top of page

Wenn dr Marco rüeft, chunnt aues cho z'seckle!

... oder wenn uf em Lache d'Motorsoogine brüele!



Das isch sehr e gwagti Ussag und isch bi witem nid eso. Um was isch es gange? Ig muess hurti chlei ushole. Dr Marco Kocher, üse Infrastrukturchef, het es breit gfächerets Repertoire und e Hampfele vo Ufgabe z'bewäutige, drum isch jo schliesslech di Büetz ou bi ihm. Wüu är brueflech ir ganze Schwiiz umehönteret, chöme ihm uf dr Strecki Büren an der Aare – Genève, oder Büren an der Aare – Züri, oder mynetwäge ou umgekehrt, geniali Idee i Sinn. Bim nöchschte Tank- oder Bedürfnisstop flüge Düme übers Handy und bi jedem wo im FCB im ne Chat isch, tschäderets de churz drufabe. "So", dänkt är, "die Lüt hani uf Trab brocht, am Samschtig fäderets uf em Lache". Bim Wyterfahre wird scho schwärs Grät organisiert, d'Regierig muess go Serwela choufe (natürlich bim SPAR ds Büre u de nume vom Bigler, gäu Angela). Das hätte mer ou erlediget! Eis müesst dir wüsse, liebi FCBler. Wenn dä öppis im Gring het, het är's nid im Füdle. Chlyni Pouse.


Am Zischtig 2. März, 13.39 mittuöiropäischi Zyt, het's äbe tschäderet im WhatsApp: "Am Samstig würdi gärn d Böim und Strücher wieder mou schnide. Für das wäri froh wen der eint oder anger chönt cho häufe. Zit 08:00". Potz Heiterefahne, churz und troche! Do het me Zyt bis a Bach abe, aui Termine abzsäge.


Am Donschtig 4. März, 08.17 ou wieder mittuöiropäischi Zyt, vermuetlech Gaffepouse im Frässbauke z'Würelos, tschäderets. "Am Ton aa dr Marco, u verreckte Cheib, dass stickt nach Büetz". "De gsehni das richtig usser der Herr Tüscher isch am Samstig niemer ume?" E liechti Süüri isch i de WhatsApp-Wäue mitgschwunge.


Jitz hei es paar doch no Beduure gha und gfunge, we mir nid gö go häufe, houzet dä radibutz aues ab. U schliesslech het sich e chlyne Gruppe vo enormer Schlagchraft uf em Lache igfunge und Houz umgloh, ghäckslet, verjätet und verbrönnt, es isch e wahri Fröid gsy.


Ig cha nech säge, es isch e chaute aber e geile Samschtig gsy.


Z'schwäre Grät het dr Markus Fahrni vo Fahrnis Gärten AG in Büren an der Aare zur Verfüegig gschteut. Die fachmännische Betröiig vo Maa und Maschine vo Syte Fahrnis Gärten AG isch dr Diego Imperiali verantwortlech gsy.


Apropos aues radibutz furtputze. Gottlob het e technische Defekt ar Soogi dr Joel Fuhrer g'stoppet, dä wär schüsch no über d'Aare gumpet gö Böim sueche. Mit vereinte Chräfte heimer ne chönne beruhige u ds Bier, wo mir ihm ufzwängt hei, isch du glich no bim Gurgeli düre. Wiudsou!

Die Herre Steinbacher (Profis i Sache Böim umchutte) hätte Träne i de Ouge gha, wenn sie die Truppe am Wärch gseh hätte.


So gäge die Vieri het eine es Machtwort gsproche. D'Suechi nach Böim, wo liechti Bräschte hei, si igschteut worde, schüsch hät das no bis wyt i d'Nacht gmacht – wusch, Boum furt, wo isch dr nöchscht? Oder mi chönnt ou säge, dr Durscht het gwunne.


Top Isatz gsi, das hei ou dr Presi u sy Tochter uf ihrem Spaziergängli chönne feschststeue.

Mir si aui gschpannt, wenn's z'nöchschte mou tschäderet, wie läng Vorbereitigsphase bis zum Isatz wird si. Wenn du rüefsch Marco, lege mir aui die schnäue Schueh a und seckle was gisch was hesch. Lueg de, dass d'Angela gnue Servela ichouft, gäu Marco. Ahaa – aber de bitte bim SPAR und vom Bigler müesse sie sy. So gäbigi Stäckli zum brätle wäre de ou ke Seich.


Guet Houz Budi



Aktuelle Beiträge

Alle ansehen

Comentários

Avaliado com 0 de 5 estrelas.
Ainda sem avaliações

Adicione uma avaliação