top of page

FC Lengnau - FCB 1:3 (0:0)

19. Mai 2019, Sportplatz Moos, Lengnau


Sie hei nie ufgäh

Trotz erschwärleche Vorbedingige, Usgang und Feschtivitäte hei a dr Subschtanz gnagt, hei üser Kräcks z'Längnou uf em Fuessbaubplatz Moos nie ufgäh u schlussändlech verdient gwunne. Es bsunders Lob het üse Goli Chäser Simu verdient. Im ne Momänt, wo z'Schpiu hät chönne kippe, het är mit sine Parade Büre im Schpiu bhaute u Schlimmers verhinderet. Plötzlech si wider aui Müglechkeite offe.


Z'Räschtprogramm

Z'Räschtprogramm vo de drü mügleche Kanditate (Müntschemier müesst me eigentlech ou no derzuezeue, mir verzichte aber uf die Variante) für ne Ufschtieg gseht fougendermasse uf:


FC Täuffelen – FC Grünstern / SC Radelfingen – FC Lengnau / FCB – SV Port

FC Lengnau – FC Müntschemier / FC Grünstern – SV Port / SC Radelfingen - FCB

FCB – FC Grünstern / SC Aegerten-Brügg – FC Lengnau


Dr FCB cha us eigeter Chraft die Sach nümme schtemme, für das bruchts e bipolari Schtörung vo de Längnouer. Bi der Visitecharte, wo sie hüt abglieferet hei, nid es unmüglechs Szenario. Säubschtverschtändlech söt me de drü mou no parat si u die Punkt ifrese, schüsch chasch dr de dä Troum ou grad abschminke.


Ufschtellig FCB:

Chäser Simu, Günther Marco (25. Grogg Reto), Lopes dos Santos Ruben, Scheidegger Mänu, Lerch Thömu (C), Rüttimaa Reto, Eggebärger Nick (67. Schläfli Dävu), Tüscher Yannik, Schneider Denis (75. Tüscher Schöggu), Schueler Fäbu, Louper Luca (88. Kubacki Yannic)


Ersatz: Schtouffer Erich


Träner: Tüscher Pädu, Vo Fäute (VoFi) Patrick


Dr Massör: Schteiner Reto


Nid derby: Hofer Mischa


Verletzt si: Imperiali Diego, Kocher Damian, Schtouffer Miggu


Gou:

47. 0:1 Louper Luca, 70. 1:1 Abrecht, 80. 1:2 Rüttimaa Reto, 89. 1:3 Rüttimaa Reto


Üsi Zueschouer

Üsi Fans si eifach es grossartigs Vöukli. Erschtunt heimer dörfe feschtschteue, wie zauriich sie dä Trip über ds grosse Wasser hei i Chouf gnoh um däm Derby bizwohne. Bösi Zunge bhoupte, d'Schtedtlibeizer heige fruschtiert inegschtuelet und ir Chiuche heigs grad so viu Lüt gha, dass es zum ene Schieber glängt hei. Üses Eis macht vo sich z'rede u mir hoffe, dass blibt no es zytli so.


Erschti Haubzyt

Am fachkundige Publikum isch nach em Apfiff schnäu klar worde, dass do zwe Wäute ufenang träffe. Do eher die schpielerischi Eggippe (üse FCB), dört e Mannschaft wo uf ds Zerstöre us isch u mit länge Bäu ihres Glück versuecht het. Es isch drum ou nume logisch, dass Büre i dr Schtartphase optisch die besseri Mannschaft isch gsi. Mi isch zu Chance cho, wo me de scho no öppe einisch hät chönne ds Gou träffe, aber überhaschteti Versüech hei no nie zum Ziu gfüehrt. So nach zwänzg Minute het sech Längnou langsam gsammlet gha, z'Schpiuateile hei sech agliche. Bim ne Zwöikampf het sich dr Günther Marco verletzt und het vom Platz müesse. Gueti Besserig Marco, mir bruche de di, gäu! Ersetzt isch är düre Grogg Reto worde. Churz druf abe isch e erfouriche Agriff, abgschlosse vom Louper Luca, nume knapp am Gou verby. Im Gägezug isch Längnou zu zwe Hochkaräter cho. Beidi Mou het dr Chäser Simu mit chatzeartige Reflexe grettet und Büre vom ne unverdiente Rückschtand bewahrt. Paar Minute schpöter, e schnäui Agriffsuslösig vom FCB isch dr Uslöser gsi, verschiesst dr Schueler Fäbu nume knapp. Es isch Hin und Här gange, fouglech isch wider Längnou draa gsi, aber ou sie hei d'Chance nicht packt. E Wimpereschlag drufabe chunnt dr Rüttimaa Reto das bekannte Schrittli z'schpät und e Schuss vom Scheidegger Mänu stricht knapp übers Gou. Jitz häts guet u gärn gsamthaft scho öppe vier Gou chönne gäh, aber ds Ziuwasser isch äuä scho am Vorabe ds Gurgeli ab. So het ds Sauz i dr Suppe zu däm unterhautsame Schpiu no gfäuht. Beid Siite hei d'Chance vergiiget, mit em ne chline Pöuschterli i d'Pouse z'goh.


