top of page

FC Orpund – FCB 3:4 (1:1)

Samschtig, 28. Septämber 2019, Sportplatz Aare, Orpund


Ufschtellig mit Überraschig vo Büre (wer sucht, der findet): Simon Käser, Manuel Scheidegger, David Schläfli, Ruben Dos Santos, Eric Stauffer, Joel Tüscher (61. Fabian Schuler), Men Meier, Thomas Lerch, Luc Gutbub, Yannic Kubacki (59. Luca Lauper), Reto Rüttimann


Ke Isatz: Stauffer Mikael (ET), Lars Freiburghaus, Raphael Schuler, Yannik Tüscher


Nid derby: Nick Eggenberger (Schaffe), Reto Grogg (Ferie), Marco Günther (Militär), Mischa Hofer (im Zwöi), Diego Imperiali (verletzt), Dario Leisi (verletzt), Denis Schneider (Privat)


Träner und Massör: Patrick Tüscher, Patrick Von Felten (abwesend), Reto Steiner


Gou: 1:0, 12. 1:1 Reto Rüttimann (Pass Men Meier), 50. 2:1, 63. 2:2 Luca Lauper (Pass Luc Gutbub), 80. 3:2, 82. 3:3 Luca Lauper (Penauti), 90.+2 3:4 Luc Gutbub (Troumpass Reto Rüttimann)

Bemerkig über ne ussergwöhnlichi Aktion: D'Spieler Fabian und Raphael Schuler und Joel und Yannik Tüscher und dr Masör Reto Steiner, si wägem Matsch gäge Rüti schpöter i d'Ferie abgreist. Wüu Orpund dä Matsch uf e Samschtig vorverleit het, hei die arme Cheibe ou wider früecher müesse, oder eher wöue heicho. Schappoo, das isch e schöni Aktion und schpricht für ne super Teamgeischt.

Vorzeiche zu däm Matsch

Orpund het me i der Begägnig scho aus Favorit müesse aluege, obwou ou ihne dr Schtart i die nöii Saison nid ganz nach Wunsch glückt isch. Gäge Aurore verlore, Rüti und Evilard klar gschlage, deheim gäge Pieterle verlore und derfür uswärts gäge Madretsch drü Punkt ghout. Büre het aber um die schpielerische Vorzüg gwüsst und ou mitübercho, dass Orpund bim ne guete Schtart i ds Schpiu unberächebar cha si. Dr FCB isch auso gwarnt gsi, ds Ougemerk het me scho uf ne sicheri Defensive gleit, aber sicher ohni grad dr Gagg i de Hose z'ha. Mit zwene Sieg i Foug het me jo durchus Säubschtvertroue dörfe u chönne usschtrahle. Aber im Hingerchopf isch sicher ou umegeischteret, dass es Verlüre unweigerlech wieder zum Abschturz i die ungere Regione füehrt und dr Druck uf Träner u Schpieler enorm würd zuenäh. Die Vorzeiche hei villech ou derzue gfüehrt, dass me üse Turbo Fabian Schuler vo Afang a uf em Bänkli het müesse sueche u derfür dr defensiveri Joel Tüscher zum Zug cho isch. Das si aber lediglich Schpekulazione, nume das mir de do derzue ou öppis gseit hei.

Erschti Haubzyt – e verkorkste Schtart und es versöhnlechs Änd

Bi wunderbarem Wätter het dä Matsch uf em Schportplatz Aare mit em ne Poukeschlag agfange. Es isch hüt nid z'erschte Mou gsi i der Saison, wo me sech i de Afangsminute het lo düpiere. Gäge Aegerten hets i dr 7. Minute scho kachelet (u zur Info i dr 90. Minute ou), mi het sech gschteigeret und gäge Azzurri das Kunschtschtück scho ir 5. Minute gschafft (u zur Info i dr 92. Minute ou). Jitz hets bereits ir 3. Minute, wenn ou sehr unglücklech, scho wider klefelet. We me die Intensität no meh schteigeret, isch es bau so wyt, dass me scho i Rücklag isch, bevor überhoupt dr Schtartschuss gäh isch. Zrugg zu däm Gou. E schreg übere Platz blosende Wind het für Situazione gsorget, wo dr Bau nid eifach isch z'kontrolliere gsi. D'Flugbahn isch grad bi höche u länge Bäu schwär gsi uszrächne. Es isch vermuetlech ou bi däm Corner (bi nümme sicher) dr Fau gsi, dass dä Cheib gäng länger u länger isch worde. Dr Simon Käser het ne wou kontrolliert, chunnt aber i Rücklag und kollidiert mit em Pfoschte, übere Pfoschte knaut dr Bau is Gou zum 1:0 für Orpund. Richtig beobachtet Simu? Zwe Minute schpöter schteit üse Goli scho wider im Rampeliecht, das mou pariert är dr Schuss mit em ne gwohnt starche Reflex. Mir chöme nid zur Rueh, es geit hin und här, Büre isch wider dran. E perfekt gschpiuti Flangge vom Men Meier verwandlet dr Reto Rüttimann souverän zum Usglich. Es cha vo nöiem los go.Ir 16. Minute muess sech dr Simon Käser scho wider mit so em ne fiese Corner befasse. Dür d'Windbeiflussig wird dä Bau zum ne Diräktschuss, aber dr Simu isch uf em Poschte u entschärft über d'Latte. Ig bi ir nöchi vom Gou vo Orpund schtationiert gsi u mi het dünkt, dass üse FCB chlei hüffiger vor em Gou uftoucht isch aus Orpund uf dr Gägesyte. Us ere söttige Situation erschpiut sich dr Manuel Scheidegger, wie eh und je schpiufröidig u mit Drang nach vore, e Grosschance. Im letschte Ougeblick länkt es Orpunderbei dä Schuss näbe z'Gou. Paar Minute schpöter tankt sich dr Yannic Kubacki herrrlech düre, mit vehementem Isatz cha e Verteidiger dr Yannic us em Tritt bringe u d'Chance vereitle. Fasch im Gägezug (25. Minute) weiss e gägnerische Schtürmer mit em ne Superpass nüt aazfoh.


