Absysts vom Fuessbaugscheh

Es isch wahrlech e turbulänti Vorrunde gsy, bsunders denn, wenn me ds Ändi vo dr vergangene Saison aus Aafang vor nöie Saison nimmt. Und dem isch ou rechtens so, wüu schliesslech ds Training nächhär bereits zur Vorbereitig vo nöie Tate z'wärte isch. Verschtöht mi richtig, die Turbulänze sy de nid öppe nume fuessbauerischer Natur gsy, nei bigoscht nid.

Dir heits aui no y Erinnerig –Räge, Räge und no einisch Räge. Logischi Foug, dr Aarestand wird höch, höcher u juschtemänt für üse Platz viu z'höch. Dr Lache mutiert zum Sumpfgebiet und wird e beliebte Tummuplatz für aues was kröicht und flöicht, däm seit me Zwäckentfrömdig oder ganz eifach usdrückt, dr Lache suufft ab.

Gäge Ändi Juni hets aagfange, am Damm und y de nöiralgische Schteue het ds Wasser aafo drücke und scho chlyni Glünggali biudet. E vorübergehendi Wätterberuehgig het üs lo düreschnuufe um de paar Tag schpäter demonstriert z'übercho, wie heftig d'Natur cha zueschlo.

Es isch du schnäu klar worde, dass aui Bemüehige öppis wöue z'rette mit Abpumpe und Abflussgräbli schufle, uf z'grosse Widerstand gschtosse isch. Tatelos het me müesse zueluege, wie praktisch ds ganze Houptfäud und e grosse Teil vom Trainingsplatz zum Tüüfu göh und e greglete Fuessbaubetrieb ir Vorrunde nid wird müglech sy.

Trainingseinheite hei dank em Gaschträcht vom SV Safnern und em OK vo dr Gmeind für d'Benützig vo dr "Maeschimatte" extern chönne gwährleischtet wärde. Das isch e Rieseapplous wärt. Dr nöchscht Rieseapplous geit a d'Gägner vo dr erschte und zwöite Mannschaft. Sämtlechi Heimschpiu het me chönne dräye und uf Modus uswärts schteue. So isch ds Rückrundeprogramm uf em Lache e geballti Ladig vo Heimschpiu.

Über die ganzi Sanierig dür d'Firma Aemmer vo Lyss isch uf üser Homepage scho brichtet worde. Hüt chame säge, dass d'Rückrunde uf em Houptfäud cha düregfüehrt wärde. Houz aalänge, dass nid Corona wieder ds Gfüeu überchunnt üs z'malträtiere.

Fischässe – ändlech wieder mou!

Mit em ne gwüsse Risiko het sech dr Vorschtand entschlosse, üsi Fründe und tröie Bsuecher vom ne feine Fisch, wieder mou z'beglücke. Risiko, wüu me nid het chönne abschetze, wie heftig d'Grüch vom verfulende Rase uf em Houptplatz d'Veranschtautig vermöge z'störe. Schteu dr vor, ändleche sech wieder mou am ne chüschtige Fisch ergötze und glychzytig zieht e miefe Gruch unger dr Nase düre – igitt igitt! Kärchere, putze, fäge, suuge, wüsche, entferne, wägfüehre, ungere Teppich chehre und poliere hei zur e perfekte Ambiente y dere Lokeischen (Location) gfüehrt. Hüt seit me schliesslech nümme Stimmig und Festplatz, tönt jo husgebacken, wenn nid sogar hinterwäudlerisch. Und weiss Gott, das sy mir nid oder ömu de sicher nümme.

Das üs Corona nid is Programm ynekaflet het, isch e purlutere Zuefau und für das sy mir dankbar. Es isch nämlech e durch und durch erfougryche Aalass gsy. A dere Schteu bedanke mir üs bi aune Bsuecher fürs Vertroue und für es perfekts Fisch-Wuchenänd! Aune Häufer, minetwäge ou dene wo mer vermisst hei, e grosse Applaus und es härzlechs merci!

Mit em Cup geits los

19.08.2021 in Lengnau: FCB – SV Meiringen (2.) 2:5 (1:4)

Wie mängisch hei mir ächt scho müesse schriebe, dass sich üse FCB sang- und klanglos us em Bärner Cup verabschiedet het. Das isch y 83 Johr FCB-Gschicht gfüeut sicher scho z'nünesiebzigschte Mou, wo me ds Bünteli packt und "sich von dannen macht." Passiert isch das in Lengnau, merci viu mou liebi Längnouer für dä flott Zug bi öich dörfe z'schutte. Verlore gäge immerhin e Zwöitligischt us Meiringen. Ehrevou, aber haut glych verlore.

