Gueti Besserig Miggu
Sit einiger Zyt het sich dr Mikael Stauffer müesse mit dr Diagnose Multiple Sklerose usenandsetze. Damit verbunde sy, je nach Hüfigkeit und schterchi vo de Schüb, individuelli Behandlige im Schpitau notwändig. Do derby schpiele rächt schtarchi Medikamänt und wyteri, pärsönlich abgschtimmti Therapieforme e massgäbendi Roue.
Obwou dr Miggu gäng wieder mit Yschränkige isch konfrontiert worde, isch är a de Tränings aazträffe gsy, het wyterhin siny Juniore trainiert und im Eis het me uf ihn chönne zeue. Aus Ussestehende het me vo sine Beeiträchtigunge nüt gmerkt, är het das so guet wie's gange isch gäge use nid zeigt. We me de öppe mit ihm über sie Gsundheitszueschtand gredt het, isch eim de scho bewusst worde, dass das Händikäp vor Herusforderig zum Kampf worde isch.
Miggu, mir bewundere dini Chraft und dini positivi Yschtellig und hoffe, dass es dir so schnäu wie müglech wieder besser geit. Häb Sorg und du weisch, mir di bruche.
