top of page

FC Madretsch – FCB 1:3 (1:0)

Meisterschaft - 3. Liga / Gruppe 6 - 13.10.2019 10:30 - Mühlefeld, Biel – Hauptplatz


Ufschtellig FCB: Simon Käser, Mischa Hofer (46. David Schläfli), Lopes Dos Santos, Reto Grogg, Manuel Scheidegger, Thomas Lerch (C), Nick Eggenberger, Fabian Schuler, Luc Gutbub, Reto Rüttimann, Joel Tüscher (71. Dario Leisi)


Ersatz: Mikael Stauffer (ET), Yannik Tüscher


Nid derby: Eric Stauffer (Privat), Lars Freiburghaus (2. Mannschaft), Marco Günther (Militär), Diego Imperiali (2. Mannschaft), Denis Schneider (2. Mannschaft), Men Meier (Privat), Raphael Schuler (Privat), Luca Lauper (Rekonvaleszent), Yannic Kubacki (Ferien)


Bemerkig: Dr Luca Lauper nach erfougrichem Igriff (Vorhofflimmere mit Katheter besitige, sogenannti Ablation, heisst Verödung des Gewerbeherdes) unger de Zueschouer. Gueti Besserig und häb sorg Luca!

Bim Gägner zwöi bekannti Gsichter awäsend dr Denis Bekiroski (ex FCB) und dr Hamad Mohamed (Momo); eis Gsicht nid awäsend, dr Dino Dulepa, schade!

Für einisch hets uf em Bänkli gnue Platz gha für aui


Staff: Patrick Tüscher und Patrick "Vofi" Von Felten (Trainer), Reto "Gueti Seeu und Massör" Steiner

Gou:

18. 1:0 Shamshir Karimi, 60. 1:1 Ruben Dos Santon (Penauti), 82. 1:2 Manuel Scheidegger (auf Pass von Reto Rüttimann), 91. 1:3 Reto Rüttimann (auf Pass von Manuel Scheidegger


Notize für d'Redaktion: Ds Bänkli vo Büre (härzleche Dank für die bluemige Hiwiese)


Lektorat: Andrea Lauper. Merci viu mou Andrea, was miech äch ig ohni di!


Wätter: Herrlechs und durschtigs Herbschtwätter bi 22 Grad


E erschti Haubzyt mit Müeh

E erschti Besichtigung vom Platz het üsne Lüt offebart, dass das nid e liechti Aglägeheit wird. Im Schatte no nass und sumpfig und a dr Sunnesyte houprig und übere ganz Platz unmotivierts, höchs Gras oder Rase, auso e Herusforderig für Freund und Feind. U dä Umschtand isch relativ früeh offesichtlich worde. Bäu wo verschpringe oder abrupt blibe schtoh, Querschleger wo ke Maa öppis dermit cha afoh, im nasse Teil vom Bitz flach gschpiuti Bäu, wusch u wäg isch dä Cheib. Aber - u dä Schpruch isch im Fuessbau i Schtei gmeisslet, "aui hei die gliche Bedingige", sie müesse luege, dass sie dermit z'Gang chöme. Ig ha ds Gfüeu gha, i de Afangsminute heig Madretsch Platzverhäutnis u Platzgrössi (doch immerhin 95 x 62 Meter, häts nid dänkt) besser chönne händle aus d'Bürer. Aber a däm Tag si mini Sinne und mi Beobachtigsgab dür Ifluss vo unerklärliche Störfaktore ganz liecht zschärpis ungerwägs gsi. Gibe mir i Zuekunft wider Müeh, verschproche. Es isch du glich Büre gsi, wo zum erschte viuverschprächende Abschluss cho isch. Dr Manuel Scheidegger verzieht us öppe 18 Meter. Zwe Minute schpöter bruchts wieder einisch e häuwache Ruben, är chnüblet e Schuss vo Madretsch vo dr Linie u befreit.


