top of page

FC Aurore Bienne a – FCB 1:2 (1:0)

Meisterschaft - 3. Liga / Gruppe 6 - 08.09.2019 10:00 - Tilleul-Linde, - Hauptplatz


D'Ufschtellig vom FCB:

Simon Käser, Eric Stauffer, Ruben Lopes Dos Santos, David Schläfli, Manuel Scheidegger, Reto Rüttimann, Thomas Lerch (C), Yannik Tüscher (75. Nick Eggenberger), Men Meier (70. Dario Leisi), Fabian Schuler, Yannic Kubacki (82. Joel Tüscher)


Ohni Isatz: Mikael Stauffer, Mischa Hofer, Lars Freiburghaus, Raphael Schuler


Nid derby:

Diego Imperiali (Einsatz im Zwöi), Reto Grogg (Militär, aber ou awäsend), Marco Günther (Militär und e 35er i de Chnoche), Luca Lauper (medizinischi Pouse), Denis Schneider (verletzt ou awäsend), Luc Gutbub (no nid qualifiziert)


Gou:

5. 0:1 Didier Astudillo Arguello, 81. 1:1 Fabian Schuler, 90.+1 1:2 Manuel Scheidegger


Bemerkige:

5. gäubi Charte Manuel Scheidegger (heftiges Geschtikuliere u Ifrogschteue vom schlächte Schiri), 30. gäubi Charte Patrick Tüscher (heftiges Reklamiere), 55. gäubroti charte Patrick Tüscher (widerhouts und ungebührleches Drangsaliere vo nere arme Wärbetafele), 80. gäubi Charte Yannic Kubacki für Nocheschtüpfe, 86. gäubi Charte David Schläfli (Usbüchse aus Früschvermäute vo Huus u Herd). Uhh das wird e tüüre Sunntigmorge u bi de Schtrofpünkt rütsche mer ou obsi!

Vo Syte vo Aurore hets i dr 82. und 83. Minute jewiils die gäubroti Charte gäh.


Das cheibe Vorgeplänku isch jo fasch länger aus dr Matschbricht säuber.


Ändlech die erwarteti Trotzreaktion

Ändlech isch im vierte Schpiu dr Chnote platzt und dr FCB isch aus verdiente Sieger vom Platz. Es het aber wider einisch viu Närve, Geduud u d'Nachschpiuzyt brucht, bis es so wyt isch gsi. Ganz e kurligi Dramaturgie i däm schicksausträchtige Schpiu het dr Maa i Schwarz orcheschtriert. Im Verlouf vom Schpiubricht flächte mer de das no i.


E erschti Haubzyt ohni e Torschuss vom FCB

Es het a däm chaute u mängisch chlei nieselnde Sunntigmorge dänkbar schlächt agfange. E Agriff vo Aurore rout gäge ds Gou vom FCB. D'Flangge wird haubhöch uf Sächzähnergränze gschlage, wo dr Simon Käser im Schtiu vo nere Schnappschiudchröte igrieft. Dr Schiri het sis Pfyffli aber öppe glich schnäu im Muu u git Freischtoss für Aurore. D'Bei si wou innerhaub vo dr Linie gschtange, g'fasset het är aber klar usserhaub, drum dä Pfiff, dr Freischtoss, bereits z'erschte Gou und d'Schockstarri vo de zauriich ufmarschierte Bürer. Das kann ja heiter werden, Erinnerige a ds Schpiu gäge Azzurri si wach worde. Aber ke Angscht. Trotz däm misslungene Schtart het sich Büre ganz angers präsentiert aus ds Wuchenänd vorhär. Mi het kämpft, g'fäitet, isch nach Bauverlüscht hingenoche u i schier ussichtsloser Lag no gschpurtet. D'Mannschaft het es ganz angers Gsicht zeigt, aus bi der 1:5 Schmach.



Trotzdäm, Aurore het liechti Vorteile gha, het kompromisslos und erfougrich d'Agriffsbemüehige vo Büre ungerbunge. Mängisch zu ruschtikal, het me doch dr eint oder anger Euboge ir Nöchi vo Nasebei u Ouge gseh. Das het dr Schiri nid wöue gseh, gseh het är aber hert u fair gfüerti Zwöikämpf vo de Bürer u entschprächend sim musikalische Palmares es paar wyteri fautschi Tön bigfüegt. Das het bi de Bürer hie u do für roti Chöpf gsorgt u z'eint oder angere böse Wort vo dr Zunge glöst. Angscht isch ufcho, öb das Schpiu so einigermasse pflegt und aschtändig über d'Rundi brocht wird.