E chlini Randnotiz, schnäu igflächtet

Muess me im Längfäud z'Biu e Schnägg i Sack näh, dass dr Parkplatz chasch berappe, so muesch z'Längnou nume fasch e Schnägg de gfäuigscht ou bider ha. So öppe e Haubschtund vor Schpiubeginn wird ds Moos hermetisch abgrieglet, es durchdachts Sicherheitsdispositiv schliesst es Yschliche oder es Dürebräche völlig us. Bim Schlangeschtoh vor em Kabäuschen hesch de Zyt, dis Münz fürezgrüble, bevor e schträng blickende Maa dir seit, was do Usus isch. E schöni Tradition us vergangene Zyte.

Übrigens liebe Längnouer, äntwäder isch mi Brüue kaputt oder mit dr Azeigetafele schtimmt öppis nid. Bitte tschegge!



Zwöiti Haubzyt

Nach dr wouverdiente Pouse isch es du nid lange gange, het dr Louper Luca mit em Ahang Erbarme zeigt. Är het am ne Längnouer dr Bäu abgluchset, louft i Sächzähner u schiebt gekonnt zum 0:1 i Chaschte (47. Minute). Büre wider mit dr bekannte Schteigerig i dr zwöite Haubzyt und ou wider mit em ne Häppy-End, wie so viu mou i dr Vergangeheit? Sie hei ömu z'Schrube azoge und klar zeigt, wär do aus Sieger vom Platz söu loufe. E schöne Agriff über d'Syte vom Scheidegger Mänu bringt dr Rüttimaa Reto i ne viuverschprächendi Position, sie Schuss chlatscht lediglich a Pfoschte. Zwüschedüre sacket dr Louper Luca für nes Dutzendfoul e gäubi Charti i, wo Fouge het. Bim nöchschte Schpiu gäge Port deheime, cha är mou säuber erläbe, was mir aus während nünzg Minute müesse düremache (s'Närvegostüm und so). Mi isch em Gfüeu nid los worde, dass dä Momänt chunnt, wo Büre dr Sack zuemacht. Sie hei schpielerisch die fineri Klinge gfüehrt und d'Versüech schpiuentscheidendi Akzänte z'setze mit meh Vehemänz gsuecht. Aber - und das isch nüt Nöis – mi geit mit de usegschpiute Chance eifach viu z'fahrlässig um. Wär se nid macht, überchunnt se. E dumme Schpruch, aber gäng no träffend. Genau so isch es gsi, ir 70. Minute schiesst Längnou usem ne Tohuwabohu ir Verteidigung dr Usglich. D'Offensivbemüehige nach däm Dämpfer vom FCB verpuffe, sigs wüu me d'Chrutze nicht breicht oder knapp dernäbechlepft. Churz druf abe geits im Sächzähner vo Büre wiud zue und här. Eine bhautet d'Übersicht, dr Häxer vo Meieried! Drü Mou, ig wiederhole schüstemang drü Mou het dr Simu verhindert, dass Längnou zum Erfoug chunnt. Wenn ig das richtig gseh ha, hei sicher no zwe Schpieler vo üs ou no d'Scheichli derzwüsche gha. Schreckmomänt, fasch dr Gagg i de Hose u no grad i z'Schtange bisse. Jitz no dr Anke vom Brot lo abschläcke? Sicher nid! Das hei sich vermuetlech ou d'Prodagonischte usem Büreschtedtli gseit und sech i ds Füdle klemmt. Gäng wenn dr FCB schnäu u flach schpiut, wird’s am Gägner trümmlig u schteit belämmeret im Schiuf und d'Erfougschance schtiege. Mir notiere die 80. Minute. Dr Schueler Fäbu louft mit em Bau i Sächzähner u leit für e Rüttimaa Reto pfannefertig uf. Do muesch de Reto nid öppe zwöu mou bitte, chautblüetig vouschtreckt är zur verdiente Füehrig. Nün Minute schpäter, Duplizität der Ereignisse, nume het am Reto das Mou dr Louper Luca pfannefertig ufgleit. Ou do, keis zögere u keis umeblötterle, inhoue u juble.


Muess ou no gseit si

Ig muess mou zwe Schpieler ewähne, wo Wuchenänd für Wuchenänd nid für e gross Schpektaku verantwortlech si, aber mit ihrem Angaschement und Kampfgeischt wichtig si für üsi Eggippe. Das isch z'Chopfbaumonschter u Bauverteiler Lerch Thomi und dr Tüscher Yannik, üses Kampfsöili u Duracellmändli! Giele, ich zieh den Hut!


Resümee

Ig muess am Chrigu Louper rächt gäh. Es isch für ne Viertligamatsch e interessanti und abwächsligsrichi Begägnig gsi. Schpannig pur und dr Itritt alleweil wärt.


Wie im Heimschpiu het Büre ou gäge Längnou uswärts e Dreier ghout und sich so e chlini Chance für ne mügleche Ufschtieg nid loh näh.


Bis zum hütige Derby het Büre pro Schpiu im Schnitt 2,15 Punkt ghout, 3,8 Gou gschosse u 1,6 Gou übercho. E überzügendi Bilanz.


Dr nöchscht Matsch

Nöchscht Wuche chunnt dr SV Port uf e Lache. Glichzytig isch ou no Fischässe, darum isch usnahmswys Aschpiu am Zwöi (14:00). Das heisst für üs, mir schleipfe no aues a Verwandte und Bekannte mit uf e Schuttplatz, luege guete Fuessbau und fröie üs uf knuschprige, feini Fisch us dr Chuchi vom FCB!


Hopp FCB




Aktuelle Beiträge

Alle ansehen

Comments