top of page

FCB - FC Grünstern 4:1 (2:0) - Aufstieg

Aktualisiert: 2. Jan. 2023

Meisterschaft 4. Liga, 5. Juni 2019, 19:30 Uhr, Sportplatz Lachen


Ufschtieg aus Lohn für ne sackschtarchi Saison!

Diskussionslos

Es het i däm schicksauhafte Matsch eigentlech nume ei churze Momänt gäh, wo me het müesse bibere, u das isch nach em Aschlussgou pär Penauti gsi. Schüsch het me das Ching gschoucklet, abklärt agiert u kämpft für DAS Ziu, dr Ufschtieg. Es chunnt nid vo ungefähr, dass dr FCB zoberscht uf em Träppli schteit. Nach dr unerwartete Niederlag gäge Besa deheim vom 27. Apriu, hei üser Giele nüt me lo abrönne. I sächs Schpiu 18 Punkt ghout, 33 Gou gschosse u nume 8 Gööli überchoh. Das isch e Antwort, do isch nume logisch, schteisch aus Ufschtieger fescht. Nach drüü Johr i dr 4. Liga ändlech wieder dört, wo me es Büre erwartet. Mir gratuliere ganz härzlech, si hoch erfröit u näh e riesegrosse Fröidegump u ds Gringweh wird sech de sicher ou no einisch verflüchtige.


Ufschtellig FCB:

Beyeler Jarno (89. Chäser Simu), Grogg Reto (80. Hofer Mischa), Lopes dos Santos Ruben, Schläfli Dävu, Scheidegger Mänu (C), Rüttimaa Reto, Eggebärger Nick (89. Friburghuus Lars), Schneider Denis, Tüscher Schöggu (89. Chocher Schoao), Schueler Fäbu, Louper Luca (78. Kubacki Yannic)


Bemerkig:

Füürtoufi für e Chocher Schoao u Friburghuus Lars.

Dr Günter Marco (verletzt und im Militär) schteit i vouer Montur do, für sini Kollege aazfüüre (eifach geil).

Mit Fröid hei mir dr Houptschponsor Markus Bigler mit Sohn unger de Zueschouer entdeckt.

Es Tröumli vom ne Platz und e würdige Rahme für dä wichtig Matsch. Ganz e härzleche Dank a Jarno und sis Team!


Träner: Tüscher Pädu, Vo Fäute (VoFi) Patrick


Dr Massör: Schteiner Reto


Nid derby: Günther Marco (d'Bänder überdehnt, Militär), Lerch Thomi (muskuläri Problem), Schtouffer Eric (Lischteproblem) Tüscher Yannik (Bänder)


Langzytverletzti, teilwies am Abklinge: Imperiali Diego, Kocher Damian, Schtouffer Miggu


Gou:

27. 1:0 Rüttimann Reto, 37. 2:0 Louper Luca, 53. 2:1 Penauti Grüenschtärn, 63. 3:1 Louper Luca (Penauti), 73. 4:1 Schueler Fäbu



Erschti Haubzyt

Wäge dr Biudigsreis über Pfingschte nach Öschtriich, e grosse Teil vom Eis nimmt dört mit härzhafter Begeischterig teil, isch dä Matsch vorverschobe worde. D'Fakte si uf em Tisch gläge. Büre muess gwinne, schüsch beschteit Gfahr, no uf e dritt Platz abzrütsche u so e mügleche Ufschtieg z'verpasse. Entschprächend angaschiert isch me de ou a ds Wärch. Aber es isch de no e Gägner uf em Platz gschtange, wo's Büre so schwär wie müglech het wöue mache. Sie si i dr Wau vo de Mittu nid zimperlig gsi. Robuscht u kompromisslos si sie i Zwöikämpf gschtiege u hei so versuecht, Büre izschüchtere und sech dr nötig Reschpäkt z'hole. Aber üsi Giele si ou keni Miuchbubis und hei Knoche häre gha u öppe mou e Ylag produziert, wo sech am Rand vo dr Legalität bewegt het. Zum Glück für ds Schpiu isch mit em Mario Serafino e Schiri uf em Bitz gschtange, wo vo A bis Z dä Matsch im Griff gha und Outorität usgschtrahlet het.



Es isch munter los und i dr 2. Minute het dr Rüttimaa Reto bereits e gueti Chance Büre i Füehrig z'bringe, aber är verzieht. Bereits i dr 8. Minute gseht dr Schläfli Dävu die gäubi Charte. Für ne Defensivschpieler so früeh e rächti Hüpotheg, aber ou es Zeiche a Gägner, "mir si de do"! Zwüsche dr nünte u füfzähte Minute, es het sech es rassigs und abwächsligsriichs Schpiu entwicklet, het Grüenschtärn e gueti Chance versiebet, dr Schneider Denis loht e Kracher über ds Gou u dr Louper Luca chöpflet näbem Gou düre. Churz drufabe cha e Verteidiger dr Schueler Fäbu nume mit em ne Riistescht am Triggo schtoppe, dr Scheidegger Mänu päfzgeret es Gschoss übere Chaschte. Büre isch fei chlei im Chut u gfüeut nöcher am Füehrigsträffer, wo dr Schiri zur Tränki rüeft. Nach em a de Fläschli nuggele u do chlei Smooltock u dört es Witzli, geits i dr gliche Intensität wyter. Und jitz mini Dame u Herre chunnt öppis us em Biuderbuech. Dä Pass vom Lopes dos Santos Ruben dür Fründ und Feind düre uf e Rüttimaa Reto isch ganz grosses Chino. Wie ne de nächhär dr Reto no zum 1:0 (27. Minute) verrumt, isch no ds Nydlechöpfli obedruuf. Ha, die Lascht wo vo de Schpieler und de Zuschouer gheit isch, hesch es fasch chönne ghöre. Mir si uf em richtige Wäg, jitz heisst's draa bliibe, Gas gäh, mir wei fiire hinech! Zwe Minute schpöter vergit dr Louper Luca us ussichtsriicher Position. Jitz isch wider Grüenschtärn dran, dr Chopfbau verfäut ds Ziu. Wieder e Sytewächsu, das mou loht dr Grogg Reto eine lo zische – 33. Minute. 34. Minute, üse Fäbu jo e Garant für Gou, versemmlet atüpisch us churzer Dischtanz. Macht nüt, Chopf hoch! Churz nächhär het Grüenschtärn es Riisepäch. E Abschutt vom Gooli geit am ne Mitschpieler a Rügge, dr Louper Luca schautet am schnäuschte u schiebt zum 2:0 y. Es isch wider am Gascht, e Schuss flügt über ds Gou und e Freischtooss blocket die guet gschteuti Muur. Es isch Pouse. Mir hei es schnäus, abwächslichsriichs u hert umkämpfts Schpiu gseh. D'Füehrig für Büre isch verdient, ou us däm Grund, wüu Grüenschtärn praktisch ke gfährleche Schuss uf z'Gou vom Beyeler Jarno brocht het. Auso, afe die haubi Mieti im Trochne, wyter so!


