top of page

FC Diessbach/Dotzigen – FCB 1:2 (0:1)

oder To be, or not to be (Zitat aus der Tragödie "Hamlet")


Ig finge dä Titu passend, wüu die ganzi Schose mit dr Saison 2020/21 näbscht ere Zwängerei für etlichi Vereine äbe ou zur e Tragödie wird. Faire Sport gseht definitiv angers us.

Letschte Samschtig hei üser Manne in Diessbach gäge Diessbach/Dotzigen Teil 1 vor Finalissima knapp aber schlussändlech verdient gwunne. Mit däm Usgang het sich dr FCB d'Chance gwahrt, dr Klasseerhaut chönne z'sichere. Für e FC Diessbach/Dotzigen het die Niederlag dr ändgüutig Abstieg bedütet. Schad wüus heisst, wenn's üser de schaffe, eis vo de Nachbarsderby wär de bereits gschtorbe. Es cha aber no blöder usecho. Gwinnt Büre gäge Madretsch und Aegerten schlot Aurore, isch ou es zwöits Nachbarsderby Vergangeheit. I däm Fau stiegt ou dr SC Rüti ab. Das zum Leid vom Ustusch mit viu bekannte Gringe by Bier und Wurscht. Logisch, dass die Büvetteverantwortleche a dere Entwicklig chum chöi Fröid ha.

Landuf landab sy d'Meinige gmacht. Es git säute e Pärson, wo sich mit dr ghlychzytige Wärtig nach dr Vorrunde und dr Reorganisation cha aafründe. Ds Echo isch fasch immer ds glyche, Chopfschüttle und Unverständnis.

FVBJ - Mit em Gring dür d'Wand

Warum muess das so sy? Wüu die z'Bärn obe e Meisterschaft nach hauber Strecki wärte und glychzytig e Reorganisation dürefüehre, wo die finanziell und emotional so wichtige Nachbarsderby verunmügleche. Das hät nid müesse sy, scho nume us em Grund, wüu dr Schummelei Tür und Tor offeschteit. Und – ig säges immer wieder - Büre mit em kehrte Match gäge Azzurri und dr viu z'früeche Begägnig gäge Aurore (lueg bim letschte Abschnitt) u de no by schönem Wätter uf em Kunschtrase, e Nachteil het müesse wägstecke. Die fragwürdigi Schiedsrichterleischtig a däm Tag uf dr Linde hei sicher no etliche im Chopf.

FC Diessbach/Dotzigen – FC Büren an der Aare 1:2 (0:1)

Zrugg zum Match gäge Diessbach/Dotzigen. Aafo tüe mer mit ere kurlige Randnotiz. Üse "Vofi", dr Co-Trainer und Coach Patrick von Felten, hät by Diessbach/Dotzigen no chönne i d'Hose styge, sy Spielerpass isch nämlich no by Diessbach/Dotzigen. Übrigens, wenn dr Vofi im Training im Isatz gsehsch, muesch di scho chley wundere, warum dä Pass nid scho lang ds Büre isch. Wändig, sprützig, witzig und no zwäg wie früsch ab dr Konfirmation. Vofi – dr Transfer isch überfäuig! Merci.

Dr erscht Teil vo dr Finalissima respektive dr Zwängerei hat Büre mit 1:2 gwunne. Dr Fabian Schuler hat bereits ir 7. Minute für d'Füehrig gsorget und so bim zauryche Aahang vo Büre ds Närveflattere vorübergehend chönne ydämme. E berächtigte Penauti, 68. Minute, het dr Gaschtgäber wieder lo hoffe. Aber ihne isch nid viu glunge. Ir Defensive aafäuig und im Sturm mit zweni Säubschtvertroue am Wärch, het em FCB i d'Charte gspiut. Für e FCB wär's müglech gsy, meh drus z'mache und vorzytig d'Entscheidig z'bewärchstellige. Ds zwöite Gou vom Luc Gutbub ir 76. Minute het du schlussändlech glängt, dä so wichtig Sieg hei z'bringe.

By Büre hei gfäut: Dario Leisi (Verletzt), Nick Eggenberger (Militär), Reto Grogg (Verletzt), Mischa Hofer (Ferien), Luca Lauper (Gesperrt), Diego Imperiali (Aufgebot anderes Team), Eric Stauffer (Verletzt).

Die insgesamt 11 gäube Charte belege, dass dä Match ke Läckerbisse isch gsy. Kampfbetont, mängisch am Rand vo dr Legalität, aber doch fair, wie sech das unger Nachbare ghört. Unger dene 11 Charte hets leider ou dr Men Meier verwütscht. Är isch gäge Madretsch gsperrt, drfür isch dr Luca Lauper wieder by de Lüt.

Aurore die Königsmacher?

Ig muess glych no es Müschterli vo dere Zwängerei vorbringe. By Aurore isch d'Mannschaft ir Gruppe vo Büre gsicheret gsy (no drü Spiu zum nochehole). Ihres Zwöi, äbefaus ir 3. Liga (zwöi Spiu zum nochehole) hät sich bi optimalem Verlouf no chönne rette. Auso geit die Mannschaft vor Büregruppe für die Gfährdete go schutte und verlüüre. Aurore b (die Gfährdete) schutte gäge Rüti und verlüüre äbefaus 6:0. Jitz chunnt dr Irrsinn, Aurore a (ir Gruppe vo Büre) gwinne im ne wytere Nachhouspiu 11:1 gäge Evilard (5. Platz). Frage, wele's Team schickt jitz Aurore im letzte Spiu gäge z'mitgfährdete Aegerten? Die liebe (schlächte) oder die böse (guete) Buebe?

  • Gwinnt Aurore gäge Aegerten und Büre gwinnt gäge Madretsch, gheit Aegerten abe.

  • Gwinnt Aegerten gäge Aurore und Büre gwinnt gäge Madretsch gheit Rüti abe.

  • Verlüürt Büre gäge Madretsch cha passiere was wott, Büre isch wäge de Strofpunkt dr Abstieger.

Die ganzi Sach mache mir mit dr Müglechkeit vo Unentschiede nid, das hört schüsch nie meh uf. Tatsach isch, dass Aurore mit ihr'ne Überlegige und Entschlüss dr Abstieger cha bestimme. E Riesesouerei, glych wär's a Gring breicht.

E Vorteil vo dr Situation vo Büre isch, dass üsi Mannschaft ds Schicksau i de eigete Häng het!

FC Grünstern – E verdiente Ufstieger!

Bi dere ganze Gschicht wei mir nid vergässe, dass dr Pascal Arni mit syne Grüenstärne suverän i die 2. Liga ufstiegt (keis Spiu verlore by zwöi Unentschiede). E logischi Foug und hochverdient. Mir us Büre fiire do ou es ganz chlyses Stückli mit. Härzleche Gratulation nach Ipsach und a erfougrich Trainer Pascal Arni und viu Glück uf die nöii Saison.

Mir wünsche üsem "Eis" viu Glück und piugere natürlech uf's Mühlefäud.



Hopp FCB!

Aktuelle Beiträge

Alle ansehen

Comments

Rated 0 out of 5 stars.
No ratings yet

Add a rating