Dr FCB cha mit Schtouz uf syni Juniore luege. Vo de chlynschte Chnöpf bis zu de Schueuentlassene hets Talänt ume, wie Sand am Meer. Dr Mario Bärtschi isch eis vo dene Talänt. Aus chlyne Chnopf scho es schportverruckts Ching, het das mit em Auter nid "besseret". Aues was ihn interessiert het, isch usprobiert worde, u das mit em ne Wiue und ere Usduur wo ds Normale schprängt. Aber irgendeinisch hey d'Eutere ygryffe und sy Energie müesse zügle, wüu chley Platz für d'Schueu sött jo ou no sy. Schtatt fürs Handbau het het är sich für e Fuessbau und für e FCB entschiede.

Mario Levin Bärtschi, gebore am 20. Septämber 2006 im Schpitau z'Aarberg. Gwohnt het d'Familie Bärtschi in Dotzigen und wo dr Mario jährig isch worde, isch d'Familie nach Büren an der Aare züglet. Nach dr Primar- und Sekundarschueu het är sich für ne Lehr aus Outomobiufachmaa entschlosse. Sy Lehrwärchstatt isch d'Vorstadt Garage Ilardo AG in Solothurn, dört schteckt är im erschte Lehrjohr.

Hamburger und Cola, nid grad die gsüngschti Verchöschtigung, aber trotzdäm, am Mario sys Lieblingsässe und -drinke. Y dr Freizyt mit de Kollege unterwägs sy, FIFA game und, we me die nächschti Frog ybezieht, natürlech go fische. Frogsch ihn, weli füüf Sache packsch für die einsami Insu y, chunnt schpontan e Fuessbau, d'Anguruete und Badhose, meh brucht är nid.

Dr Mario isch e quirlige und coole junge Maa mit em ne grosse Kämpferhärz und im Umgang e ufgschteute und aaständige Giu. By de Juniore B treit dr 1.74 gross, 60 Kilo schwär (bruuni Ouge),

Nummere 10. Y de Juniore B schpiut är im zäntrale Mittufäud und im "Eis" uf em lingge Flügu. Bis y d'Hoorschpitze motiviert, angaschiert u schtändig y Bewegig, isch dr Mario für e Gägner schwärz z'beschpiele und für d'Mitschpieler aus Aaschpiuschtation unerlässlech. Syt 2012 isch dr Mario im FCB aktiv und seit vo sich, dass är teamfähig und ungeduuig isch und ohni es schpeziells Ritual i d'Schpiu geit. Uf d'Frog, wo schteisch du schportlech y füüf Johr? "Immer no bim FCB, y dr erschte Mannschaft". Neymar, dr FC Barcelona und d'Young Boys verfougt är mit schpeziellem Inträsse.

Die grösste kleine Freude des Alltags. E erschtunlechi Antwort chunnt vom Mario: "Ds Träning!" Aber das isch tüpisch Mario, immer Vougas und am liebschte 5 Tag uf em Schuttplatz. "Ig maa d'Lüt rund um e FCB und schetze, dass me nach em ne Schpiu positivi Rückmäudige überchunnt. Louft's eim mou nid so wie's sött, wird eim ufzeigt, wie mes besser cha mache", so syni Üsserige.

Beobachtet me dr Mario im ne Schpiu zeigt är Aalage, wo im Fuessbau ds A und O bedüte. D'Fähigkeit e überdurchschnittlichi Gsamtloufleischtig härezlege, schnäu es höchs Tämpo ufznäh, es Schpiu chönne z'läse und Bereitschaft, unerschrocke y ne Zwöikampf z'schtiege (ou wenn dr Gägner e Gring grösser isch).

Mir beobachte dr Wäg vom Mario wyter und brichte sicher by angerer Glägeheit wieder über ihn. Mario, du bisch e z'frydne und härzleche Giu und dir vo de B es kollegials und fuessbauerischs super Team und e wärtvoue Beschtandteil vo üsem FCB. Mir chöi schtouz sy!

Erschienen im Matchprogramm vom 22. Oktober 2022