top of page

FC Iberico Biel - FCB 2:10 (0:5)

4. Mai 2019, 19:00 Uhr, Meisterschaft 4. Liga, Erlenwäldi in Biel


D'Vivian und ig hei agfange, d'Andrea und dr Chrigu hei nochezoge, dr Rickli, d'Laura u Stephi si ou ume Egge gschwirret. Uf zmou schteit dr Thömu do, d'Marianne isch ou gäng derby, dr Renato i de wysse Schue, dr Nidu u Tochter vom Reto, dr Pädu Friede dä Schpinncheib chunnt mit em Rennvelo, dr Lui darf natürlech ou nid fähle und d'Andrea T. isch sowieso ou gäng awäsend, nid z'vergässe ds Vöukli vo Bärn (Schuelers u Co), sie si jo sowieso e feschte Beschtandteil. Das isch keis Gseuschaftsschpiu, das si aues Lüt wo bi Wind und Wätter gö go dr FC Büre leuge. Die lö sich dür chlei Cheuti, Schnee oder Räge nid dervo abhaute, üsi Manne z'unterschtütze. Aber eis muess ig säge, es isch souchaut gsi u ke Büvette offe, wo chlei a d'Wermi hätsch chönne. Skandau Nummer eis!


Öppis wo ou chlei gnärvt het, isch Tatsach, dass uf em ganze Areal genau ei Matsch schtattgfunge het. Jedi Mängi Fuessbaufäuder si brach gläge. Aber nei, mi muess am Samschtig am Obe am Siebni schutte. Skandau Nummer zwöi.


Villech no chline Tipp, wenn uf z'Längfäud wotsch go Matsch luege. Nimm de e Schnägg meh i Sack, wüu di Chrutze chasch de nid eifach gratis u franko häreschteue, wo du wotsch. Müesse mir uf em Lache ou ifüehre!


So, göh mer zum Wäsentleche.


Büre entfesslet, furios, nid z'brämse. Es klars Verdikt uf däm wäuige Längfäud. Het ächt do chlei d'Ärde gschüttlet? Es Schtängeli het me scho lang nümme zwägbrocht. Dr letscht Versuech isch z'Ägerte i dr Vorrundi gsi, wo's schlussändlech bi nün Gou blibe isch.


Luegt me d'Resultat vo geschter a, foht me a, am Verpasste nochztruure. Ei Sieg meh, blödi drü Punkt meh, u mi häts no i dr Hang, us eigener Chraft d' Schpitze iznäh.Wüu mir wüsse jo, es isch no FC Längnou gäge FCB. Dä Schoudaun hät ig de scho no wöue miterläbe. So muess me warte, öb Längnou no über die eigete Bei schtouperet. Es isch aber ou säubschtverschtändlech, dass de üser ou zersch no ds Räschtprogramm müesse abschpuele, wie sech das ghört.


Bim letschte Bricht si d'Schlusswort gsi, chöi mir mit ere Trotzreaktion rächne? Idrücklech het sich dr FCB zrugg gmäudet u schpielerisch überzügt und einisch d'Bäu dört häre versänkt, wo si häreghöre – nähmlech i z'gägnerische Gou!


Ufschtellig FCB:

Beyeler Jarno, Lopes dos Santos Ruben, Schneider Denis (46. Schtouffer Eric), Scheidegger Mänu, Lerch Thömu (C), Kubacki Yannic, Günther Marco, Tüscher Yannik, Rüttimann Reto (60. Schläfli Dävu), Schueler Fäbu, Louper Luca (73. Tüscher Schöggu)


Ersatz: Grogg Reto


Träner: Tüscher Pädu, Vo Fäute (VoFi) Patrick


Dr Massör: Schteiner Reto


Nid derby: Eggebärger Nick, Hofer Mischa


Verletzt si: Imperiali Diego, Kocher Damian, Schtouffer Miggu.


Schiedsrichter: Isch mit eigewiuige Interpretatione bi Penautis e chlei i ds Ramplicht grückt.


Wo dr Schiri apfiffe het, si scho bau d'Häufti vo de Zueschouer nid grad erfrore gsi, aber de sicher guet unterchüelet gsi. Dr Schtart het aber die chaute Glider schnäu i Wallige brocht, het doch dr Luca Louper i dr 6. Minute bereits d'Schtandfeschtigkeit vo dr Latte prüeft. Si het schtandghaute. Schpielerisch isch es gloffe wie dür Anke. Mi het dr Bau nid lang am Fuess gha, sondern het dr besser platziert Mannschaftskolleg gsuecht. Mir schribe die 15. Minute wo dr Fäbu Schueler im Sächzähner e Schuss liecht verzieht. Dä hät me de ou chönne mache, gäu Fäbu. Vier Minute schpöter zieht dr Luca Louper wider ab, dr Goli vo Iberico schteit pär Zuefau am richtige Ort. Ig wage z'bhoupte, dä hät no hüt am Sunntigmorge Ranzepfiiffe. Bereits si zwänzg Minute gschpiut und es het nach ere fulminante Druckperiode im Gou vo Iberico no nid igschlage. E chlini Näbebemerkig. Dr Schpielerträner vo Iberico het äuä deheime nid viu z'säge, dä het gschnurret und isch ufe und abe däselet, sis Pensum für die nöchschte vierzäh Tag isch ömu de erfüut.


