top of page

FC Dotzigen/Diessbach - FCB 0:4 (0:4)

Aktualisiert: 11. Dez. 2022

Meisterschaft 3. Liga / Gruppe 6 - 3. November 2019, 10:30 Uhr Sportplatz Eichi, Diessbach

Ufschtellig FCB Simon Käser, Eric Stauffer, Ruben Dos Santos (76. Lars Freiburghaus), David Schläfli, Reto Grogg, Luc Gutbub, Thomas Lerch (C) (80. Yannik Tüscher), Nick Eggenberger, Fabian Schuler (68. Men Meier), Reto Rüttimann (73. Yannic Kubacki), Joel Tüscher Ersatz: Mikael Stauffer Nid derby: Marco Günther (Militär), Mischa Hofer (2. Mannschaft), Diego Imperiali (2. Mannschaft), Luca Lauper (Rekonvaleszent), Dario Leisi (verletzt), Denis Schneider (Privat), Raphael Schuler (2. Mannschaft), Manuel Scheidegger (verletzt)


Bemerkig: Manuel Scheidegger muess wäg em ne Lyschtebruch passe. D’Operation isch am plane. Mir wünsche aune Verletzte gueti u schnäui Besserig! Üse Patrick „Pädi“ Frieden“ im gägnerische Gou. Staff: Patrick Tüscher und Patrick „Vofi“ Von Felten (Trainer), Reto Steiner (Massör) Gou: 3. 0:1 Reto Rüttimann (uf Corner vom Fabian Schuler), 5. 0:2 Luc Gutbub (Pass vom Reto Rüttimann), 18. 0:3 Joel Tüscher (uf Pass vom David Schläfli), 40. 0:4 Joel Tüscher (uf Pass vom Reto Rüttimann)


Wätter: Räge, Räge u no einisch Räge. Dr Platz in Diessbach isch chlei seifig gsi, aber erschtunlech guet beschpiubar.


Huduwätter

Es isch e Sunntigmorge gsi, wo me gärn no chlei hät ds Chüssi a dr Backe gha, nächhär gmüetlech zum Näscht us u dr Träner fasse, es Gaffee schlürfle und es chnuschprigs Groassan (Gipfeli) mampfe. Aber nei, die z’Diessbe müesse bi däm Souwätter am Sunntigmorge schutte. Item, dr gmüetlech Terminplan het am schtressige Jufle müesse wyche, anschtatt dr Träner hesch di rägefescht gäge unge u obe verpackt und uf e Wäg gmacht.

Zieht me d’Wättergabriole i Betracht, isch das vo de Bürefäns e sensationelle Ufmarsch gsy. Es het fasch usgseh wie ne Eroberigsversuech im Mittuauter. Nach em Matsch isch de d’Büvette aber ganz sicher i Bürehang gsy.


Wichtigi Absänze glänzend verträtte

Ir Wuche vor em Schpiu het sich abzeichnet, dass e wyteri wichtigi Schtütze vom Eis muess d’Sägu schtryche. Bim Manuel Scheidegger, uf sir Position uf em lingge Ussebegg e Bank, het Diagnose Lyschtebruch z’ghöre übercho. Schmärze i de vorhärgehende Schpiu hei dä Usfau bereits akündet. Vom Luca Lauper wüsse mir, dass är ersch wieder i dr Rückrunde wird i ds Gschehe ygriffe. Über d’Art und Schwäri vo dr Verletzig vom Dario Leisi bin ig leider nid im Biud. Uf em Poschte vom Manuel Scheidegger isch dr Reto Grogg igloffe. Mir näh’s vorus, är het e Bombematsch abglieferet, omnipräsant und zwöikampfstarch. Si Gägner isch wahrlech nid z’beniede gsy. We mir scho grad vo de Absänze hei. Uf e Fabian Schuler, wo mir im Schpiu gäge Grünstern schmärzlech vermisst hei, hei die beide Träner wieder chönne zeue. Dank sim löuferische und kämpferische Angaschema u de perfekte Zueschpiu het ds Agriffschpiu ou wieder a Farb gwunne. Dr Eric Stauffer, gäge Grünstern no uf dr Bank, het d’Viererchötti uf em rächte Ussebegg ergänzt. Wie gwohnt hei dr Ruben Dos Santos und dr David Schläfli (dr Flanggegott über d’Längdischtanz schlächthin) ds Inneverteidigerpaar gschteut. Im Mittufäud het dr Nick Eggenberger dr Vorzug gägenüber em Yannik Tüscher übercho, dr Men Meier het dr Vorzug am Fabian Schuler müesse zuegeschtoh. Roschadene bis a Bach abe.

