Mir wei über die brotlosi, oder ou fuessbaulosi Zyt nid untätig uf üsem Füdle umerütsche, nei, dir söuet schliesslech uf em Loufende sy, was um üse FC aues passiert oder äbe de nid passiert.
Im Momänt hei mir grad vier passendi Theme, wo öich chönnte interressiere.
Dr Rick vom Pub macht e Bandewärbig, geile Cheib
D'Boumschueu Lehmann aus Dressschponsor vo de Juniore B
Üse Bytrag übere FCB im Stedtli Magazin
D'Schtimm vom Lachen isch verschtummt
Dr Rick vom Pub macht e Bandewärbig, oder wenn Zeche vo de FCB-Jungs sinnvou verwändet wird.
Vermuetlech weiss es no nid dr Hingerscht und dr Letscht, dass dr Rick de Jong (tönt nach Schouschpieler oder Schlagersänger), ds Piccadilly Pub jitz y eigeter Regie füehrt. U wie mir aui wüsse, macht dr Rick hinger dr Theke und a dr Ländti e sagehafti Faue, darum schleipfe mir jo ou öppe e schturme Chessu zum Pub us. Aber das isch nid das, wo ig ha wöue säge.
Dr Rick macht e Bandewärbig!
das isch die frohe Botschaft, juschtemänt uf die Zyt, wo me sech tuet beschänke. Hei sich auso üsi Inveschtitione über die Johre hinwäg glohnt. Rick du bisch und blibsch e geile Cheib! Mir säge aui ganz härzlech merci und bis zum nöchschte Schluck bi dir.
Und grad no einisch e fröidigi Botschaft!
Boumschueu u Pflanzezänter Lehmann isch Dressschponsor vo de Juniore B
Ig aus Schrieberling vermuete, dass das Angaschemaa zum ne grosse Teil bim Zmittag- oder Znachtässe z'schtandchoo isch.
E ambitionierte und sehr angaschierte Schpieler vo de Juniore B, mir meine dr Sohn vom Fredu und dr Nelly Lehmann, het uf d'Frog vom Mänu Scheidegger: "Weiss eine vo öich e Dressschponsor, das gseht so läär us uf däm nöie Dress?" sofort reagiert und äbe, wie obe erwähnt, mit syne Eutere im ne Gedankeustusch für sy Mannschaft gluegt. Merci Noah, du bisch nid eine, wo nume im schportleche Beriich aues git, sondern ou im Drum und Draa es Vorbiud isch.
Sit Johre isch üs d'Familie Lehmann guet gsinnt und het gäng es ofnigs Ohr, schpeziell für e Juniorebereich. Das isch nid säubschtverschtändlech und das schetze mir sehr.
Z'Dress schteue mir de separat vor.
Liebi Familie Lehmann, ganz härzleche Dank!
Im Stedtli Magazin het der FCB dörfe mit em ne Artiku Präsänz zeige. Mir danke am Team rund ums Stedtli Magazin ganz härzlech für d'Realisation.
Ig pärsonlech finge, dass däm Team e Superwurf glunge isch. Interressnti Texte, schöni Biuder und es grafischs Wunderwärch. Do cha Büre schtouz sy, mit ere so föidale Plattform informiert z'wärde. Liebi Bürerinne und Bürer machet aktiv mit und belohnet mit öine Fiidbäcks und Brichte das Team für ihri enormi Büez - es lohnt sech.
Dr Louis liegt am Bode!
Zu däm Biud chöme mir etlechi Schlagzyle y Sinn.
Dr Louis liegt am Bode (sinnbiudlich gseit, wouverschtande)
Die Stimme vom Lachen ist verstummt
Jitz sy die chrotte Bieber scho uf em Schuttplatz am wüete!
Der Zahn der Zeit nagt, ou a üser Hightech-Lutschprächeraalag macht sie nid haut. Ei Herbschtschturm isch grad eine zviu gsy. Oder het ächt öpper gfunge, am Louis sy Schtimm bägget nid authentisch übere Lache, das Gschwür muess furt, gesagt, getan! Es Müpfli oder e Gingg het glängt und dr Louis isch verschtummt. Jitz hei di Verantwortleche bis zum Aafang vo dr Rückrunde Zyt, e Löösig z'gfinge wo ou die am Damm mitüberchöme, was dr Louis is Mikrofon yneschnürelet. De ghörsch de nümme y aune Egge: "He, was het dä gseit?", oder "hei ächt die ke Strom druffe, dass me dä Möff nid ghört!"
Mir sy mou gschpannt, was ds Budget zueloot? Das chame de am Louis nid zuemuet, liebi Lüt.
Das wärs gsy. Merci viu mou für d'Ufmerksamkeit, bliib suber und, wenn du öppis ghört oder gseh hesch, wo me muess drüber brichte, de chunnsch zu mir gäu!
Budi