FC Bözingen 34 - FCB 1:5 (1:1)
Aktualisiert: vor 21 Stunden
Samstag, 9. September 2026, 16:00 Uhr, Längfeld1 Biel
Meisterschaft 4. Liga
Text: Hans Peter "Budi" Gribi
Foto: Stephan Kubacki
Aufstellung FCB (4-2-3-1)
Tim Blatter, Noah Zambrano (59' Ruben Dos Santos), Fabian Hänzi (51' Nils Blatter), Denis Schneider (C), David Vuilleumier (77' Marco Günther), Men Meier, Joel Zambrano, Nick Eggenberger, Ledion Ramadani (81' Manuel Bigler), Manuel Bigler (77' Numa Marmier), Luca Lauper (46' Simao Lopes Magalhaes)
Ersatz
Noe Fankhauser
Verletzt
Silas Adam, Daniel Marti, Dario Leisi
Abwesend
Mario Bärtschi, Yannic Kubacki, Fabian Schuler
Aufgebot anderes Team
Rafael Azevedo Alves, Patrick Frieden, Nikola Jankovic, Fabian Suarez
Rekonvaleszent
Alex Files, Joel Knörr
Junioren B im erweiterten Kader
Jonas Beyeler, Alan Duflon, Neal Homberger, Robin Steiner
Staff
Manuel Scheidegger (Trainer), Carlos Manuel De Sousa Files (Assistenztrainer), Jarno Beyeler (Torhütertrainer), Reto Steiner (Masseur)
Tore
13' 0:1 Nick Eggenberger auf Pass von Denis Schneider
38' 1:1 Tor nach Fehlpass in der Verteidigung
46' 1:2 Ledion Ramadani nach Vorlage Nick Eggenberger
48' 1:3 Simao Lopes Magalhaes
56' 1:4 Simao Lopes Magalhaes
75' 1:5 Simao Lopes Magalhaes
Karten
30' Luca Lauper
49' Nils Blatter
81' Numa Marmier
Bemerkungen
Wunderschöner Herbsttag.
Durch Verletzung und Ferienabwesenheiten sah sich Manuel Scheidegger gezwungen, Retuschen in der Aufstellung gegenüber dem Spiel gegen Besa Biel vorzunehmen.
Der FCB liess sich durch Sticheleien und unfaire Tacklings des FC Bözingen 34 nicht aus dem Konzept bringen und schaukelte das Spiel schlussendlich souverän nach Hause. Die kluge Auswechslung eines besonders hitzigen Spielers durch den Trainer Bözingens verhinderte eine mögliche Eskalation.
Vorgeplänkel
We me sech a die Schpiu vo letschter Saison gäge FC Bözingen 34 erinnert, isch me scho chley mit em ne mulmige Gfüeu uf das Biu gfahre. Dr Gagg het scho chley useglüüslet. Giftig sy sie, die Bözinger, teils unfair und provozierend (uf Bärndütsch schyssdräckele), d'Gangart chame miud usdrückt, sauft aus robuscht bezeichne. Das isch nümme d'Schpiuart vom einscht so erfougryche Bözinge. Wär sich a die letschti Saison erinneret, weiss, dass uf em Lache ds Schpiu 2:1 usgange isch, d'Gou hey dr Fabian Schuler und dr Joel Zambrano gschosse, uswärts het me sech dr Schneid lo abchoufe und 3:0 verlore und dermit dr müglech Ufschtieg verchachelet.
Schnurz egau was gsy isch, hüt isch hüt und ds Trainergschpann und d'Schpieler hey lo gschpüre, dass me das Schpiu ganz angers wot aapacke und mit Disziplin und Loufarbeit ds Glück suecht.