Ab wie d'Füürwehr

Mir si jo nid grad e Fängruppe, wo vom Aapfiff a scho verwöhnt wird und relativ früeh im Schpiu gnüsslech cha hingereligge u ds Schpiu gniesse. Meischtens isch es schpannend ou wüu me z’eint oder z’angere Mou fahrlässig e Füehrig zur Hang us gäh het oder dr Gägner wieder het lo härecho. Das isch a däm Sunntig ganz angers gsi. Vor erschte Sekunde a het me am Gägner zeigt, dass das kes Zuckerschläcke wird und die drü Punkt gfälligscht uf Büre ghöre. Zur aggressive Körperschproch isch e Effiezienz a Tag gleit worde, wie mir se die Saison no nie hei dörfe beobachte. 3. Minute 0:1 und 5. Minute 0:2, Diessbach het me dr Schneid abkouft und so früeh dr Wäg frei gmacht für ne undiskutable Sieg. Die 18. Minute isch bereits scho öppis wie ne Siegsicherig gsi und ir 40. Minute het me dr Dechu druf to. Das die zwöiti Haubzyt nümme grad es Füürwärch i Sache Gou isch worde chame verzeihe. Umso meh wüu ou die zwöite 45 Minute vo zwe Mannschafte prägt si worde, wo nie ufghört hei schutte. Do muess me Diessbach/Dotzigen es Chränzli winde.



Erschti Haubzyt

Mir hei gschriebe, wie d’Füürwehr isch Büre i das wichtige Schpiu ygschtiege. D’Verteidigung vo Diessbach isch rächt früeh mit Arbeit ideckt worde u het ir 3. Minute nume no uf Choschte vom ne Eggbau chönne rette. Dr Eggbau, gschosse vom Fabian Schuler, gfingt am Reto Rüttimann si Chopf und wenn dr Bau dört häre chunnt, chasch dr Zeurahme i d’Finger näh, 0:1. Chum isch agschpiut gsi, het Büre d’Agriffsbemüehige scho wieder ungerbunge gha, dr Gägeagriff isch glüffe. Dr Schuss us 18 Meter vom Luc Gutbub isch über ds Gou gschtriche. Mir schriebe die 6. Minute u wieder het me a Agriff vo Diessbach/Dotzigen schtarch verteidiget u dr Gägeagriff louft. Dr Bau chunnt vom Thomas Lerch zum Reto Rüttimann, är gseht dr Luc Gutbub i beschter Abschlussposition und schpiut ihn punktgenau a, nach dr Baukontrolle und Ischetzig vo dr Situation lüpft dr Luc dr Bau mit au sir Routine übere machtlos Patrick Frieden zum 2:0 is Gou. E Schtart nach Mass. Trotz der früeche Füehrig und ere überlägene Schpiuwys vo Büre, lot d’Heimegippe dr Gring nid lo hange. Sie chöme besser is Schpiu, löh aber ir entscheidende Phase d’Präzision misse, oder d’Verteidigungsschtrategie vo Büre gryfft. Die Druckphase duuret öppe zäh Minute, ehe Büre wieder e Gang ufeschautet und ds Schpiudiktat wieder übernimmt. D’Überlägeheit isch ds Resultat vo fasch perfekte Verschiebige und em ne vorbiudleche Zwöikampfverhaute. Mir sy ir 24. Minute acho, e Agriff vom Heimteam wird vor em Sächzähner dür e David Schläfli abgfange. Är gseht i ussichtsricher Position dr Joel Tüscher schtoh u dröschet dä Bäu richtig Sächzähner vom Gägner. Dr Joel Tüscher kontrolliert dä Bau, schlot e Finte und schiesst im Schtiu vom ne aute Profi flach zum 3:0 i Egge. So wie ds Schpiu louft und Büre Ateile het, bereits d’Vorentscheidig? Mir sy jo fang chlei vorsichtig worde, u es brucht fei chlei öppis, bis mir das Wort Entscheidig is Muu näh. Aber do cha u darf jitz nüt Negativs mehr passiere. Für das isch die jungi Egippe vo Diessbach/Dotzige z’unerfahre und im Momänt ou grad chlei bedient. Trotz der klare Füehrig blibt Büre dra und setzt Druck uf. Die iheimischi Verteidigung cha sich mängisch nume no mit Häng u Füess wehre, macht oftmaus ou dr Idruck, überforderderet z’si. Ir 31. Minute bringt e schtarchi Einzuleischtig vom Fabian Schuler dr Luc Gutbub i ne erfougsverschprächendi Situation. Dr Schuss cha vom Patrick Frieden mit em ne guete Reflex no über d’Latte bugsiert wärde. Üse Simon Käser het chum meh nennenswärti Interventione, so souverän isch z’Defensivverhaute vo de Bürer. Im Mittufäud zieht me gschickt d’Fäde u schpiut wenn immer müglech dr nöchscht Schpieler flach a u louft i d’Gass, für wieder a Bau z’cho. Ernöit wird e Agriff vor em Sächzähner vo Diessbach/Dotzigen abgfange, dr David Schläfli zieht uf, für eine vo sine wyte Bäu. Öb Absicht oder Glück, dä Bau chunnt tupfgenau zum Reto Rüttimann, dä tanzet d’Verteidigung inklusive Goli us u schiebt überleit zum mitloufende Joel Tüscher. Furztroche lochet är y, 0:4 und mit Garantie d’Vorentscheidig (40. Minute). Churz vor dr Pouse het dr Joel Tüscher e wyteri Chance, langsam aber sicher muess är aber sir intensive Loufarbeit Tribut zoue und vergitt.


