top of page

Saisonrückblick 2018/19

Nach däm Widerufschtieg i die 3. Liga si im Vorfäud Schpekulazione u Aschprüch kursiert, wo me sauft nomou cha füregrüble.


Zruggblettere

Ir Saison 2017/18 het dr FC Büre nume um zwöi Punkt dr zwöit Rang verpasst, u derby e ganz e gueti Faue gmacht. Mit 35 Punkt us 22 Schpiu und em ne Durchschnitt vo 2,68 Gou pro Schpiu het me chönne mit em Zeigte zfryde sy.


Agschproche uf d'Saisonziu 2018/19 hei die zwe Verantwortleche, dr Patrick Tüscher und dr Patrick "VoFi" von Felten, sich nid so ganz lo i d'Charte luege. Aber das sie mit däm junge Team, gschpickt mit fuessbauerisch aute u routinierte Füchs a dr Schpitze wei mitrede, dass hei sie fürebrösmelet. Jo, sie si du glich no chlei offner worde u hei ganz liesli das Wort "Ufschtieg" umschriebe, mit "eventuell es Wörtli mitrede".


E harzige Start und es paar Absacker

Mit em ne 23 Maakader isch me i das Abentüür gschtartet. Mit grad mou 24 Johr Durchschnitt es jungs, aber es ambitionierts Team. D'Vorbereitig isch eher aus dürzoge z'charakterisiere gsi u im Cöp gäge Grüenstärn (3. Liga) het's e Bruuse abgsetzt, mi het Gägegou im ne Gascho müesse heitrage (5:0). Wie seit me so schön, e verchacheleti Houptprob schpricht für ne böimige Schtart. Nei, liebe Sportsfründ, ig mache absolut kei Witz! Ig cha jo ou nüt derfür, isch die Prömiere in Müntschemier so uschaflig i d'Hose. Fortuna isch zueputzt gsi, dr Schiri het Pflotsch uf de Ouge gha und üse Träner het Schtrom im Füdle gha für ne ganzi Saison. Es Desaschter schtatt e guete Schtart! So isch das nid planet gsi. Aber es wär jo nid Büre, weme gmüetlech chönnt hingerligge, Pünktli zeue u ohni Schpektaku e Liga höcher chlättere.


Ds Wuchenänd druf isch Rehabilitation agseit gsi. Mit grad 7:0 hei üsi Manne zeigt, dass dä Usrütscher in Müntschemier eimalig gsi isch, u so nümme söu vorcho. Ou in Aegerten het me Kanone glade gha, Schpiufröid zeigt und mit 9:1 ds Schtängeli nume knapp verpasst. Bösi Zunge bhoupte, dass kene het wöue ds Zähte mache, wüu däjenig hät müesse e Harasse Bier zahle. Nach däm Zwüschehoch isch me guter Dinge gsi, uf em Lache gäge Ins im gliche Schtiu wyterzfahre. Do het du Ins öppis dergäge gha und üs Bürer ufzeigt, dass üses Team haut scho chlei e Wundertüte isch. Guet kämpft, Päch gha, aber glich 3:2 verlore. Dä Rückschlag muesch zersch mou vertoue und mit der Situation z'gang cho. Dr nöchscht Dämpfer i Form vo Besa (2:2) het Büre i dr Ranglischte lo abrütsche, mit 8 Punkt Rückstand het me sech vom plante Ziu süfferli verabschiedet, am Aschpruchsbarometer het me nitzi gschrüblet. Jitz gits eifach nume no eis, d'Arschbacke zämechlemme u Vougas gäh. Gesagt – getan! FCB – Iberico Bienne 5:2, Täuffelen – FCB 3:5, FCB – Lengnau 3:0, SV Port – FCB 2:6, FCB – Radelfingen 3:1, Grünstern – FCB 1:4. 6 Schpiu – 18 Punkt – 26 Gou gschosse, 9 Gou übercho. E idrücklechi Serie het Büre dört häre katapultiert, wo sie eigentlech häre ghöre. Tatsach isch aber, dass me punkteglich mit Grünstärn, ganzi 5 Punkt hinger Müntschemier hingenoche hächlet.



E Uszug us em Rück- und Usblick Saison 2018/19

No es Wort zum Tränergschpann. Dr Pädu u dr Vofi mache e Supertschop. Sie heis verschtange, jungi Schpieler hungrig z'mache u z'integriere, die Arrivierte z'ermuntere Verantwortig z'übernäh u die äutere Schpieler izschpanne, mit am Chare z'schriesse. Nid z'vergässe d'Nöizuezüg, wo sech mönschlech u schportlech nahtlos integriert hei und us dr Mannschaft nümme wägzdänke si. So isch e Mannschaft gwachse, wo harmoniert, dür ne Superkollegschaft überzügt u wider Fröid am schutte zeigt. Und – und das isch ou wichtig - nach em Matsch bim ene Schluck ds Zämesii u d'Kameradschaft pflegt.


