FC Täuffelen - FCB 1:5 (1:1)

Samstag, 26. September 2026, 15:15 Uhr, Rüti Täuffelen

Meisterschaft 4. Liga

Text: Hans Peter "Budi" Gribi

Aufstellung FCB (4-2-3-1)

Noe Fankhauser, David Vuilleumier (63' Noah Zambrano), Fabian Hänzi, Denis Schneider (C) (90' Joel Zambrano), Marco Günther, Fabian Schuler (72' Nikola Jankovic), Joel Zambrano (85' Yannic Kubacki), Silas Adam (74' Manuel Bigler), Men Meier (51. Ledion Ramadani), Manuel Bigler (38' Nick Eggenberger), Yannic Kubacki (51' Luca Lauper)

Abwesend

Mario Bärtschi, Nils Blatter, Tim Blatter, Ruben Dos Santos, Numa Marmier

Spiel mit anderem Team

Patrick Frieden, Simao Lopes Magalhaes (4 Tore bei den Jun. B), Rafael Azevedo Alves, Fabian Suarez

Rekonvaleszent

Alex Files, Joel Knörr, Dario Leisi, Daniel Marti

Junioren B im erweiterten Kader

Jonas Beyeler, Alan Duflon, Neal Homberger, Robin Steiner

Staff

Manuel Scheidegger (Trainer), Carlos Manuel De Sousa Files (Assistenztrainer), Jarno Beyeler (Torhütertrainer), Reto Steiner (Masseur)

Tore

09' 1:0 Roy Winkelmann

15' 1:1 Manuel Bigler

58' 1:2 Luca Lauper (Foulelfmeter)

63' 1:3 Ledion Ramadani

68' 1:4 Ledion Ramadani

90' 1:5 Ledion Ramadani

Karten

11' Men Meier (grobes Foul) gelbe Karte

55' Luca Lauper (Reklamieren) gelbe Karte

55' Nick Eggenberger (Grobes Foul) gelbe Karte

Bemerkungen

Ledion Ramadani (24.05.2010) mit klassischem Hattrick in der zweiten Halbzeit und "Man of the Match".

Nach Verletzung kehrt Silas Adam in die Startelf zurück, Fabian Schuler und Noah Zambrano nach Ferienabwesenheit wieder im Team.

Erschty Haubzyt

Gägenüber em Schpiu uf em Mühlefeld hey mir in Töiffele es komplett angers Schpiu gseh. E harzige Schtart mit viu Fäupäss, mangelndem Aabiete und gäng und gäng wieder längi Bäu y d'Schpitze, wo prompt wieder zruggcho sy. So chunnt me nid is Schpiu und vo Schpiusicherheit isch wyt und breit nüt z'gseh gsy. Dr Manuel Scheidegger het paarmou druf ufmerksam gmacht und versuecht, meh Rueh und Struktur is Schpiu z'bringe. Aber bis y d'Pouse isch das leider nid würklech bis y d'Chöüf vo de Schpieler düredrunge. Genau die Energie und Schpiufröid, wo ds Eis uf em Mühlefeld no uszeichnet het, het me sträflech vermisst.

Töiffele, harzig mit drüü Niederlage, em ne Sieg gäge Schüpfen und wytere zwe Niederlage y die Saison gschtartet, isch offesichtlich vom FCB ungerschetzt worde. Ufsässig und mit viu Loufarbeit hey sie versuecht ds Schpiu vom FCB zerstöre und ds schpielerische Manko wettzmache.

