FC Etoile Biel - FCB 0:1 (0:1)
Samstag, 19. September 2026, 16:00 Uhr, Mühlefeld Biel
Meisterschaft 4. Liga
Text: Hans Peter "Budi" Gribi
Foto: Stephan Kubacki
Aufstellung FCB (4-2-3-1)
Noe Fankhauser, David Vuilleumier (79' Numa Marmier), Nils Blatter, Denis Schneider (C), Marco Günther, Men Meier, Joel Zambrano, Nick Eggenberger, Ledion Ramadani (83' Nikola Jankovic), Manuel Bigler, Luca Lauper (60' Simao Lopes Magalhaes)
Ersatz
Mario Bärtschi, Tim Blatter, Fabian Hänzi, Yannic Kubacki
Abwesend
Rafael Azevedo Alves (Match mit Junioren B), Ruben Dos Santos (Arbeit), Patrick Frieden (nicht im Kader), Fabian Schuler (Ferien), Fabian Suarez (nicht im Kader), Noah Zambrano (Ferien)
Rekonvaleszent
Silas Adam, Alex Files, Joel Knörr, Dario Leisi, Daniel Marti
Junioren B im erweiterten Kader
Jonas Beyeler, Alan Duflon, Neal Homberger, Robin Steiner
Staff
Manuel Scheidegger (Trainer), Carlos Manuel De Sousa Files (Assistenztrainer), Jarno Beyeler (Torhütertrainer), Reto Steiner (Masseur)
Tore
22' Denis Schneider auf Eckball von Joel Zambrano mit einem wuchtigen Kopfball
Karten
58' Nick Eggenberger (grobes Foul)
Bemerkungen
Y dr 25. Minute verweigeret dr Schiedsrichter Etoile Biel e klare Penauti. Dr David Vuilleumier, was het ihn do ächt gritte, hout völlig unmotiviert e Etoile-Schpieler im Sächzähner vo de Socke.
Y dr Pouse erregt ufsmou e Tumult d'Ufmerksamkeit vo de Zueschouer. Het doch tatsächlich e Etoile-Schpieler e Mitschpieler wöue abtöffle. Das isch e Ysatz am fautsche Ort und e Verpuffig vo Chräft, wo me anderwytig besser hät chönne ysetze. Was für ne Szene.
Erschti Haubzyt
Was für ne erschti Haubzyt! Tempo, Zwöikämpf und Chance zuhauf. Aber aues schön dr Reihe no. Büre het dä Schpitzekampf mit namhafte Absänze müesse y Aagriff nä. Mit Silas Adam, Ruben Dos Santos, Dario Leisi, Fabian Schuler und Noah Zambrano hey grad füüf Schtammschpieler in Biel nid chönne mitmache. Mit Silas Adam, Ruben Dos Santos, Dario Leisi und Daniel Marti, isch e Grossteil vo de fählende Schpieler zur Unterschtützig is Mühlefäud cho. Das isch gläbte Teamgeischt und ganz nach em Guschto vo de Trainer, so muess es sy.
Ds Schpiu het für üse FCB viuverschprächend aagfange. Bereits früeh (5. Minute) het der FCB mit er e schöne Aktion uf sich ufmerksam gmacht. Der Ledion Ramadani (wie mängi Lunge het dä Giu?) leit super für e Nick Eggenberger uf, doch dr Abschluss misslingt. D'Schlagzau isch höch, d'Zwöikämpf knackig und Büre cha e es liechts Übergwicht erarbeite. Es duuret zwöuf Minute, bis Etoile sich einigermasse erfougverschprächend vor em Noe Fankhauser cha y Szene setze. Dr Chopfbau entscherft dr Noe y gwohnt souveräner Manier. Dr FCB blybt dran und chunnt zu wytere Chance. Dr Manuel Bigler chöpflet e Bau scharf uf e Chaschte vom heimische Gooli, doch dä cha mit em ne riese Reflex über d'Latte rette. Etoile, es Team us quirlige und technisch versierte Schpieler, isch bis uf zwänzg Meter vors Gou vo Büre im Schpiu, aber nächhär happerets gwautig. So ou y dr 16. Minute. Us ussichtsrycher Distanz verzieht e Schpieler und lot e gueti Chance lo ligge. Dr FCB tuet y Sache Zwöikämpf nid tüüssele, gringsvoraa und chnuschprig a d'Sach und dr derby d'Fairness wahre. Das chöi nid aui Gägner gutiere, lö sich bim gringschte Kontakt lo gheie und schpiele dr tot Maa. Grännicheibe. Das närvt und passt so gar nid zu däm rassige Schpiu. 21. Minute, dr Nick Eggenberger bricht uf dr rächte Syte düre und wird y beschter Position rotwürdig gleit. Dr Schiri git die gäubi Charte und dr Freistoss füehrt zum ne Corner. Dr Joel Zambrano zirklet dä Bau perfekt y Sächzähner ine, wo dr guet poschtiert Denis Schneider chräftig us sächs Meter cha ynicke. Die Füehrig isch völlig grächt, het sich doch dr FCB die klarere Chance erarbeitet. Mittlerwyle sy mir y dr 25. Minute. Dr David Vuilleumier cha sy Gägeschpieler nid blocke, dä haset ab und was gisch was hesch dr Dävu hingenoche und hout dä penautiryf vo de Socke. Schockzueschtand unger de Zueschouer, aber d'Entwarnig chunnt sofort, dr SR lot seeleruhig lo wyterschpiele. Bhu - mit em ne blaue Oug no dervo cho. Nach em ne wunderschöne Zämeschpiu verpasst paar Minute schpöter dr Ledion Ramadani ds sichere2:0, sy Schuss nach em ne super Zueschpiu vom Luca Lauper, missratet völlig. Die nöchschti Chance lot nid lang uf sich warte. E Chopfbau vom Men Meier verpasst ds Gou nume minim und dr Marco Günther gseht paar Minute schpöter sy Schuss us 16 Meter am ne Gägner abpraue. Cha da Lappi nid a nes angers Ort schto?
