...oder uf guet Dütsch: "Dami Salami, was macht dä Fahne uf em Lache?
Chunsch ahnigslos mit em ne Liedli uf de Lippe uf e Lache und plötzlech blybt dr nöchscht Ton bim Hauszäpfli hange und verändet eländiglich. Do hanget e komischi Fahne! Ke Bäretatze, ds Rot irgendwo häregschlarget und grüen, das geit gar nid. E Windstoss löst das Rätsu. Es isch "Bandiera d'Italia" oder ou "Il Tricolore Italiano", aber de ganz korrekt "Bandiera della Repubblica Italiana", d'Fahne vom Europameischter! Ha no glost, öb öppe eine hinger em Damm huuret und "Fratelli d'Italia" über ds Land schmätteret. Es isch leider nüt gsy. Vermuetlech isch är by Nacht und Näbu con il suo coro italiano cho d'Fahne hisse und sie hei derby inbrünstig "Il Canto degli Italiani" i Nachthimu pääget. D'Chrääje hei ömu rächt gstrubusset usgseh, aber schlächt gschlofe hei sie de uf jede Fau.
E Schlingu dä Cha. Gäng für ne gepflegti Chauberei z'ha. Es sy genau die fyne Späss, wo dr Gianluigi so liebenswärt mache. Geischtrych, nie unger dr Gürtulinie und mit de perfekte Gabriole zum Beschte gäh.
Eis muess de ou no gseit sy. Völlig verdient sy d'Italiäner mit em Chübu heigange. Mir chöi ou stouz sy, hei nume 3:0 gäge Europameister verlore. So het aues sy Ornig.
D'Fahne hanget de gäng no. Spöteschtens bim erschte Meischterschaftsspiu muess de dä Fahne abe, mir wei de nid no, dass das öppe no i fautschi Häus chunnt.
Forza Italia – hopp Büre!
コメント