Erschti Haubzyt
Dr FCB het ganz guet aagfange und derby versuecht, dr Bau lo z'loufe um so de Zwöikämpf us em Wäg z'go, was formidabel funktioniert het. Bereits y dr zwöite Minute bringt dr umsichtig und mannschaftsdienlech Joel Zambrano dr Ledion Ramadani y ne gueti Position. Dr Schuss us ussichtsrycher Position faut aber z'schwach us und d'Chance isch verby. Dr FCB drückt und toucht fasch im Minutetackt vor em gägnerische Gou uf. E Corner, perfid vor d'Chischte vo Bözinge zirklet, eröffnet e hundertprozäntigi Chance, aber ou die chame nid nütze. Aber dr Bau blybt im Schpiu, dr Nick Eggenberger drückt ab, dr abgfäuscht Schuss chlepft a d'Latte. Das sy mou ganz gueti sächsminütige Momänte gsy, wo Gluscht uf mee mache. Bim ne Gägeschtoss vo Bözinge, wo höch y Sächzähner gschpiut wird, rüeft dr Tim Blatter ufs Tapeet. "Joo!", pääggets übers Mühlifäud, und scho isch dä Cheib obe düre, es churzes Düreschnuufe und d'Chance isch verby. Das isch äbe de, we me fasch nüt z'tüe het und plötzlech gweckt wird. Nume zur Verfouschtändigung, dr Tim het sy Arbeitstag säubschtbewusst und bis uf dä Bock fählerfrei abgschpuelet. Zu de bereits erwähnte guete Chance vom FCB, verpasst dä Maa, wo schüsch ganz sicher weiss, wo ds Gou schteit, e hundertprozäntigi Chance. Uf es präzises Zueschpiu vom Manuel Bigler glingt am Luca Lauper d'Füehrig nid. Das wär ne gsy, dr Doseöffner, wie im Schpiu gäge Nidau.
Ds 0:1, es Lehrstück!
Es isch e Genieschtreich gsy, ds eis zu nuu. Us dr eigete Häufti gseht dr Denis Schneider, dass dr Nick Eggenberger uf dr rächte Syte frei schteit. E länge, höche Pass überrumplet die ganzi Verteidigung vo Bözinge, dr Nick Eggenberger nimmt dä Bau gekonnt a, louft ufs Gou und schiebt dr Bau näbem unkontrolliert usem Gou schtürmende Gooli flach y d'Masche. Schad, het me nächhär die Variante so nümme praktiziert.
Das Gou isch zwene Bözinger schreg ygfahre. Mit überhartem Yschtiege verdiene sich dr Fabian Liechti und dr Nico Kammermann die gäubi Charte. Y dr 24. Minute chunnt ernöit dr schpiu- und louffröidig Ledion Ramadani zur e guete Chance. Dr Schuss cha dr Gooli pariere, reschpektive dr Ledion schiesst ihn a. Zää Minute schpöter füehrt e fasch identischi Szene ou nid zum ne längscht fäuige 0:2. Mi überchunnt fasch chley dr Ydruck, dass nume Büre gschuttet het. Es tüscht nid, dr FCB het ds Schpiu gmacht, aber us viu guete Momänte d'Chance zum Usbou vo dr Füehrig nid packt. Villech wär e Wytschuss bi däm Gooli es guets Rezäpt gsy, oder über d'Syte vom Nick Eggenberger, wo är mit sim Gägeschpieler loufend Chatz und Muus gschpiut het. Mittlerwyle sy mir y dr 37. Minute aacho. E Freischtoos eröffnet am FCB eine vo unzählige Chance, aber ou do, wott's eifach nid klappe. Es isch bezeichnend, dass Bözinge praktisch im Gägeschtoss dr Usglych macht. Dä blöd Schpruch: "Wär se nid macht, überchunnt se", het sich wieder einisch bewahrheitet.
Zwöiti Haubzyt - dr FCB mit schpielerische Mittu zum Erfoug
Wär y dr Nöchi vo dr erschte Mannschaft ir Pouse gschtange isch, het mitübercho, dass dr Manuel Scheidegger nid nume e liebe Cheib und e guete Trainer isch. Nei, dä cha richtig giftig wärde und mit Überzügig und Nachdruck artikuliere, was Sach isch und wie me mit dene und dene Situatione umzgo het. Und wichtig isch, dass er druf ufmerksam gmacht het, dass das "üses Schpiu" isch und mir üs nid lö lo provoziere. Mann, het das gfruchtet. D'Schpiu het sich drufabe sehr zum Positive entwicklet.
