FC Täuffelen - FCB 0:5 (0:1)

Samstag, 30. August 2025, 15.15 Uhr, Rüti Täuffelen, Meisterschaft 4. Liga

Text: Hans Peter "Budi" Gribi

Fotos: Für einisch het dr Stephan Kubacki e freie Tag yzoge, das möge mir ihm gönne!

E Schteigerigslouf bringt dr erscht Saisonsieg.

Ufschtellig FCB

Noe Fankhauser – Marco Günther (69' Numa Marmier) - Fabian Hänzi – Daniel Marti (48' Ruben Dos Santos) - Nick Eggenberger - Denis Schneider - David Vuilleumier (60' Mario Bärtschi) - Joel Zambrano – Fabian Schuler - Dario Leisi - Joel Tüscher

Ersatz

Aui Schpieler im Ysatz

Abwäsend

Silas Adam - Manuel Bigler - Tim Blatter - Fabian Jenni - Alex Jorge Files - Joel Knörr - Yannic Kubacki - Luca Lauper - Men Meier - Remo von Wartburg - Noah Zambrano

Staff

Patrick Meier (Trainer), Thomas Lerch (Assistenztrainer), Reto Steiner (Masseur)

Tore

44' 0:1 Fabian Schuler

53' 0:2 Dario Leisi

65' 0:3 Nick Eggenberger

67' 0:4 Fabian Schuler

90'+1' 0:5 Dario Leisi

Karten

Joel Zambrano

Erschti Haubzyt, e zu knappi Füehrig für e FCB

Ds dritte Schpiu vo dr nöie Saison und die dritti Schtartufschtelligsvariante ufgrund vo Abwäseheite, aber das sy mir üs fange gwöhnt und dr Trainer verzwyflet ou nümme ab jeder Hiobsbotschaft.

Die erschte zwänzg Minute sy beidsytig prägt vo Fäupäss und uf üser Syte vo ungnüegender Loufleischtig, y Form vo sich zeige oder y Schtellig loufe. Äbefaus nid optimau isch wieder d'Kommunikation gsy, es isch chum e Ton z'ghöre gsy, oder sie hey so lieslig mitenang gschnurret, dass mir uf em Damm d'Ohre hätte söue schpitze, damit mir das mitüberchöme. Me isch fasch versuecht z'säge, es konfuses Schpiu mit Chance beidsytig, ufgrund vo Fähler und ungnüegender Konzentration. Aafangs vom Schpiu het dr Gaschtgäber zwe oder drei gueti Chance, wo sie Unkonzentriertheite im Ufbouschpiu vom FCB hey chönne abfoo, aber kläglech verseit hey. Ou uf dr Gägesyte isch es zu söttige Situazione cho, wo dr FCB sogar hät chönne oder söue y Füehrig go, so y dr15te und 23igschte Minute, wo me e gueti Position vor em Gou nid het chönne usnütze. Y dr 39. Minute het dr Noe Fankhuaser derfür gsorget, dass Weschte vom FCB wyss blybt. Chatzehaft cha är e Schuss vom ne Töiffeler um e Pfoschte länke. Uff - das isch mou knapp gsy. Üse Torgarant, dr Fabian Schuler, het du churz vor dr Pouse no derfür gsorget, dass üs ds chüehle Pousebier nid isch im Haus blybe schtecke. Mit em ne satte Schuss belohnt är die chley besseri Mannschaft mit em Füehrigsgou. Pouse!

Mittlerwyle isch Dr Ruben Dos Santos vo sym Samschtigpänsum bim Arbeitgäber in Töiffele ytroffe.

Zwöiti Haubzyt und es schtarch verbesserets Büre

Y dr 48. Minute ersetzt dr Ruben Dos Santos dr Daniel Marti, wo bi sym erschte Schtartysatz im Eis sy Sach ganz ordentlech gmacht het, nüt het probiere z'künschtle und nüt het uf sir Syte lo abrönne. E guete Yschtand. Die erschte Minute zeige, dass ir Kabine etlechi Pünkt sy agschproche worde. Ds Schpiu vom FCB würkt angaschierter und bringt meh Offensivdrang. Us em ne flüssig vortreite Agriff cha dr David Vuilleumier (53. Minute) e punktgenaui Flangge uf e Dario Leisi zirkle und dr Dario drückt ab, dr. Gooli cha pariere, drückt aber dr Bau bim Abdräje is Gou - 0:2. Y dr 60. Minute gryft dr Mario Bärtschi y ds Schpiu y, für ihn verlot dr David Vuilleumier dr Platz. Es louft die 64. Minute, wo's scho wieder chachelet im Gou vo Töiffele. Dr Joel Tüscher lanciert mit em ne feine Pass dr Nick Eggenberger, wuchtig schiesst dr Nick zum 0:3 y. Zwe Minute sy vergange, isch dr Fabian Schuler wieder dra, y dr Manier vom ne Goalgetter schliesst dr Fäbu zum 0:4 ab, es isch mittlerwyle sy viert Träffer und dr insgesamt sächst Träffer, zeut me dr Cupmatch derzue. Dä Maa het definitiv e Louf. Dr Numa Marmier chunnt y dr 69. Minute für e Marco Günther is Schpiu, es isch e Eis-zu-Eis-Wächsu. Zwe Minute schpöter isch dr Dario Leisi wieder zur Schteu und erziut ds vermeintleche 0:5, ds Gou wird wäge Offside aberkannt. Wyteri zwe Minute schpöter chlepfts a dr Latte vo Töiffele, dr Nick Eggenberger het Päch und chöpflet as Aluminium. Zwüschedüre gseht dr sehr aktiv Joel Zambrano wäg em ne Foul die gäubi Charte. Töiffele, zu däm Zytpunkt fasch inexischtänt, isch schwär aagschlage, do chunnt ke effiziänti Gägewehr meh. Ou ds Schreie vo dr Bank cha nüt meh bewege, Töiffele isch groggy und uf de Fäuge. Y dere Zyt verpasst dr FCB, us diverse Chance öppis Zäubars usezhole. Eis Gou hets de doch no gä. Dr Joel Tüscher wird uf dr Sächzähnerlinie höch asgschpiut, är nimmt dä Bau sydefyn abe und leit ne am Dario Leisi vor d'Füess, dä facklet nid lang und dröschet dä Bau zum 0:5 y d'Masche.

Fazit

E erschti, chnorzigi Haubzyt het dr FCB mit em ne Schteigerigslouf vergässe gmacht und dä Match souverän heimbrocht. Eis muess me aber ou gseh. Töiffele isch nid e Gägner gsy uf Ougehöchi. Luegt me Tabäue a, sy die mügleche Schwärgwicht schnäu usgmacht. Dr Match vo Ins Müntschemier gäge Etoile Biel isch bim Schtand vo 5:1 abbroche worde. Ig nime a, dass Ins Müntschemier die drüü Punkt am grüene Tüsch zuegschproche überchunnt und zäme mit Nidau d'Tabäueschpitze biudet.

Dr nächscht Match isch am nöchschte Samschtig uf em Lachen gäge Bözingen 34. Zu däm Zytpunkt wärde dr Men Meier und dr Manuel Bigler, zwe diskussionslosi Stammschpieler, wieder aawäsend sy. Das würd e punktuelli Verschterchig bedüte, aber die beide hey chum oder kes Training y de Bei, derfür sy sie chräftig y de Arme, vom Goffere vo A nach B schleppe. Es chlyne Scherz zur Uflockerig söu erloubt sy. Eigentlech brucht's die Zwe, das isch unbeschtritte, aber...