Rückblick Grünstern - FCB

Text: Mario Bärtschi

Sonntag, 24. Mai 2025, 19:00 Uhr. Gemeindesportplatz Ipsach

Meisterschaft 3. Liga, Gruppe 4

Aufstellung

Tim Blatter (Torwart), Ruben Dos Santos (Innenverteidiger links, ab 45' Remo von Wartburg), Fabian Hänzi (Innenverteidiger rechts), Manuel Bigler (Innenverteidiger Mitte, 85' Marco Günther), Joel Tüscher (Aussenverteidiger links), Numa Marmier (Aussenverteidiger rechts, 60' Mario Bärtschi), Nick Eggenberger (Mittelfeld links), Men Meier (Mittelfeld rechts), Dario Leisi (linker Flügel), Luca Lauper (rechter Flügel), Fabian Schuler (Mittelstürmer)

Ersatz

Julian von Heydebrand

Abwesend

Manuel Scheidegger, Denis Schneider, David Vuilleumier, Alex Jorge Files, Joel Knörr, Jascha Kubacki, Stefan Pranjic, Yannic Kubacki

Staff

Patrick Meier (Trainer), Thomas Lerch (Assistenztrainer), Reto Steiner (Masseur)

Tore

06' 1:0 Luca Reber

35' 1:1 Dario Leisi

54' 2:1 Luca Reber

56' 2:2 Fabian Schuler

65' 2:3 Dario Leisi

89' 2:4 Fabian Schuler

Karten

06' Fabian Hänzi

87' Men Meier

Erschti Haubzyt

Dr FCB schtartet schlächt is Schpiu und kassiert bereits y dr 6. Minute es Gägegou. Es isch e verflixti Gschicht, mit dene früeche Gou, we me de das mou cha abschteue, gseht de villech dr Schpiuverlouf ou chley angers us. Gweckt dür dä früech Träffer, het sich Büre am Rieme packt und ou afo schutte und plötzlech het me ds Schpiu chönne usglyche gschtaute. Es entwicklet sich es Hin und Här, ohni das es Team e hochkarätigi Chance het chönne kreiere. Jitz wo dr Luca Lauper nid vo Aafang a y dr Spitze het müesse schutte, isch är zu mee Baubsitz cho und isch a gfährleche Situatione beteiliget gsy. Sou ou y dr 35. Minute. Dr Luca Lauper chunnt ussedüre a Bau und schlot e herrlechi Flangge y Sächzähner, wo dr Dario Leisi souverän cha ynechöpfle. Ds Resultat entspricht jitz am Schpiuverlouf, dr FCB isch e äbebürtige Gägner, villech mit em ne Millimüü Vorteil für e Gaschtgäber. Churz vor dr Pouse gheit dr Ruben dos Santos uf d'Schuutere und muess usgwächslet wärde. Sy Poschte übernimmt dr Remo von Wartburg.

Zwöiti Haubzyt

Dä munzig Vorteil het Grünstern mit us dr Kabine gno und schiesst y dr 54. Minute, wieder dür e Luca Reber, ds 2:1. Die meischte Zuschouer hey scho dänkt, so jitz isch Fürobe, einisch mee gö üser Manne aus Verlürer vom Platz. Do hey sie aber d'Rächnig ohni dr Fabian Schuler gmacht. Churz nach dr Füehrig cha dr Fabian Schuler sy überzügend Uftritt mit er e Troumchischte kröne, 2:2. Ds Schpiu isch wieder lanciert und dr FCB übernimmt ds Zepter. Y dr 60. Minute, är het uf em Bänkli scho lang uf e Ysatz gschpaniflet, chunnt der Mario Bärtschi für e Numa Marmier is Schpiu. Y dr 65. Minute zeigt dr FCB, wie me sich perfekt vo hinge bis y d'Schturmspitze füre cha düreschpiele. Dr Luca Lauper isch am Bau, schpiut e Doppupass mit em Mario Bärtschi und wie y dr erschte Haubzyt findet sys perfekte Zuschpiu dr guet ufgleit Dario Leisi, Guudfüessli häre und 2:3 für Büre. Das isch jitz e ganz dominanti Phase vo de Bürer, und nä mir das vorus, Grünstern chunnt nümme zu Chance. Dr FCB schpiut sys Schpiu und das mit Angaschemaa und Schpiufröid. Es louft bereits die 85. Minute, dr gäng no aagschlagni Marco Günther chunnt für e Manuel Bigler is Schpiu. Y dr Schlussphase (89. Minute) schpiut dr Nick Eggenberger e Troupass uf e Fabian Schuler, dr Fäbu setzt sich gäge drei Gägeschpieler düre und verwandlet herrlich zum 2:4.

Man of the Match isch...

natürlech dr Fäbu Schuler, wo sich y beschter Lune zeigt het und a auti Zyte het chönne aachnüpfe.

Natürlech dr Dario Leisi, wo gäng Vougas git und zwöi Mou am richtige Ort gschtange isch und verwandlet het.

Natürlech dr Luca Lauper, wo sich hinger dr Spitze poschtiert schynbar wohler füehlt und so besser is Schpiu chunnt.

Und natürlech dä und dä und dä. Söu heisse, ds ganze Team het hüt zeigt, dass sie die Saison haut ou mit viu Päch hey müesse düreschto und de trotzdäm ds Beschte drus gmacht hey. Man of the Match isch ds ganze Team.

Hopp FCB und viu Glück bi de letschte zwöi Schpiu.