Päng! Startschuss zur Meischterschaft

22.08.2021: FC Schüpfen – FCB 4:2 (3:1)

Z'rächtem los, sprich dr Meischterschaftsuftakt, isch in Schüpfen gschtiege. Dr FCB het nid chönne verberge, dass me trotz namhafte Absänze, gäge es schwachs Schüpfe, nid isch y dr Lag gsy, z'punkte. D'Chance nach em Aaschlussträffer wäre do gsy, aber se packe, das schteit uf em ne angere Papier. Torschütze für Büre: Nikola Crnogorac, David Probst.

28.08.2021: FC Orpund – FCB 0:0

Gäge ei Mitfavorit uf ne Schpitzeplatz ir Gruppe 4, het sich Büre achtbar us dr Affäre zoge. Es isch aber ou e Tatsach, dass Orpund uf etlechi Stammspieler het müesse verzichte und so nid ir gwohnte Dominanz het chönne ufträte. Ou bi Büre sy drei wichtigi Spieler us de verschiedenschte Gründ vermisst worde. Summa summarum entspricht die Punkteteilig in etwa de zeigte Leischtige. Angeri Meinige sy säubschtverständlech ou erloubt.

05.09.2021: FC Pieterlen – FCB 0:3 (0:1)

8:0 und 6:2 het Pieterlen die erschte zwöi Schpiu verlore, e dänkbar schlächti Hypothek für z'Gmüet. Jitz ersch rächt, oder gäng no am Bode zerschtört? Die erschti Haubzyt het sich zum ne reine Kampfschpiu entwicklet, klari Torchance sy Manguwar gsy. Es het scho söttig gäh, wo am Schpiu für e Gang y d'Büvette dr Rügge kehrt hei. "Das geit eh unentschiede y Pouse!" Die hei du d'Rächnig ohni dr Luca Lauper gmacht, 1:0 für e Gascht us Büre. Nach dr Pouse schwächt sich Pieterlen säuber. Innerhaub vo 11 Minute gseht e Spieler zwöi Mou gäub, heisst auso rot. Büre wird dominanter u zäh Minute schpöter chachelets wieder dür e Luca Lauper. Vier Minute vor em Abpfiff macht dr Thomas Lerch mit em 3:0 aues klar. Ir ganze Begägnig het dr Schiri 10 gäubi Charte verteilet. Das isch ou es Indiz, dass dä Matsch uf gnietigem Niveau isch umkämpft gsy.

11.09.2021: FC Zollikofen – FCB 2:2 (2:1)

So dr erscht Bärnerclub! Vor dene het me jo im Seeland e gwüsse Reschpäkt. Warum eigentlich? Wüu Stadtbärnerclubs und ou d'Randregione wie Zollikofen, es unheimlechs Yzugsgebiet hei. U wär es grosses Yzugsgebiet het, het ou die Qual der Wahl und cha useläse. Ohni öpperem uf e Zääje z'tschaupe chame säge, bi üs ir Gägend isch es eher (fasch chlei) ds Konträri. Muesch froh sy, wenn die wo hesch, wenns um d'Wurscht geit (apropos Wurscht – d'Bigler AG isch üse Houptschponsor), ou aui do sy und am Chare schriesse. Jitz hani fasch dr Fade verlore. Auso – Zollikofen, kes Muffesuuse, keck hei sie aagfange üsi Bürener u sy grad überrumplet worde. "Das kann ja heiter werden" – 11. Minute 1:0, 12. Minute 2:0. Ke Angscht, Büre het sich ufgfange und ir 36. Minute het dr Luca Lauper, scho wieder dr Luca, für Resultatkosmetik gsorget. Und wie chönnts angers sy, het dr Luca Lauper mittels Penauty ou für z'verdiente Unentschiede gsorget.

