ir 26. Minute glingt Büre e flüssig vortreite Agriff, dr Pass vom Luca Lauper uf e Men Meier cha aber us churzer Distanz nid verwärtet wärde. Churz druf abe knaut dr Reto Rüttimann e Pass vom Luc Gutbub übers Gou. Wenns scho nid optimau louft, bruchts eigentlech nid no Näbegrüsch, wo ds Gfüeg dürenang hudle. Aber das isch passiert, dr Ruben Dos Santos zwickts im Oberschänku und muess dr Platz verloh. Är het bim Fruschttritt gäge das arme Spielerhüsli no fasch dr Zäje broche. Dr Yannic Kubacki chunnt ine und geit für e Luc Gutbub uf die rächti Ussebahn, dr Luc gseht sich i d'Verteidigung zruggversetzt. Aber wie mir ihn kenne wird är öfters, wie sys Pendant uf dr Gägesyte Mänu Scheidegger, sich i Agriff yschaute. Chum uf em Platz het dr Yannic e Superchance nach Pass vom Reto Rüttimann, aber leider nid chönne reüssiere. Ir gliche Minute cha dr Denis Schneider dr Vergani i letschter Minute erfougrich vom Torschuss störe.



Büre gfingt langsam dr Tritt

Büre chunnt jitz chlei besser is Spiu, aber no ohni z'brilliere. Vorerscht kassiert dr David Schläfli e gäubi Charte. Är het mit em ne Lieblizupfer e gägnerische Stürmer chönne erfougrich störe. Nach eim vo de rare und erfougsversprächende Agriffe, dr Fabian Schuler het sich usse düre schön i z'Szene brocht, breicht dr Reto Rüttimann lediglich dr Pfoschte. Do het e dütsche Profifuessbauer, schyns nid grad dr häuscht unger dere Spezies, gseit: "Da hat man schon kein Glück und dann kommt noch Pech dazu." So chames ou säge! Evilard gäng ufsässig und äng am Gägespieler übertriebts, es grobs Foul wird mit Gäub belohnt. Dr Freistoss für Büre isch kes Zuckerschläcke, im Nirvana versandet dä Bau. Mir stöh churz vor dr Pouse. Evilard cha us em ne Eckbau ke Gfahr erzüge und e Schuss vom Fabian Schuler verfäut sys Ziu.



Es churzes Fazit zur 1. Haubzyt

So wie sich d'Situation ir Tabäue vor em Spiu präsentiert het, isch me zweni angaschiert as Wärch. Mi isch ou zweni häre, wos weh tuet. Dür das Verhaute het Evilard guet is Spiu gfunge und het sich ab dene Freiheite wou gfüeut und nie lugg gloh. Ds guete Kollektiv vo Evilard isch ir erschte Häufti ds Entscheidende gsy. Guet u gärn hät sie mit ere Füehrig i Pouse chönne.



Üsi Zueschouer

Erfröilech isch dr Zueschouerufmarsch uf em Lache gsy. Mir hei haut scho e tröii Fängmeind, öbs guet oder schlächt louft, isch do derby kes Kriterium. Bravo!



2. Haubzyt, dr FCB wott u d'Latte isch dr gröscht Gägner

Churz nach Aapfiff vo dr zwöite Haubzyt het sich dr Cyriel Ross ohni Gägneriwürkig schwärer verletzt. Mir wünsche vo do us "gueti Besserig!"