Rückrundi – über es Wächsubad vo de Gfüeu zum Ufschtieg

Ändi März het me d'Plastigschüeli (früecher "Schtifu") wider gschnüeret und d'Chance übercho, gäge Müntschemier Bode guet zmache. Und mi het die Chance packt. Aber, u do si mir üs aui einig, Glück, e wougsinnte Schiri u dank ere bombe zwöiti Haubzyt, het Büre dä Match 1:0 chönne gwinne. Über das Knorz in Wileroltigen wei mir nid z'viu Wort verlüüre (1:1), Tatsach isch aber, dass do dr Schiri nid entscheidend igriffe het (e glasklare Penauti). D'Uswürkige si weniger dramatisch gsi. Grünstern het unentschiede gschpiut u Müntschemier gar verlore. Ds Heimschpiu gäge Aegerten-Brügg het dr FCB im Titurenne wider entscheidend zrugg gworfe. 3:2 het me verlore u derby es 2:0 ufghout um no ir 89. Minute dr fatau Träffer z'kassiere. Jitz het me nid nume ds Mässer wider am Haus gha, nei mi schteit no bis zu de Chnöi im Schissdräck. Mit dere Niederlag isch die Serie vo 9 Schpiu ungschlage leider z'Änd gange.


Im ene rassige Schpiu gwinnt Büre am Oschtermäntig in Ins 2:4. E Uszug usem Matschbricht widerschpieglet am beschte, was los isch gsi. "Hesch nach em Apfiff chlei die beide Träner i z'Visier gnoh, isch eim schnäu klar worde, dass das nid e eifachi Gschicht isch und wird. Säge wie schtoh, säge wie nid schtoh u säge wie loufe u säge, dass nid darfsch go, wüu schüsch dr anger geit. Blib! Aber nei, jitz muesch goh! Schiess doch! Schnurret mitenang, tue nid gäng usehöische, deck jitz dä! Do isch dr Hanspeter Latour e Weisechnab dergäge."

Es darf nid wohr si. Deheim gäge Besa dominiert dr FCB, loht ir zwöite Haubzyt es Füürwärch ab u verlürt am Schluss 3:2. Do muess sech Büre dr Vorwurf vo fählender Chautblüetigkeit vor em Gau lo gfaue. Die beide Träner hei mit dr Ussag zum Team "jitz isch dr Druck wäg, jitz chöi mir befreit ufschpiele" ghörig Dampf vom Chessu gnoh und eventuell Entscheidendes bewürkt.Tabäue zeigt Büre i dr Defensive, isch doch Lengnau 5 Punkt u Müntschemier 4 Punkt vor em FCB.


Chunnt ächt wider so ne Serie, wie mir se ir Vorrundi hei dörfe miterläbe? Bitter nötig wär's. Dr nöchscht Matsch hät me gschieder im Bett verbrocht. Was die uf em Längfäud a Wättergabriole serviert hei, geit uf ke Chuehut ufe. Samschtig 4. Mai, Obe am siebni, mou rägnets, nächhär schneits, es chutet, rägnet u schneit u wyt u breit ke Büvette, wo di chlei chasch ufwerme. Es Gaffe fertig am Minikiöskli isch mit Jack Daniels panschet u zwüsche Hotdog-Machine und Teebüttali bääget es Bébé, wo vom ne Ching gwicklet wird. Sache gits! Warm worde si mir paar Verschüpfte einzig und allei dür ne tolli Vorschtellig vom FCB und dür ds Resultat, 10:2 für üsi Giele. Super! Usser Müntschemier hei aui Tituaschpirante äbefaus gwunne. Ds Zittere geit wyter.


Es chlises Intermezzo

Heimschpiu gäge Täuffelen

Bevor ig uf ds Schpiu igoh, muess öppis zu dene zwöi Biuder gseit si. We üsi Manne so i ds Schpiu gange wäre, wie d'Mimik (Mouggere) usdrückt, die wäre sang- und klanglos abgschiffet. Absolut geil isch dr Yännu "hoi zäme, auso de bini haut do", dr Rüttimaa het äuä kes Gummi i de Hose. Gäbet däm Löu es Gummi (scho wieder dr Latour)! Dr Denis Schneider, e Sauzsüüle! Dr Nick weiss no nid so gnau wo n'är isch (het üs de aber eines Besseren belehrt). Dr Louper zersch es Tanzschrittli u nächär vouer Optimismus! Dr Mänu amüsiert sech, die zwe Bärner luege vo de Bire i d'Schnitz, jo und dr Ruben ou grad. Dr Simu u dr Thomi hei zäme abgmacht, kuul z'winke, aber de nume einisch u de no chlei härestoh!


Näbscht de Faxe hei si ou no gschuttet, u wie! Im ene interessante Schpiu, Büre het wytgehendscht dominiert, hei schöni Agriffe u herrlechi Gou zum wichtige 4:1 Sieg gfüehrt. No öppis zur aktuelle Tabäue. Bis zum hütige Tag het Büre i der Gruppe am meischte Gou gschosse. Drü Mou het me zu Null gschpiut, dr höchscht Sieg isch 10:2 usgange (Iberico) u die höchschti Niederlag isch 2:0 gsi (Müntschemier). Dr Schicksausmatsch gäge Längnau het ghaute, was me sech dervo erhofft het. Es isch e interessanti und abwächsligsrichi Begängig si. U we de Büre no z'bessere Ändi für sich het, um so schöner. Völlig verdient het me die Punkt us Lengnau entfüehrt (3:1). Bis zu däm Derby het Büre pro Schpiu im Schnitt 2,15 Punkt ghout, 3,8 Gou gschosse u 1,6 Gou übercho. E überzügendi Bilanz.


