top of page

FC Aurore Bienne a - FCB 1:0 (0:0)

Aktualisiert: 24. Dez. 2022

Sportplatz Tilleul-Linde Biel, Sonntag, 6. September 2020, 10:00 Uhr

Meisterschaft 3. Liga, Gruppe 6


Ufstellig:

Stauffer Mikael, Gutbub Luc, Schneider Denis, Schläfli David, Dos Santos Ruben, Lerch Thomas (C), Meier Men (81' Eggenberger Nick) Kubacki Yannic (65' Tüscher Joel), Schuler Fabian, Rüttimann Reto, Lauper Luca (69' Leisi Dario)


Ersatz: Günther Marco, Hofer Mischa, Sutter Michael (Ersatzgoalie)


Trainer: Rüttimann Reto, Von Felten Patrick


Nid im Ufgebot:

Bigler Manuel (2. Mannschaft), Grogg Reto (Ausbildung), Imperiali Diego (2.), Käser Simon (verletzt), Scheidegger Manuel (Familie), Stauffer Eric (2.)


Gou: 64' 1:0 Joris Medici


Charte:

42' Luca Lauper (gelb)

56' Fabian Schuler (rot)

64' Reto Rüttimann (gelb)

67' Denis Schneider (gelb)


Bemerkige: Spiu findet uf em Kunstraseplatz statt.


E Sunntigmorge zum vergässe!

Ig gibes gärn zue, mini Gfüu bir Heifahrt si no zungerobe gsi u d'Wuet uf dä Bschiss vor Linde jitz bim Schriebe no i jedem Egge vo mim düregschüttlete Dänkapparat z'gspüre. Ig wirde sogar derzue verleitet lut "Skandau" z'päägge, aber Pünkt bringt's üs nümme u dr Schiri wird äuä trotzdäm dr Schlof der Gerechten schlofe und eventuell no es süffisants Lächle uf de Lippe ha, ab sim Husarestück.


D'Istellig het gstumme, die taktischi Uslegi äbefaus

Der FCB het de Zuschouer uf dr Linde vo Afang a zeigt, dass sie wüsse um was das es geit und d'Marschroute vo de Trainer eis zu eis umgsetzt. Ir Defensive isch me guet gstange, het rächtzytig gschobe und bi Gägeagriffe ufgrückt. Mit däm Rezäpt het Aurore Mühe gha und isch gäng wieder blybe hange. Bis zur ominöse 56. Minute hets usgseh, aus das die Taktik verhet und das am Schluss e Punkteteilig ohni Gou chönnt ds Resultat sy.


Es Wort zum Gägner

Es paar Spieler vo Aurore chönnte problemlos uf ere zwöite Bühni für Furore sorge - d'Schouspielerei. Was i 90 Minute a Schouspielerei und Theatralik by Fouls botte worde isch, geit uf ke Chuehut ufe. Dr einzig uf em ganze Platz wo däm Triebe öppis guets het chönne abgwinne, wär a däm Morge gschieder deheim im Näscht blibe.



E erschti Haubzyt mit aune Facette wo dr Fuessbau cha biete

Es isch e rassigi erschti Haubzyt gsi. Athletisch, schnäu und prägt vo Zwöikämpf, mi cha scho säge, e Abnützigskampf. Aus einzige Wermuetstropfe si die fählende Torszene z'beduure gsi. So het Aurore i 45 Minute üse Miggu nid einisch ärnschhaft prüeft. Uf dr Gägesyte het me de aber klari Torchance usgmacht aber nid chönne reüssiere.


Bereits ir erschte Minute probierts dr Luca Lauper mit em ne satte Schuss näbe ds Gou. I dr 12. Minute chunnt Aurore zum Zug, e Schuss vo dr Nummer nün verfäut ds Ziiu aber klar. Churz druf abe überchunnt dr Luca Lauper Platz, är facklet nid lang und schliesst ab, dr Goalie pariert. Paar Minute spöter wird dr Reto Rüttimann vom Yannic Kubacki bedient, aber dr Schuss isch zweni präzis. Es paar Wimpereschläg später schiesst dr Yannic Kubacki näbe ds Gou. Jitz chame scho uf ne liechte Vorteil für Büre plädiere. Einersyts het me meh Baubsitz und toucht ou vermehrt vor em gägnerische Gou uf. Zäuhbars isch aber nid uszmache, wüu i Sache Präzision no einigi Wünsch offe blybe. Ds Spiu isch hert umkämpft und es chunnt vermehrt ou zu Foul im Gränzberich, woby dr Schiri mit Aurore rächt fougsam umgeit und tunlichst ufs Zücke vore gäube Charte verzichtet (Nr. 21 vo Aurore, är hät spöter nach em ne wytere grobe Foul vom Platz ghört). Ds Spiu, nach wie vor mit ere höche Intensität, läbt jitz zum grosse Teil vo länge Bäu i d'Spitze. Für die verteidigendi Mannschaft es liechts Unterfange d'Absichte z'unterbinde. Freistöss uf beidne Syte bringe weni Gfahr. Churz vor dr Pouse chunnt dr Luca Lauper es Schrittli z'spät und hout si Gägespieler vo de Socke. Die logischi Foug, e gäubi Charte.