Jitz isch Büre im Spiu acho. Öb Kabinepredig oder dr Tee vom Thomas Lauper dr entscheidend Impuls glieferet het, enzieht sich üser Kenntnis. Uf au Fäu het Büre entgäge gha und ou ir Agriffsuslösig kreativer gschaffet aus ou scho. E Freistoss vom Fabian Schuler gfingt dr Reto Rüttimann, sy Schuss verfäut aber ds Ziu. Paar Minute spöter zirklet dr Men Meier e Bau uf e Chopf vom Thomas Lerch, wüu zweni Druck derhinger isch, cha dr Goalie pariere. Ds Spiu isch jitz ou für Zueschouer interessanter und abwächsligsricher. Beidi Syte kreiere Chance, hei aber mit de Abschlüss no ihri liebe Müeh. Mi wird das Gfüeu nid los, dass hüt es Husarestückli ds Züngli a dr Waag wird sy. D'Frog isch nume, wäm das schlussändlech glingt. Mir schriebe die 65. Minute. Dr glücklos Luca Lauper (giut ou für die angere Stürmer) wird düre Dario Leisi ersetzt. U wär dr Dario scho het gseh schutte weiss, was das für ne Wirbuwind isch. Seckle, kämpfe, bisse u nie lugg lo. E Fröid däm Giu zuezluege, ou wenn d'Präzision mängisch unger dr Unbekümmertheit no liidet. Aber genau dä Wiue het ihm churz nach dr Iwächslig d'Chance eröffnet. Sy Chopfbau (jo, tatsächlich) uf Pass vom Luc Gutbub trifft nume d'Latte. Jitz wär wieder dä dütsch Profi dran! Büre het jitz ds Zepter i d'Hang gnoh. Das isch für e Trainer vo Evilard Grund gnue, dr Maa im zäntrale Mittufäud usztusche. Är wird de spöter no sys guete Händli bewiese. Mir heis vori vor Latte gha u stüre no es Kapitu meh derzue. E Freistoss vom Manuel Scheidegger setzt dr Men Meier mit em Chopf wo häre ächt? Jo, wo häre schüsch, natürlich a d'Latte, "aller gueten Dinge sind drei." E Verteidiger klärt zum Eckbau, wo Büre nüt Kreativs z'standbringt. Es louft die 77. Minute und by Evilard chunnt dr Bujar Nushi für e Francesco Vergani is Spiu. Uf em Platz isch mittlerwyle klar worde, dass die entscheidendi Phase im Spiu bevorsteit.



Büre nid belohnt

Zersch gseht dr Men Meier die gäubi Charte für nes grobs Foul. Im Gägezug sablet dr Sandro Rüger, bereits scho verwarnt, vo hinge dr Reto Rüttimann um. Dr Schiedsrichter wändet d'Regle "Gnade vor Recht" a u liegt mit däm Entscheid nid richtig. Das ir 82. Minute dr Iwächsuspieler ds 2:1 für Evilard schiesst, isch nid unbedingt die logischi Foug. Aber mi cha ou nid säge, es sig unlogisch. Het doch Evilard nie nocheglo und d'Entscheidig äbefaus gsuecht. Nach däm Töifschlag het d'Bank vo Büre müesse handle. Hinge steut me uf Drüerchetti um, das heisst David Schläfli use, und Joel Tüscher ab uf e Bitz, klar mit offensiver Usrichtig. Büre isch agrennt, het aber glichzytig müesse ufpasse wie ne Häftlimacher, dass ke Spieler vo Evilard dürebricht. Zersch het uf ne Eckbau dr gägnerisch Goalie chönne rette und ir 94. Minute verpasst dr Thomas Lerch mit er e ganz grosse Chance dr Usglich, dr Goalie cha ernöit pariere.



Fazit

"Mi isch gäng so guet, wies dr Gägner zuelot." Das isch e viu zitierte Satz u chame hüt problemlos uf das Spiu adaptiere. Während em ganze Spiu het Evilard i dr gliche Kadänz gschutte, isch unagnähm i d'Zwöikämpf gstiege u viu gloffe, het Büre gäng wieder chönne unter Druck setze. E gueti zwöiti Haubzyt het für Büre nid glängt. Für das sy üsi Stürmer z'guet bewacht worde und i entscheidende Situatione erfougrich gstört worde. Evilard het sich für dä Bsuech in Büre guet vorbereitet. Sy hei ihri Schueuufgabe gmacht. Chunnt derzue, dass me sech i eim Spiu normalerwys nid mit 3 Latteträffer muess abfinge. Das isch eifach Päch.


Jitz steit me ir Tabäue ungerin. Mit Grünstern chunnt am nöchschte Samschtig dr Tabäueerscht mit em woubekannte Trainer Päscu Arni. Dä wird für üs wou kes Gschänkchrättli by sich ha. Aber trotzdäm, do gits nume ei Devise: "E Sieg muess häre, ghoue oder gstoche!" Bekannt isch, dass me sech gäge gueti Gägner meistensch akzeptabu schlot. Aber u das isch ou klar, bruchts de do zwe gueti Haubzyte! Mir drücke d'Düme!


Tabäue



Nöchschts Wuchenänd uf em Lache:


FCB – FC Grünstern b

Samstag, 17. Oktober 2020, 16:00 Uhr


Hopp FCB!

Aktuelle Beiträge

Alle ansehen

Comments