Trotz dr liechte Überlägeheit vo Aurore isch me ruhig blibe, isch konzentriert u mannschaftlich gschlosse as Wärch u het d'Chance gsuecht. D' Verteidigung vo Aurore z'knacke het sich aber aus fasch unlösbar erwiese. So het mes nid gschafft, ir erschte Haubzyt e aschtändig Schuss ufs Gou z'bringe. Uf dr Gägesyte het dr Simon Käser i glänzender Form ufschpielend, derfür gsorget, dass me nid no meh i ds Hinterträffe cho isch. Mir schriebe die 30. Minute, es isch zum Haaröuseiche was dä Maa im schwarze Gwändli für Tön vo sech git. Säubschtverständlech tuesch di aus Träner chlei enerviere u chunsch i Wallige, wenn's nid korräkt isch. Säubschtverständlech isch aber nid, wenn aus Maa a dr Linie für das Gäub gsehsch. Wie mir igangs gläse hei, het das de no Konsequänze.


Taktischi Meischterleischtig

So isch e erschti Haubzy ohni wyteri Gou z'Änd gange. Näbscht däm, dass die gschtangne Manne vo Büre (ig rede vo Lerch, Scheidegger u Rüttimann) wie gwohnt e super Leischtig zeigt hei, müesse mir ou mou die junge Wiude rüehme. Ir Defensive wie gwohnt dr Eric Stauffer u dr Ruben Lopes Dos Santos engaschiert u zwöikampf- und chopfbaustarch. D'Nomination vom David Schläfli het chlei überrascht (nid wägem Chönne sondern wäge de Hürotsabwäseheite) isch aber e klevere Schachzug gsi. Im Mittufäud het dr Yannik Tüscher mit sim Wiue u dr Technik wärtvoui Akzänte gsetzt. Dr Men Meier, do cha ig nume dr Huet zieh, so wie dä gschpiut het wird är zur feschte Grössi, gratuliere zur Topleischtig. Im Schturm hei dr Yannic Kubacki und dr Fabian Schuler g'rackeret, si gringsvorah i Zwöikämpf un hei so mänge Gägeagriff im Keim erstickt. Ou do zieh mir dr Huet u si sehr amüsiert.


Jitz heisst's sech z'regeneriere, am Patrick Tüscher empfähle mir e Chloschterfrou Melissegeischt u für üs Zueschouer drücke mer dr Dume, dass hüt dr FCB mou belohnt wird.


E zwöiti Haubzyt im Schtiu vom ne Psüchosriller

Es het ke Grund gäh, ar Ufschtellig Retusche azbringe. Die zeigti Leischtig het gschtumme und het für e wyter Verlouf vom Matsch zueversichtlich gschtimmt. Fokussiert u mannschaftlech gschlosse, so isch üses Team i die zwöiti Haubzyt gschtiege. Sie hei unmissverschtändlech zum Usdruck brocht, dass es uf dr Linde nume ei Sieger cha gäh – dr FCB. D'Schpiualag isch e komplett angeri gsi aus gäge Azzurri. Nüt vo länge höche Bäu, wo chum chasch verarbeite u meischtens vo dr Defensive abgläse wird u zum Gägeagriff füehre. Flach dr Linie noh i Louf schpiele, oder e schöni Schpiuverlagerig uf üsi schnäue Lüt, dass si d'Rezäpt gsi. U si hei gfruchtet. Büre het das Schpiu i d'Hang gno, het aber müesse ufpasse wie ne Häftlimacher, dass sie nid öppe i ne Konter zur Schpiuentscheidig inelauere. Aber das hei si im Griff gha.


Dr Träner dä us em Busch funkt

Mir si ir 55. Minute acho, wo e zwifuhafti Entscheidig näbem Platz zu Reaktione füehrt. Jitz chunnt dr gross Uftritt vom Maestro. Dr Patrick Tüscher het nid mit dr Wimpere zuckt (liechti Übertriebig) het aber dr nöchschte Wärbebande e Bolide gsawattet. Wie ne gschtochni Geiss spurtet dr Schiri zum Träner u schickt ne unger Dusche. So haub i de Büsch uf em ne Bänkli het är das Schpiu mit Schperberöigli verfougt u schpöter sogar pär Händi mit dem Patrick Von Felten Kontakt ufgnoh. Huere amüsant! Zrugg zum Matsch.