Ds Guete vorewäg, dr FCB isch angaschiert as Wärch, isch reschpäktlos y d'Zwöikämpf und het d'Vorteile uf ihrer Syte gha. Was me muess bemängle, sy die verpasste Torchance. Nach Adam Riese hät dr FCB y dr Pouse söue, oder gar müesse, 3:1 füehre, we me dr berächtigt Penauti für Etoile y d'Rächnig ybezieht.
Zwöiti Haubzyt
Es wird es völlig angers Schpiu. Het y dr erschte Häufti Rasse und Klasse dominiert, isch es es Knorz und nid würklech es interessants Schpiu worde. D'Schpannig het däm Schpiu dr Charakter ufdrückt und het üsi Närve schtrapaziert. Es isch wieder dr omnipräsänt Ledion Ramadani gsy, wo mit em ne Wytschuss uf sich ufmerksam gmacht het. Etoile isch bemüeht gsy, het viumous haschtig abgschlosse und üse Gooli nid y Unrueh chönne versetze. Die klare Chance sy nid nume bi de Platzherre Manguwar worde, ou dr FCB isch us däm Schlagabtusch nid zu klare Chance cho. Y dr 60. Minute het dr Luca Lauper Fürobe gmacht und dr Sima Lopes, drüüfache Torschütz gäge Bözingen, het ihn ersetzt. Bis uf ei Chance het ou dr Simao y däm verchnorzte Schpiu keni wytere Goumüglechkeite chönne erschaffe, und do derby isch är nid dr einzig gsy. Etoile het wou versuecht, d'Schpiu no y die für sie rächte Bahne z'länke, aber es isch bim wöue blybe. Dr FCB isch ufsässig gsy und het die drüü wichtige Punkt uf Biege und Bräche wöue mit hey nä. So isch es bi däm knappe, aber verdiente Sieg für Büre blybe.
Mahnfinger
Nach em Schpiu het dr Manuel Scheidegger d'Mannschaft globt und ds Kollektiv y Vordergrund gschteut. "Mir hey gwunne und das isch nume e chlyne Teil vo üsem Ziu, es git ke Grund euphorisch z'wärde und abzhebe. Mir schtö mit beidne Füess uf em Bode und schaffe akribisch wyter", het dr Mänu dr Mahnfinger y d'Höchi gschtreckt.
Fazit
Dä Sieg isch verdient, ou wüu üsi Manne über 90 Minute die drüü Punkt hey wöue. Wies dr Mänu gseit het, isch ds Kollektiv und dr Wiue zum Sieg usschlaggäbend gsy. Nach dr intensive erschte Haubzyt isch dr Schpiufluss nach dr Pouse dusse blybe, nid z'letscht ou, wüu sich Etoile meh uf ds zerstöre, aus uf schpielerischi Lösige konzentriert het. Das dr Noe Fankhauser, übrigens gäng wie gäng mit er e tadulose Leischtig, y dr zwöite Haubzyt chum ärnschthaft prüeft worde isch, ungermuuret die Ussag. Mir gratuliere für ne behärzti Leischtig.
Nöchscht Wuche…
… reise mir wieder einisch uf Töiffele. Punkt 15:15h isch uf dr Rüti aapfiff. Mir hoffe uf schön Wätter, e grosse Ufmarsch vo de Bürer und wie chas ou angers sy, uf drüü wyteri Punkt.
Hopp FCB!
Kommentare