top of page

Cup 1. Rnd: Sarina Gstaad - FCB 3:4 (0:2)

Berner Cup - Runde 1 - 03.08.2019 16:00 - Schützebode, Saanen – Hauptplatz


Mit Isatzwiue u Kampfgeischt het Sarina-Gstaad dene um zwe Klasse besser platzierte Bürer fasch dr Cöpischtieg vermasslet. Und – si mir ehrlich, dä Klasseunterschied het me müesse go sueche.


Dr FCB het dr besser Schtart verwütscht und sech d'Müglechkeit erarbeitet, i Füehrig z'goh. Aber fählendi Träffsicherheit, oder ds Oug für e besser platziert Mitschpieler het eifach gfäut. Gstaad het aber i de Afäng vom Schpiu realisiert, dass si müesse es Brygge nochegheie, wenn si nid wei am Schluss es Zwöi am Rügge ha. Dr Kampfgeischt und z'kompromisslose Ischtiege i Zwöikämpf, het Würkig zeigt, die afänglichi Dominanz vo üsne Cräcks isch zerschtört gsi. E schwärwiegende Fähler i dr Abwehr vo Sarina-Gstaad het d'Wändi brocht. Dr Luca Lauper het die Chance usgnützt und zum beruehigende 0:1 igschobe (16. Minute). Gstaad fruschtiert ab däm Füehrigsträffer vo Büre, het no e Schippe drufgleit und isch hie und do grad e chlei ungeschtüm i Zwöikämpf gschtiege, het sech aber dür das chönne im Schpiu bhaute. E wytere Fähler i dr Abwehr vo Gstaad het am Manuel Scheidegger e zwöiti Chance zum Flangge gäh, wo dr Fabian Schuler i dr 29. Minute zum 2:0 verwandlet u Büre i ds Gfüeu versetzt het, wie dr sicher Sieger uszgseh. Do hesch aber de Rächnig definitv ohne Sarina gmacht.


Nach dr Pouse het Sarina-Gstaad Ärnscht gmacht und ir 54 Minute uf 1:2 verchürzt. Ha grad am ne Säguflüger zuegluet, wo uf em Flugplatz Saanen glandet isch. Cha auso nid erschöpfendi Uskunft gäh, wie das gloffe isch. Item, bim 2:2 hani are rassige Oberlendere müesse nocheluege Ou do, nid bi dr Sach, reschpektive dr Fokus uf vermeintlech Wichtigerem. So, jitz wider voui Konzentration, wüu es wird no schpannend. Mir schriebe die 64. Minute, dr Reto Grogg erkämpft sech uf dr Ussebahn dr Bau, louft ungefähr zäh Meter, si Flangge nimmt dr Joel Tüscher im Schtiu vom ne Profifuessbauer und hämmeret das Ding i d'Masche. Drü Minute schpöter no einisch so ne Wunderchischte. E Flangge vom Fabian Schuler chöpflet dr Eric Stauffer sensationell zum 2:4 unter d'Latte. Juhuu – hingereligge u ds schöne Wätter gniesse. Nei, das cha me bim FC Büre eifach nid. Sarina het öppe siebe Minute vor Abpfiff doch tatsächlech no dr Aschlussträffer g'schafft. Aber zum Glück für üses Ego isch es so blibe. Viu het nid gfäut, u Sarina-Gstaad hät es wyters Kapitu ir Cöpgschicht gäge Büre gschriebe.


Nid nume dä Cöpmatsch isch e voue Erfoug gsi. Carfahrt mit dem Marco Imperiali uf Saane hei öppe 15 Zueschouer mit em Team gnosse. Es härzlechs Merci a Marco für dä prompt Isatz.


Übrigens hei bis jitz (d'Sunntigschpiu schtöh no us) e Hampfele Seeländer i däm Cöp müesse d'Schtorze chehre. Port, Müntschemier, Hermrigen/Jens, Bözingen, Pieterlen, Grünstern, Orpund, Rüti, Mett. Guet müglech, dass ir zwöite Runde muesch dr Pass i d'Füdletäsche näh. Mit e chlei Glück het jo Büre de villech mou es Heimschpiu. Obwou, ou bim ne Heimschpiu si gwüssi Friktione aagseit. Wäg em ne wichtige Event uf e Lache, muess de jede Zueschouer si Verpflegig im Rucksack mitnäh. E Tipp gfälligscht: Es Päärli Servela, e Bitz Chäs, e Tube Sänf und e Fläsche Bier isch für unterwägs gäng e gluschtigi Variante, ou wenns nid um ds Schwinge geit.


Hopp FCB!




Aktuelle Beiträge

Alle ansehen

Comments

Rated 0 out of 5 stars.
No ratings yet

Add a rating