FCB – FC Bözingen 34 2:1 (2:1)

6. September 2025, 16:00 Uhr, Fussballplatz Lachen Büren an der Aare, Meisterschaft 4. Liga

Text: Hans Peter "Budi" Gribi

Fotos: Stephan Kubacki

Ufschtellig FCB

Noe Fankhauser, David Vuilleumier (46' Ruben Dos Santos), Denis Schneider, Fabian Hänzi (81' Marco Günther), Nick Eggenberger, Men Meier, Joel Zambrano, Fabian Schuler, Mario Bärtschi (34' Manuel Bigler), Joel Tüscher (81' Numa Marmier), Yannic Kubacki

Ersatz

Tim Blatter

Abwäsend

Silas Adam, Fabian Jenni (2. Mannschaft), Dario Leisi, Daniel Marti (2. Mannschaft), Noah Zambrano

Verletzt

Alex Jorge Files, Joel Knörr, Luca Lauper

Staff

Patrick Meier (Trainer), Thomas Lerch (Assistenztrainer), Reto Steiner (Masseur)

Gou

26' 1:0 Fabian Schuler (Penauty)

30' 1:1 Trim Rizvanaj

40' 2:1 Joel Zambrano

Charte

45+1' Joel Zambrano

Bemerkig

62' roti Charte Lasare Bagdasarian (Gooli)

Dr Gooli het dr Bau y de Finger, lot ne lo gheie für ne is Schpiu z'bringe, e Verteidiger meint es sig Abschtoss und nimmt ne y d'Häng und wott ne setzte. E fatali Yschetzig vo dr Situation. Dr sehr souverän und fählerlos Schiri schickt dr Gooli drufabe vom Fäud.

Erschti Haubzyt

Für einisch sy d'Vorussetzige für d'Ufschtellig nid ganz so problematisch gsy, wie y de erschte drüü Schpiu. Dr Dario Leisi het ds Ggöferli packt und het e Feriewuche yzoge, derfür isch dr Men Meier wieder do und het scho e Wuche trainiert und dr Manuel Bigler isch über Paris vo dr längere Reis ds Büre ytroffe.

Dr Gägner us Bözingen isch mit em ne Unentschiede gäge Lengnau, em ne klare 0:3 Sieg in Täuffelen und em ne ernöite Unentschiede gäge Hermrigen-Jens ungschlage y d'Meischterschaft gschtartet. Üse FCB, y dr Rägeschlacht vo Ins aus Verlürer vom Platz, gäge Aarberg es Unentschiede usegrangget und in Täuffelen souverän 5:0 gwunne, het gäge Bözingen scho Druck gschpürt, vo müesse gwinne.

Bözingen isch forsch as Wärch und het bereits y dr 5. Minute e Chance y Füehrig z'go. Dr Noe Fankhauser cha dr Yschlag erfougrych abwehre. Dr Gooli vo Büre isch im Fokus blybe, bereits drüü Minute schpöter schäpperets a dr Latte, mit de Fingerschpitze länkt dr Noe dr Bau a d'Latte. Das isch jitz nid grad dr Schtart, wo sich dr Trainer gwünscht het. Büre isch gwarnt. Es duuret zäh Minute, bis dr FCB es Läbenszeiche vo sech git. Dr. Joel Tüscher knaut e haubhöchi Flangge diräkt uf e Chaschte vo Bözingen. Knapp dernäbe isch haut ou dernäbe. E guete und stilistisch schöne Versuech vom Schöggu.

Nach dr erschte Viertuschtund wird klar, dass das ke Spaziergang git. Bözingen isch giftig und ufsässig und wenn's gäge ds gägnerische Gou geit, üsserscht ziuschträbig. Dr Noe Fankhauser muess scho wieder ygryffe, är cha e zügig vortreite Aagriff vo Bözingen entscherfe. Büre chunnt jitz besser is Schpiu, lot dr Bau und Gägner lo loufe. Us em ne harmlose Aagriff vo de Platzherre entschteit die kuurligi Situation, wo zum Penauty füehrt (26. Minute). Was het de dä Schpieler grytte? Mir wüsses nid, wüsse tüe mir, dass dr Fabian Schuler mit Überzügig dr Bau setzt und unhautbar verwandlet. Wie d'Jungfrou zum Ching chunnt dr FCB zur Füehrig. Es het du nid lang so söue sy. Bereits vier Minute schpöter korrigiert Bözingen dä Foopa (Fauxpas, schriebt me im Bärndütsch tatsächlech so) und cha nach em ne Eggbau e Abprauer zum Usglych verwärte.