E chlyne Ischueb

Dass mir z'Orpund es angrs Büre gseh, g'üsseret im Matschbricht Rüti, het sech bis do häre scho bewahrheitet. Dr Zueschouer überchunnt e rassige und umkämpfte Matsch z'gseh. Was uffaut isch, dass Orpund wie Büre hinge sehr verletzlich si. Die Ussag wird beschtätiget dür relativ viu Torszene und Freischtöss, wo durchus zu gfährleche Konschtellatione füehre.

Wyter im Texscht…

… u Büre paueret wyter. Dr Reto Rüttimann toucht nach gueter Baueroberig a dr Sytelinie im Sächzähner uf, si Schuss näbem schtunende Goli düre verfäut ds Ziu um nes Muggeseckali. Jitz isch es am Men Meier, schön igsetzt vom Yannic Kubacki gseht är si Schuss us ca. 8 Meter vom Goli pariert. Mir gö langsam aber sicher am Ändi vor erschte Haubzyt entäge. E Freischtossdublette vo Orpund bringt höchschti Gfahr. Dr eint Freischtoss geit knapp näbem Gou düre, dr anger wird vom Simon Käser neutralisiert. Sodeli, das Zwüscheresultat vo 1:1 chame aus leischtigsgrächt lo gäute. Wüu ou beid Egippe d'Glägeheit verpasst hei, us guete Müglechkeite öppis Zäuhbars usezhole.

Zwöiti Haubzyt – wider e verkorkste Schtart, aber mit Häppiend!

Es isch wie verhäxt, chum schteisch wider uf em Bitz, bringsch di scho wider i Schiessdräck. Mir schriebe die 48. Minute, isch auso nach Wiederafang eigentlech die 3. Minute, richtig – wie gehabt. Schuss a Pfoschte – Schuss a d'Latte, Schuss dr Simu mit em ne chatzehafte Reflex gheit ne use, Schuss Gou. Nei kes Gou, dr Schiri gseht es Offside, wo nach Konsultation vo mine Biuder tatsächlech kes isch gsi. Ab der Situazion dräit dr heimisch Träner düre (isch üs ou nid unbekannt) und wird mit dr gäube gfougt vo dr gäubrote Charte vom Platz gschickt (härzlech willkomme im Klub vo de Pünkt i de Chlammere). Zwe Minute schpöter isch es de glych so wyt, 2:1 und die ernöiti Füehrig für e Gaschtgäber isch Tatsach. Praktisch nach em Aschtoss vergit dr Joel Tüscher e gueti Chance zum Usglich. Uf dr Bank wird’s unruhig, es wird g'rangget, hei die Ameise am Füdle? Dr Träner schwingt sis Taktstöckli, es wird Veränderige gäh. Dr Luca Lauper louft sich warm u dr Fabian Schuler chasch nümme haute. Dr Luca chunnt für e Yannic Kubacki, zwe Minute schpöter dr Fäbu für e Joel Tüscher. Das isch es klars Zeiche, d'Bemüehige im Agriff z'verschterche, dr Usglich vehement z'sueche. U tatsächlich, e guet tämperierti Flangge vom Luc Gutbub hout dr igwächslet Luca Lauper i d'Masche. Das nennt me Effiziänz und schpricht für nes guets Näsli vom Träner, reschpektive für ne hochkarätige Bank. Büre het jitz es Millimü meh vom Schpiu, ohni dominierend z'würke. Zum einte isch e Fabian Schuler löuferisch fasch nid z'packe und zum angere schpiut me jitz kompakter uf. Ir 67. Minute het dr Luca Lauper fasch d'Füehrig uf em Fuess, dr satti Schuss landet aber im Sytenetz. Dr Luc Gutbub, mit em ne Sytewächsu super igsetzt, gseht si Schuss vom viu beschäftige Orpunder Goli pariert. Us ere Druckperiode vo Büre use passiert ds Unmügleche, Orpund geit zum dritte Mou i Füehrig. Dr Simon Käser gseht bi däm Gou leider ke Intervenzionsmüglechkeit. Zwe Minute schpöter wird dr Fabian Schuler im Sächzähner vo de Socke ghoue, e diräkti Gouchance isch keni feschtschteubar gsi, e völlig unmotivierti Aktion vom Orpunder. Dr Luca Lauper, aus sichere Schütz bekannt und gfürchtet, hout das Ding i Chaschte. Dr Goli het dr Egge groche, aber dr scharf Schuss het unerreicht linggs unge igschlage. 3:3, was für nes verruckts Schpiu! Aber es wird no verrückter. Dr Men Meier verpasst e gueti Chance und hout über ds Gou. D'Uhr zeigt scho die 90. Minute, Orpund vergit us beschter Position. Dr verzognig Schuss schtricht ca. 5 Meter näbem Gou düre. Das wär se gsi, d'Siegsicherig für Orpund. Aber d'Fortuna het sich am hütige Tag uf em Bürebänkli breit gmacht (heit er se nid gschpürt Giele?). Jitz gö mir im Bricht wieder ganz ufe, so z'säge uf Fäud 1! Yessss! Mir juble, gumpe u si schtouz uf üsi Giele.


