top of page

CS Lecce - FCB 2:7 (0:5)

Sportplatz Längfeld 2 Biel, Sonntag, 23.08.2020, 14:00 Uhr

Meisterschaft 3. Liga, Gruppe 6


Ufstellig:

Stauffer Mikael, Gutbub Luc, Schneider Denis, Dos Santos Ruben, Scheidegger Manuel, Lerch Thomas (C), Meier Men (58' Eggenberger Nick), Kubacki Yannic (58' Hofer Mischa), Schuler Fabian, Rüttimann Reto (58' Leisi Dario), Tüscher Joel (50' Lauper Luca)


Ersatz: Sutter Michael (Ersatztorhüter)


Trainer: Rüttimann Reto, Von Felten Patrick


Abwäsend:

Bigler Manuel (2. Mannschaft), Grogg Reto (abwäsend), Günther Marco (verletzt), Imperiali Diego (2.), Käser Simon (verletzt), Schläfli David (Privat), Stauffer Eric (verletzt)


Gou:

10' 0:1 Kubacki Yannik (Schuler Fabian)

13' 0:2 Rüttimann Reto (Penauti, Foul am Gutbub Luc)

16' 0:3 Rüttimann Reto (Flangge Schuler Fabian)

32' 0:4 Rüttimann Reto (Abprauer nach Schuss vo Schuler Fabian))

42' 0:5 Schuler Fabian (Scheidegger Manuel)

55' 1:5 Wael Akrout

58' 1:6 Meier (Schuler Fabian)

81' 1:7 Scheidegger Manuel (Schuler Fabian, Freistoss Schneider Denis)

85' 2:7 Evanderson Vitorio Dos Santos


Charte:

81' Scheidegger Manuel (eigentlech isch es am Eggenberger Nick sini)


Bemerkige:

Wäge illegalem Cämpe uf em Parkplatz hei mir dä ominös Schnägg deheim chönne is Feriesöuili abeloh. De Fahrende sei Dank!


Gueti Vorussetzige:

Nach em Startsieg gäge Aegerten Brügg het me d'Reis ufs Längfäud in Biu mit glöste Närvesträng chönne unger d'Redli näh. D'Istellig het gstumme gha und e seriösi Leistig isch me im Stang gsy abzrüefe. Auso kei Panik uf dr Titanic. D'Resultat vo de Samstig- u Sunntigmorgespiu hei ou derzue bytreit, d'Stimmig z'lüpfe. Azzurri gwinnt gäge Madretsch 4:1, Aurore – Pieterlen 2:2, Rüti – Orpund 0:3, Aegerten – Grünstern (das viu globte Team vom Pascal Arni) 1:1, Evilard – Diessbach 2:0. Eis isch mittlerwyle klar gsy, gwinnt me dä Matsch, hievt me sech mindestens uf e zwöit Tabäueplatz. Us dere Sicht gseh, het me nümme chönne gwinne.


E begeisterndi ersti Haubzyte:

Dr FCB het dä Match so apackt, wie me das het dörfe erwarte respektive het erhofft. Ab dr erste Sekunde isch e Zwöiklassegseuschaft uszmache gsi. Dr FCB het zeigt, dass me die unnötigi Niederlag vo dr letschte Saison wott guetmache. Konzentriert und ufsässig isch me vo Apfiff a as Wärch. Isch dr Gägner mou a Bau cho, het me sofort attackiert und Druck ufbout und so unzähligi Bäu erkämpft. Es isch e Fröid gsi zuzluege, mit was für Trickli und Fintene me Lecce het lo is Lääre loufe. Si hei eim mängisch fasch chlei duuret, so hiuflos het se dr FCB lo usgseh. Es isch lediglich e Frog vo dr Zyt gsi, bis es mou chachelet im gägnerische Gou.