E chlyni Zwüschebemerkig

Uf de Notize vo dr Bank schteit "Büren in der Startviertelstunde besser". Das ha ig äbe us de erwähnte Ischränkige angers gseh, nime aber die Notiz für bari Münze u de isches so. Was eim i de Afangsminute ou ufgfaue isch, dass Büre wieder vermehrt mit höche u länge Bäu operiert het. Das isch guet müglech, dass das dene Platzverhäutnis gschuudet isch gsi. Oder het me ächt e gwüsse Närvosität nid chönne verschtecke? Es paar Unsicherheite ir Verteidigung animiere d'Träner derzue, dr Davd Schläfli uf em Bänkli i d'Ufwärmphase z'schicke. Dusse hei sie d'Signal verschtange, cha är sich doch nach paar Minute wieder gmüetlech uf dr Bank usschtrecke. Mir höögle die Schtartvieruschtund ab.


E Aahüfig vo Fähler füehrt zum 1:0

Us em ne Agriff vo Büre resultiert e Konter. Dä Konter isch ou nume müglech gsi, wüu e abverheite Pass i d'Mitti dr Gägner i dä komfortabli Zueschtand brocht het. E Aahüfig vo unglückleche Abwehrversüech bringt e Madretscher fasch uf Füferhöchi i Schussposition. Dä loht sich nid zwöi Mou lo bitte, ohni Müeh schiesst är zur Füehrig i. Das häts jitz nid grad unbedingt brucht, aber so gvätterlet me ou nid im Sächzähner ume. Eine dra schwarte u furt mit Schade! Isch mängisch nid ds Dümmschte. Es fougt e dürzogni Periode. Büre gfingt im Momänt dr Tritt nid wie gwünscht u Madretsch het a sich säuber gnue z'chätsche. Das zeigt sich bim einte Schpieler vo Madretsch, wo vehemänt e Charte herusforderet, es laferet ihm im Duurzueschtang u hängle tuet är wie e Dirigänt bim Crescendo. Büre wird jitz stercher, mi überchunnt dr Idruck, langsam aber sicher chöme üsi Giele uf Betriebstämperatur. Es erschts Müschterli liefere dr Joel Tüscher und dr Reto Rüttimann ab. Dr Joel, bekannt für genau zirkleti Flangge, setzt dr Reto perfekt i. Dr Abschluss bringt no nid die erhoffti Wändi. Es paar Minute schpöter, Büre befindet sich in ere momentane Druckphase, schliesst dr Nick Eggenberger uf ne Corner ab. Ou do isch ds Ziuwasser ar warme Herbstsunne scho verpufft gsi, d'Resultatkorrektur no usegschtüdelet. Langsam aber sicher wärde mir a dr Linie chlei schtifusinnig, dr Usglich wär verdient. Bis zur Pouse passiert aber nüt me, wo üs cha i Ekstase bringe.


Zwüschebilanz

Bemüeht und gäge Gägner und Umschtänd vom Terrain kämpfe u so isch öppe aus gseit. Aber trotzdäm het me dr Idruck übercho, dass üs ir zwöite Haubzyt es bessers Team präsentiert wird. Das me sech uf si Kampfgeischt und Qualitäte besinnt und uf die tolli Serie vo 4 Schpiu u vier Siege.


FC Aurore Bienne a - FC Büren a. A. 1:2 FC Büren a. A. - SC Rüti b. Büren 1:0 FC Orpund - FC Büren a. A. 3:4 FC Büren a. A. - FC Pieterlen 7:2


U wenn de aui Schtricke riesse, de cha de sauft d'Fortuna ihres Füdle uf em Bänkli wider cho sädle. Das si mir üs jo fang gwöhnt.




E Gang höcher schaute

Jitz darf ou ändlech dr David Schläfli zeige, dass är früeh is Bett isch und fit wie ne Turnschueh awäsend isch. Är ersetzt dr Mischa Hofer, wo aues gäh het und dr Wäg is Schpiu nach chline Afangsschwierigkeite gfunge het. Dr David geit uf e Inneverteidiger- und dr Reto Grogg nimmt dr Rächtsverteidigerposchte i. Mit sir unverwüeschtleche Art isch die Retusche, vorauem bi däm Schpiuschtang, nachvollziehbar.