Dr Trainer drääjt a de Schteuschrübli

Obwou dr Mario Bärtschi es angaschierts und guets Schpiu glieferet het, isch am Patrick Meier nid entgange, dass Defensive vo Büre de agile Bözinger zweni Paroli cha biete. Villech ou zum Schutz vom Mario und mit em Wüsse vo de Qualitäte vom Wäutreisend Manuel Bigler, wird dä villech unpopulär aber notwändig Wächsu vouzoge. Sy mir ehrlich, dass mir am Schluss hey chönne juble, isch nid z'letscht dr Routine und Hartnäckigkeit vom Mänu z'verdanke, wo Schtabilität is Schpiu brocht het. E guete und notwändige Schachzug.

Dr FCB cha sich nun öfters erfougrych vom Druck löse und Bözingen vermehrt bedränge. Aber ufpasse, Bözingen macht es guets und druckvous Schpiu und isch jederzyt für ne Effort guet. Churz vor dr Pouse krönt dr Joel Zambrano sy gueti Leischtig mit sym erschte Gou für e FCB. E länge Bau vom Denis Schneider uf e Nick Eggenberger isch dr Uslöser gsy, dr Nick louft a Grundlinie und schpiut dr Bau uf e Sächzähner zrugg, wo dr Fabian Schuler e Bözinger ustanzet und y Rückruum für e Joel Zambrano ufleit. Dr satt Diräktschuss us 13 Meter isch unhautbar und Füehrig für e FCB.

E umkämpfti zwöiti Haubzyt

E hert umkämpfti zwöiti Haubzyt het us der Begägnig es überdurchschnittlechs Viertligaschpiu gmacht, zwar ohni Gou, aber mit viu Zwöikämpf und interessante Szene.

Nach dr Haubzyt chunnt dr Ruben Dos Santos für e David Vuilleumier is Schpiu. Bözingen drückt uf e Usglych, het gfüut es Muggeseckeli meh vom Schpiu, louft enorm viu, aber dr FCB blybt schtabiu und verteidiget mit Härz und suecht dr Erfoug über schnäu vortreiti Aagriff. Zu guete Chance chunnt me weder hüben no drüben, dr Match wird zum ne Abnützigskampf.

Die fatali 62. Minute für Bözingen

Dr Gooli cha y letschter Not e Aagriff vo Büre rette, schteit aber klar usserhaub vom Sächzähner. Wüu är dr letscht Maa isch, muess ihm dr Schiedsrichter die roti Charte zeige. Wär jitz gmeint het, Bözingen gheit usenang, het sich gwautig tüscht. Optisch hey sie bis zur letschte Sekunde e guete Ydruck hingerlo und teilwys sogar e liechte Vorteil usegschpiut. Dr FCB het sich aber nümme lo verwütsche und sys Schpiu konsequent z'Änd gschpiut.

Fazit

E villech glückleche Sieg, begünschtigt dür e dummi Aktion vo Bözingen. Aber d'Schtabilisierig vo dr Defensive bim FCB isch schlussändlech usschlaggäbend gsy, dass me die Füehrig bis am Schluss het chönne über d'Runde bringe. Es isch no nid ds gäube vom Ei gsy, aber e Leischtigsschteigerig het me alleweil chönne feschtschteue. Und der FCB zeigt, dass me ohni e Chartefluet cha Schpiu gwinne. Das isch gägenüber dr letschte Saison e Rieseschritt vorwärts. Dr FCB het definitiv sys Fynöggelichleid abgschtreift und konzentriert sech uf ds Schpiu. Bravo!

Hopp FCB