Dr Luca Lauper, syt dr 30. Minute mit gäub belaschtet und im Schpiu hüt nid so aacho, wie das normalerwys dr Fau isch, macht Platz für e Simao Lopes. Schüsch wärde vo dr Schpielerbank här, keni wytere Retusche vorgno.
Eis vorewäg. Es isch e zwöiti Haubzyt worde, wo me schpielerische Läckerbisse serviert het übercho. Dr Bau isch glüffe, ds Kollektiv het figureetlet. Me isch fasch versuecht z'säge, Fuessbau wie us em Biuderbüechli.
Es isch nid lang gange, het die Pousepredig Frücht treit. Uf Vorlag vom Nick Eggenberg cha dr Ledion Ramadani d'Ornig wieder härschteue. Es isch du nächhär fasch Schlag uf Schlag gange. Mit viu Druck und schpielerische Mittu het dr FCB d'Gangart uf em Platz beschtimmt und plötzlech het me d'Chance packt.
Dr Simao Lopes krönt sy Leischtig mit em ne klassische Hattrick
Es fouge 27 Minute ganz im Zeiche vom Simao Lopes. Y dr 48. Minute isch är für 1:3 besorgt gsy. Y dr 56. Minute het är nochedopplet und y dr 75. Minute mit em ne klassisch Hattrick zum 1:5 dr Sack ändüutig zue gmacht. Schappoo!
Y de bishär gschpiute 5 Schpiu y dr Meischterschaft isch ufgfaue, dass ds Trainergschpann 18 Maa mitnimmt und aui Fäudschpieler ds Vertroue lgschänkt und zum Zug chöme. Es isch ou in Bözinge so gsy und uf d'Schpiuwys hey die Wächsle ke negative Yfluss gha.
Trotz krasser Überlägeheit bis am Schluss und wie erwähnt, schöne Schpiuzüg und Kabinettstückli, isch es zu keine Gou me cho.
Es Wort zum Johrgang 2010
Wie sich dr Simao Lopes und dr Ledion Ramadani vo B-Schpieler zu fixe Grösse im Eis entwicklet hey, isch schlicht phänomenal. Mit Johrgang 2010 schtö die zwe Jungs fuessbauerisch und physisch uf beidne Bei. Mannschaftsdienlech, kämpferisch und technisch chöi sie überzüge und sy im Eis dä Farbtupfer. Do wärde mir y Zuekunft no viu Fröid ha. Und ds Beschte draa, es het no mee söttigi Talänt, wo süüferli is Eis integriert und schpöter Schtammschpieler wärde. Freude herrscht!
Fazit
Das Schpiu het ei Maku gha. Mit em ne drüü oder vier zu nuu hät dr FCB zur Pouse müesse füehre. Chance zuhauf sy ungnützt blybe. Gäge e schterchere Gägner chönnt d'Chanceverwärtig zum entscheidende Faktor wärde. Die sackstarchi zwöiti Haubzyt het dä Mangu aber lo vergässe.
Wuchenänd für Wuchenänd sackschtarch üse Migu
Ig tue nid gärn einzelni Schpieler usehäbe, maches aber hüt glych, wüu ig dr Meinig bi, dass dr Joel Zambrano ufgrund vo dr Leischtigsschterchi und de schpielerische Mittu es Erwähne verdient het. Unuffäuig und unufgregt zieht är mit viu Loufarbeit d'Fäde im Mittufäud, git Impuuse gäge füüre und rackeret gäge hinge. Är verlüürt chum e Zwöikämpf und überzügt mit ere höche Passquote. A syr Syte isch dr Men Meier harzig is Schpiu cho, het sich aber enorm gschteigeret, sys Potenzial vou usgschpiut und a super Matsch gschuttet.
Aber gwunne het schliesslech ds Kollektiv, wo jede Schpieler sy Teil zur guete Mannschaftsleischtig bytreit het. Fortschritte sy sichtbar, mir sy gschpannt, wie die Reis wytergeit. Härzlechi Gratulation und GOOD LUCK Jungs.
Hopp FCB!
Nächste Woche
geht es schon wieder nach Biel, genau genommen ins Mühlefeld.
Samstag, 19.09.2026, 16:00 Uhr, FC Etoile Biel - FCB, Mühlefeld Biel
Hopp FCB!
Kommentare