Büre gäge letztscht ir Tabäue Port 6:2. Churz vor em Apfiff wird klar, dass Längnou in Radelfingen, vermuetlech nach em ne rächt dramatische Schpiu, mit 4:3 abgschiffet isch. Dr FCB het sech nid lo lumpe u nach verchnorztem Schtart die Chance packt. Sie chlättere uf e zwöit Tabäuerang und heis jitz ir Hang, us eigeter Chraft dr Ufschtieg z'schaffe.


Büre gwinnt in Radelfingen 6:1, Grünstern gwinnt in Port und Lengnau verlürt deheim gäge Müntschemier und isch wäg vom Fänschter. Lauper, Lauper, Schuler, Rüttimann, Schuler, Schuler. So heisse die Torschütze vo Radelfingen. Trotz Umschtellige, isch jo die ganzi Saison gäng chlei dr Fau gsi, u wichtige Absänze u Usfäu (Yannik Tüscher, Thomas Lerch, Marco Günter, Eric Stauffer), het sech d'Mannschaft vom Gschpann Tüscher/Von Felten nid lo lumpe u dä Sieg heikarlet.



Zwüschefazit

Das isch e wärtvoue Sunntigmorge gsi. D'Finalissima het me dank super Leischtige erzwunge. Ig bi fasch chlei versuecht z'säge. Totgeglaubte leben länger. Mir hei scho gseit: Sie heis verchachelet, jitz het me dr Trumpf zur Hang usgäh, mi het d'Chance nid packt, Usrütscher vo de Gägner het me nid usgnützt, usw. Aber mir si ou immer zueversichtlich gsi, hei g'ahnt und ou gseh, zu was die Mannschaft fähig isch. Üs isch bewiese worde, dass e tolli Kameradschaft, es Kolleg si uf u näbem Platz, cha Bärge versetze. Giele, dir heit e Bärgchötti versetzt, glich wie's jitz usechunnt, merci viu mou für ne schpannendi, unterhautsami, begeischterndi, mängisch Finger chätschendi, super Saison. Für am Mittwoch si mir zueversichtlich u dir schtrotzet jo sowieso vor Tatedrang u Säubschtvertroue. Viu Glück, mir si schtouz!


Mittwuch 5. Juni 2019 - Finale uf em Lache

Gäge es chanceloses Grünstern het me sech wiuensstarch präsentiert u suverän 4:1 gwunne. Es het i däm schicksauhafte Matsch eigentlech nume ei churze Momänt gäh, wo me het müesse bibere, u das isch nach em Aschlussgou pär Penauti gsi. Schüsch het me das Ching gschoucklet, abklärt agiert u kämpft für DAS Ziu, dr Ufschtieg. Es chunnt nid vo ungefähr, dass dr FCB zoberscht uf em Träppli schteit, notabene z'erschte Mou die Saison. Nach dr unerwartete Niederlag gäge Besa deheim vom 27. Apriu, hei üser Giele nüt me lo abrönne. I sächs Schpiu 18 Punkt ghout, 33 Gou gschosse u nume 8 Gööli überchoh. Das isch e Antwort, do isch nume logisch, schteisch aus Ufschtieger fescht. Nach drüü Johr i dr 4. Liga ändlech wider dört, wo me es Büre erwartet. Mir gratuliere ganz härzlech, si hoch erfröit u näh e riesegrosse Fröidegump u ds Gringweh nach em ne sagehafte Fescht het sich ir Zwüschezyt ou chönne verflüchtige.


Mir hei die Saison a däm Team, gformet u gschliffe vom Tüscher Pädu und em Vo Fäute Patrick, viu Fröid gha. Mou hei mer glitte, mou i überschwänglichi Öiforie abdriftet, gschtuunet u zwieflet, ghoffet u banget, klatschet und bääget vor Entzückig. Giele, dir sit eifach grossartig, unschlagbar, einzigartig!


Es grosses MERCI a die beide Träner Patrick Tüscher und Patrick Von Felten, a Reto Steiner und a öich Jungs!



Dä Erfoug widme mir…

Öpper darf me bi däm Erfoug nid vergässe, öpper wo ou e gwichtige Ateil a däm Erfoug uf si Fahne cha schriebe. Das si die, wo bi Wind und Wätter weiss dr Tüfu wohäre fahre, für d'Mannschaft z'unterstütze. Das si üsi tröie Zueschouer - üse drizäht Maa uf em Platz. Es riesigs Komplimänt und es merci wo vo Härze chunnt.


Ds schönschte Biudli vor Saison



Aktuelle Beiträge

Alle ansehen