E Prömiere und die Junge überzüge

Es isch e intensive und interessante Matsch worde. Jitz het ou Büre sini Chance, z'Visier isch aber no chlei tschärpis igschteut gsi. Was i de erschte drü Schpiu sech aus Schwechi usegschteut het, nähmlech z'Gou schiesse, isch ou hüt nid in Hülle und Fülle verbesseret worde, aber Azeiche zur Normalität si durchus z'erkenne gsi. Mir hei scho erwähnt, dass Aurore uf Konter nid ungfährlech isch, aber üse Simon Käser het i zwe Situazione mit emene Superreflex Büre im Schpiu bhaute. Ir 70. Minute macht dr Men Meier, zurächt mit em ne Applous belohnt, am Dario Leisi (Johrgang 2002 und es Eigegwächs) Platz. Füf Minute schpöter chunnt dr Nick Eggenberger für e Yannik Tüscher, ou är völlig verdient mit Applous ideckt. Es isch scho erschtunlech, do wird i der Schpiukonschtellation eine mit Johrgang 2001 und eine mit 2002 igwächslet, u du schteusch ke Ungerschied fescht. Es Riesekomplimänt a d'Linie für dä Muet und äbeso a die zwe Giele, wo sich nahtlos igfüegt u Akzänte gsetzt hei.


Verruckti 10 Minute

So jitz wird’s chlei Psücho, Turbulänze gliche am ne Würbuschturm. Zersch macht dr Fabian Schuler mit em ne überleite Lüpfer übere gfüeut Zwöimetergoli z'höchscht verdiente 1:1 (81. Minute). E Minute schpöter gseht dr Vincent Ekoman die gäubroti Charte und dr Joel Tüscher wird für e Yannic Kubacki igwächslet, wo es grossartigs Schpiu het bote. E wyteri Minute schpöter flügt dr völlig verdutzt Julien Giordano vom Platz. Dür e Druck vo üsne Manne hei nümme aui Schpieler vo Aurore kuul chönne umgoh. Jitz toucht Büre im Minutetakt vor dr Chischte uf. Es muess doch no länge, es wär längscht verdient, mi cha nümme schtiu a dr Schtange schtoh, simultan macht me Schussbewegige mit und isch Füür u Flamme, d'Luft um z'Bürebänkli ume knischteret. Söu me jitz no aues riskiere für z'gwinne oder si mir mit däm Punkt z'friede. D'Schpieler näh üs dä Entscheid ab, sie wei dä Sieg. Mittlerwyle isch dr Zeiger vo dr Matschuhr scho uf die 90. Minute gumpet. Mir müesse üs äuä mit däm Punkt – super – die Agriffsuslösig vom Thomas Lerch i Louf vom Joel Tüscher u dä gseht dr Manuel Scheidegger uf dr änere Syte, läck mir dä Sytewächsu isch Wäutklass, oohhh was macht dr Manuel Scheidegger, loht e Gägner lo usschtige u – Gouuuu, tschou zäme. Geniau gmacht, tüpisch Mänu, furztroche i läng Egge versteckt. Härzschlagfinale! U dr Räschte? Dr Räschte schpiut Büre kuul u rutiniert z'Änd u belohnt sich mit de erschte drü Punkt. Jitz si ou mir acho ir dritte Liga.


Längi Pouse

Jitz wos louft, chunnt wider e vierzähtägigi Pouse. U die nöchschti Aktivität für üses "Eis"isch ds Derby gäge Rüti am Samschtig, 28. Septämber uf em Lache. Apfiff isch 16.00.


Üsi Junge … und üsi "Aute"

Es isch e Fröid, öich Junge zuzluege. Wenn unger dr Rubrik "Nid derby" luegsch, wär aues Renomierts gfäut het, chasch uf die hütigi Leischtig schtouz si. Und dr Konkurränzkampf im Eis wird gäng brisanter. Nöchscht Wuche isch dr Luc Gutbub (Johrgang 2000) schpiuberächtigt. Wenn dä Giu bim Träning beobachtet hesch, isch dr Kinnlade verreiset, hesch se operativ müesse lo fixiere.


Ds Schpiu vo hüt het aber ou zeigt, wie wichtig e Thomi Lerch, e Reto Rüttimann und e Mänu Scheidegger für das Team si. Es isch es grosses Glück, schteue si ihri eigete Bedürfnis zrugg und i Dienscht vo dere Mannschaft.


Ig zieh aber ou dr Huet für e Mischa Hofer (är Macht e Schueu u cha nume no einisch träniere), für e Lars Freiburghaus und für e Raphael Schuler. Sie si hüt nid zum Isatz cho, hei aber mit de Kollege uf Platz mitgfieberet und se unterstützt. Die ganzi Situazion isch haut ou chlei am Schpiuverlouf gschuedet. Das si Supersportslüt, ihri Zyt chunnt. Bravo, wir verbeugen uns!



Nume im Team isch me starch!


Hopp FCB

Aktuelle Beiträge

Alle ansehen