Ds erschte positive Zeiche het dr Silas Adam uf em rächte Flügu gsetzt. Unwiderstehlich het är sich düregsetzt und sy Pass y Sächzähner het dr Men Meier knapp nid chönne verarbeite, e gueti Chance. E Unufmerksamkeit füehrt y dr 9. Minute zum Füehrigsträffer für d'Platzherre. Dr Noe Fankhauser, vo syne Vorderlüt schträflech allei glo, schtürmt us em Gou und cha dr erscht Bau so haub abwehre, muess aber nächhär dr zwöit Aalouf wyt usserhaub vom Sächzähner attaggiere, verfäut dr Bau, und muess zueluege, wie dr Winkelmann cha vouschtrecke. Jitz söt dr hingerscht und dr letsch gmerkt ha, dass so ke Bluemetopf z'gwinne isch. Wie ygangs erwähnt beobachte mir trotzdäm, wie dr FCB mit länge Bäu wott is Schpiu gfinge. Meischtens bringts nüt, oder e suuberi Kontroue vom Bau, isch umringt vo Gägner, schlicht nid müglech. E Lichtblick het am FCB dr Usglych brocht. Es schöns Zämeschpiu über mehreri Statione schliesst dr Men Meier mit em ne exakte Pass uf e Manuel Bigler ab, unhautbar vouschtreckt dr Mänu. Es fougt e Schpiuphase, ohni Höhepünkt und ohni zündendi Idee. Es het wieder e Chraftakt vom Silas Adam brucht, mit viu Durchsetzigsvermöge cha är sich am Flügu freischpiele, Diräktabnahm vom Yannic Kubacki cha dr Gooli blockiere. Paar Minute schpöter gseht dr Kubi sy Schuss würkigslos über ds Gou flüge. Und bau wär Töiffele wieder y Füehrig gange, aber dr ufmerksam Noe Fankhauser cha dr Winku würkigsvou verchlynere, so dass dr ellei ufs Gou schtürmend Töiffeler ds Nachsehe het. Y dr 38. Minute gseht dr Men Meier die gäubi Charte und dr Nick Eggenberg chunnt für e glücklos kämpfend Manuel Bigler is Schpiu. Churz drufabe breicht dr Joel Zambrano mit em ne Wytschuss d'Ussekante vom Pfoste. Das isch es gsy, vor erschte Haubzyt, nüt erbouends muess me leider feschthaute. Chunnt derzue, dass z'viu Schpieler nid gwohnt souverän ufträtte und Müeh hey y Tritt z'gfinge. Es cha definitiv nume no besser wärde.

Zwöiti Haubzyt, es verbesserets Büre und es Schouloufe vom Ledion Ramadani

E zwyfuhafte Penauti, souverän versänkt vom Luca Lauper, und e effiziänte Ledion Ramadani mit em ne klassische Hattrick, bringe dr FCB uf d'Siegerschtross.

Y dr 51. Minute ersetzt der Ledion Ramadani dr äbeso unglücklech (für einisch) kämpfend Men Meier und dr Luca Lauper ersetzt dr glücklos Yannic Kubacki. Wird’s jitz besser? Y dr 53. Minute schticht dr Denis Schneider mit em ne Energieaafau use. Us dr eigete Häufti schtürmt är übere Bitz, churz e Doppupass mit em Fabian Schuler, sy Schuss landet aber knapp näbem Gou. Im nöchschte Aagriff schiesst dr Luca Lauper es Offsidgou. Das sy ömu scho mou positivi Zeiche.

Plötzlech überschlö sich d'Ereignis. Dr Nick Eggenberger wird a dr Schtrofrumgränze z'bodegmääit. We me dr Nick kennt, blybt so öppis nid ungschtroft, är wehrt sich und dr Luca Lauper lot e berächtigte Kommentar lo fouge. Dr Schiri mit dr Situation hoffnigslos überforderet überleit lang, was ächt jitz z'tue sig. Zerscht überchunnt e Töiffeler die gäubi Charte (reklamiere), nächhär e Töiffeler (dr Täter) die roti Charte und wüus grad so gäbig geit, überchunnt dr Luca Lauper gäub und aller guten Dinge sind vier, dr Nick gseht ou no grad dr gäub Gartong. Nach paar Minute wird dr Silas Adam im Sächzähner gleit, dr Penauty verrumt dr Luca Lauper souverän zum 1:2. D'Chartefluet und dr Penauty sy zytlech so abgflüffe, dass dr Schiedsrichter und ou ig ds Gschehe nümme punktgenau chöi widergä. Das gseht me ou im Bricht vom SR, dört cha öppis nid schtimme. So jitz isch d'Schpiu lanciert und mit dr Überzau chunnt dr FCB besser is Schpiu. Dr Noah Zambrano ersetzt dr David Vuilleumier und drei Minute schpöter schiesst dr Ledion Ramadani z'erschte vo syne drüü Gou. Es paar Minute drufabe schtriechlet e Bau vom Nick Eggenberger d'Latte. Es isch wieder Ramadani-Time, dr Ledi lot zwe Töiffeler lo usschtiege und schiesst y wyter Gouegge zum 1:4 y. Es isch erfrüschend däm bescheidene und ruhige Giu zuezluege, angaschiert und technisch versiert, isch är e mords Berycherig für das Team.