Tormaschine rout

10, 13, 16, 32, 42! Das isch keis Rätsu, das sy d'Ischlagszyte im Gou vo Lecce. Mir schriebe die 10. Minute. Dr Fabian Schuler tripplet sich bis uf Grundlinie düre, spiut dr Bau vor's Gou wo dr Reto Rüttimann und dr Goli ne verpasse, am hingere Pfoste steit dr Yannic Kubacki und schiebt zum 0:1 y. E wyteri Chance verpasst me, aber ir 13. Minute wird dr Luc Gutbub nach em ne schöne Louf vo de Socke ghout. Penauti! Für e Reto Rüttimann kes Problem, troche verwandlet är zum 0:2. Keni 3 Minute spöter, Lecce isch ab däm Powerfuessbau verwirrt und nid uf dr Höchi vo dr Sach, wo's bereits scho wieder yschlot. Dr Fabian Schuler isch usse düreglofe, sy Flangge verwandlet dr Reto Rüttimann ohni Müeh, 0:3. Jitz het me scho chlei müesse Angst ha um die tapfere aber völlig überforderete Lecce-Boys. Ihres Rezäpt, sich vermehrt mit Fouls us dr Affäre z'zieh, het Büre nid beidruckt, im Gägeteil mit Vougasfuessbau het me Antwort gäh. Uf dä Torreige abe isch e Viertustund düreschnuufe agseit gsy. Nenei, mi het nid ds Schutte igsteut, Träffsicherheit het ungerem klare Resultat chlei glitte, d'Konzentration isch de aber wieder schnäu ufegfahre worde. 32. Minute, e Schuss vom ne Bürer cha dr Goli vo Lecce nume gäge füre lo abpraue, dr Reto Rüttimann steit richtig und schiebt zum 0:4 y. Ig weiss nid wär gschosse het, chönnt durchus aber dä überau präsänti Fäbu gsy sy (jitz isch grad Bestätigung inecho, has jo gwüsst!). Dr klassisch Hattrick isch Tatsach. Es louft die 42. Minute. E Agriff vo Büre über die linggi Syte, usglöst vom Mikael Stauffer, dr Luc Gutbub leitet dä Bau ohni z'zögere zum Manuel Scheidegger wyter, dä louft und gseht dr Fabian Schuler, dr Pass verwärtet der Fäbu in gekonnter Manier, 0:5. Churz drufabe pfyft dr usgezeichnet Schiedsrichter (praktisch immer uf Bauhöchi) zur Pouse.


Taktische Hickhack

Wenn me scho schribt, de darf me gloub ou mou die kritischi Stimm erhebe. Diese Freiheit nehm ich mir!

Nach em Sytewächsu isch ds Spiu mit dr Startegippe wieder ufgnoh worde. Do hei mir no nüt z'mule oder z'gaaggere, e logische Fau. Füf Minute spöter chunnt dr Luca Lauper für e Joel Tüscher uf e Platz. Es liechts Stirnrunzele begleitet dä Wächsu, nid wäge däm wo ine chunnt, sondern wäge däm wo use muess. Do derzue spöter meh. Wyteri 10 Minute spöter schnüert d'Trainerbank vo Büre es Drüerpäckli mit Men Meier, Yannic Kubacki und Reto Rüttimann use, Mischa Hofer, Dario Leisi und Nick Eggenberger ine. Für die wo ine chöme hei mir nüt z'meckere, völlig logisch. Bi dene wo dr Platz müesse verloh cha me sech zur e Diskussionsrundi zämesetze u stundelang diskutiere.

Ig u paar angeri Zueschouer ou hei dänkt, bim Stand vo 0:5 tuet me langsam aber sicher d'Mannschaft verjünge, sprich d'Routiniers schone für e nöchscht Match wo's de wieder viu Routine brucht. Mit de Routiniers sy dr Reto Rüttimann, Manuel Scheidegger und dr Thomas Lerch gmeint. Aber damit ds Gfüeg nid usenang gheit, eine nach em angere süferli uswächsle, damit d'Kontinuität nid us em Glychgwicht gheit. So het me dr Vorschlaghammer füregnoh u aues churz u chly gschlage. Schad für die junge Giele, schad für's Resultat, schad für die zwöiti Haubzyt, schad für's Oug.

Ig weiss es, jammere uf em ne sehr höhe Niveau. Aber gloub nid völlig näb de Schueh!


