top of page

FCB - FC Azzurri Biel 1:5 (1:3)

31. August 2019, 16:00, Sportplatz Lachen Büren an der Aare


Es isch e verflixti Gschicht. Machsch zwöi Mou eigentlech es guets Schpiu, verlüürsch zwar, aber chasch dr nid fählende Wiue ode mangelnde Isatz vorwärfe. Ds dritte Schpiu bout scho chlei Druck uf, jitz wott me reschpektive muess me gwinne. Jo nid e klassische Fäuhschtart härelege. Es isch aber passiert, mit ere schlächte Leischtig, das darf me gloub so säge, beroubt me sech aune Chance, i das Schpiu z'gfinge. Es isch jo nid so, dass Azzurri unwiderstehlich gschuttet het oder uf em Papier e Klass besser wär, sie hei eifach und effizient gschuttet und während 90 Minute ihres Leischtigspotenzial abgrüeft. Schlussändlech muess me mit em ne gwüsse Nyd säge, dass die drü Punkt scho uf die rächti Syte gheit si.


Einisch meh het me aus gewiefte Zueschouer müesse konschtatiere, dass d'Ufschtellig wider Retusche erfahre het. Für d'Experte isch nid schlüssig z'erkläre gsi, warum Päärli wo eigentlech guet harmoniere, si usenanggrisse worde. Wo sich d'Niederlag abzeichnet het (Pouseschtand 1:3), hät sich villecht vor taktische Usrichtig här die eint oder angeri Müglechkeit ufdrängt, um Druck z'erzüge. Villech wär de ou dr Gloube a ne Wändi i d'Chöpf ufgfrüscht worde. Aber Tatsach isch, wenn zwe Experte hesch, luege schlussändlech drei Ufschtellige use. Zur Verteidigung vo de Experte schpricht aber sicher das inakzeptable Schlussresultat u der Fau in die Niederungen der Tabelle.


Ufschtellig Büre: Simon Käser, Lars Freiburghaus, Ruben Dos Santos (33. Reto Grogg), Eric Stauffer (46. Marco Günther), Manuel Scheidegger, Reto Rüttimann, Thomas Lerch (C), Yannik Tüscher (60. Raphael Schuler), Joel Tüscher, Fabian Schuler, Yannic Kubacki (46. Men Meier)


Ke Isatz: Mikael Stauffer


Nid uf em Lache azträffe: Mischa Hofer (Isatz im Zwöi), Nick Eggenberger (Diplomreis), Diego Imperiali (Privat)Luca Lauper (gsundheitlechi Schonig), David Schläfli (Isatz im Zwöi), Denis Schneider (Zerrig)


Gou: 0:1 Michael Scire, 13. 1:1 Reto Rüttimann, 16. 1:2 Michael Scire, 17. 1:3 Patrick Rocha Alves, 60. 1:4 Michael Scire, 90. + 2 1:5 Filipe Rocha Alves


Bemerkige: Minute Ruben Dos Santos muess mit Magechrämpf dr Platz verloh. Dr Raphael Schuler het si erscht Isatz für e FCB Men Meier gseht si Penauti vom Gooli pariert. 90 + 2 1:5 zeut trotz Absitsschtellig


Erschti Haubzyt – e dürzogeni Leischtig:

Bereits ir 3. Minute loht dr schpöter Dopputorschütz Michael Scire e Schuss knapp übers Gou. Drei Minute schpöter isch es um Büre bereits gscheh. Uf Pass vom Monteiro loht wider dr Michael Scire üsem Goli ke Chance – 0:1. Wyteri 2 Minute schpöter die nöchschti Haubchance für Azzurri, aber dr Schuss vom Davis Rocha Alves geit knapp näbem Pfoschte düre. 8 Minute gschpiut u Azzurri zeigt, was sie uf em Lache hüt vorhei. Schpöteschtens jitz hät Büre söue gwarnt si und e Gang höcher schaute, mit meh Biss i die Zwöikämpf go. Ir 12. Minute vergit dr Yannic Kubacki us churzer Dischtanz e gueti Chance. E Abwehrspieler cha no sis Scheichli ineha und i Corner ablänke. Dr Corner bringt dr Fabian Schuler punktgenau uf e Chopf vom Reto Rüttimann, dä verwandlet perfekt zum Usglich. Si mer jitz im Schpiu acho? D'Antwort lutet leider nei. Ei Minute nach em Usglich isch dr Michael Scire, dä Tüfuuskärli, wider vor dr Chischte und schiesst 1:2, erneut i Schussposition brocht vom Eduardo Monteiro. Es si gäng die gliche zwe drei Schpieler, wo üsi Schpieler mit schnäue Baustaffette usheble. Mir hei dr Fruscht vom 1:2 no i de Chnoche, si dran dä abzschüttle, chachelets scho wider. Die Gebrüeder Roacha Alves hei sech dürgschpiut und ir 19. Minute zum 1:3 igschobe. Jitz si mir scho chlei gschtrubusset, zwänzg Minute gschpiut u dr Matsch isch praktisch entschiede. Es churzes Ufflackere hets de glich no gäh. Dr. Fabian Schuler, vom Yannic Kubacki guet bedient, knaut das Ding a d'Latte. Das Zwüschehoch vo üsne Kräcks bringt dr Fabian Schuler erneut zu ere guete Chance, aber dr Goli vo Azzurri pariert mit em ne Superreflex. E Minute schpöter, mir notiere bereits die 29. Minute, landet e Schuss vom Eric Stauffer näbem Gou. Churz schteit üses Härz schtiu, jitz toucht dä Michael Scire scho wieder vor em Gou uf u chunnt zum Schuss. Üse Simon Käser pariert aber hervorragend. Ir 31. Minute versuechts dr Yannik Tüscher mit em ne Wytschuss, bim ne Hoor wärs gfährlech worde. Ir 33. Minute geits bim Ruben Dos Santos nümme wyter, Magechrämpf hole ne vo de Bei. Für ihn chunnt dr Reto Grogg zum Handkuss. Churz vor dr Pouse prüeft dr Manuel Scheidegger mit em ne Freischtoss dr Goli vo Azzurri, dä beschteit di Prüefig u chlemmt dr Bau. Innerhaub vo 2 Minute probierts erneut dr Yannik Tüscher zwöi Mou mit em ne Schuss, einisch cha dr Goli i Corner länke, dr zwöit Schuss gfingt sis Ziu nid. Pouse!


Es munzigs Resümee

E dürzogeni Leischtig vo üsne Manne. Ds Schpiu vo Büre mehrheitlech prägt dür zwöi bis maxium drü Päss wo achöme, dr nöchscht Bau isch e Fäuhpass zum Gägner, dr schnäu Konter wird lanciert. Wenn do no öppis wotsch usrichte, muesch de gwautig i Trickchischte länge u d'Schuttschueh müesse rouchne vor luter Gas gäh.


Zwöiti Haubzyt – d'Enttüschig isch komplett

Es geit im gliche Schtiu wyter. Ds Bemüehe isch zwar do, fruchtet aber gar nid. Zu zerfahre isch z'FCB-Schpiu. Es fäut eifach chlei überau, die Schtrukture wo me i de erschte zwöi Schpiu het chönne erkenne, si plötzlich wie usputzt. Es grieft nüt u d'Motivation isch dür nes zaghafts "Hopp Büre" oder "chömet Giele" fasch nid z'ghöre.Dr überragend Maa i däm Schpiu, dr Michael Scire, setzt es wyters Zeiche für Azzurri. Är schliesst e Sololoauf zum aues entscheidende 1:4 ab. Unerklärlichwys wird z'Schpiu zwüsche dr 60. u 80. Minute, trotz däm klare Schpiuschtand, ruppiger u dr Schiri zückt die erschte gäube Charte für e Gascht. Ds Schpiu isch ke Schläck me. Büre cha nid u Azzurri wot nid. Es isch fasch chlei es warte uf e Schlusspfiff. Us em ne witeri Agriffsversuech wird e Bürer im ominöse Sächzähner gfoulet, dr Schiedsrichter pfifft zum Penauti. Doch no chlei Äktschen. Dr Men Meier vergit aber die Chance zur Torkorrektur. Churz vor Schluss versuecht dr Raphael Schuler mit em ne Schuss uf Resultatkosmetik z'mache, aber z'höch agsetzt schtricht dä Bau über ds Gou. Ir 90. Minute plus 2 Minute schiesst de dr Filipe Rocha Alves us höchscht verdächtiger Offsideposition no 1:5.


E Versuech vo nere Bilanz

Mir heis scho atönt. Schpielerisch het dr FCB hüt nid brilliert, was erschwährend derzue cho isch, isch Bereitschaft das Schpiu wöue z'drääje. Es git Mätsch, die muess me haut mit de eifache Mittu probiere wider i z'richtige Glöis z'bringe. Ke gäubi Charte für üsi Egippe, das gits fasch nid, zeigt aber ou, dass me z'Zwöikämpf nid so rächt agnoh het. Ufopfernd schpiele, z'gägesytige afüüre und ufmuntere, het me vermisst. So housch ke Bluemeschtruss, ersch rächt nid bitternötigi Pünkt. Für mi isch das hüt nid üse FCB gsi. Z'eklatant isch d'Leischtigsibuess gägenüber de angere Schpiu gsi. Mir si u blibe zueversichtlich, dass die jungi Egippe, gschpickt mit Rutiniers, wieder uf Bei chunnt und üs demonstriert, dass mes besser cha.

Hopp FCB



Aktuelle Beiträge

Alle ansehen