Mit däm 4:1 im Rügge schpiut Büre befreit uf und chunnt zu wytere Chance. Unger angerem verpasst dr Ledi ds sichere 1:5. Churz vor em Abpfiff isch du dr Hattrick doch ne Tatsach. Dr Ledion Ramadani trifft zum 1:5 und realisiert y 39 Minute dr klassisch Hattrick. Das isch übrigens dr zwöit klassisch Hattrick vom ne FCB-Youngster im Auter vo 16 Johr. Im Schpiu gäge FC Bözingen het dr Simao Lopes ds glyche Kunschtstück voubrocht.

Man of the Match: Ledion Ramadani

Fazit

E "härzleche Dank" schickt dr FCB uf Biel. Dr FC Etoile Biel besiegt uswärts dr bishärig Leader und nöchscht Gägner vom FCB, dr FC United Hermrigen-Jens mit 0:1 und hievt dr FCB a Tabäueschpitze.

Wie ygangs erwähnt, isch es gägenüber em Schpiu gäge Etoile e Begägnig um ne Klass schlechter gsy. Aber in Töiffele isch das praktisch immer so, öb jitz 3. oder 4. Liga. E herte Fight mit ere ghörige Portion Ghässigkeite und mit em Hang zum üsi Hormon y Wallig z'versetze. Wichtig isch, wenn söttigi Schpiu ou chasch gwinne, und sowyt isch üsi Mannschaft mittlerwyle.

Ein Wort zu einem wichtigen Utensil, den Schienbeinschonern

Gemäss Wettspielreglement (WR) des SFV gilt gemäss Artikel 30 Bekleidung der Spieler, Absatz 1:

Alle Spieler der an einem Verbandsspiel beteiligten Teams haben das ganze Spiel in vollständiger Bekleidung bzw. Ausrüstung (Leibchen, Hose, Stulpen, Schienbeinschoner, Schuhe) zu bestreiten.

Der SFV übernimmt die IFAB-Regeln (International Football Association Board) und da heisst es:

Schienbeinschoner – Diese müssen aus einem geeigneten Material bestehen und genügend gross sein, um angemessenen Schutz zu bieten, und von den Stutzen abgedeckt werden. Die Spieler sind für die Grösse und Zweckdienlichkeit ihrer Schienbeinschoner selbst verantwortlich.

Es dürfte wohl allen Spielern klar sein, dass ein Schoner in der Grösse einer SIM-Karte keinen Schutz gewährt. Im Falle einer Kollision des Schienbeins mit einem Fussballschuhe kann das verheerende Folgen haben. Auf einen entsprechend drastischen Bildhinweis verzichte ich.

Also Jungs, sorgt bitte für Schienbeinschoner in anständiger Grösse, die einen geeigneten Schutz garantieren. Dir secklet jo im Matsch ou nid füdleblutt übere Platz und riskieret dr Schniedelwutz z'verlüüre, oder?

Warum spreche ich dieses Thema an? Weil im Spiel gegen Täuffelen tatsächlich Spieler mit Pseudoschoner oder gar keinen Schonern gespielt haben. Erspart euch und den Mitspielern das Ansehen solcher möglichen Horrorverletzungen.

Nächste Woche ist auf dem Lachen Spitzenkampf!

Hopp FCB!