Üses Kader

Mi darf mit Schtouz säge, dass mir i üser Egippe es paar begnadeti Fuessbauer hei. Im Mittufäud dr Fabian Schuler, dr Luc Gutbub (e Rieseverschterchig) und dr Thomas Lerch technisch u löuferisch brillant und mit em Oug für e besser poschtiert Kolleg. Dr Nick Eggenberger e Kämpfer wie’s im Büechli schteit, isch e perfekti Ergänzig. Im Schturm oder hängendi Schpitze schteit de no dr Reto Rüttimann, wo Wuchenänd für Wuchenänd Entscheidige mit perfekte Päss ileitet oder d’Gou grad säuber macht. Dr Joel Tüscher, wo i der Vorrunde e Schteigerigslouf härezouberet het und jitz uf z’Ändi vo dr Vorrunde so richtig ufblüet und no Gou macht. D’Verteidigung a däm hütige Tag i glänzender Verfassig. Dr Simu, ufermksam u sicher und sini Vorderlüt lutschtarch dirigierend. Dr Ruben Dos Santos Schpiu für Schpiu üsi Läbensversicherig (wenn är nid grad öppis zäme chauberet), dr Eric Stauffer schtiusicher und aggressiv im Zwöikampfverhaute und e Reto Grogg, wo uf em lingge Ussebegg e Riesepartie gschpiut het. Jitz no e Blick uf’s Bänkli, was dört no aues für versierti Fuessbäueler uf e Isatz warte, nächhär geisch no d’Verletztelischte düre, Wahnsinn.