Dr Ufreger vom Tag

Bevor dr Rüttimaa Reto sis wichtige Gou het chönne schiesse, hei aui Beteiligte zersch no müesse Bluet schwitze. Dr hingerscht u dr letscht Chnoche vom Eis schteit uf em Lache u wartet uf e Tagesbefäu zum umzieh, wo am Träner sis Telefon tschäderet. "Du Träner, ig schtecke im Schtou z'Önsige, es längt mir äuä nid"! Jo heiligs Blechle, de hei mir schüsch scho so viu u wichtigi Usfäu und jitz no das. Wo die schlächti Mäudig publik isch worde, het me scho öppe i z'eint oder angere ratlose Gsicht chönne luege. Aber aues haub so schlimm, är isch itroffe und ohni gross Izloufe vor erschte Sekunde a unger Schtarchschtrom gschtange u ds wichtige Gou zum 1:0 gschosse.


Zwöiti Haubzyt

So Giele, jitz no einisch füfevierzg Minute Konzentration, Kampf u Fröid ha am Schutte, de isch dä Mischt karlet. Nid z'früech fröie! Wenn aus hingerschte Maa dry muesch, chas haut mou passiere, dass ds Tämparamänt nid zu hundert Prozänt im Griff hesch. So gscheh i dr 53. Minute. Dr Grogg Reto, schüsch wie gäng e tadulosi Leischtig, schäutet e Schritt z'schpät, u scho cha e gägnerische Schtürmer loszieh. Jitz chunnt äbe dä mit em Tämparamänt u de grad sofort e Pfiff – Penauti. Ds Schpiu geit praktisch vo vore los. Es paar Ougeblicke schpäter wird es Dürebräche vom Louper Luca mit em ne Lieblizupfer gschtoppet. Bim Freischtooss luegt nüt vo Belang use. Mir schribe die 58. Minute u dr Tüscher Joel forderet am gägnerisch Gooli aues ab. Vorteile si uf Bürer Syte, wie i dr erschte Haubzyt schaffts dr Gägner nid, zum ne gfährleche Gouschuss azsetze. Angers üsi Jungs, dr Luca Louper bricht im Sächzähner düre und wird vo de Socke ghout. Dr Penautipfiff blibt nid us. I gwohnter Manier verwandlet är suverän, 3:1. Es nochet im, es isch aagrichtet. Jitz nid zviu Öiforie, nid öppe no dr Chnöischlotteri übercho, kontrolliert das Züüg heifahre. Aber, u das isch ou eine vo de Sterchine vo üsne Manne, die wei no meh, die hei no Hunger, tüe i dr zwöite Haubzyt praktisch i jedem Schpiu no es paar Brigget i Ofe. So het jo no 4:1 müesse faue. D'Hingermannschaft vo Grüenschtärn het mit unlutere Mittu wieder eine vo de schnäue Bürer Schtürmer gschtoppet. Dr Freischtooss vom Schneider Denis cha dr Gooli nume mit Müeh pariere, dr Abprauer verwandlet dr Schueler Fäbu zum beruhigende und entscheidende 4:1 (73. Minute). Die letschte füüfzäh Minute bringt Büre locker und rutiniert über d'Bühni. Dr Kubacki Yannic erkämpft sich no e Riisechance und bim ene Hoor hät dr Chocher Schoao (Joao) no es Gou gmacht.



E ufschtiegswürdigi Leischtig vor e Mannschaft mit em ne grosse Kämpferhärz u viu Luscht schöne u schpektakuläre Fuessbau z'zeige. Die gueti Kameradschaft, ou eine vo de Erfougsfaktore, muess me nid äxtra erwähne, dass gseht u gschpürt me i jeder Läbeslag.


Nach em Schlusspfiff hout sich d'Mannschaft vom extrem zauriich erschienene Publikum d'Reschpäktsbezügige und dr verdient Applous.


Wir sind 3. Liga!


Mir hei die Saison a däm Team, gformet u gschliffe vom Tüscher Pädu und em Vo Fäute Patrick, viu Fröid gha. Mou hei mer glitte, mou i überschwänglichi Öiforie abdriftet, gschtuunet u zwieflet, ghoffet u banget, klatschet und bääget vor Entzückig. Giele, dir sit eifach grossartig, unschlagbar, einzigartig!


Es grosses MERCI a die beide Träner, a Schteiner Reto und a öich Jungs!


Hopp FCB



Aktuelle Beiträge

Alle ansehen