Sie hei nie ufgäh. U wär drü Mou i Rückschtand chunnt und am Schluss no gwinnt, het nid nume es Chrottehoor im Sack u d'Fortuna uf em Bänkli. Nei, dä het dä Sieg bis zum Schluss wöue, derfür aues gäh u fouglech ou verdient gwunne.

Dr Penauti


Büre und die 90.+ Minute

Es isch die 92. Minute gsi, das 3:4. Seit üs das öppis? Säubschtverschtändlech hei mir das no im Chopf. Wäm's usegheit isch, do no mou zum nocheläse:

FCB - Aegerten Brügg

2:3

92. Siegesträffer Aegerten

FCB – FC Azzurri Bienne

1:5

92. 2:5 für Azzurri

FC Aurore Biel – FCB

1:2

92. Siegesträffer Scheidegger

FC Orpund – FCB

3:4

91. Siegesträffer Gutbub

Wie wichtig isch dä Sieg?

Luegt me d'Resultat vo hüt a, wird eim ersch rächt bewusst, wie wichtig die drü Punkt vo Orpund si. Vom erschte Platz trenne üs 6 und vom zwöite Platz no 4 Punkt. Vom 4. bis zum 10. Platz si grad mou 5 Punkt Ungerschied.

D'Ranglische gseht dür das Wuchenänd ou wider chlei versöhnlecher us. Mi cha sauft bhoupte, dass dr FCB sini Fuessabdrück ir 3. Liga i Bode gschtampft het.

Es wichtigs Aalige:

Ig möcht gärn einzelni Schpieler usehäbe u rüehme. Schriebe was si aues souguet gmacht hei. Aber das chani nid. Wüu – u das isch bim ne Kader vo 24 Maa z'wichtigschte – dä wo 90 Minute uf em Bänkli schmoret, im Zwöi sis Beschte git, oder nach Verletzig druf blanget ändlech wider izgriefe, dr glich gross Ateil am Erfoug het, wie die wo uf em Bitz d'Chohle zum Füür us hole. Die Lüt gsehsch mit dr gliche Motivation am Träning, am schaffe bim Fischässe, am Hüehneruseruume u schüsch am Mitmache i üsem Verein. Si akzeptiere ihre momentan Zueschtand, ohni Unrueh z'bringe, gö mit ere Säubschtverschtändlechkeit is Zwöi go häufe punkte. Vor dene Schpieler ha ig e grossi Achtig, sie si für üse Verein unentbehrlich und enorm wichtig. Vergässe mir das nid u tüe mer se pflege und mit ne lieber einisch z'viu rede, aus einisch zweni. Ig bi ou überzügt, dass e Isatz über 90 Minute im Zwöi e Junior wyter bringt. Dür das, dass z'Eis ou am Samschtig schpiut, het sich die Situazion verscherft, Fingerschpitzegfüeu isch agseit.


Dr Siegträffer



Aktuelle Beiträge

Alle ansehen

コメント

5つ星のうち0と評価されています。
まだ評価がありません

評価を追加