FC Aarberg – FCB 1:1 (0:0)

Kehrausball in Aarberg

Die Begegnung der beiden Absteiger hielt sich auf bescheidenem Niveau. Das Unentschieden entspricht dem Spielverlauf.

Sonntag, 1. Juni 2025, 10:15 Uhr, Aarolina Aarberg

Meisterschaft 3. Liga, Gruppe 4

Aufstellung

Tim Blatter (46. Julian von Heydebrand), Ruben Dos Santos, Manuel Bigler, Fabian Hänzi, Joel Tüscher, Men Meier, Nick Eggenberger, Numa Marmier (46. Denis Schneider), Mario Bärtschi (74. Marco Günther), Fabian Schuler, Luca Lauper

Ersatz

Alle Spieler im Einsatz

Abwesend

Yannic Kubacki, Dario Leisi, Manuel Scheidegger, David Vuilleumier, Remo von Wartburg

Alex Jorge Files, Joel Knörr, Jascha Kubacki, Stefan Pranjic

Staff

Patrick Meier (Trainer), Thomas Lerch (Assistenztrainer), Reto Steiner (Masseur)

Tore

55' 0:1 Joel Tüscher

80' 1:1 Jan Marbot

Karten

Keine

Erschti Haubzyt mit liechte Vorteile für Aarbärg

Wär d'Reis uf Aarberg gschücht het, muess gschpürt ha, dass dä Match uf dr Aarolina zwüsche de beide Abschtieger, kes Zuckerschläcke wird. Und nä mir's vorwäg, die Lüt hey e weise Entscheid troffe und Zyt angers z'totgschlage.

Ds erschte Usruefezeiche setzt dr Fabian Schuler y dr 9. Minute. Im Mittufäud lot är zwe Aarbärger lo aut usgsee, louft no paar Schritt und schiesst us ca. 19 Meter. Mit em ne riese Reflex cha dr Gooli vo Aarbärg y Corner rette. Ds Schpiu blööterlet aaschliessend vor sech häre, ke Mannschaft cha dominant ufträtte und sech düresetze. Die Flaute duret bis zur 21. Minute und plötzlech setzt sich e Aarbärger düre und chunnt zum Schuss us 14 Meter. Dr Tim Blatter im Gou vo Büre isch gforderet und muess hingerenang zwöi Mou rette. Dr erscht Schuss hät im ungere rächte Egge söue yschloo und dr Nachschuss isch haubhöch ufs Gou cho. Die zwe Blitzparade rette dr FCB vor em ne Rückstand. Paar Minute schpöter setzt sich dr Numa Marmier uf em rächte Flügu gekonnt düre, sy Pass y Sächzähner findet dr Luca, dä drückt ab. Dr Gooli cha dä Bau blockiere. Wieder paar Minute sy vergange und dr Schiri, schüsch mit er e ryffe Leischtig, bestroft die doppufüessigi Rettigsaktion vom Tim Blatter nid wie vermuetet, mit em ne Penauti. Dr Tim het nume dr Maa verwütscht, dr Penauti wär die logischi Foug gsy. Bis churz vor dr Pouse passiert nid viu Ufregends. Mittufäudgeplänkel, Päss y d'Botanik, Dribblinggs wo sich dr Drippler fasch säuber dripplet, kurz – nüt Gfröits. Die erschti Haubzyt, muess me konschtatiere, het dr Gaschtgäber mee vom Schpiu gha und die klarere Chance usegschpiut. Do derzue ghört ou die Chance y dr 45. +1. Minute, e wyti Flangge erreicht e Aarbärger churz vor em Sächzähner, sy Lupfer gratet liecht z'höch und schtricht knapp über d'Latte. Was die chöi, chöi mir ou. Unger däm Motto tanket sich dr Numa, är het unheimlech viu Baukontakte gha, uf dr rächte Syte düre und setzt dr Fäbu Schuler tiptop y Szene. Sy Schuss aber isch z'höch aagsetzt und schlot im Wäudli hingerem gou e Schneise. Pouse!

Zwöiti Haubzyt mit liechte Vorteile für Büre

Wie abgmacht hüetet y dr zwöite Haubzyt dr Julian von Heydebrand für e Tim Blatter d'Kischte vo Büre. Und dr Denis Schneider, ufs Bänkli strafversetzt wäge Fiirlechkeite letscht Wuchenänd, louft für ds Loufwunder Numa y. Unger üs Zueschouer hey mir scho gseit: "Hoffentlech gits de öppe mou e Chischte, es isch bau glych uf weler Syte, schüsch schloft de die zwöiti Gsichtshäufti ou no y!" Dr Joel Tüscher het mit üs Beduure gha. Haublinggs chunnt är a Bau und schteut fescht, dass är zimmlech Ruum het und zieht uf und dröschet dä Bau unge rächts, unhautbar, zum 0:1 y Egge. Herrlech gmacht Schöggu! Jitz sy mir wieder wach und harren der Dinge, die da kommen, hoffentlich. Aber ds Schpiu gheit is aute Fahrwasser zrugg und üse Erregigszueschtand chautet ab und gfrüürt fasch y. Büre, mit liechte Vorteile ungerwägs, chunnt dür e Men Meier nach schönem Dribbling zur e Grosschance. Sy Schuss us 16 Meter verpasst ds gägnerische Gou nume knapp. 74. Minute, dr Marco "Günä" Günther chunnt für e Duracell-Mario (Mario Bärtschi), wo nach 74 Minute sy Kilometerleischtig für ds ganze Schpiu scho abgschpuelet het gha. Aarbärg isch bemüeht, dr Fade nid z'verlüüre und suecht dr Usglych. Y dr 80. Minute isch är Tatsach, dr Usglych. Dä Topf war vermiedbar gsy, hät me konsequänter verteidigt, oder haut mou dr Bau furtdröschet. Jitz isch ou Büre wieder häuwach und versuecht, das Schpiu no für sich z'entscheide. Mit zwe, drei Päss schteit me vor em gägnerische Sächzähner, aber dr entscheidend Schlag wot nid glinge. Ou churz vor Schluss, wo's dr Luca Lauper us 8 Meter verpasst, dr entscheidend Träffer z'markiere.

Fazit

Mit däm Uswärtsunentschiede blybt Aarbärg uf em letschte Platz chläbe, knapp eis Punkt hinger üsem FCB. Ir letsche Begägnig vo dere Saison het de Aarberäg no uswärts Grünstern und üse FCB begrüesst uf em Lachen der SC Grafenried. Es wär es Pfläschterli uf d'Wunde vo üs, chönnt me dä letscht Platz grosszügigerwys de Aarbärger überloo.

Hopp FCB!