Wenn y üsne Lige dr Fuessbau no töif im Winterschlof schteckt, heisst das no lang nid, dass grad aui uf dr fuule Hut umeliege, wägerli nid.
Schtiu isch es jo sowieso nie. Irgend im ne Egge wird gäng diskutiert, gmunklet he du dä het de…, es Grücht y Umlouf brocht u mängisch gar gwärweiset, was isch de jitz wieder los, dass...
Ds Biud rächts bringt di sicher uf d'Schpur. Syt das dr FCB uf e Lache züglet het, hei jenschti Lüt gäng wieder Aalouf gnoo, so ne schmucki Aazeigetafele z'inschtalliere und immer und immer wieder isch es gschyteret. Einersyts wüu me wieder viertklassig gschpiut het, oder dr Sponsor gfäut het, oder der FC ds Gäud angerwytig het müesse ysetze. Dr längscht Schnuuf vo aune y der Beziehig het dr Willy Rüttimann gha. Die cheibe Tafele isch ihm nie zum Chopf us, und die Hartnäckigkeit hets sich schlussändlech uszaut. Absatz, ig muess go ushole. Wüu, do schpiut no e angeri Person dry.
Die Person het nid nume ds Härz am rächte Fläck, nei är het öppe die glychi Usduur wie dr Willy. Sit Johre isch är dr flyssigscht Matchbausammler ever, d'Red isch vom Gianluigi "Cha" Maffeo, und y däm Zämehang isch e Name immer wieder uf de Matschaazeige uftoucht – Baronello GmbH, Malerei und Gipserei vo Biel. Und wüu die beide Hornhut am Füdle hey, isch dä Vertrag z'schtangchoo, bereits ungerschriebe und ds Gräbli für z'Elektrische isch ou scho fasch usghobe.
Dr Kontakt mit em Gschäftsfüehrer, Stefano Catanese, het dr Cha vermittlet und dr Willy het das Gschäft y ds Trochene brocht.
D'Firma Baronello GmbH isch am 22.06.2006 im Handusregischter ytreit worde. Ds Ehepaar Catanese het im 2021 ds Gschäft a Sohn Stefano Catanese übergää. D'Firma beschäftigt 63 Mitarbeiter und sie isch schpezialisiert uf Maler- und Gipserarbeite. Vom chlyne Ruum bis zur Grossbouschteu deckt Baronello GmbH mit ihrem Personaubeschtand und dr Infraschtruktur aues ab.
Mir sy hocherfreut und danke am Herr Stefano Catanese ganz härzlech für ds Angaschemaa y üsem FCB.