4 Schpiu und 5 Punkt, das näh mir so gärn entgäge, es cha bisseguet so wytergo.

19.09.2021: FC La Neuveville-Lamboing – FCB 3:2 (0:0)

5:0 gäge Aegerten, 5:0 gäge Rüti, 7:2 gäge Länggasse, 6:0 gäge Täuffelen. 4 Schpiu, 4 Sieg und es Gouverhäutnis vo 23:2, wahrlich es ydrücklechs Palmares. Mit weune Gfüeu sy üsi Manne gäge Jura ungerwägs gsy? Lo abtöffle dört obe? Nei das isch definitiv nid y Frog cho, Büre het kämpft und isch byssig gsy. Guet ygschteut isch 1:0 mittels Penauty für La Neuveville-Lamboing ersch ir 53. Minute gfaue. Fasch poschtwänded (61. Minute) glycht dr Nikola Crnogorac us. Vier Minute schpöter schiesst dr Marco Günther 2:1. Und jitz chunnts bitter. 82. Minute dr Usglych für e Gaschtgäber und ir 86. Minute z'Siegtor. Schad, dr verdient Punktgwinn für ne gueti Leischtig isch uf dr Ziugrade entschwunde. Huet ab, gäge Leader ds Schpiu 90 Minute offe gschtaute, spricht für ne gueti Morau.

25.09.2021: FC Lengnau – FCB 2:2 (1:1)

Derbys - das isch Fleisch am Chnoche! Das heisst nid nume Fuessbau, sondern "sehen und gesehen werden", do es Schwätzli, dört chlei läfferle, eis näh u we de Büre gwunne het, näh mer zersch no eis, bevor mer mit em ne z'friedne Gring üs Richtig Büre us em Schtoub mache.

Uf em Heiwäg isch me scho is grüble cho. Wieder 2:1 gfüehrt und y de letschte Minute ds Schpiu no us dr Hang gäh. Zieht me y Betracht, wär bi Büre wieder aues gfäut het, chönnt me de sauft ou ds Wort Schadensbegränzig is Muu näh. Men Meier, Manuel Bigler, Nick Eggenberger, Roméo Bezzola, Joel Tüscher und Fabian Schuler. Aber, und das muess me dr Mannschaft höch aarächne, ds Angaschema und ds Zwöikampfverhaute hei gschtumme.

10' 0:1 Luca Lauper (Penauty), 45' 1:1, 50' 1:2 Luca Lauper (Penauty, es hät ne gloub nid jede pfyffe), 90' + 5' 2:2.

Bis do häre chame, aber mit chlyne Abstriche, mit dr Leischtig vor Mannschaft zfryde sy. Es fäut lediglich dr ganz gross Wurf. Und dört sy üser Manne mängisch gar nid so wyt wäg. Das es aber ou angers cha usecho, het ds Team vom Reto Rüttimann und Patrick Von Felten schmärzlech und zum ne ungünschtige Zytpunkt müesse erfahre.

01.10.2021: SC Aegerten Brügg – FCB 2:1 (2:1)

Luca Lauper, Luc Gutbub, Dario Leisi, Stefan Pranjic, Roméo Bezzola, Nick Eggenberger, Mikael Stauffer, Men Meier, Joel Tüscher, Fabian Schuler.

Jitz bisch uf em Houzwäg! Hesch scho dänkt, "e geili Ufschtellig die Bürer!" Neiiii! Das sy aui die, wo a däm blödsinnige Obe mit Abwäseheit glänzt hei. Es git Momänte do frogsch di, bin ig do im fautsche Fium? E wichtige Matsch, e souwichtige Matsch. Das isch e diräkte Gägner um die heiss umkämpfte Abschtiegsplätz. Nach däm schmychuhafte Sieg het sich Aegerten nächhär ufgfange und ir Tabäue abgsetzt. Dem FCB sei Dank!

Vom Zwöi ygschprunge sy: Nicolas Hugi, Diego Imperiali, Tim Kehrli und dr Jan Leuenberger. Uf dr Bank und de ou no zum Ysatz cho sy dr Reto Rüttimann und dr Patrick Von Felten. Beid he dr Usglych nume um Zentimeter verpasst. Das wär e Gschicht gsy, potzmygottstüüri!

Löh mir üs nümme länger über z'wie und wieso us. Es isch e leide Obe gsy. Büre hets mehrmous verpasst, d'Füehrig us dr 35. Min. uszglyche, jo mit chlei meh Fortüne wär sogar dr Sieg no dinnegläge. Das Schpiu isch d'Initialzündig gsy für ne Schwächephase, oder um bir Wortwau z'blybe, d'Initialzündig für ne Serie vo Fäuhzündige.

10.10.2021: SC Rüti b. Büren – FCB 3:0 (2:0)

Wie gwohnt, hei wichtigi Spieler wäge Militär, Sunntig absitze, verletzt oder weiss dr Tüüfu was gfäut. Ou do giut dr Satz vo obe, e souwichtige Matsch unger Tabäuenachbare. Das Büre 3:0 verlüürt, bueche mir unger Betriebsunfau ab. Pfoschteschuss, Latteschuss, Eigegou. Und Rüti? Drü Chance, drü Gou. Däm seit me Effizienz, Effizienz in Volländig!

