top of page

FC Ins - FCB 2:4 (1:1)

Ostermontag, 22. April 2019 , Sportplatz Rötschmatte, Ins


Wärtvoui Punkt am Oschtermäntig


Immer die beschwährleche Reise nach Ins! Das geit eim langsam aber sicher uf e Sack. Das het nüt mit dr Gägend oder de Inser z'tüe, scho ender mit der Art, wie üser die Ufgab agöh. Immer es Gwürg, immer es Knorz und immer es Resultat uf em letschte Drücker, oder ömu de fasch immer Es isch ou hüt bi däm wunderbare Oschtermäntigwätter nid angers zue- und härgange. Luege mir d'Vergangeheit a, gseht das fougendermasse us:


2018/2019: FCB – Ins 2:3 Ins – FCB 2:4

2017/2018: FCB – Ins 1:3 Ins – FCB 1:2

2016/2017: FCB – Ins 1:2 Ins – FCB 1:2

2015/2016: Ins – FCB 1:2 FCB – Ins 0:7

2014/2015: Ins – FCB 4:2 FCB – Ins 3:3

2013/2014: Ins – FCB 0:4 FCB – Ins 4:0

2012/2013: Ins – FCB 6:1 FCB – Ins 2:1


I virzäh Begägnige het dr FCB 7 Mou gwunne, einisch unentschiede gschpiut u 5 Mou verlore. Zwüschine hets öppe e klare Sieg für Ins oder Büre gäh, aber meischtens isch's e Kampf uf biege u bräche worde.


Es isch bedütend eifacher, im Häftli es Oschternäschtli z'gfinge, aus mit intaktem Nörvegostüm d'Heireis vo Ins azträtte. Mi chönnt sech i dr Schefetasche vom FCB Gedanke mache, öb me nid näbem Reto Steiner aus Masseur, no wott e Neurolog für Zueschouer angaschiere. Würd sich gloub no lohne u Büetz würd däm nid usgoh.


Schicke mer no vorus, was dWuche vorhär gäge Aegerte-Brügg usegluegt het. Äbe nüt, dänke jitz die meischte Igfleischte. Aui die heisse Gägner vo Büre (Müntschemier, Grüenstärn, Längnou) hei gwunne und dr FCB het deheime e 2:0 Rückschtand ufghout und ir letschte Minute ds Schpiu no vergäh. Anschtatt wärtvoue Bode guetzmache, het me sech i dr Roue vom Jäger wider gfunge. Einische meh Pünkt lo liege, wos eifach nid nötig wär gsi.


Gömer zum Tagesgschäft.


Ufschtellig FCB:

Chäser Simu, Schläfli Dävu (46. Hofer Mischa), Schtouffer Eric, Günther Marco, Grogg Reto, Schneider Denis, Lerch Thömu (C), Tüscher Yannik (72. Eggenberger Nick), Scheidegger Mänu (81. Kubacki Yannic), Schueler Fäbu, Louper Luca


Ersatz: Eggenberger Nick, Freiburghaus Lars, Hofer Mischa, Kubacki Yannic


Träner: Tüscher Pädu, Vo Fäute (VoFi) Patrick


Die gueti Seu: Schteiner Reto (Künschtlernahme Susi)


Gäub gschperrt: Dos Santos Ruben


Verletzt si:

Imperiali Diego, Kocher Damian, Rüttimann Reto,Tüscher Schöggu, Schtouffer Miggu. Keine vergässe? Schüsch bi mir mäude!


Schiedsrichter: Eifach nume zum Gring schüttle. Wenn üsereins d'Büetz so unmotiviert ageit, überchunsch früecher oder schpäter es Rieseproblem. Aber derfür het är eis Gou meh gmäudet, aus Büre gschosse het. Geile Typ mit sine häublaue Söckli!


Gou:

39. 0:1 Schuler, 42. 1:1, 47. 1:2 Schuler, 50. 2:2, 72. 2:3 Schneider, 84. 2:4 Schuler


Man oft he Match: Dr Schueler Fäbu u dr Oschterhas


Nämer z'Beschte vorab. Dr FCB isch nach wie vor 2 Punkt hinger em Erschtplatzierte, u das isch jitz dr FC Längnou. Bis zum Vierte isch no aues offe, u dr Viert, dass si mir, das schteut uf u loht üses Härz schnäuer pöpperle!


