FC Büren an der Aare – SV Port 5:2 (3:1)

Donnerstag, 18. September 2025, 20:15 Uhr, Giessacker Safnern, Meisterschaft 4. Liga

Text: Hans Peter "Budi" Gribi

Ufschtellig FCB

Tim Blatter, Marco Günther (70' David Vuilleumier), Manuel Bigler, Numa Marmier (55' Mario Bärtschi), Nick Eggenberger, Denis Schneider, Men Meier (80' Joel Tüscher), Fabian Schuler, Ruben Dos Santos, Yannic Kubacki (55' Noah Zambrano), Dario Leisi (85' Yannic Kubacki)

Ersatz

Aui Ersatzschpieler im Ysatz

Abwäsend

Silas Adam, Noe Fankhauser, Fabian Hänzi (Cupspiel mit seinen Junioren), Fabian Jenni, Daniel Marti, Joel Zambrano (Militär)

Verletzt

Alex Jorge Files, Joel Knörr, Luca Lauper

Staff

Patrick Meier (Trainer), Thomas Lerch (Assistenztrainer)

Gou

09' 1:0 Dario Leisi

21' 2:0 Yannic Kubacki

33' 3:0 Dario Leisi

44' 3:1

50' 3:2

70' 4:2 Noah Zambrano

75' 5:2 Ruben Dos Santos (Penalty)

Charte

25' Ruben Dos Santos (e völlig übertriebeni Charte)

56' Men Meier

Bemerkig

Schpiu wäge Ferieabwäseheit vorverschobe uf Safnern. Man möge mir verzeihen, ig cha dä Entscheid nid nochevouzieh. Ynahme futsch und jitz e 14 tägigi Pouse. Das hät ig jitz äuä söue für mi bhaute, aber mi cha nid gäng uf d'Schnurre hocke.

Erschti Haubzyt – e suuberi Leischtig

Nach dr Torfluet gäge FC Besa hey mir Äderige y dr Ufschtellig chönne feschtschteue. Dr so wichtig Maa im Mittufäud, Joel Zambrano, isch im Militär und het müesse adäquat ersetzt wärde. Dr Denis Schneider, schüsch ruhende Pol y dr Abwehr, isch füregrückt. Dr Fabian Hänzi het mit syne Juniore C Youth League es Cupschpiu in Rubigen mit 5:0 erfougrich chönne gschtaute, mir gratuliere, und isch fouglich ou nid uf em Bitz gschtange. Fäbu, tue de aube d'Muetter orientiere, nid dass sie chrampfhaft dr Sohnemann uf em Platz suecht. Dr Marco Günther het die Lücke gschtopft. Und zu guter Letzt isch dr Noe Fankhauser wäge Ferieabwäseheit ou nid zur Verfüegig gschtange, der Tim Blatter het übernoo.

Der FCB het e konzentrierte und wiuige Ydruck gmacht und ds Zepter übernoo. Dr quirlig Dario Leisi, är harmoniert y dr Schpitze mit em Yannic Kubacki hervorragend, het ir 8. Minute am unufmerksame und mit der Baukontroue beschäftigte Porter dr Bau abgläschelet und schiebt überleit y rächt Egge zur Füehrig y. Büre lot nid noo und isch beschträbt, die Sach früeh z'entscheide, schyteret aber vorlöufig no a dr Verteidigung vo Port. Die 20. Minute louft, dr Dario Leisi setzt sich uf dr lingge Syte gekonnt düre und schpiut dr Bau flach uf e Fuess vom Yannic Kubacki. Dä muesch im Momänt nid zwöi Mou bitte, überleit und wuchtig schiesst är zum 2:0 y. Churz drufabe het dr Schiri, es Loufwunder isch är nid gsy, e Bläckout. Für es Dutzendfoul zeigt är am verdutzte Ruben Dos Santos die gäubi Charte. Mir schtö y dr 31. Minute und scho wieder chachelets im gägnerische Gou. Dr Marco Günther louft a dr Usselinie und gseht, dass sich dr Yannic Kubacki freigloffe het, schpiut ne a und dr Kubi leitet dr Bau diräkt zum Dario Leisi wyter, und dr Dario macht churze Prozäss – 3:0. Jitz het scho jede dänkt, dä Matsch isch im Sack und hei d'Zügu lo schlyffe u prompt vor dr Pouse no d'Quittig übercho. Bim ne gägnerische Aagriff zögeret dr Tim Blatter bim Useloufe und chunnt schliesslech z'schpät, dr Gägner cha zum 3:1 verchürze.