Ig cha öich versichere, dass mir ganz es anders Schpiu gseh hei, aus ir erschte Haubzyt. Dä Rückschtand het üsi Giele gwurmet, si hei e Zagge ufegschaute oder es Brigge meh i Ofe gschosse. Lang hei mir nid müesse warte. Ir 51. Minute verpasst dr Fabian Schuler uf Pass vom Thomas Lerch dr Usglich. E Minute schpöter, Madretsch isch gäng guet gsi für ne heissi Szene, verpasst Madretsch e Riesegouchance. Dr Schuss geit näbem Gou düre. Zwe Minute schpöter chunnts zure ähnleche Situazion, ou dä vergit dr Schpieler vo Madretsch kläglech – gottlob. So Giele, jitz aber Finger use, gnue vo Warnige mit Schuss vor e Bug. Ds Schpiudiktat i d'Finger näh. Wenns schpielerisch nid geit, de kämpfe und fäite (fighten), euf Wadebysser müesst dir sy. 4 Minute schpöter treit dä nöi Schpirit bereits Frücht. Dr Fabian Schueler wird im Sächzähner umghoue – Penauti. Wie gäge Orpund schpurtet dr Ruben Dos Santos übere Platz und nimmt dä Bau i d'Finger. Ruben nid so gschprängt, so lang du Penautis so suverän verrumsch, ghöre d'Schüss ab däm Punkt dir. U tatsächlech, e suveräni Aglägeheit. Bravo, jitz isch dr Zapfe ab, 1:1 (58. Minute). Jitz marschiere üsi Jungs, ei Agriff um e anger rout gäge z'Gou vo Madretsch. Bi Madretsch wird Närvosität schpürbar grösser. Ke Wunder, die wüsse säubschtverschtändlech wo das Büre schtarch isch u das me es Schpiu mit glichem Angaschema z'Änd schpiut. 62. Minute, das hät chönne d'Füehrig si, igsetzt vom Luc Gutbub verpass dr Joel Tüscher my Gotseeu die lääri Chrutze. Nid verzwiefle, ruhig bliebe, u scho zieht dr Reto Rüttimann allei ufs Gou, läck du mir ou är vergit. Das darf doch nid wohr si, hoffentlech rächt sich das nid. Sächs Minute schpöter vergit dr Manuel Scheidegger u vier Minute schpöter dr Reto Rüttimann. Das isch zum Hoor usrupfe. Z'einzig Positive bi dene verpasste Chance isch, dass me sech die Chance überhoupt erarbeitet und am Drücker isch. Praktisch im Gägezug gits e bränzligi Konschtellation im Sächzähner vo Büre. Dr Ruben, normau im Abwehrverhaute bsunne und suverän, e Usfau chunnt durchus ou mou vor, hout e Madretscher vo de Socke, dä schteit uf, päng liegt är scho wieder am Bode. Genau, dr Ruben het grad no nochedopplet. Z'Erschtunlichschte bi der ganze Gschicht isch, dass dr Schiri gfunge het, das sig z'Normauschte vo dr Wäut. Büre hät bim ne Penauti weni erdrückendi Argumänt chönne zur Verteidigung bitrage. Parallele zum Orpundmatch chöme obsi, churz vor Schluss wieder müesse arenne, für nes Pünktli z'chraue. Aber es isch du ganz angers cho. Ir 82. Minute verwärtet dr Manuel Scheidegger e Bruschtablag vom Reto Rüttimann zur Füehrig für Büre. Das ir 91. Minute d'Siegsicherig faut, e Superkombination zwüsche Manuel Scheidegger und Reto Rüttimann schliess dr Reto ab, isch e schöne Schlusspunkt gsi.


Fazit

Es isch verruckt, nach drei Schtartpleite het sich üsi Euf ufgfange u macht Wuchenänd für Wuchenänd Furore. Mi cha d'Ufschtellig dürenangwürble u mi isch nid minger erfougrich. Die gsundi Mischig vo Kämpfer und Indiviualischte, vo Junge und Aute, macht üses Eis so erfougrich. Das e gueti Kameradschaft herrscht u fliessige Träningsbsüech z'verzeichne si, liegt fasch uf dr Hang.


Ir Torschützelischte si dr Luca Lauper und dr Reto Rüttimann mit je 6 Gou (bim SFV i Momänt nid korrekt) z'Vorderscht azträffe. Ir Tabäue isch me eis Punkt hinger Pieterlen und 6 Punkt hinger em suveräne Aurore Biel a vierter Schteu. Luegt me no einisch zrugg, tuet dä Matsch gäge Lecce (jitz Letzscht) dopplet weh. Aber mir luege jo füre und nid zrugg.


Hopp FCB



Aktuelle Beiträge

Alle ansehen

Коментарі

Оцінка: 0 з 5 зірок.
Ще немає оцінок

Додайте оцінку