Dr FCB het i däm Schpiu wider mou müesse umschteue. Erschtens het me mittlerwile zwe verletzti Golis, eim isch e Bagger uf e Gring gheit und am anger isch Schuetere am blöd tue. Es gseht us, wie Beid i der Rückrundi nümme chönnte i Isatz cho. Es het dr Chäser Simu, sowieso scho überträniert, i d'Hose müesse. Merci Simu, wirsch no zur läbige Legände! Und e angere Goli isch uf em beschte Wäg derzue, Gschicht z'schribe. Dr Jarno Beyeler wird mit gröschter Wahrschihnlechkeit sis gfüehte sibete Kombäck gäh. Hurra, Wäutrekord, mir fröie üs. Das isch de no nid aues was Defensive ageit. Üse Ruben dos Santos, wo e hervorragendi Meischterschaft schpiut (jitz nid düredräje gäu Ruben, schön uf em Teppich bliibe), het e Gäubschperri nid dörfe, sondern müesse abhocke. Auso nüt vo igschpiuter Defensive, aber sit beruhigt liebi Läser, e Bürer Hüehnerhuufe isch nid uf em Inserräseli umegfurzet, si hei die Sach ganz styf gmacht. U dr Eric Schtouffer het si Lade im Griff gha und es geils Schpiu abglieferet.


Hesch nach em Apfiff chlei die beide Träner i z'Visier gnoh, isch eim schnäu klar worde, dass das nid e eifachi Gschicht isch und wird. Säge wie schtoh, säge wie nid schtoh u säge wie loufe u säge, dass nid darfsch go, wüu schüsch dr anger geit. Blib! Aber nei, jitz muesch goh. Schiess doch. Schnurret mitenang, tue nid gäng usehöische, deck jitz dä! Do isch dr Hanspeter Latour e Weisechnab dergäge. Aber ds Schpiugscheh wird i dene Wort passend charakterisiert. Es isch es hin und här gange, zeichnet gsi vo Zwöikämpf. Schtrukture im Schpiu si chlei ungergange, aber dür die Intensität isch Begägnig interessant gsi und het gläbt vor Angscht, es Gou z'übercho. E erschte Weckruef dür z'Inseli het dr Denis Schneider abgloh. E Freischtoss us öppe 25 Meter het är a d'Latte brätscht, no z'Aarbärg si Gringe zum Fänschter gschneut, zum luege, was äch do los sig. Jitz het z'Schpiu so richtig Fahrt ufgno u Torszene si hüfiger worde. Vorauem dr FCB het Lunte groche und isch agrennt, mou über d'Mitti oder mit länge Bäu uf d'Flügle. Und so ne Bau het d'Füehrig für e FCB brocht. Dr Mänu Scheidegger isch perfekt gschickt worde, zeiht ine u drückt ab. Dr. Goli het dä Bau müesse lo abklatsche u dr Fäbu Schueler het dr Abprauer unter d'Latte knaut. Jo, aber gottfriedschtutz, nach drei Minute schpäter isch die Herrlichkeit scho wieder Gschicht gsi. E Konter het zum Usglich gfüehrt. Büre het wyter drückt u vehemänt 2:1 gsuecht. Churz drufabe het dr. Häublausöckeler zur Pouse pfiffe. Das si aube so d'Minute wo mir Bürefans bruche für abezfahre, d'Seele lo z'bambele loo, oder eifach a öppis Schöns dänke. So möge mir de die zwöiti Haubzyt ou no bysse.


Wyter geits und üser si totau bir Sach. Genau nach zwe Minute (47.) macht dr Fäbu si zwöiti Chischte. Jitz aber uf Zack si, ufpasse und ou chlei a z'verteidige – zack 2:2; dänke, hani eigentlech wöue säge, scho hets wider igschlage. Das darf wou nid wohr si. Uns schwant böses! Aber üsi Lüt schtecke das Ding wäg u gäh Gas, si jitz dominierend. Aber z'Hingereliege muesch zum Chopf us bringe. Mir schriebe die 50. Minute u dr Denis packt wider e Schtrich us. Und das Mou isch dä Cheib dinne, e Superchischte, chancelos muess dr Goli hingere gryffe. Ins leit e Zahn zue, het zwei drei gueti Chance, packts aber nid. Derfür isch dr Fäbu i dr 72. Minute wider zur Schteu und schiesst sis dritte Gou zum Ändresultat vo 4:2 für Büre. So hei mir das gseh. Es isch eine uf em Bitz gschtange, dä het öppis anders gseh. Im Internet chasch go nocheläse, 5:2 hei mir gwunne. We dr FCB nume chlei meh so ring zu Gou chiem.


Nöchscht Wuche isch Besa Biel/Bienne uf em Lache z'Bsuech. Zyt, um vor erschte Minute a für ne entschpannti Atmosphäre zsorge. Auso Modis u Giele, am nöchschte Samschtig isch Pflichttermin, ab uf e Lache! Dr FCB fröit sech uf öich! Hopp FCB




Aktuelle Beiträge

Alle ansehen

Comments