Video von Stephan Kubacki

Zwöiti Haubzyt – Larifari rächt sech fasch

Die zwöiti Haubzyt isch us diverse Gründ nid ds Gäube vom Ei gsy. Umschtellige y dr Defensive, ds Usenangrysse vom erfougryche Duo Leisi/Kubacki und ds Noloo vo dr Konzentration bi etleche Schpieler, hey us em ne aafänglech guete Matsch es Knorz lo entschtoo. Das isch mi Ydruck, säubschtverständlech chame das ou angers gseh. Us dene Gründ isch d'Gschicht vor dr zwöite Häufti e Churzgschicht.

Y dr 49. Minute macht dr SV Port ds 3:2, Fähler uf Fähler hey d'Porter mehrmous wieder is Schpiu brocht und ou ermüglecht, dr Aaschlussträffer ds erziele. Ungloublech, dass me gäge e Durchschnittsmannschaft wie Port, nid cha es 3:0 verwaute, resp. d'Füehrig usboue. Y dr 55. Minute chunnt dr Noah Zambrano, wo ändleche ou is Gschehe ygryfft, für e agil und torgfährlech Yannic Kubacki und dr Mario Bärtschi ersetzt dr unermüedlech und schnäui Numa Marmier. No es Wort zum Numa. Wiuig, wiuiger, am wiuigtsche. Was am Numa no fäut, isch d'Präzision im Passschpiu und zur rächte Zyt dr Pass ou wöue z'schpiele. Wenn dä Giu das no verinnerlicht, de chunnts guet, villech sogar souguet, ig wünsche ihm das. Jitz chunnt e ganz wichtige Szene. Y dr 58. Minute rettet dr Tim Blatter mit Überzügig und mit er e grossartige Parade ds Unentschiede. Y däm Momänt isch ds Schpiu uf dr Gnepfi gschtange und mir wüsse nid wie die Gschicht z'änd gange wär, hät… (hät dr Hung nid gschysse, hät är dr Haas verwütscht).

Dr Räschte isch schnäu verzeut. Ds verchnorzte Schpiu het du glych no guet für e FCB gändet. Uf Pass vom Dario Leisi schiesst dr Noah Zambrano ds 4:2 (73') und dr Ruben Dos Santos verrumt e Penauty souverän zum 5:2.

Dario Leisi - Man of the Match (im Trainer-Lybli vom langjährige Sponsor SCHWAB-FELLER AG)

Fazit

Die besseri Mannschaft het schliesslech gwunne, aber souverän gseht anders us. Was söus? Drüü Punkt und dr Marsch a Tabäueschpitze cha am Samschtig gäge Etoile Biel sy Fortsetzig gfinge. Aber Giele, löt's de nid wieder lo schlyffe. Zieht nünzg Minute düre, ou wäge de tröie Zueschouer.

Nachtrag zum Schpiu gäge Besa - Pizzaplousch

Es het Pizza gä, wie ig ghört ha, feini Pizza. Dr Sandro Imperiali und d'Sandra Frank hey dä Ysatz unentgäutlech gleischtet und dr Gwinn us dere Aktion y d'FC-Kasse to. E grossartigi Aktion, wo me nid gnue cha verdanke. Merci viu Mou Sandro und Sandra. Me cha de das gärn mou wiederhole, ds Echo isch nämlech sehr positiv usgfaue.

Hopp FCB