top of page

CS Lecce - FCB 1:0 (0:0)

Meisterschaft - 3. Liga / Gruppe 6 - 25.08.2019 14:00 - Längfeld 2, Biel – Hauptplatz


Wenn ig bim Schriebe die glichi Effiziänz a Tag lege, wie dr FC Büre i de erschte zwöi Schpiu bim Gou schiesse, gits es magers Brichtli. Das söu nid öppe abwärtend gägenüber üsne Giele gmeint si, schliesslech isch es jo e Tatsach, dass scho im zwöite Schpiu us ere eklatante Überlägeheit e ganz bescheideni Usbütti usegluegt het.


Gäge Aegerten Brügg isch es Plus a Gouchance usegschaffet worde, wo drü Punkt verdient hätte, jo hät'sch aus Gwinner müesse vom Platz go. Das z'toppe schynt eim schier unmüglech. Aber liebe Fäns vom FCB, es isch passiert. Mi het Chance en masse versiebet, linggs drnäbe, rächts drnäbe, drüber, a Pfoschte, verzoge, verschtouperet, verchachelet, dr Goli agschosse, z'Runde nid is Viereggige verrummt. Hät ig nid scho so mutz Hoor, potz wooumääu ig hät mir dr Räschte vo de Fädere vor Verzwieflig zum Gring usgrupft. So het sech dr Schade i Gränze ghaute. Nach em Match isch scho z'beobachte gsi, dass die einti oder angeri Pärson nümme grad die schönschti Föhnfrisur het chönne vorzeige, d'Muulegge si abeghanget und dr Gang zum Parkoutomat isch zum Schpiessruetelouf worde. Wär sech i dr Büvette (mi cha ou säge Bäbischtube) no es Bierli gönnt het, hät scho müesse e gäbige Sufludi sy, dass me wider e z'fridne Gring überchunnt. Deheim itrudlet, hantli d'FCB-Schale i Egge bängglet und ufs ominöse Chnöpfli drückt. Jitz mutiersch zum Seeländer, zum agfrässne Schwingerfän. Nach 42 Sekunde im Schlussgang hei mir arg gebeutelte FCB-Fans dank em Chrigu Stucki doch no öppis z'gumpe und z'fiire gah. Do het beschtimmt dr Rächt gwunne, was me bi Euf gäge Euf nid cha bhoupte.


Dr FCB het einisch meh a dr Ufschtellig müesse umeschrüble. Dr Luca Lauper isch wäge Härzrhythmusschtörige im Schpitau gsi u het für die nächschti Zyt vom Döktu Schpiuverbot. Mir wünsche vo dere Syte gueti u schnäui Besserig. "Mir bruche di Luca"! Dr Denis Schneider isch verletzt und het äbefaus müesse passe. Ou do gueti Besserig, mir chöi ou uf di nid verzichte. Dr David Schläfli het wäge de Flitterwuche Träningsrückschtand, dr Yannic Kubacki het churzfrischtig e Privattermin müesse wohrnäh. Dr Diego Imperiali het im Zwöi gschuttet u Brieftube wo d'Schpiuberächtigung für e Raphael Schuler hät söue verbybringe, het sech verfloge.


I fougender Ufschtellig het dr FCB dä Matsch i Agriff gnoh:

Im Verlouf vom Schpiu hei dr Ruben Dos Santos, dr Lars Freiburghaus und dr Nick Eggenberger i ds Schpiu igriffe.


Nid zum Isatz cho isch üse Ersatzgoli Mikael Stauffer u dr Yannik Tüscher.


Das fatale Gou isch i dr 55. Minute gfaue.


Es isch so, wie ig Igangs gseit ha. Es git es magers Brichtli, erschtens wüu näbscht em Gou schiesse eigentlech nume Büre für Ungerhautig gsorgt het (isch schwierig öppis Vernünftigs z'schriebe) u zwöitens ig im Momänt mit em nöie Schpiuprogramm e Huufe Büetz uf mi wartet. Übrigens wird das scho bau e Schunke. Praktisch aui Sponsore vom Juniorekaländer si problemlos, teils fasch e chlei begeischteret, umgschtiege. A der Schteu aune üsne guet gsinnte Firme und Lüt es grosses merci, wo vo Härze chunnt. Das söu de aber öppe gar nid zur Gwohnheit wärde, dä mit em Spränzubricht, für das sit dir mir, liebe Läser, z'wichtig.


Wär dr Matsch nid gseh het, cha nach dene Zylete ds Gfüeu übercho, üse FCB sig mit dr dritte Liga chlei überforderet, heig Müei mitzhaute. "Dem ist bei weitem nicht so!" Schpielerisch über wyti Schtrecke gäge Aegerten tonagäbend, schpielerisch gäge Lecce überläge. Bereits i de erschte Minute vor Begägnig erschpiut me sich Hochkaräter vo Torchance. Derzue gfüehrt het nid nume e kontrollierte Schpiuufbou, bi Baubsitz vom Gägner het me früeh gschtört u d'Unzuelänglechkeite vo de Gaschtgäber offegleit. Die beide Momänte, ergänzt dür nes vorbiudlechs Zwöikampfverhaute sie für das Übergwicht verantwortlech gsi. Mi het sich dür einzelne überherti Zwöikämpf nid lo us dr Rueh bringe, äbeso dür kuurligi Entscheide vom ne nid überzügende Schiri. Einzig - u das isch a däm Tag das Manggo gsi - ds Gouschiesse het gharzet und isch mit zuenähmender Duur vom Schpiu zur Sysyphusarbeit worde. Aui Aschträngige si nid belohnt worde u trotzdäm hei d'FCBler nie ufgäh und a ihri Cance gloubt. Dä Umschtand schtimmt üs zueversichtlich und vo zwöi abverreckte Schpiu lö mir üs nid hingerem Ofebänkli lo fürelööke u mache uf Panik. Nenei - für das hei mir viu zviu Hornhut am Füdle. Mir hei scho im Ufschtiegsjohr dür ds Staubad müesse, dört hei mir chönne Erfahrig sammle u si schlussändlech für üse Gloube a das Team grossartig belohnt worde. Ig bi derfür, mir probiere das no grad einisch, verdient heis die Giele uf au Fäu.


Nöchschte Samschtig, Aschpiuzyt 16:00, chunnt FC Azzurri Biel uf e Lache. Mir marschiere, wie gwohnt, i grosser Azau uf. Nid z'letscht ou wüus aus Menü Ghackets und Hörnli git. Es feins Schlückli Wy oder so, lö mir üs de nid lo näh!


I däm Sinn Hopp FCB, Gas gäh!







Aktuelle Beiträge

Alle ansehen