Zwöiti Haubzyt

Wenn mit ere 4:0 Füehrig i die zwöiti Haubzyt schtiegsch, isch no verschtändlech, wenn nid grad mit dr gliche Effizienz, schprich Konzentration, as Wärch geisch. Aber ou i der zwöite Haubzyt isch es e läbhafte und unterhautsame Matsch gsi. Mi hät de Iheimische dr eint oder anger guet Abschlussversuech möge gönne. Wüu kämpferisch sy sie nid viu schlächter gsi aus dr FCB. D’Präzision und z’fählende Säubschtvertroue nach ere abverheite erschte Haubzyt hei haut scho nid grad Hochkonjuktur gha. Aber das sie chöi schutte und sech nid müesse verschtecke hei sie i Schpiu gäge Grünstern (2:1 gwunne), Evilard (5:0 gwunne), Aegerten (3:2 gwunne), Madretsch (2:1 gwunne) u achtbari Resultat gäge Pieterlen und Aurore zeigt. Aber, u das isch beide Egippe höch aazrächne, a Intensität het das Schpiu nie nochegloo. Ir 56. Minute setzt sich dr Joel Tüscher glänzend düre und bedient dr Nick Eggenberger mit em ne Superpass. „Jitz Nick, mach dä Cheib!“ Het är’s ächt wöue z’guet mache? Uf au Fäu verzieht är, nüt isch gsi mit em erschte Gou. Büre schpiut nümme ganz so unwiderstehlich uf, isch aber doch sichtbar die besseri Mannschaft. D’Ersatzschpieler wärde zum Warmmache unger de Schirme wägbugsiert. Zyt für nöii Chräft! Mit dr Konzentration vo de erschte 45 Minute, wär scho no chlei meh drinne gläge. So verzieht me us beschter Dischtanz vo 18 Meter, bringt e Pass i Louf vom Fabian Schuler knapp nid a Maa u rütscht bim ne Schussversuech uf em liecht seifige Rase us. Ir 66. Minute lanciert Diessbach/Dotzige e viuverschprächende Agriff. Dr Abschluss cha dr Ruben Dos Santos uf dr Linie furtchlepfe. Schwein gha! Jitz isch Zyt für nöii Chräft. Dr. Fabian Schuler cha i verdient Füürobe. Ds Militär verschlingt haut scho no rächt Subschtanz. Für ihn chunnt dr Men Meier, wo sech nahtlos i die gueti Mannschaftsleischtig ifädlet (68.). Büre chunnt wieder zu guete Chance, ir 73. Minute (isch es dr Luc gsi?) gfingt dr Schuss ds Ziu nid. Dr nöchscht Protagonischt darf sini müede Chnoche uf em Bänkli go usschtrecke. Dr Reto Rüttimann (schpiufröidig wie eh und je) wird dür e Yannic Kubacki ersetzt. U wieder chunnt Büre zur e dicke Chance, dr Men Meier verzieht aber. 76. Minute, dr nöchscht Maa het Füürobe. Für e Ruben Dos Santos chunnt dr Lars Freiburghaus, wo dr Poschte uf em rächte Ussebegg inimmt, dr Eric Stauffer rückt i d’Inneverteidigung. Es schteit scho dr nöchscht Schpieler im Schtartloch. Es isch dr Yannik Tüscher, wo am Thomas Lerch si Platz inimmt. Nach liechte Unpässlechkeite gäge Grünstern, het dr Thomas Lerch i gwohnter Manier z’Schautzäntrum vom FCB beherrscht und zur Schtabilität bytreit. Gschuttet isch de ou no chlei worde. Die 86. Minute hät eigenlecht 5:0 söue bringe. Nach em ne satte Schuss vom Reto Grogg hei nachenang dr Nick Eggenberger und dr Luc Gutbub d’Resultatkosmetik verpasst. Es hät nid söue sy, ir 90. Minute verpasst dr Nick ernöit, das mou alleini vor em Gou. Ds Warte uf das lang ersehnte Gou geit i ne wyteri Runde. Mir drücke dr Dume. Fazit Ds Fazit faut hüt churz u bündig us. Die besseri Egippe het gwunne. Mit früeche Gou und ere forsche Gangart vo Afang a, het me sech dr nötig Reschpäkt und ds Säubschtvertroue ghout. Das me no so effiziänt isch gsi het me nid dörfe erwarte, erschtunt aber bi der Entwicklig vom Team nid. Ernöit het me Usfäu vo Leischtigsträger kalten Arsches wäggschteckt und sis Schpiu gmacht. E ganz e ryfi Leischtig, wo me am ne guete Kollektiv z’verdanke het. Hopp FCB


Fotogalerie





Aktuelle Beiträge

Alle ansehen

Comments