top of page

LacheNews vom 17. Juni 2023

Y de letschte zwe Wuche isch einiges uf em Lache über d'Bühni gange.


MatchZytig vom 3. Juni 2023


Reparatur Belüchtig – 23. Mai 2023

Ei Pfunzle het jo umsverrecke nid so wöue, wie sie eigentlech sött, nämlech konschtant lüchte, mi chönnt ou säge, üsi Schpieler erlüchte. Aber äbe, das het nid funktioniert. Denn wo's eigentlech notwändig wär gsy, dass öppis geit, sy die Ersatzteil nid lieferbar gsy. Jitz, es brucht jo mittlerwyle zum Training ke Liecht meh, het me ändlech das Thema chönne abschliesse. D'Lieferfirma het dr Bock nid gfunge, auso isch churzum die ganzi Pfunzle usgwächslet worde. Abhöögle und Fröide herrscht!


Aerifiziere Trainingsplatz – 24. Mai 2023

Am Vorobe vom 24. Mai 2023 het d'Firma Aemmer AG vo Lyss bereits die erschte Maschine häregschteut, dass es de am Morge cha zügig los goo. Punkt 08.00 bi ig uf dr Matte gschtange. Aus erschts het me dr Sand, dä chunnt vo Brienz, uf e Trainingsplatz verteilet. Wytergange isch es mit em Aerifizieren. Mit Dorne schticht me y Töifi und schtanzt ca. 12 cm längi Belüftigslöcher y Bode. Das chöi bis zu 200 Löcher pro Quadratmeter sy. Jitz müesse dr Sand und die Ärdzapfe y d'Löcher ygschaffet wärde. Für das fahrt me mit em ne Schleppnetz so lang über e Platz, bis e grosse Teil verteilet isch. Dr Räschte wird mit em Ufnahmegrät ufgno und abgfüehrt. Die Arbeit het dr FCB übernoo. Im Momänt gseht dr Platz, ou wäge dr Tröchny no gschtrubusset us, aber mit em erschte Räge wird sich ds Terrain wieder erhole und im ne saftige Grüen erstrahle.


Börder mäije - 1. Juni 2023

Es isch jo fang nümme zum derby sy gsy. Ds Gras isch y d'Höchi gschosse und d'Schtrücher und Böum wuchere bis y Platz inne. Für söttigi Fäu het dr FCB dr Fritz Gross vo Walperswil. Ei- bis zwöimou im Johr chunnt dr Fritz und git sym Unghüür d'Spore. Und nächhär muesch luege, dass y Deckig bisch, schüsch hesch emänt no e Bitz vom ne Boum im Füdle oder am Gring und das isch nid so gsung. Item – wüu dr Bode furztroche isch gsy, isch är mit sym 10 Tonne Gfährt über d'Plätz gfahre und het so viu effiziänter chönne usemischte. Jitz gseht dr Lache wieder gschläcket us, es isch e Fröid.

Budi

Aktuelle Beiträge

Alle ansehen

Comentários