16.10.2021: FC Länggasse b – FCB 4:1 (2:1)

Eis vorwäg, Büre het sich uf em Kunschtrase achtbar us dr Affäre zoge, aber die dritti Niederlag haut glych müesse y Chouf näh. Bereits ir Minute 8 geit Länggasse y Füehrig. Büre secklet scho wieder am ne Rückstand noche. Nodisno gfinge sie aber is Schpiu, blybe aber z'unpräzis und verschwafle gueti Momänte unkonzentriert oder übermotiviert. D'Foug isch ds 2:0 ir 39. Minute. Churz drufabe glingt am Luc Gutbub dr Aaschlussträffer. Jitz heisst's dä guet Momänt z'konserviere und mit Voudampf zur Pouse us z'cho. Zwe gueti Chance wärde nid gnützt und Länggass schiesst z'vorentscheidende 3:1. Ds Gou zum 4:1 isch nume no Maggiasch gsy.

Es isch wieder so ne Matsch gsy, wo Büre zwöi mou d'Chance het wieder is Schpiu z'gfinge, aber y de entscheidende Momänte d'Chautblüetigkeit lot lo vermisse.

Jitz hanget me y dr Ranglischte mit 6 Punkt ungerinne, jitz sött de no öppis cho. Usgrächnet gäge Täuffelen wo im Momänt uf em zwöite Platz isch und Worb, aktuell uf em füfte Platz.

23.10.2021: FC Täuffelen – FCB 4:4 (2:0)

Wär a däm Samschtig nid uf Täuffelen piugeret isch, isch säuber tschuud. Ig chas fasch nid angers usdrücke aus, es isch e geile Matsch gsy. 8. und 11. Minute und scho schteits 2:0 für d'Huusherre. Mir hei uf em Damm, dä isch de nid so schön und zwäckmässig wie üse, verwunderet d'Ouge griebe und dänkt, "das kann ja heiter werden". Ufgrund vo der erschte Haubzyt sy mir Fachlüt uf em besagte Damm dr Überzügig gsy, "mir wäre die bessere Schtratege." Für Nachschueb us dr Buvette z'hole hesch nid lang müesse froge, freiwiuig sy sie greiflet, dass sie dr Untergang nid müesse miterläbe.

Ab dr 35. Minute isch Büre erwachet. Zwöikämpf sy ganz anders gfüehrt und d'Loufbereitschaft isch e Gang höcher abgschpuelet worde und dr Bau isch schnäuer und präziser dür d'Reihe gange. Es het eim aafo fessle. Mit Glück isch Täuffelen um e Aaschlussträffer umecho. Nach dr Pouse, bi Büre isch wichtig wie me y d'Gäng chunnt, isch es im glyche Schtiu wytergange. Z'überfäuige Aaschlussgou macht dr Denis Schneider mit eim vo syne bekannte Gschoss us dr Dischtanz. Meh uspacke so Züg Denis! Jitz seit Büre, was uf em Platz abgeit. E Druckphase vo de Bürer bringt düre Reto Rüttimann dr Usglych (61. Min.). Sächs Minute schpöter geit dr FCB sogar und verdientermasse y Füehrig (Luca Lauper). Täuffelen isch im Schtouz verletzt und drückt vehemänt uf ne Gouerfoug, via Eigegou chöme sie zum Usglych wie d'Jungfrou zum Ching (75. Min.). Ds Schpiu isch so fesselnd, dass es niemerem meh y Sinn chunnt, y d'Büvette go Nachschueb hole. Z'liede isch schpürbar. Dr FCB zeigt e Supermorau und isch sech bewusst, dass e Vouerfoug ir Luft liegt. 5 Minute nach em Usglych tschäderets scho wieder, dr Luca Lauper bringt dr Damm zum choche, 3:4! Aber verdienti drü Punkt isch ne leider vergönnt gsy. 86. Min., wieder schpät wie scho mehrmous, belohnt sich Täuffelen mit em Usglych. Büre het ydrücklech bewiese, dass sie ou angers chöi und y der Gruppe problemlos chöi beschtoh, we me aus Team uftritt.

