FC Besa Biel - FCB 2:5 (2:3)

Samstag, 2. Mai 2026, 20:00 Uhr, Längfeld 2 Biel

Meisterschaft 4. Liga

Text: Hans Peter "Budi" Gribi

Foto: Stephan Kubacki (kommen später)

Aufstellung FCB

Tim Blatter, Silas Adam, Ruben Dos Santos, Denis Schneider, Marco Günther, Men Meier, Rafael José Azevedo Alves, Joel Miguel Zambrano, Fabian Schuler, Nick Eggenberger, Yannic Kubacki

Ersatz

Nevio Eggli (kein Einsatz), Dario Leisi, Numa Marmier, Daniel Marti (die Wechsel sind mir leider nicht bekannt)

Abwesend

Manuel Bigler, Noe Fankhauser, Fabian Hänzi, David Vuilleumier

Verletzt

Mario Bärtschi, Alex Jorge Files, Joel Knörr, Luca Lauper, Simao Lopes, Joel Tüscher, Noah Raul Zambrano

Allen Verletzten gute und schnelle Genesung.

Staff

Patrick Meier (Trainer), Gianluigi Maffeo (Assistenztrainer)

Tore

06' 0:1 Fabian Schuler

08' 1:1 Denis Schneider Eigentor

20' 2:1 Shaban Shabani

43' 2:2 Fabian Schuler

45' 2:3 Nick Eggenberger

74' 2:4 Fabian Schuler

88' 2:5 Dario Leisi

Karten

84' Joel Miguel Zambrano (4. gelbe Karte und somit gegen Etoile gesperrt)

Ds Fazit

Nä mir ds Fazit mou a Aafang. Es isch nüt Erbouends gsy und ds Schpiu isch bis zum 2:4 y dr 74. Minute uf dr Gnepfi gschtange. Notabene gäge es Team, wo gäge Täuffelen e 14:3 Packig kassiert het und gsamthaft y 17 Schpiu 92 Gou het müesse ystecke. Mir hey im Brichtli gäge FC Bözingen erwähnt, dass dr FCB, us was für Gründ ou immer, ds schpielerische Elemänt lot lo vermisse und us de Chance viu zweni macht. Die Umschtänd chönnte de im Räschtprogramm (u.a. FC Lengnau deheime und FC United Hermrigen-Jens uswärts) im Ufschtiegsrenne entscheidendi Faktore sy. Mi chunnt ou nid drumume z'erwähne, dass me es Team wie Besa vo A-Z muess dominiere und ds Schpiu vorzytig y die rächte Bahne länkt, schprich nid bis füfzaä Minute vor Schluss no dr Chnöischlotter muess bekämpfe. Was mi aber de glych wieder positiv schtimmt isch, dass me gägenüber em Schpiu in Bözingen versuecht het hingeruse z'schpiele, ou wenn drus zwe, drei haarschtröubendi Situatione entschtande sy. Item gwunne isch gwunne, morn frogt niemer me dernoo. Näme mir die Punkt und warte gschpannt, wies wyter geit.

Dr Match

Bereits y dr erschte Minute verpasst dr Yannic Kuback ds 0:1 und dr Nachschuss vom Fabian Schuler geit höch über ds Gou is Chrut use. Praktisch im Gägezug lot dr FC Besa nach em ne Baugwinn im Mittufäude e Hochkaräter us. Y dr sächste Minute schiesst dr Fabian Schuler nach em ne katastrophale Abwehrfähler ds 0:1. D'Fröid währt aber nid lang. E verheerende Fäupass us em Sächzähner vo Büre bringt Besa y Baubsitz, dr scharf Pass uf e Füüfer länkt dr Denis Schneider bim Abwehrversuech is eigete Gou. Es isch wieder am FCB, e Pass vom Rafael Azevedo bringt dr Fabian Schuler y erfougverschprächendi Position, aber dr Fäbu verzieht. Die 14. Minute bringt wieder dr FCB y Not. E Bauverluscht im Mittufäud füehrt zur e Chance für Besa. Dr Nick Eggenberger cha y letschter Sekunde d'Gfahr entschärfe. Füüf Minute schpöter muess dr Ruben erfougrych es müglechs Gou bereinige. Dür ne wytere, vermiedbare Fähler im Mittufäud, dr Bau chläbt eifach z'lang am Fuess, trifft Besa zur überraschende Füehrig.

Das isch ds Hin und Här y de erschte 20 Minute, wo dr FCB ke klari Linie zeigt und sich dür Foopas immer wieder säuber y Not bringt Was isch nume mit em FCB los? Wo blybt d'Schpiufröid, wo blybt ds gägesytige aaschporne und ds hiufryche Kommuniziere uf em Platz? So chunnt dr FCB nid zum Chnorze use und muess Angscht ha, sich z'blamiere. Dem Himmel sei dank! Es isch du doch no angers cho. Dr Fabian Schuler und dr Nick Eggenberger chöi vor dr Pouse ds Schpiu no chehre und für die zwöiti Haubzyt d'Hoffnig unger em Bürenaahang wieder wecke.

Ds Schpiu isch ir zwöite Haubzyt nid besser worde und dr 2:3 Vorschprung vo Büre isch no lang nid y trochne Tüecher gläge. Besa het sich nid wöue gschlage gä und het für die eint oder angeri gueti Szene und entschprächender Gougfahr gsorget. Ändlech, y dr 74. Minute het dr Fabian Schuler mit em 2:4 für klari Verhäutnis gsorget und y dr 88. Minute entscheidet dr wieder gsund Dario Leisi ds Schpiu ändgüutigi für e FCB.

Nöchscht Samschtig isch dr Letschtplatziert FC Etoile Biel in Büre z'Gascht. Aaschpiuzyt wie gäng 16:00h. Bi der Glägeheit wünsche mir üs, dass dr FCB sys wahre Gsycht zeigt und dominant dä Match heybringt. Ds Potenziau isch unzwyfuhaft vorhande, wecke was do töif unge schlummeret und üs wieder begeischtere. Merci viu mou fang zum voruus!

Hopp FCB