No es Wort zur e Absänz, wo hüt chlei isch z'gspüre gsi. Dermit söu ke Leischtig vom ne andere Spieler kritisiert wärde, wüu jede sys Beschte gäh het und kene abgfaue isch. Äbe zur Absänz, uf em lingge Usebegg het dr Manuel Scheidegger wäg em ne wichtige Alass gfäut. Si offensivi Uslegig, wie übrigens ou dr Luc Gutbub uf dr angere Syte, het me hüt vermisst. Z'Überraschende ir Agriffsuslösig hät i däm viu umkämpfte Spiu es beläbends Elemänt chönne sy. Vor dr Pouse isch nüt me Ufregends passiert, aber kei Angscht, das chunnt zum Leidwäse vo üs Bürer no früeh gnue.


Zwöiti Haubzyt – e Houptdarsteuer kippet ds Spiu!

Nämers vorwäg, dass mir nächhär das leide Kapitu chöi abschliesse. Was sich dr Schiedsrichter ir zwöite Haubzy gleischtet het, het ds Spiu us de Fuege grisse, het us em ne unterhautsame Match, mit zuegäh mängisch chlei viu Herti, es Hickhack mit Ghässigkeite und unfaire Tacklings lo wärde. Und – und das isch ds Schlimme do dra – het dr FCB derby d'Arschcharte zoge.


Nach em Pousetee het Aurore drü früschi Chräft brocht und dr Druck erhöht. Zwe Abschlüss innert 3 Minute verfähle ds Gou vo Büre aber knapp. Im Gägezug cha Büre us ere guete Position ke Nutze zieh. Es paar herti Foul uf beide Syte bringe Unrueh is Spiu, und uf de Spielerbänk wirds hektisch und lüter. I der Situation verpasst dr Schiedsrichter, ds Spiu wieder i d'Häng z'näh. So isch nid verwunderlich, dass vo jitz a ds Spiu a Attraktivität verlürt. Mir schriebe die 56. Minute. E Iwurf vo Büre uf Sächzähnerhöchi bi Aurore landet i de Bei vom ne Gägner. Dr Fabian Schuler wott sich dä Bau zrugghohle u breicht si Gägner vou am Schirmbei. Dass dr Schiedsrichter i der Situation die roti Charte zieht, isch uf ke Art und Wys nachvouziehbar, ou i Hinsicht uf die usteilte Fouls im Verlouf vom Spiu. Ds Konzept vo Büre, bis jitz vou ufgange, droht mi eim Maa weniger z'schietere. Ab der herte Strof verlürt Büre im Momänt chlei dr Fade und Aurore glingt d'Füehrig zum 1:0. Wär jitz dänkt het, dass nach dr Dezimierig und em Gou dr Match verby isch, het sich tüscht. Mit 10 Maa het sich dr FCB ufböumt und gäge die drohendi Niederlag aues gäh. E Freistoss landet i dr 71. Minute knapp näbem Gou u zwe Minute spöter chame e schöne Agriff nid z'Änd spiele. I dr 78. Minute wird dr Reto Rüttimann im Sächzähner gfoulet, aber Pfyffe vom Schiedsrichter blibt stumm. D'Hektik nimmt zue, Ghässigkeite si am Rand vo Tätlechkeite. Es isch es Wunder, artet ds Spiu nid vouständig us. Die mahnende Wort vo einzelne Spieler verhindere schlimmers. Büre drückt u drückt und toucht immer wieder vor em Sächzähner uf. Aber ou Aurore chunnt zu Abschlüss, aber wie ir erschte Haubzyt bringt dr Gastgäber chum e platzierte Schuss ufs Gou. Churz vor Schluss verpasst dr igwächslet Dario Leisi dr Usglich nume knapp. Es wär verdiente Usglich gsi.


Fazit

Es het a däm Sunntigmorge viu Ungreimtheite gäh, wo Büre nid het chönne beiflusse. So chame sech d'Frog steue, warum das dä Match uf em Kunstraseplatz gspiut worde isch. Ds Houptfäud het sich troche und spiubereit präsentiert. Het me sich villech e Vorteil uf em für Aurore gwohnte Glöif erhofft?

Ig chume nid drum ume z'gloube, dass e usgwogeni Spiuleitig em FCB d'Chance zum ne Punktgwinn offeglo hät. So isch me mit dr rote Charte und drei gäube Charte bi de Bösewichte wieder vou derby u gfingt sich i dr Rangliste uf em Platz 5. Aber nach Verlustpunkt no a dr Spitze verträtte.


Schad isch e guet ufgschteuti und beschtens vorbereiteti Mannschaft so hert bestroft worde. Aber eis wüsse mir nach drei gspiute Meisterschaftsspiu sicher. Das Team git nid uf und wird am Samschtig, 12. Septämber am Vieri uf em Lach gäge SC Rüti vou motiviert sy und mit dr Wuet im Buch aues gäh, speziell ou für e Fabian Schuler.



Nöchschts Wuchenänd uf em Lache:


FCB – SC Rüti b. Büren

Samstag, 12. September 2020, 16:00 Uhr


Hopp FCB!

Aktuelle Beiträge

Alle ansehen