31.10.2021: SC Worb – FCB 2:2 (1:1)

Tatort Agglomeration Bärn, was seit üs das? Klar es Plastigg-Glöuf! Dr SC Worb, unbestritte e Spitzemannschaft und dämentsprächend z'vorderscht y dr Tabäue aazträffe. Das het am FCB nid gross Ydruck gmacht. Forsch und fräch sy sie ufträtte, d'Zwöikämpf konsequänt aagno und mit spielerische Mittu versuecht, dr Gägner y Verlägeheit z'bringe. Dr Füehrigsträffer vom Denis Schneider isch trotz dr Lobhudelei überraschend cho (14. Min.). Worb het ab däm Poukeschlag es millimüü d'Contenance verlore und e herteri Gangart ygschlage. Mängisch am Rand vo dr Legalität und immer druf erpicht, dr Schiedsrichter, wo guet aagfange und souschlächt ufghört het, uf demselben umezhacke. Es Wunder het e Worber nid früehzytig Dusche für sich allei gha. E Unachtsamtkeit y de Reihe vo de Bürer bringt Worb dr Usglych (36. Min.) no vor dr Pouse. Wie gäge Täuffelen isch dr FCB mit ere positive Körperschproch zum Kaböischen usecho und het de Worber Paroli bote. Ir 70. Minute het wiederum dr Denis Schneider y ds Viereggige breicht. Das isch de Huusherre jitz aber ghörig ufs Gäder gange, es het ne fasch dr Techu glüpft. D'Reaktione, wie mer gschriebe hei mängisch ar Gränze vom Erloubte, sy nid usblybe. Und wie gäge Täuffelen isch es wieder die 86. Minute gsy, wo Büre um ne verdiente Erfoug brocht het.

Randnotize und Tabäue

Es isch eifach e Tatsach, mit Unentschiede chunsch nid vom Fläck. Hesch zwar e guete Ydruck hingerlo, aber schlussemänd wärtvoui Pünkt abgäh, wie äbe zum Bischpiu in Orpund, Lengnau, Täuffelen und Worb. Zeue mir no es Pünktli vo dene Schpiu derzue, wo me nid müesst verlüüre, wie gäge La Neuveville und Aegerten, würd das scho fei chlei Punkt gäh und entsprächend dr Chnopf löse. Aber äbe, hät dr Hung nid gschysse, hät er dr Haas verwütscht.

E Tatsach isch ou, u das schläckt ke Geiss wäg, dass dr FCB chum mou mit dr glyche Egippe het chönne yloufe. Gäng hets Absänze gäh, teils begründeti und haut ou teils söttigi fluffiger Art. Das macht haut d'Ufgab für üsi Trainer ou nid liechter. We me bedänkt, dass beid zäme in Aegerten sy uf em Bitz gschtange, muess me scho is grüble cho.

Y dr Rückrunde gseh hoffentlech d'Vorzeiche angers us. Keni Trainingserschwärnis wäge Hochwasser, keni Uswärtsschpiu, keni Schpiu uf Plastigg, d'Mehrzau vo de Schpiu am Samschtig, etc. Vom Vorschtand bis zur Platzkassiererin gäh so viu Lüt Stunde um Stunde für ne guet funktionierende Verein. Sponsore und Gönner unterstütze dr FCB, trotz jitz bereits über zwöi Johr schwierige wirtschaftlichi Verhäutnis. Mir chöi e schöni Infrastruktur üses Eige nenne. Was wei mir meh? E schüche Wunsch – es Birebitzli meh zämerücke und gmeinsam am Charre schriesse. Die beide Trainer heis verdient und sy dankbari Abnähmer und mir aagfrässne FCBler chöme öich wyterhin cho ungerschtütze, ou wenn dir z'Honolulu schuttet, verschproche!

Zum Personal isch z'säge, dass es es paar nöii und viu verschprächendi jungi Giele het, wo üs no viu Fröid wärde mache. Dänke mir a Roméo Bezzola, Nikola Crnogorac und Stefan Pranjic. Aber, und das isch wichtig, Zyt muess me ne lo und z'nötige Vertroue schänke. Bi paar Spieler weiss me nid so rächt, wie Zuekunft usgseht. Studium und Bruef und dermit verbunde e eventuell Wägzug vo Büre. Us der Sicht wär e Versterchig uf d'Rückrunde z'überdänke.

Aber ig nime a, do wärde die Verantwortleche ds Nötige y d'Wäg leite.

Mir fröie üs uf ne erfougrichi Rückrunde. Hopp FCB!

Büren an der Aare, im Dezämber 2021 /hpg