top of page

E Huufe Arbeit

Wenn mir zäme dr Ufwand für üse Fuessballplatz us dr Sicht vom Platzwart und em Infrastrukturverantwortleche aaluege, wird eim ersch so richtig bewusst, was das für ne Rieseufwand isch. Und we me sich das so düre Chopf lot lo go, muesch vor jedem wo dä Job gmacht het, dr Huet zieh.


Luege mir nume die Wuche a, es wird dir gschmuech, dr Wahnsinn, was do a Zyt inveschtiersch.


Am Mittwuch isch ds Mähje noche gsi. D'Pflänzli uf em chly und em gross Platz hei nach däm Räge feiechly d'Häus greckt. Für das es gschläcket usgseht, het me zwöi Mou müesse dürefahre. Mähje mit Ufnäh und gäng wieder go lääre und wieder gringsvoraa uf d'Maschine und die nöchschte Bahne zieh. Nach de Plätz ghört sech's, dass dr Umschwung ou es nöis Make-Up überchunnt. Wo me du zfride het chönne zruggluege, si schuppdiwupp 9 Schtung und 40 Minute düre gsy.


Mit em wüsse, dass am Samschtig Spiu vo de Juniore C und D stattfinde, isch klar gsy, dass vermuetlech no einisch muess gmähjt sy und de no e Platz in roter und ei Platz i wysser Farb (Originaugrösse) muess zeichnet sy. Zu guter letzt chunnt no derzue, dass e Portion Dünger, in Anbetracht vo dr aktuelle Wätterlag, ou no het müesse verteilet wärde. Mir wei jo e saftige und widerstandsfähige Rase.


Uf die Zwöufy isch dr Marco Kocher übermüedet us em WK diräkt uf e Schuttplatz cho. No im grüene Gschtäutli het är aafo zeichne und ig ha gmähjt. Nach Abschluss vo dene Arbeite isch de no ds Dünge dra cho. Grätschafte müesse putzt sy u dr Arbeitsplatz im ne aschtändige Zuestand verloh wärde. Es isch ungloublech, jede vo üs het a däm Nomittag 4 Schtung und 49 Minute abgschpuelet.


Dr Blick zrugg uf ne schöni Aalag entschädiget eim für e Ufwand.


We du d'Fotos vo dr Drohne aluegsch, lueg bisseguet die perfekte Linie vom Marco a, äntwäder my chas oder my chas äbe nid. E schöni Kulisse für es erfougrychs Spiu. Viu Glück Jungs!


No e Gratistipp a diejenige, wo ne öppe es Papierli, es Fläschli oder e Zigarettestummu zu de Finger usgheit. Wenn dir z'jung sit für das zämezsläse, de bi ig nid z'aut für öich das abznäh, aber das muess nid sy. E pflegti und gfröiti Aalag isch nume müglech, wenn aui mithäufe. I däm Sinn zeut dr FCB ou uf di!


Merci viu mou!




Aktuelle Beiträge

Alle ansehen