Büre nimmt sich säuber us em Spiu

Auso, mir tüe üs wieder beruhige u verzeue, was ir zwöite Haubzyt passiert isch. Sicher dütlech weniger aus i dr Erschte. Ds Spiu het d'Mechanisme verlore, Bindeglieder zwüsche de Reihe si unterbroche gsi, ds Verständnis ungerenang het schwär Schade gnoh. So gseh isch nid verwunderlich, das ds Fazit vor zwöite Haubzyt mit em Resultat vo 2:2 unentschiede usgeit. Zur Verteidigung muess aber ou gseit sy, dass d'Chanceverwärtig gägenüber dr erschte Haubzyt nid annähernd erreicht worde isch. D'Bemühige sy sichtbar gsi, d'Outomatisme äbe nümme. So chönnt me ou argumäntiere, dass ds Säubschtvertroue haut ou chlei Schade gnoh het.


1:5 us Sicht vo Lecce isch absolut nid zwingend gsi. Es brucht haut mängisch nume e Fäupass u de isch es passiert. Büre het die Resultatkosmetik wieder i Sänku gsteut. Uf Pass vom Fabian Schuler (scho wieder, dä het sini Füess überau im Spiu gha) het dr Men Meier dr Abstand wieder härgsteut (58. Minute).


Jitz bin ig verwirrt

Jitz ha ig gmeint, ir 55. Minute sig dä Drüerpackwächsu über Bühni u nächhär macht dr Men Meier (für e Schiri dr Manuel Scheidegger) i dr 68. Minute 1:6. Do het eine es Gstürm im Fadechörbli. Ig oder dr Schiri? Ha jitz das Gou am Men Meier gäh, wie's korräkt isch, ha aber drus die 58. Minute gmacht. So löh mir das lo sy, zwar nid z'fryde, aber wenigschtens bereiniget.


Wyter im Text

Druf abe isch dä Hickhack über Bühni u dr Unterhautigswärt vo däm Match isch um etlechi Grad i Chäuer g'sacket. Ganzi 25 Minute isch ds Spiu so dahin plätscheret, aber nid ganz ohni Grosschance vo üsne Manne. Hät me die packt, wär problemlos es zwöistelligs Resultat müglech gsi. Gou hets de glich no gäh. E Freistoss vom Denis Schneider chunnt nid wie gwünscht, dr Fabian Schuler (scho wieder) verlängeret mit em Absatz und dr Mänu chunnt a Bau, und wenn dä nume chlei Platz gseht, de rauscht's im Blätterwaud, 30-Meter-Sprint und 1:7 isch Tatsach. E wytere Fähler ir Defensive het de Lecce no 2:7 beschert, wyter nid schlimm aber völlig unnötig.


Fazit

Büre isch definitiv parat. Sig das konditioneller, spielerischer oder technischer Natur. Die erschti Haubzyt het bewiese, dass dr FCB e Match cha i d'Finger näh, intalligänte Fuessbau im Bluet het und uf em Platz e Kommunikationsart awändet, wo motivierend würkt und so vorauem de junge Spieler Sicherheit cha vermittle. E äutere Fuchs us ere Bürener Fuessbaudynastie (genau dr Chrigu Lauper) het gmeint, die erschti Haubzyt sig öppis vom Bessere wo är i de letschte Johr vom Eis gseh heig. Mir schliesse üs däm Votum bedingigslos a u mache e z'friedne Gring.


Sensationelle Ufmarsch vo üsne Fans

Ei Faktor, wo üsne Giele ou gäng guet tuet und es Motivationschüebli bedütet, si üsi Fans. Mit het uf em Längfäud meh Bürener-Gringe chönne usmache aus Wohnwäge vo Fahrende. Dr Mikael Stauffer het mir gschriebe "Budi, chönntsch du im Bricht üsi Superfans erwähne, wo z'Biu si gsi." Mach ig gärn Miggu u mir stifte üsne Fans e Rieseapplous für die tolli Unterstützig.




Nöchschts Wuchenänd uf em Lache:


FCB – FC Azzurri Bienne

Samstag, 29.08.2020, 16:00 Uhr


Hopp FCB!


Aktuelle Beiträge

Alle ansehen

Comments

Rated 0 out of 5 stars.
No ratings yet

Add a rating