So jitz geits Schlag uf Schlag, heit d'Hüet liebi Lüt. Uf ne super Pass vom Reto Rüttimann eröffnet dr Luca Louper uf si tüpische explosivi Art dr Torreige (21. Minute). 23. Minute, dr Jarno Beyeler erreicht dr Luca Louper mit em ne länge u präzise Abschlag, dr Pass i d'Mitti uf e mitglofnig Ruben dos Santos Lopes, chlept dä ohni Müeh i d'Masche, 0:2. Mir ar Linie hei scho gseit, so jitz chöi mir hingerelähne u für einisch chlei üses Närvegostüm schone, tuet jo ou mou guet! Ir 30. Minute hout eine vo Iberico dr Luca Louper vo de Socke. Penauti – e Gschicht i drei Akt. Du gloubsch das nid? Isch aber eso! Erschte Alouf, dr Bau isch souverän verschteckt. Dr Schiri seit, widerhole das Ding. Eine vo üs isch z'früeh i Sächzähner inegsecklet. Zwöite Alouf, dr Goli laueret i Schuss, widerhole. Es isch scho wider eine, äbe wie vori. Dritte Alouf, souverän versteckt, 0:3! Dr Damm isch broche, wie es Schwiizeruhrwärch schpuelet dr FCB ei Agriff um e anger richtig Gou vo de Husherre ab. Z'nöchschte Gou lot nid lang uf sech warte. Luca Louper uf e Fäbu Schueler – Flachschuss - 0:4. Drufabe verletzt sich dr Denis Schneider u muess z'Fäud verloh, dr Erich Schtouffer nimmt sie Platz i. Gueti Besserig Denis! Zum Wind und zum liechte Räge mischt sech jitz no Schnee derzue. D'Böum im Jura si puderet. Es isch jo bau Pouse, de chöi mir de as Kiöskli eis go schnappe. Aber zersch erläbe mir no live ds Gou zum 0:5. Mir schribe scho die 48. Minute, dr Marco Günther verwärtet e Flangge vom Reto Rüttimann souverän. Pouse! Mir furze schnäu aui äbe a das Kiöskli, dört wird Gaffe gmacht, Chinder gwicklet, drü Würschtli blöterle ir e Hotdog-Maschine ume, es git Cerveja de Portugal u z'Gaffe fertig isch mit Jack Daniels. Herrlech exotisch!


Logisch chöme mir z'schpät. Die Möffe schutte scho u hei ou scho am Resultat umegschrüblet. 1:5 verpasst! 1:6 verpasst, mi chönnt fasch säge, Skandau Nummer drüü. Übrigens, dr Fäbu Schueler het zuegschlage. Mir chöme uf e Bitz und eine vo Büre nimmt Alouf für ne wiitere Penauti – und verhout. Ig säge jitz nid wär, wüu är mi ganz schüch gfrogt het, "schribsch du das?" Dir müesst öich jitz im wytere Verlouf vom Bricht ohne Zytagabe abfinge, wüu dr Drang öppis z'süfferle grösser isch gsi, aus z'usharre, wenns derewäg schtrubusset. Die nöchschti Chischte isch wider e schöne Agriff über z'Site gsi. Dr Reto Rüttimann het dr Fäbu Schueler muschtergüutig bedient, dä schiebt mit em ne Flachschuss suverän i, 1:7. Churz druf abe het e schöni Kombination übere Yannik Tüscher zum Luca Louper ds 1:8 brocht. Iberico het du zeigt, dass ou nid grad us Chätschgummi si, 2:8 isch z'Resultat dervo. 2:9 schiesst dr Mänu Scheidegger, vorbiudlech igsetzt vom Marco Günther. So, jitz muess das Schtängeli häre. Schiesseglich wär die Chischte Minerauwasser (äuä chum) muess zahle. Dr Joel Marc Tüscher (üse Schöggu) verpasst die Chance mit em ne herrleche Wytschuss nume knapp. Es het ne du glich no a Gring gäh, dür ne kämpferischi super Leischtig rettet dr Dävu Schläfli e Bau churz vor dr Autlinie, zieht düre und bedient dr Schöggu Tüscher sensationell u dä verwärtet im gliche Schtiu zum Schlussresultat vo 2:10.


So num lang umeschtürme, hei i die warmi Schtube und luege, dass me d'Cheuti zu de Glieder usbringt. Es warms Teeli abeschlürfle und ab i z'Näscht.


Nöchscht Samschtig si mir de wider uf em Lache, weme Töuffele i Angscht u Schrecke versetzt! Hopp FCB!

Aktuelle Beiträge

Alle ansehen

Comments

Rated 0 out of 5 stars.
No ratings yet

Add a rating