E Riisechance verchachelet

Gäge 10 Maa nie is Schpiu gfunge

CS Lecce - FC Büren an der Aare 2:1 (1:1)

29. April 2023, 17:30 Uhr, Längfeld 2, Biel (uf em Plastigg-Glöif)

Meisterschaft 4. Liga

Fotos: Stephan Kubacki

Käser - Bigler - Schläfli - Dos Santos - Tüscher - Schneider - Meier - Schuler - Eggenberger - Lauper - Leiser

Im Verlouf vom Schpiu ygwächslet: Hänzi - Pranjic - Kubacki - Murad

Ersatz: Stauffer (ET) - Lerch

Gou:

11' 1:0

17' 1:1 Dos Santos (Penauti)

70' 2:0

Gäubi Charte: Schläfli - Dos Santos - Eggenbergerer

Nähme mir ds Resümee vorzue. Aues, aber ou aues wo irgendwie e Relevanz beträffend Ufschtieg y dere Gruppe cha aamäude, het für Büre gschuttet. Walperswil - Radelfingen 0:0 und Port - Orpund 1:1. Und der FCB bringts nid fertig, eis Scheichli vors angere z'bringe. Mi het's versuumet e wichtige Schritt für ne mügleche Ufschtieg ztue. Dä mit "y dr eigete Hang ha" isch passe und verbockt.

Es zwöits Ärgernis isch, us Sicht vo Lecce aber überus verschtändlech, dass dä Matsch uf em Plastiggbitz het schtattgfunge. Näbedra isch e saftige Rase bi absolut beschte Bedingige brach gläge.

Uf eis müesst dir gfasst sy. Das ig do e grossi Schtämperete abloo, wär Wasser y d'Aare treit und ig würd viu z'verruckt derby. Derfür het üs dr Stephan Kubacki wieder Superfotos zum vertörle gschosse. Merci viu mou Stephan.

Mit em ne Kunschtschuss us ca. 18 Meter isch Lecce y Füehrig gange. Bis do häre het sich dr FCB no nid sortiert gha und dr Gägner isch nid resolut gnue y sim Würkigschreis gschtört worde.

Bereits dr 15. Minute flügt dr Gooli vo Lecce vom Platz. So richtig isch niemer nochecho. Äuämaa het e Bürer dr Gooli gfoulet und dä Grümscheler weiss nüt gschieders, aus dryzschloo. Völlig korräkt, dass är die roti Charte gseht. Wenns nach rächte Dinge zuegange wär, häts jitz söue Freischtoos für Lecce gäh, aber dr Schiri zeigt uf e Punkt. Dr Ruben verrumt dä problemlos. Was nächhär abgange isch, islch nid ds Gäube vom Ei gsy. Büre het nid y d'Gäng gfunge, im Gägeteil, Lecce isch y däm Matsch mehrheitlech schpiubeschtimmend gsy. Es isch offesichtlech worde, dass ihne d'Platzverhäutnis y d'Charte gschpiut hei. Was de Lecce ou guet cha für e Gägner z'verwirre, isch provoziere, tote Maa schpiele und dräckele. Het sich Büre vo söttige Machetschafte lo us em Takt bringe? Nid nume! D'Überzau zu eigete Gunschte usznütze, het me nid klever aapackt. Zum Teil sy 4 Verteidiger uf dr Mittulinie bi eim Gägeschpieler bliebe hocke und hei däm Triebe zuegluegt, anschtatt ufzrücke, z'presse und sich is Gscheh ybringe.

Me isch lieb gsy mitenang!

Es isch ke Gnuss gsy uf em Längfäud 2 in Biel. Büre het y 90 Minute zwe gueti Chance kreiert, viu zweni, mit em ne mügleche Ufschtieg vor Ouge. Das Lecce y dr 70. Minute no zum 2:1 cho isch, het zu däm Samschtignomittag passt - e verchachelete Samschtignomittag äbe.

Räschtprogramm vo Lecce und Büre:

FCB - Walperswil

Lecce - Täuffelen

FCB - Aarberg

Walperswil - Lecce

Aarberg - Lecce

FCB - Port

Port - Lecce

Aegerten Brügg - FCB

FCB - Ins/Müntschemier

Lecce - Aegerten

Ins/Müntschemier - Lecce